Leriman fu Gado wortu kisi deki-ati fu du a wroko di den kisi

NA INI den mun di no pasa so langa ete, dusundusun leriman ben kon makandra fu kisi leri. Den leriman disi ben kon na wan na den hondrohondro „Leriman fu Gado Wortu” Distrikt Kongres fu Yehovah Kotoigi, di ben bigin na ini mei 2001. Den kongres disi ben hori na heri grontapu. Den Kotoigi di ben kisi kari fu kon na den kongres disi, ben kisi a rai fu leri densrefi, fu tron moro bun leriman, èn fu du a wroko di den kisi fu leri trawan.

Yu ben de na wan fu den kongres disi? Efu dati de so, dan a musu de so taki yu ben warderi a bun yeye nyanyan di ben de fu kisi na den konmakandra disi pe wi e anbegi a tru Gado, Yehovah. Meki wi luku now sortu bun sani wi leri na a kongres.

A fosi dei—Den Buku fu Bijbel di Gado meki sma skrifi, bun fu gi leri

A fesiman fu a kongres ben gi den sma drape wan switikon nanga a taki di ben nen „Leriman fu Gado Wortu, Un Teki Leri”. Fu di Yesus Krestes ben teki leri fu Yehovah, a „Gran Leriman”, meki a kon tron a Bigi Leriman (Yesaya 30:20; Mateyus 19:16). Efu wi wani tron moro bun leriman fu Gado Wortu, dan wi srefi musu kisi leri fu Yehovah.

Baka dati, wan lezing ben hori di ben nen „A Kownukondre Leriwroko E Meki Bun Froktu”. A takiman ben interview wan tu sma di abi a koni fu leri trawan Gado Wortu, èn disi ben sori taki a e gi prisiri srefisrefi fu meki disipel èn taki a e tyari winimarki kon.

 Wan tra lezing ben hori baka dati èn a ben nen „Den Tumusi Moi Sani Di Gado Du E Gi Wi Deki-ati fu Handri”. A lezing dati ben gi wi deki-ati srefisrefi. Na ini a fosi yarihondro, den „tumusi moi sani” di abi fu du nanga a Kownukondre fu Gado ben gi sma deki-ati fu handri (Tori fu den Apostel 2:11). Wisrefi kan gi sma deki-ati fu handri. Wi kan fruteri den fu den „tumusi moi sani” di Bijbel e leri wi, soleki a leri fu a lusu-paiman, a di fu na opobaka, nanga a di fu a nyun frubontu.

A lezing di ben hori baka dati ben gi ala sma deki-ati fu „Prisiri Nanga Yehovah En Regtfardikifasi” (Psalm 35:27). Fu man de regtfardikisma, dan wi musu leri fu lobi san de regtfardiki èn fu tegu gi san takru. Boiti dati, wi musu studeri Bijbel èn wi musu kakafutu gi sani di kan du wi ogri na yeye fasi, sosrefi wi musu kweki sakafasi. Te wi e du den sani disi, dan dati sa tapu wi fu abi demakandra nanga takru kompe, wi no sa feti fu kon gudu neleki fa den sma na ini a grontapu disi e du dati, èn wi no sa luku felem noso tra sani di abi fu du nanga hurudu nanga ogridu.

A thema taki di ben nen „Wi De Srekasreka fu De Leriman fu Gado Wortu”, memre wi taki Yehovah e meki wi tron koni dinari nanga yepi fu en Wortu, en santa yeye, nanga en organisâsi na grontapu. A takiman ben fruteri wi fa wi musu gebroiki Gado Wortu. A ben taki: „Wi wani meki a boskopu fu Bijbel bekènti nanga ala overtoigi, so taki a kan teki rutu na ini na ati fu den sma di e arki wi.”

A fosi symposium fu a kongres ben abi leki nen „Wi E Leri Wisrefi aladi Wi E Leri Trawan”. A fosi pisi ben sori taki wi musu libi akruderi den srefi hei markitiki fu a Kresten libi, di wi e leri trawan. A pisi di ben hori baka dati, ben frumane wi fu „gebroiki a wortu fu waarheid na wan reti fasi” (2 Timoteyus 2:15). Fu man leri wisrefi, dan a de tumusi prenspari taki wi e studeri Bijbel fayafaya, èn wi musu du dati doronomo sosrefi, awinsi o langa wi e dini Gado kaba. A lasti pisi fu a symposium ben sori taki Didibri e suku fu kisi wi, èn fu dati ede a e luku fu si efu wi abi bigifasi, efu wi no lobi fu teki yepi fu trawan, efu wi e denki taki wi prenspari moro trawan, efu wi dyarusu, efu wi abi bita-atifasi, efu wi e atibron nanga tra sma, èn efu wi lobi krutu trawan. Ma te wi e du ala muiti fu kakafutu gi Didibri, dan a sa lon gowe libi wi. Fu man kakafutu gi Didibri, dan wi musu kon krosibei na Gado.—Yakobus 4:7, 8.

