Ala sma kan abi den srefi reti trutru?

JOHN ADAMS, di ben tron a di fu tu presidenti fu Amerkankondre, ben de wan fu den sma di ben poti en nen fu teken a tumusi prenspari dokumenti di sma sabi leki a Declaration of Independence (wan fruklari di ben sori taki a kondre ben teki srefidensi). Na ini a fruklari den moi wortu disi ben skrifi: „Wi e bribi taki den tru tori disi e sori krin taki Gado meki ala sma nanga den srefi reti. Toku, a krin fu si taki John Adams ben e tweifri efu ala sma abi den srefi reti trutru, bika a ben skrifi: „Na Almakti Gado meki libisma nanga wan Frustan èn nanga wan Skin di e difrenti na so wan fasi fu makandra, taki noti no kan kenki dati kwetikweti.” Tra fasi leki san John Adams ben sori, H. G. Wells, wan historia skrifiman fu Ingrisikondre ben man prakseri fu wan libimakandra pe ala sma abi den srefi reti èn a libimakandra disi ben abi dri prenspari sani leki fondamenti: ala sma na grontapu ben abi a srefi soifri bribi, ala sma ben kisi a srefi leri, èn nowan fetilegre no ben de.

 Te nanga now, wi no abi a libimakandra disi pe ala sma abi den srefi reti, soleki fa Wells ben abi na prakseri. A no de so srefisrefi taki ala sma abi den srefi reti, èn a libimakandra prati ete na ini difrenti grupu. A sani dati tyari winimarki kon gi a libimakandra? Nôno. Wan libimakandra di prati na ini difrenti sortu grupu e tyari pratifasi kon na mindri sma. A abi leki bakapisi taki sma e dyarusu tapu makandra, den e kisi bita-ati gi trawan, sma e sari, èn furu sma e lasi den libi fu di trawan kiri den. Fosi na ini Afrika, Australia, nanga Noord-Amerika, sma ben e si weti sma leki den moro prenspari sma na ini a libimakandra. A sani dati tyari furu pina kon gi sma fu tra ras. Sma kiri sosrefi ipi-ipi Aborigine (den fosi pipel fu Australia) di ben libi na ini Van Diemen’s Land (now na èilanti disi nen Tasmania). Na ini Europa sma no ben wani si den Dyu na ai, èn dati meki taki den kiri dusundusun fu den na ini a Holocaust. Na ini Fransikondre nanga Rosiakondre, yu ben abi den grupu fu heihei sma di ben gudu sote. Sosrefi yu ben abi tra sma di ben moro pôti èn den sma disi no ben de tevrede nanga den eigi situwâsi. A sani disi meki taki na ini a di fu 18 yarihondro, wan bigi revo broko na ini Fransikondre, èn na ini a di fu 20 yarihondro wan trawan broko na ini Rosiakondre.

Wan koni man fu fosi ben skrifi: „A wan libisma tiri a tra libisma nanga ogri bakapisi” (Preikiman 8:9). Den wortu fu en de tru, awansi a wan di e basi trawan na wán sma nomo noso wan grupu fu sma. Te wan grupu fu sma e hei ensrefi moro wan tra grupu, dan dati seiker sa tyari sari nanga pina kon.

Ala sma abi den srefi reti na Gado

A de so taki spesrutu grupu fu sma hei moro trawan? Gado no e si en so. Bijbel e taki: „Fu wán sma [Gado] meki ibri nâsi fu libisma fu libi na tapu a heri grontapu” (Tori fu den Apostel 17:26). Boiti dati, a Mekiman „no sori taki a e teki partèi gi granman èn a no poti moro prakseri na a heihei man leki na a mofina wan, bika den alamala na a wroko fu en anu” (Yob 34:19). Ala libisma na famiri fu makandra, èn na ini Gado ai nowan sma hei moro wan trawan.

No frigiti tu, taki te wan sma dede dan a denki di a ben abi taki a ben hei moro trawan, no sa de moro. Den Egeptesma fu owruten no ben e bribi dati. Te wan Farao ben dede, dan den ben poti furu gudu na ini en grebi so taki a ben kan kisi wini fu den te a ben go doro fu de wan heiman baka te a dede. Ma a Farao trutru ben man du dati baka di a dede? Nôno. Fufuruman teki wan lo fu den gudu dati puru na ini den grebi, èn den sani di den no ben feni fu fufuru de fu si na ini museum na ini a ten disi.

