Tan sori bunfasi

„A froktu fu a leti e sori na ini ibri bunfasi nanga regtfardikifasi nanga waarheid.”​—EFEISESMA 5:9.

1. Fa milyunmilyun sma na ini a ten disi e sori taki den e agri nanga Psalm 31:19?

A MORO bun sani di ibri libisma kan du, na fu gi Yehovah glori. Na ini a ten disi, milyunmilyun sma e du dati fu di den e prèise Gado gi a bunfasi fu en. Wi leki getrow Kotoigi fu Yehovah, e agri nanga wi heri ati nanga a psalm skrifiman di ben singi: „A bunfasi di yu kibri leki wan gudu gi den wan di e frede yu, furu srefisrefi!”—Psalm 31:19.

2, 3. San ben kan pasa efu wi no ben o tyari wisrefi na wan bun fasi te wi e du a wroko fu meki disipel?

² A bigi lespeki di wi abi gi Yehovah e meki taki wi e prèise en gi a bunfasi fu en. A e gi wi deki-ati tu fu ’prèise Yehovah, fu blesi en, èn fu meki sma kon sabi a glori fu en kownumakti’ (Psalm 145:10-13). Fu dati ede wi e teki prati fayafaya na a Kownukondre preikiwroko èn sosrefi na a wroko fu meki disipel (Mateyus 24:14; 28:19, 20). A no de fu taki dati aladi wi e du a preikiwroko fu wi, wi musu tyari wisrefi na wan bun fasi tu. Efu wi no e du dati, dan wi ben kan tyari syen na tapu a santa nen fu Yehovah.

³ Furu sma e taki dati den e dini Gado. Ma a fasi fa den e tyari densrefi, no e kruderi nanga den markitiki di de fu feni na ini a Wortu fu Gado di a meki sma skrifi nanga yepi fu en santa yeye. Son sma ben taki dati den ben du bun, ma dati no ben de fu si na a fasi fa den ben e tyari densrefi. Fu den sma disi, na apostel Paulus ben taki: „Yu di e leri trawan, yu e leri yusrefi? Yu di e preiki: ’Unu no musu fufuru’, yusrefi e fufuru? Yu, di e taigi sma: ’No du sutadu’, yusrefi e du sutadu? . . . ’Fu unu ede den nâsi e fluku a nen fu Gado’, soleki fa a skrifi kaba.”—Romesma 2:21, 22, 24.

4. San na a bakapisi te wi e tyari wisrefi na wan bun fasi?

⁴ Na presi taki wi e tyari syen na tapu a nen fu Yehovah, wi e du ala muiti fu meki a nen kisi glori fu di wi e tyari wisrefi na wan bun fasi. Disi abi wan bun krakti tapu den wan di no de memre fu a Kresten gemeente. Gensman no sa kisi okasi fu taki takru sani fu wi (1 Petrus 2:15). Boiti dati, a bun fasi fa wi e tyari wisrefi e hari sma kon na a organisâsi fu Yehovah. Disi e gi den sma na okasi fu gi Yehovah glori èn fu kisi têgo libi.—Tori fu den Apostel 13:48.

5. Sortu aksi wi musu luku now?

⁵ Wi na onvolmaakti sma. Fu di dati de so, dan fa wi musu tyari wisrefi so taki wi no e gi Yehovah syen? Fa wi kan tyari wisrefi na so wan fasi taki wi no e meki tra sma di e suku waarheid, naki futu? Iya, fa wi sa man sori bunfasi?

Wan froktu fu a leti

6. San na wan tu fu den „wroko fu a dungru di no e meki froktu”, ma sortu froktu musu de krin fu si na mindri Kresten?

⁶ Fu di wi na Kresten di gi densrefi fu dini Gado, meki wi man wai pasi gi „den wroko fu  a dungru di no e meki froktu”. Den wroko disi na lei, fufuru, skempi taki, a taki di sma e taki fu seks na wan fasi di no bun, a tyari di sma e tyari densrefi na wan fasi di e gi syen, a taki di sma e taki sani di no fiti, nanga drungufasi. Nowan fu den wroko disi e gi Gado grani (Efeisesma 4:25, 28, 31; 5:3, 4, 11, 12, 18). Na presi taki wi e du den sortu wroko disi, wi e „tan waka leki pikin fu leti”. Na apostel Paulus e taki dati „a froktu fu a leti e sori na ini ibri bunfasi nanga regtfardikifasi nanga waarheid” (Efeisesma 5:8, 9). Sobun, wi man tan sori bunfasi efu wi e waka na ini a leti. Ma sortu leti na disi dan?