 A lezing di ben nen „Tegu gi Seksbuku Nanga Seksfelem Di Panya na Heri Grontapu” ben kon na a yoisti ten. A sori wi fa fu kakafutu gi den sani disi di kan pori a yeyefasi fu wi. A profeiti Habakuk ben taki fu Yehovah: „Yu ai soifri tumusi fu si ogri sani; èn yu no man si problema” (Habakuk 1:13). Wi musu „tegu gi san ogri” (Romesma 12:9). Papa nanga mama ben kisi a rai fu luku sortu sani den pikin fu den e luku tapu Internet nanga telefisi. A takiman ben taki dati den sma di lobi fu luku seksbuku nanga seksfelem musu suku yepi na wan mati di lepi na yeye fasi. A ben o bun tu fu denki dipi fu wan tu bijbeltekst èn fu hori den na ede; bijbeltekst soleki Psalm 97:10; Mateyus 5:28; 1 Korentesma 9:27; Efeisesma 5:3, 12; Kolosesma 3:5, nanga 1 Tesalonikasma 4:4, 5.

A lezing di ben kon baka dati, ben nen „Meki a Vrede fu Gado Kibri Yu”. A lezing dati trowstu wi fu di a gi wi a dyaranti taki te wi abi tumusi furu broko-ede, dan wi kan trowe a hebi dati na tapu Yehovah (Psalm 55:22). Te wi e begi Yehovah, dan wi kan fruteri en ala sani san de na tapu wi ati, èn a sa gi wi „a vrede fu Gado”. Dati wani taki dati wi ati sa de korostu fu di wi abi wan bun matifasi nanga en.—Filipisma 4:6, 7.

A lasti lezing fu a fosi dei, di ben nen „Yehovah E Gi En Pipel Glori fu di A E Meki Leti Skèin na Den Tapu”, ben gi sma prisiri srefisrefi. A taki dati fruklari a kontru fu Yesaya kapitel 60. Aladi grontapu de na dungru now, toku „freimdesma”, dati wani taki wan bigi ipi sma di wi kan agersi nanga skapu, e nyan bun fu a leti fu Yehovah, makandra nanga den salfu Kresten. A takiman sori go na vers 19 nanga 20, èn a taki: „Yehovah no sa ’saka’ leki a son, èn a no sa ’kon pikin’ leki a mun. A sa tan gi en pipel glori, fu di a e skèin leti na den tapu. Disi na trutru wan kefalek moi dyaranti gi wi, aladi wi e libi na ini den lasti dei fu a grontapu disi di de na dungru!” Na a kaba fu a lezing, dan a takiman ben meki bekènti taki wan buku tyari kon na doro. A buku dati nen A Profeititori fu Yesaya—Leti gi a Heri Libisma Famiri (pisi 2, na ini Bakratongo). Yu kaba leisi a nyun buku disi?

A di fu tu dei —Wi koni nofo fu leri tra sma

Baka a takimakandra fu a deitekst tapu a di fu tu dei, dan wi ben poti ala prakseri na a di fu tu symposium fu a kongres. A ben abi leki nen „Dinari Di E Yepi Trawan fu Tron Bribiman”. Den takiman di ben hori den dri pisi fu a symposium disi, ben poti prakseri na den dri sani di wi musu du fu yepi sma fu tron bribiman. Wi musu preiki a Kownukondre boskopu, wi musu go baka na den sma di wani sabi moro, èn wi musu leri den fu du san Krestes ben komanderi. Nanga yepi fu interview nanga demonstrâsi, wi ben man si soifri fa wi kan leri trawan fu tron disipel.

A pisi di ben hori baka dati, ben abi leki nen „Boiti Taki Wi E Horidoro, Wi Musu Dini Gado Fayafaya”. A takiman ben sori taki a moro prenspari sani di wi musu du, na fu „horidoro te na a kaba” (Mateyus 24:13). Wi musu gebroiki ala den sani di Gado seti, so taki wi kan dini en fayafaya. Wi kan begi en, wi kan studeri en Wortu, wi kan go na konmakandra èn wi kan teki prati  na a preikiwroko. Wi musu sorgu taki den lostu fu grontapu nanga den sani di sma fu grontapu lobi fu du, no e bigin basi wi libi. Wi musu sorgu tu taki den sani disi no e tapu wi fu dini Gado fayafaya.

