Den gi Gado glori nanga den bun wroko di den du

TRU Kresten e gi Gado glori nanga a fasi fa den e tyari densrefi èn nanga den bun wroko di den e du (1 Petrus 2:12). Wi kan si dati te wi e luku san pasa na Italiakondre na ini den yari di pasa.

Na ini september 1997, wan bigi gronseki ben de na wan tu presi na ini den kontren Marche nanga Umbria. Sowan 90.000 oso kisi pori. Grupu Yehovah Kotoigi ben gi yepi wantewante na den Kotoigi drape èn sosrefi na tra sma. Den gi den wagi pe den ben kan tan na ini, sribisaka, sani fu bori na tapu, masyin fu leti lampu, nanga tra sani di den ben abi fanowdu. Sma ben si a muiti di den ben meki fu yepi trawan.

A koranti Il Centro ben skrifi: „Den fosi sma di ben tyari yepisani kon na den presi pe a rampu ben pasa, na den Yehovah Kotoigi fu Roseto [na ini a distrikt Teramo] . . . Boiti taki den sma di de getrow na Yehovah e kon makandra ten na ten fu begi, den de klariklari sosrefi fu yepi sma di e pina, awansi sortu bribi den sma disi abi.”

Nocera Umbra na wan fu den foto di kisi a moro bigi pori fu di a rampu disi ben pasa. A komsarsi fu a foto dati ben skrifi den Kotoigi: „Mi e taki unu tangi nanga mi heri ati, fu di unu yepi den sma na ini Nocera. Mi de seiker taki ala sma fu a foto e firi a srefi fasi.” Boiti dati, a Ministeria fu kondre afersi gi a Congregazione Cristiana dei Testimoni di Geova (Kresten Gemeente fu Yehovah Kotoigi) wan spesrutu dokumenti fu gi den grani èn sosrefi wan medari. Den sani disi ben de fu „sori taki trutru den ben wroko fayafaya fu yepi trawan, di problema ben opo kon na ini den kontren Umbria nanga Marche”.

Na ini oktober 2000, wan bigi frudu pasa na ini a kontren Piedmont di de na a noordsei fu Italiakondre. Ete wan leisi, den Kotoigi seti sani wantewante fu yepi trawan. Sma ben si den bun wroko disi tu. A Kontren Piedmont gi den wan plakati „fu di den ben gi densrefi fu yepi den sma fu Piedmont di ben kisi fu du nanga a frudu, èn di ben abi a yepi disi tranga fanowdu”.

Yesus Krestes ben gi den disipel fu en a komando: „Meki un leti skèin na fesi sma, so taki den kan si den bun wroko fu unu èn kan gi glori na un Tata, di de na hemel” (Mateyus 5:16). Yehovah Kotoigi no e gi densrefi glori. Na presi fu dati, den e prisiri fu gi Gado glori nanga den „bun wroko” di den e du fu yepi trawan na yeye fasi èn sosrefi na tra fasi.