7. San wi musu du fu kan tan sori bunfasi?

⁷ Aladi wi abi fowtu, toku wi kan sori bunfasi efu wi e waka na ini a yeye leti. A psalm skrifiman ben singi: „Yu wortu na wan lampu gi mi futu, èn wan leti na tapu mi pasi” (Psalm 119:105). Efu wi wani tan sori „a froktu fu a leti” nanga yepi fu „ibri bunfasi”, dan wi musu tan waka na ini a yeye leti di de fu feni na ini a Wortu fu Gado. Den Kresten publikâsi e taki finifini fu a leti disi, èn wi e taki doronomo fu en sosrefi na den konmakandra pe wi e anbegi Gado (Lukas 12:42; Romesma 15:4; Hebrewsma 10:24, 25). Wi musu poti furu prakseri tu na a eksempre fu Yesus èn na a leri fu en, fu di a de „a leti fu grontapu” èn a „e skèin a glori fu [Yehovah]”.—Yohanes 8:12; Hebrewsma 1:1-3.

Wan froktu fu a yeye

8. Fu san ede wi man sori bunfasi?

⁸ Yeye leti trutru e yepi wi fu sori bunfasi. Boiti dati, wi man sori a fasi disi fu di a santa yeye fu Gado, noso en wroko krakti, e tiri wi. Bunfasi na wan fu den „froktu fu a yeye” (Galasiasma 5:22, 23). Efu wi e teki a tiri fu Yehovah en santa yeye, dan dati sa meki taki wi e kisi a moi froktu disi.

9. Fa wi kan handri akruderi den wortu fu Yesus di skrifi na Lukas 11:9-13?

⁹ Te wi wani sori bunfasi, wan froktu fu a yeye, fu di wi trutru wani plisi Yehovah, dan dati musu meki wi handri akruderi den wortu fu Yesus: „Tan aksi, èn unu sa kisi; tan suku, èn unu sa feni; tan naki na tapu doro, èn a doro sa opo gi unu. Bika iniwan sma di e aksi, sa kisi, èn iniwan sma di e suku, sa feni, èn iniwan sma di e naki na tapu doro, den sa opo a doro gi en. Fu tru, iniwan papa de na un mindri di, efu en manpikin e aksi en wan fisi, kande sa gi en wan sneki na presi fu wan fisi? Noso efu a e aksi en wan eksi sosrefi, dan a sa gi en wan kruktutere? We, efu unu leki [onvolmaakti sma, sobun] ogri sma, sabi fa fu gi bun presenti na den pikin fu unu, o moro dan a Tata na hemel, sa gi santa yeye na den wan di e aksi en fu dati!” (Lukas 11:9-13) Meki wi teki a rai fu Yesus, fu di wi e begi Yehovah meki a gi wi a yeye fu en. Na so fasi wi sa man tan sori bunfasi, di de wan froktu fu a yeye disi.

„Tan du bun”

10. Na sortu fasi Yehovah e sori bunfasi, soleki fa a skrifi na Exodus 34:6, 7?

¹⁰ Nanga yeye leti fu a Wortu fu Gado èn nanga a yepi fu Gado en santa yeye, wi kan „tan du bun” (Romesma 13:3). Te wi e studeri Bijbel doronomo, dan wi e leri moro nanga moro fa wi kan sori bunfasi soleki fa Yehovah e du dati. Na artikel na fesi ben taki fu den difrenti fasi fa Gado e sori bunfasi, soleki fa a de fu si na ini a fruklari di Gado ben gi Moses, èn di skrifi na Exodus 34:6, 7. Drape wi e leisi: „Yehovah, Yehovah, wan Gado di abi sari-ati nanga switifasi, di no e kisi atibron esi-esi èn di abi lobi bun-ati nanga waarheid pasa marki, di e kibri lobi bun-ati gi dusundusun sma, di e gi pardon fu fowtu èn fu a pasa di sma e pasa en wet èn sosrefi fu sondu, ma di no sa gi fri fu strafu  kwetikweti, fu di a e tyari strafu fu a fowtu fu papa kon na tapu manpikin nanga granpikin, na tapu a di fu dri geslakti èn na tapu a di fu fo geslakti.” Te wi e kon sabi moro fu den difrenti fasi fa Yehovah e sori bunfasi, dan dati sa yepi wi fu „tan du bun”.