Fa den sma di e wroko tranga èn di abi hebi lai, kan feni kowru-ati na ini a ten disi? A lezing di ben nen „Wi Kan Kisi Kowru-ati Ondro a Tyatyari fu Krestes” ben gi piki tapu na aksi dati. Yesus ben gi den bakaman fu en a switi kari fu teki a tyatyari fu en na den tapu èn fu leri fu en (Mateyus 11:28-30). Wi e teki a tyatyari fu Yesus na wi tapu, te wi e waka baka na eksempre fu en. A no ben teki sani na en tapu di ben gi broko-ede èn a ben poti den moro prenspari sani na a fosi presi. Di a takiman ben interview wan tu sma di tapu nanga sani di ben gi den furu broko-ede, dan dati ben poti moro krakti tapu den prenspari prakseri fu a lezing.

Wan fu den heimarki fu den bigi konmakandra fu Yehovah Kotoigi na a dopu fu nyun sma di gi densrefi abra na Gado. A brada di ben hori a lezing di ben nen „Wan Sma Di Dopu Sa Kisi Moro Bigi Grani fu Gi Trawan Leri”, ben gi den sma di ben o teki dopu, wan switikon. A ben gi den deki-ati fu du moro na ini a diniwroko. Leriman fu Gado Wortu di no dopu so langa ete èn di doro den markitiki fu Bijbel, kan meki muiti fu kisi frantwortu na ini a gemeente.

A nen fu a fosi lezing a bakadina dati ben de „Du Neleki a Bigi Leriman”. Milyardmilyard yari langa, di Yesus ben de na hemel, a ben luku bun fa en Tata ben du sani, èn a ben du den sani dati neleki en. Na so fasi a tron a Bigi Leriman. Di a ben de na grontapu, a ben gi sma leri nanga koni. Te a ben poti aksi, dan den aksi dati ben abi krakti tapu den firi fu sma, èn den agersitori di a ben gebroiki ben de makriki fu frustan. Te Yesus ben gi sma leri, dan a ben gebroiki a Wortu fu Gado èn a ben taki nanga faya èn nanga switifasi. Boiti dati, a ben abi krakti na den sma tapu. A sani disi no gi wi deki-ati fu du neleki wi Bigi Leriman?

Wan tra lezing di ben naki wi ati, na a wan di ben nen „Yu De Klariklari fu Dini Trawan?” A ben gi wi deki-ati fu dini sma neleki fa Yesus ben du dati (Yohanes 13:12-15). A takiman ben gi mansma di man teki frantwortu, a deki-ati fu de leki Timoteyus. Den musu suku okasi fu dini trawan (Filipisma 2:20, 21). Papa nanga mama ben kisi deki-ati fu de leki Elkana nanga Hana fu di den e yepi den pikin fu den fu go na ini a furuten diniwroko. Yongusma ben kisi a rai fu waka baka na eksempre fu Yesus nanga a yongu Timoteyus. Den musu de klariklari neleki den, fu yepi trawan (1 Petrus 2:21). A ben naki wi ati srefisrefi tu, di wi yere fa sonwan teki a frantwortu na den tapu fu dini trawan.

A thema fu a di fu dri symposium ben de „Kisi Moro Wini fu a Leri Di Gado E Gi”. A fosi takiman ben sori taki a de prenspari srefisrefi fu poti moro prakseri na san wi e leri. Wi kan du dati te wi e teki syatu pisi ten fosi fu studeri, èn baka dati wi kan pruberi fu studeri moro langa. A ben gi den arkiman deki-ati tu fu suku den tekst na ini a Bijbel èn fu skrifi syatu na tapu papira san den e leri te den de na den konmakandra. A di fu tu takiman ben sori wi o prenspari a de fu tan hori „na eksempre fu gosontu wortu” (2 Timoteyus 1:13, 14). Wi musu teki ten fu studeri èn wi musu go na den konmakandra. Disi sa yepi wi fu no meki seksfelem nanga seksvideo abi krakti na wi tapu, èn a sa kibri wi sosrefi gi libisma denki, a denki fu den sabiman di e krutu Bijbel, nanga a leri fu den sma di fadon komoto na bribi (Efeisesma 5:15, 16). A lasti takiman fu a symposium ben sori taki a de prenspari taki wi e du san wi leri, so taki wi kan kisi wini trutru fu a leri di Gado e gi.—Filipisma 4:9.

