Hendrik VIII nanga a Bijbel

WINSTON CHURCHILL ben skrifi na ini en buku History of the English-Speaking Peoples (Pisi 2): „Na ini a di fu 16 yari hondro wan grupu fu Lomsu kerkiman opo densrefi teige a Lomsu Kerki, èn a sani disi meki taki wan bigi kenki kon na ini kerki bribi. Leki bakapisi fu dati furu sma ben kon si a Bijbel leki wan buku di e gi tumusi bun rai na ini ala sortu afersi. Den bigisma fu a ten dati, ben feni taki sma di no ben kisi nofo skoroleri no ben musu abi a Santa Buku, fu di dati ben o tyari takru bakapisi kon. Den ben feni taki den priester wawan ben musu leisi Bijbel.”

A buku e taki moro fara: „Tyndale nanga Coverdale ben vertaal a heri Bijbel na ini Ingrisitongo, èn na a kaba fu a herfst fu 1535, den Bijbel disi ben tyari kon na doro fu a fosi leisi. Now sma ben e meki moro fu den Bijbel disi. Lanti fu Ingrisikondre ben komanderi den kerki tiriman fu gi sma deki-ati fu leisi Bijbel.” Hondrohondro yari langa, sma na ini Ingrisikondre no ben sabi noti fu Bijbel èn fu den sani di skrifi na ini, fu di kerki no ben gi den na okasi fu leisi a buku dati. Ma tangi fu a tiri fu Kownu Hendrik VIII, meki den sma ben kisi okasi now fu kon sabi moro fu Bijbel. *

„Ete wan sani ben pasa di no ben de so moi gi den sma di ben wani tan hori den owru gwenti nanga denki di ben abi fu du nanga Bijbel. Den tiriman fu Ingrisikondre ben gi sma na ini Parijs a wroko fu meki bun furu Bijbel na ini Ingrisitongo. Den Bijbel disi ben musu de moro moi èn moro diri leki iniwan tra Bijbel di ben meki kaba. Na ini september 1538, den kerki tiriman fu ibri kontren na ini a kondre ben kisi a komando fu bai den moro bigi Bijbel di ben de na ini Ingrisitongo, èn fu poti wán na ini ibri kerki. Na so fasi den kerkiman ben kan gebroiki en makriki èn den ben kan leisi en sosrefi. Den ben poti siksi fu den Bijbel disi na ini a Sint Paulus kerki di de na ini a foto London, èn heri dei, ipi-ipi sma ben e go na ini a kerki fu leisi den. Soleki fa sma e fruteri wi, dan disi ben de so, spesrutu te den ben man feni wan sma nanga wan tranga sten fu leisi gi den.”

A de wan sari sani taki na ini furu kondre, furu sma di abi a grani fu leisi Bijbel doronomo, no e du dati. Disi na wan sani di e gi wi broko-ede trutru, bika Bijbel na a wan-enkri buku di ’Gado ben meki sma skrifi nanga yepi fu en santa yeye èn di bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi’.—2 Timoteyus 3:16.

[Futuwortu]

[Prenki na tapu bladzijde 32]

Hendrik VIII: Wan skedrei na ini a Royal Gallery na Kensington. A teki fu a buku The History of Protestantism (Pisi I)