11. San wi musu du fu di wi sabi taki Yehovah abi sari-ati nanga switifasi?

¹¹ A fruklari disi di e kon fu Gado e sori wi taki wi musu abi sari-ati nanga switifasi neleki fa Yehovah abi dati. „Koloku fu den sari-atiwan”, na so Yesus ben taki, „bika sma sa sori den sari-ati” (Mateyus 5:7; Lukas 6:36). Fu di wi sabi taki Yehovah abi switifasi, meki wi e sori switifasi nanga bunfasi tu na trawan, sosrefi na den wan di wi e preiki gi den. Disi e kruderi nanga a rai fu Paulus: ’Meki a taki fu unu de switi ala ten, a musu abi sowtu, so taki unu sabi fa unu musu gi ibriwan sma wan piki.’—Kolosesma 4:6.

12. (a) Fu di Gado no e atibron esi-esi, dan fa wi musu handri nanga trawan? (b) San a lobi bun-ati fu Yehovah e meki wi du?

¹² Gado no e atibron esi-esi. Fu dati ede, wi no sa poti prakseri na den pikinpikin fowtu di tra bribiman e meki, efu wi wani „tan du bun”, ma wi sa luku den bun fasi fu den (Mateyus 7:5; Yakobus 1:19). A lobi bun-ati fu Yehovah e meki taki wi e sori getrow lobi, srefi na ini den moro muilek situwâsi. A de fanowdu trutru taki wi e du disi.—Odo 19:22.

13. San wi musu du fu sori taki Yehovah abi ’waarheid pasa marki’?

¹³ Fu di wi hemel Tata abi ’waarheid pasa marki’, dati meki wi e pruberi fu ’rikomanderi wisrefi [na Gado] leki dinari, fu di wi e taki wortu di tru’ (2 Korentesma 6:3-7). Tu fu den seibi sani di Yehovah e tegu gi, na „wan tongo di e lei” nanga „wan falsi kotoigi di e taki leitori” (Odo 6:16-19). Sobun, fu di wi wani plisi Gado, meki wi e ’puru falsi fasi èn e taki waarheid’ (Efeisesma 4:25). Meki wi sori bunfasi na so wan fasi ala ten, fu di a de prenspari srefisrefi.

14. Fu san ede wi musu gi trawan pardon?

¹⁴ A fruklari di Gado ben gi Moses musu meki tu taki wi e gi sma pardon, bika Yehovah de klariklari fu gi pardon (Mateyus 6:14, 15). A no de fu taki dati Yehovah e strafu sondari di no abi berow. Fu dati ede, te wi wani hori a gemeente krin na yeye fasi, dan wi musu sori bunfasi soleki fa Gado wani dati.—Lefitikus 5:1; 1 Korentesma 5:11, 12; 1 Timoteyus 5:22.

„Luku bun”

15, 16. Fa a rai fu Paulus di skrifi na ini Efeisesma 5:15-19 kan yepi wi fu tan sori bunfasi?

¹⁵ Efu wi wani tan sori bunfasi, aladi ogri e lontu wi, dan wi musu meki a yeye fu Gado abi furu krakti na wi tapu èn wi musu luku bun fa wi e waka. Fu dati ede, Paulus ben gi den Kresten na ini Efeise a deki-ati disi: „Luku bun fa unu e waka, no leki sma di no koni, ma leki koni sma, fu di unu e bai a yoisti ten gi unsrefi, bika den dei godelowsu. Fu dati ede, no de onreidelek  moro, ma tan si krin san na a wani fu Yehovah. Sosrefi, no kon drungu nanga win, di lusu fasi fu libi de na ini, ma tan kon furu nanga yeye, èn taki nanga unsrefi nanga psalm nanga prèisesingi gi Gado nanga yeye singi, èn singi gi Yehovah aladi a poku di de na ini un ati e tyari unu” (Efeisesma 5:15-19). A rai disi na trutru bun rai gi wi na ini den muilek lasti dei disi.—2 Timoteyus 3:1.

¹⁶ Efu wi wani tan sori bunfasi, dan wi musu luku bun taki wi e waka neleki den wan di e sori a koni fu Gado (Yakobus 3:17). Wi musu wai pasi gi seryusu sondu èn wi musu meki a santa yeye abi furu krakti na wi tapu. Wi sa man du den sani disi te wi e meki a yeye disi tiri wi (Galasiasma 5:19-25). Te wi e gebroiki a rai fu Gado di wi e kisi na den Kresten konmakandra, den kring konmakandra, nanga den kongres, dan wi sa man tan du bun. Den wortu di Paulus ben skrifi gi den Efeisesma e memre wi sosrefi taki na furu fu den konmakandra pe wi e anbegi Gado, wi e kisi wini te wi e singi „yeye singi” nanga wi heri ati. Furu fu den singi disi e taki fu yeye fasi, soleki bunfasi.