Wi ben breiti trutru di wi yere a lezing di ben nen „Nyun Sani Di Seti fu Yepi Wi Go na Fesi na Yeye Fasi”! Wi ben prisiri di wi kon sabi taki wan nyun buku sa tyari kon na doro heri esi. A buku dati sa nen Feni winimarki fu a Theokrasia  Diniwroko-skoro. Di a takiman ben e fruteri san skrifi na ini a buku, dan wi no ben man wakti srefisrefi fu kisi a buku dati. Disi na san a ben taki fu a pisi tori na ini a buku di e gi sma rai fa fu taki: „A nyun leribuku disi e pristeri 53 penti di e leri wi fa fu leisi bun, fa fu taki bun, èn fa fu gi bun leri, ma a e du dati tra fasi leki fa den buku fu grontapu e du. A buku e gebroiki Bijbel gronprakseri fu pristeri den penti disi.” A buku sa sori fa den profeiti, Yesus, nanga den disipel fu en ben gi sma leri nanga koni. Iya, a buku disi nanga den nyun sani di wi sa du na a Theokrasia Diniwroko-skoro, sa yepi wi trutru fu tron moro bun leriman fu Gado Wortu.

A di fu dri dei—Unu musu de leriman nanga a ten na prakseri

Baka di den ben taki fu a deitekst tapu a lasti dei, dan ala sma poti yesi arki a lasti symposium fu a kongres. A symposium dati ben nen „A Profeititori fu Maleaki E Sreka Wi gi a Dei fu Yehovah”. Maleaki ben de wan profeiti di ben libi sowan hondro yari baka di den Dyu drai kon baka fu Babilon. Den ben bigin baka fu du ogridu èn fu anbegi falsi gado. Den no ben lespeki a nen fu Yehovah, fu di den no ben gi yesi na den regtfardiki wet fu en. Den ben tyari breni, malengri nanga siki meti leki srakti-ofrandi. Boiti dati, den ben e broko trow nanga a wefi fu den yongu yari fu den. Kande den ben du dati, so taki den ben kan trow nanga uma fu tra kondre.

A fosi kapitel fu a profeititori fu Maleaki e gi wi a dyaranti taki Yehovah lobi a pipel fu en. A kapitel disi e sori krin o prenspari a de fu abi bigi lespeki gi Gado èn gi santa sani. Yehovah e fruwakti taki wi e du ala san wi man du fu plisi en, èn taki wi e anbegi en nanga wi heri ati. Wi no musu si a santa diniwroko fu wi leki wan plekti nomo èn wi musu gi frantwortu na Gado fu den sani di wi e du.

A takiman ben fiti a di fu tu kapitel fu Maleaki na a ten fu wi, èn a aksi: „Wi alamala e luku bun taki sma ’no e feni nowan onregtfardikifasi na tapu wi mofobuba’?” (Maleaki 2:6) Den wan di e teki fesi fu gi sma leri, musu luku bun taki a leri di den e gi, trutru e komoto fu a Wortu fu Gado. Wi no musu de leki den sma di e handri na wan feradelek fasi èn di e broko trow na wan fasi di Gado no feni bun.—Maleaki 2:14-16.

A pisi di a lasti takiman fu a symposium ben hori ben nen „Suma Sa Tan na Libi Baka a Dei fu Yehovah?”. A ben yepi wi fu sreka wisrefi gi a dei fu Yehovah. A takiman ben taki na wan krakti fasi: „A de trutru wan trowstu gi den futuboi fu Yehovah fu sabi taki den na a bigi kontru fu Maleaki kapitel 3 vers 17! A vers disi e taki: ’„Seiker  den sa kon de fu mi”, Yehovah fu den legre taki, „na a dei di mi e meki wan spesrutu gudu. Èn mi sa abi sari-ati nanga den, neleki fa wan man abi sari-ati nanga en manpikin di e dini en.”’”