A Farao no ben man gebroiki den diri sani dati srefisrefi, fu di a ben dede. Dede no abi speri; heihei sma e dede èn lawlaw sma e dede, gudu sma e dede èn sosrefi pôtisma e dede. Bijbel e taki: „Da sabiman dede, so srefi da dom soema nanga da grofoe soema pori. [Libisoema] de leki dem meti disi dede gowe” (Psalm 49:11, 13, Da Bijbel na ini Sranantongo). Den wortu disi di skrifi nanga yepi fu santa yeye, de gi wi alamala awansi wi na kownu noso srafu: „Ma fu a sei fu den dedewan den no sabi notinoti, èn den no abi wan paiman moro. . . Nowan wroko noso prakseri noso sabi noso koni no de na ini Syeol, a presi pe yu e go.”—Preikiman 9:5, 10.

Nowan enkri sma hei moro wan trawan na ini Gado ai, èn wi alamala e dede a srefi dede. Fu dati ede na ini a syatu pisi ten disi di wi de na libi, a de fu soso trutru fu denki taki wan spesrutu grupu fu sma hei moro wan trawan!

Wan libimakandra pe ala sma abi den srefi reti—Fa dati sa kon?

Ma a de so taki wan dei e kon taki wi sa abi wan libimakandra pe sma no sa suku fu hei densrefi moro trawan? Iya, wi kan abi a howpu dati. Pikinmoro 2000 yari na fesi di Yesus ben de na grontapu, a ben poti a fondamenti gi so wan libimakandra kaba. Yesus ben gi en libi leki wan frulusu-ofrandi gi ala libisma di e bribi, so taki „ibriwan sma di e sori bribi na ini en, no ben sa kisi pori ma ben sa abi têgo libi”.—Yohanes 3:16.

Yesus ben sori den bakaman fu en taki nowan fu den ben musu firi densrefi moro hei leki wan trawan di ben de wan bribiman neleki en. Yesus ben taki: „No meki sma kari unu Rabi, bika wán na un  leriman, aladi unu alamala na brada. Sosrefi unu no musu kari nowan sma na grontapu un tata, bika unu abi wan Tata nomo, di de na hemel. No meki sma kari unu ’leriman’, bika wan sma nomo na un Leriman, a Krestes. Ma a moro bigi wan na un mindri musu de un dinari. Iniwan sma di e hei ensrefi, den sa lagi” (Mateyus 23:8-12). Gado e si ala den tru futuboi fu Yesus leki sma di de wán na ini a tru anbegi.

Den fosi Kresten ben si densrefi leki sma di ben de wán? Den wan di ben frustan den leri fu Yesus ben si densrefi so fasi. Den ben si makandra leki sma di ben de wán na ini a bribi èn den ben sori dati fu di den ben kari makandra „brada” (Fileimon 1, 7, 20). Nowan fu den ben kisi deki-ati fu denki taki a ben hei noso bun moro trawan. Fu gi wan eksempre, prakseri fa Petrus ben taki fu ensrefi nanga sakafasi na ini a di fu tu brifi fu en. A ben taki: „Simon Petrus, wan srafu nanga apostel fu Yesus Krestes, gi den wan di kisi wan bribi, di abi a srefi grani leki di fu wi” (2 Petrus 1:1). Petrus ensrefi ben kisi leri fu Yesus, èn leki wan apostel, a ben abi prenspari frantwortu. Toku, a ben si ensrefi leki wan srafu èn a ben sabi fu tru taki tra Kresten di tan hori a bribi, ben abi a srefi grani leki en.

Wan tu sma kande e taki dati Gado ben sori taki ala sma no abi den srefi reti, bika a ben meki Israel tron a spesrutu nâsi fu en na ini owruten (Exodus 19:5, 6). Kande den sma disi feni taki a sani disi e sori taki son ras hei moro trawan, ma dati no tru. A tru taki den Israelsma di ben de bakapikin fu Abraham, ben abi wan aparti matifasi nanga Gado èn taki Gado ben meki den wawan kon sabi den sani di a wani meki sma sabi (Romesma 3:1, 2). Ma a no ben du dati fu di a ben si den leki wan pipel di ben hei moro trawan. Na presi fu dati, a ben du dati fu di a ben wani taki ’ala den nâsi ben musu kisi blesi’.—Genesis 22:18; Galasiasma 3:8.

Soleki fa a sori, dan wan lo fu den Israelsma no ben abi a srefi bribi di Abraham, a fositen tata fu den, ben abi. Den no ben de getrow èn den no ben wani teki Yesus leki a Mesias. Fu a sani dati ede, meki Gado drai baka gi den (Mateyus 21:43). Ma den safri-ati libisma kisi den blesi di Gado ben pramisi. Na a Pinksterfesa fu 33 G.T., a Kresten gemeente seti. Na organisâsi disi fu Kresten di ben salfu nanga santa yeye, ben kisi a nen „na Israel fu Gado”, èn a ben sori fu de na organisâsi di Yehovah ben o gebroiki fu gi sma blesi.—Galasiasma 6:16.

