Problema di de fu di ala sma no abi den srefi reti

„ALADI ALA SMA MUSU ABI DEN SREFI RETI, TOKU NOWAN MAKTI NA GRONTAPU OITI KAN MEKI DATI PASA TRUTRU.”

Na so Honoré de Balzac, wan Fransi tori skrifiman fu a di fu 19 yarihondro, e taki. Yu e agri nanga en? Furu sma e firi taki a no bun taki son sma abi moro reti leki trawan. Toku, srefi na ini a di fu 21 yarihondro disi, a libimakandra prati ete fu di ala sma no abi den srefi reti.

CALVIN COOLIDGE di ben de presidenti fu Amerkankondre fu 1923 te go miti 1929, ben e broko en ede nanga a problema taki ala sma na ini a libimakandra no abi den srefi reti. A ben feni taki „grupu fu heihei sma di abi spesrutu grani no musu de moro”. Sowan 40 yari baka di Coolidge ben de presidenti, a Kerner Commission (wan grupu fu ondrosukuman) ben kisi a wroko fu studeri fa sma fu difrenti ras e libi nanga makandra. Den ondrosukuman disi ben taki dati den ben frede taki te fu kaba Amerkankondre ben o abi tu libimakandra: „wán fu nengre, nanga wán fu weti sma. Den tu grupu disi ben o libi aparti fu makandra èn den no ben o abi den srefi reti.” Wan tu sma e taki dati a sani disi de fu si kaba èn taki na ini a kondre dati „moro nanga moro pratifasi e kon na ekonomia sei èn sosrefi na mindri den ras”.

Fu san ede a de so muilek fu meki ala sma kisi den srefi reti? Wan prenspari reide fu dati na a fasi fa libisma tan. William Randolph Hearst di fosi ben de wan hei politiekman, ben taki wan leisi: „Awansi fa a no fa, ibri libisma wani de moro hei leki wan trawan.” San a ben wani taki nanga dati? Kande Henry Becque, wan Fransi komedi skrifiman fu a di fu 19 yarihondro, ben taki en moro soifri. A ben taki: „A reide fu san ede a de so muilek taki ala sma abi den srefi reti, na fu di wi wani abi den srefi reti leki den sma wawan di hei moro leki wi.” Fu taki en tra fasi, libisma wani abi den srefi reti leki den sma di abi wan moro hei posisi leki den na ini a libimakandra. Ma fu di furu sma no wani lasi den grani nanga den wini di den gwenti fu kisi, dati meki den no wani taki sma di lagi moro den e kisi den srefi reti leki den.

Fositen, furu sma ben gebore na ini osofamiri di no ben abi hei nen, den ben gebore leki memre fu hei famiri, noso leki memre fu kownu famiri srefi. A sani disi de so ete na wan tu presi. Ma na ini furu kondre na ini a ten disi a moni di sma abi e sori efu wan sma de fu wan pôti famiri, fu wan famiri di no pôti so, noso fu wan heihei famiri. Ma a ras fu wan sma, a skoroleri di wan sma kisi, èn efu wan sma man leisi nanga skrifi, na sani sosrefi di e poti sma aparti fu trawan. Èn na son presi sma e desko umasma fu di den feni taki mansma warti moro leki den.

 Wi kan fruwakti taki wan kenki sa kon?

Wet di abi fu du nanga den reti fu sma, yepi fu dwengi sma fu si trawan leki sma di abi den srefi reti leki den. Na ini Amerkankondre den meki wet di e dwengi sma fu no desko trawan. Na ini Afrika wan kaba kon na a Apartheid di ben meki taki weti sma ben e hori densrefi aparti fu nengre. Aladi sma e hori trawan na ini katibo ete, toku wet e krutu dati na furu kondre na grontapu. Krutubangi teki bosroiti sosrefi di e dwengi sma fu lespeki den reti di spesrutu pipel abi tapu gron, fu di den pipel disi ben de den fosi sma di ben libi na tapu den gron disi. Sosrefi wet di e tapu sma fu desko pôtisma, meki taki den sma disi kisi yepi na difrenti sortu fasi.

A sani disi e sori taki ala sma abi den srefi reti kaba? Nôno. Aladi sma fu spesrutu grupu no e desko trawan so furu moro, toku a de so taki pratifasi e kon na mindri tra grupu. A buku Class Warfare in the Information Age e taki: „Na ini a ten disi a sori taki a no fiti moro fu taki dati gudu bisnisman èn wrokoman na tu difrenti grupu. Disi e kon fu di den tu bigi grupu disi prati kon tron pikinpikin grupu fu sma di de nanga atibron.”

A de so taki pratifasi sa de fu têgo na mindri libisma fu di ala sma no abi den srefi reti? We, soleki fa na artikel di e kon now sa sori, dan wi kan fruwakti taki wan kenki sa kon.