Wan tra heimarki fu a kongres ben de a drama. A drama disi ben nen „Abi Lespeki gi Yehovah En Tirimakti”. A drama disi ben abi fu du nanga den manpikin fu Korak. Aladi a papa fu den ben opo ensrefi teige Moses nanga Aron, toku den ben tan loyaal na Yehovah èn na den sma di a ben poti fu teki fesi. Korak nanga den bakaman fu en lasi den libi, ma den manpikin fu Korak ben tan na libi. A lezing di ben hori baka dati ben nen „Saka Unsrefi Loyaal na Ondro a Tirimakti fu Gado”. A ben sori fa den sani di pasa na ini a drama abi fu du nanga ibriwan fu wi. A takiman ben taki fu siksi sani di Korak nanga den bakaman fu en ben misi fu du. Den no ben horibaka na wan getrow fasi gi Yehovah en tirimakti. Den ben kisi bigifasi, den ben feti nomonomo fu kisi makti, èn den ben dyarusu. Den ben suku fowtu na den sma di Yehovah ben gi frantwortu. Den ben kragi nomo. Den no ben de tevrede moro nanga den grani di den ben abi. Na presi taki den ben tan getrow na Yehovah, den ben poti moro prakseri na mati nanga famiriman.

A thema fu a publikitaki ben de „Suma E Leri Ala Nâsi a Waarheid?” A no ben taki fu ala sortu tru tori, ma a ben taki spesrutu fu den sani di Yehovah abi na prakseri. Yesus Krestes ben gi kotoigi fu a waarheid dati. A takiman ben taki fu den sani di wi e bribi trutru, fu a yoisti fasi fa wi musu anbegi Gado, èn fu a yoisti fasi fa wi musu tyari wisrefi. Fu di a brada ben agersi den fosi yarihondro Kresten na so wan fasi nanga Yehovah Kotoigi na ini a ten disi, meki wi kisi wan moro tranga overtoigi taki ’Gado de trutru na wi mindri’.—1 Korentesma 14:25.

Baka di wan syatu takimakandra fu a Waktitoren-studie fu a wiki dati ben hori, dan ala den leriman fu Gado wortu di ben de drape, kisi deki-ati fu a lasti taki di ben nen „Wi De Fayafaya fu Du a Wroko Di Wi Kisi fu Leri Trawan”. A takiman ben taki syatu fu a heri programa, dan a poti krakti na tapu o prenspari a de fu gebroiki a Bijbel te wi e gi sma leri. A poti krakti sosrefi tapu den fasi fa wi kan tron bun leriman. Wan tra sani di a ben poti krakti na tapu, na taki wi musu abi frutrow na ini a waarheid di wi e leri trawan. A takiman ben gi wi a rai fu ’meki ala sma si taki wi e go na fesi’ èn fu ’poti prakseri doronomo na wisrefi èn na den sani di wi e leri sma’.—1 Timoteyus 4:15, 16.

A „Leriman fu Gado Wortu” Distrikt Kongres ben de wan bigi fesa trutru! Meki wi du neleki wi Gran Leriman, Yehovah, èn neleki wi Bigi Leriman, Yesus Krestes, te wi e leri trawan a wortu fu Gado.

[Faki/Prenki na tapu bladzijde 28]

Nyun publikâsi gi sma di abi spesrutu yepi fanowdu

Den sma di ben de na a „Leriman fu Gado Wortu” Distrikt Kongres, ben prisiri trutru di den ben kisi tu nyun publikâsi. Den publikâsi disi sa yepi den bun fu leri sma na spesrutu presi fu grontapu a waarheid fu Bijbel. A traktaat di nen Yu Abi wan Yeye na ini Yu Di No Man Dede? sa yepi Kotoigi heri bun fu bigin wan takimakandra nanga sma di e libi na ini kondre pe sma e gebroiki a srefi wortu gi „sili” nanga „yeye”. A nyun traktaat e sori krin taki a yeye no de a srefi leki wan yeye mekisani. A e sori tu taki sma no e tron yeye mekisani te den dede.

A brochure di nen Een voldoening schenkend leven — Hoe u dit kunt bereiken ben tyari kon na doro na a kaba fu a di fu tu dei fu a kongres. A brochure disi de fu yepi preikiman fu bigin wan bijbelstudie nanga sma di no sabi taki a Mekiman na wan trutru Sma di abi firi. Den sa man du a srefi nanga sma di no sabi taki wan buku de di Gado meki sma skrifi nanga yepi fu en santa yeye. Yu kisi okasi kaba fu gebroiki den nyun publikâsi disi na ini yu diniwroko?

[Prenki na tapu bladzijde 26]

Hondrohondro sma teki dopu na ini a foto Milan na Italiakondre èn na den kongres di hori na heri grontapu

[Prenki na tapu bladzijde 29]

A drama „Abi Lespeki gi Yehovah En Tirimakti” ben naki na ati fu sma srefisrefi