Wan tu memre fu a gemeente dati ben musu leri fu si makandra leki brada nanga sisa. Fu gi wan eksempre, a disipel Yakobus ben piri-ai gi den sma di ben gi gudu Kresten moro grani leki pôti Kresten (Yakobus 2:1-4). A sani dati no ben bun. Na apostel Paulus ben sori taki den Dyu Kresten, kwetikweti no ben prenspari moro den Kresten di ben de fu tra nâsi, èn taki mansma kwetikweti no ben prenspari moro umasma. A ben skrifi: „Fu taki en leti, un alamala na manpikin fu Gado nanga yepi fu a bribi di unu abi na ini Krestes Yesus. Bika un alamala di ben dopu na ini Krestes, weri Krestes leki wan krosi. Grikisma noso Dyu no de, srafu noso friman no de, mansma noso umasma no de; bika un alamala na wán sma na ini wánfasi nanga Krestes Yesus.”—Galasiasma 3:26-28.

Wan pipel di de wán na ini a ten disi

Yehovah Kotoigi na ini a ten disi e pruberi fu libi akruderi Bijbel gronprakseri. Den sabi taki ala sma abi den srefi reti na ini Gado ai, bika Gado no e si nowan sma moro hei leki wan trawan. Fu dati ede, Yehovah Kotoigi no prati na ini wan grupu fu kerki tiriman èn wan grupu fu tra kerkiman. Sosrefi a kloru fu den skin noso den gudu di den abi, no e  tyari pratifasi kon na den mindri. Aladi wan tu fu den kande na gudu sma, toku den no e poti prakseri na a „prodo di wan sma e prodo nanga den sani di a abi fu tan na libi”, bika den sabi taki den sani dati de fu wan pisi ten nomo (1 Yohanes 2:15-17). Na presi fu dati, den alamala de na ini wánfasi fu di den e anbegi Yehovah Gado, a Sma di abi a reti fu tiri ala sani.

Ibriwan fu den Kotoigi e teki a frantwortu na en tapu fu abi wan prati na ini a wroko di e du fu preiki a bun nyunsu fu a Kownukondre na tra sma. Neleki Yesus, den e gi grani na den sma di e kisi kwinsi èn na den wan di trawan e wisiwasi. Den e go na den oso fu den sma disi èn den e gi den okasi fu kon sabi a Wortu fu Gado. Den Kotoigi di no gudu e wroko makandra nanga den Kotoigi di trawan kande e si leki heihei sma. Den yeye eigifasi fu wan sma de moro prenspari leki gudu noso tra sani. Soleki fa a ben de na ini a fosi yarihondro, ala den Kotoigi na brada nanga sisa na ini a bribi.

Sma kan de difrenti aladi den de wán

A no de fu taki, dati sma di de wán, no de a srefi dorodoro. Mansma nanga umasma, owrusma nanga yongusma, den alamala de na ini a Kresten organisâsi disi di abi sma fu furu difrenti ras, tongo, kulturu nanga posisi. Ibriwan fu den e difrenti, fu di den no koni na a srefi fasi. Ma den difrenti dati no e meki taki sonwan fu den hei moro trawan. Na presi fu dati, den difrenti dati moi fu si. Den Kresten dati sabi taki iniwan talenti noso koni di den abi na presenti fu Gado èn den no abi reide fu dati ede fu denki taki den hei moro trawan.

A pratifasi di de na mindri difrenti grupu fu sma e kon fu di libisma e pruberi fu tiri densrefi na presi taki den e teki a tiri fu Gado. Dyonsro Gado en Kownukondre sa teki na aladei tiri fu a grontapu disi abra. Dati sa meki taki nowan spesrutu grupu fu sma sa de moro di hei moro trawan, soleki fa libisma meki dati kon de. Wan kaba sa kon tu na ala tra sani di tyari pina kon na ini den someni yarihondro di pasa. Na a ten dati, trutru, ’den safri-atisma sa abi grontapu leki a gudu fu den’ (Psalm 37:11). Sma no sa abi nowan enkri reide moro fu meki bigi taki den hei moro trawan. Spesrutu grupu sma di hei moro trawan no sa de moro, èn sma no sa kisi okasi moro fu tyari pratifasi kon na ini a bradafasi fu libisma di sa de na heri grontapu.

[Prenspari pisi na tapu bladzijde 5]

A Mekiman „no poti moro prakseri na a heihei man leki na a mofina wan, bika den alamala na wroko fu en anu”.—Yob 34:19.

[Prenki na tapu bladzijde 6]

Yehovah Kotoigi e gi grani na tra sma

[Prenki na tapu bladzijde 7]

Gi tru Kresten a yeye fasi fu wan sma prenspari moro tra sani