17. Sortu frutrow Kresten kan abi te den siki seryusu èn te den no man go na den konmakandra doronomo?

¹⁷ Ma fa a de nanga tra Kotoigi di no man kon na den Kresten konmakandra doronomo, fu di den siki seryusu? Kande den e firi broko-saka fu di den no man anbegi Yehovah ala ten makandra nanga den brada nanga sisa fu den. Ma den kan abi a frutrow taki Yehovah e frustan sortu situwâsi den de na ini. A sa hori den na ini a waarheid, a sa gi den en santa yeye, èn a sa yepi den fu tan du bun.—Yesaya 57:15.

18. San sa yepi wi fu tan sori bunfasi?

¹⁸ Efu wi wani tan sori bunfasi dan wi musu luku bun suma na den sma di wi abi demakandra nanga den. Wi no musu abi demakandra nanga den wan di ’no lobi bun sani’ (2 Timoteyus 3:2-5; 1 Korentesma 15:33). Te wi e gebroiki a rai disi, dan a sa yepi wi fu no „meki a santa yeye fu Gado firi sari”. Dati wani taki dati wi no sa du sani tra fasi soleki fa a yeye e sori wi (Efeisesma 4:30). Boiti dati, wi sa kisi yepi fu du bun efu wi e tron bun mati fu den wan di e sori nanga a fasi fa den e libi, taki den lobi bunfasi èn taki den e teki a tiri fu Yehovah en santa yeye.—Amos 5:15; Romesma 8:14; Galasiasma 5:18.

Bunfasi e tyari tumusi moi winimarki kon

19-21. Fruteri wan tu ondrofenitori di e sori san na den bun bakapisi te wi e sori bunfasi.

¹⁹ Te wi e waka na ini a yeye leti, te wi e du san a yeye fu Gado e sori wi fu du, èn te wi e luku bun fa wi e waka, dan dati sa yepi wi fu no du ogri èn fu „tan du bun”. Disi kan tyari tumusi moi winimarki kon. Luku na eksempre fu Zongezile di de wan Kotoigi fu Yehovah na ini Zuid-Afrika. Di a ben de na pasi fu go na skoro wan mamanten, dan a go luku omeni moni a ben abi na bangi. A kon si taki a ben abi 42.000 rand (6000 Amerkan dala) moro leki san a ben fruwakti fu abi. Wan waktiman fu a bangi nanga tra sma sosrefi, gi en deki-ati fu teki a moni èn fu poti en na wan tra bangi, so taki a ben kan gebroiki en gi ensrefi. A Kotoigi trowpaar pe a ben tan, ben de den wan-enkri sma di prèise en fu di a no ben teki a moni.

²⁰ A dei baka dati, Zongezile fruteri den sma fu a bangi fu a fowtu di den ben meki. Den kon si taki a nomru fu en rekening ben gersi a nomru fu wan rekening di wan gudu bisnisman ben abi. A sani disi ben meki taki a bisnisman poti moni tapu a rekening fu Zongezile. Fu di a bisnisman no ben man bribi taki Zongezile no ben gebroiki noti fu a moni disi, meki a aksi en: „Fu sortu kerki yu de?” Zongezile fruteri en taki a de wan Kotoigi fu Yehovah. Den heihei-man fu a bangi prèise Zongezile trutru èn den taki: „Wi ben winsi taki ala sma ben de so eerlijk leki den Kotoigi fu Yehovah.” Fu tru, eerlijkfasi nanga bunfasi kan meki taki trawan e gi Yehovah glori.—Hebrewsma 13:18.

²¹ Te wi e sori bunfasi, dan wi no abi fu du bigi sani fu abi bun bakapisi. Fu gi wan  eksempre: Wan yongu Kotoigi di e dini leki wan furuten preikiman na wan fu den èilanti fu Samoa, ben musu go na ati-oso. Sma ben e sidon wakti fu go na a datra èn wan owru uma ben sidon sei a Kotoigi. Di a si taki na uma disi ben siki seryusu, dan a meki a go na a datra fosi en so taki a ben kan kisi yepi moro esi. Bakaten, a Kotoigi miti na owru uma disi na wowoyo. Na uma ben memre a brada ete èn sosrefi a bun sani di a ben du gi en na a ati-oso. Na uma taki: „Now mi sabi taki Yehovah Kotoigi lobi tra sma trutru.” Fosi, na uma disi no ben wani arki a Kownukondre boskopu. Ma a bunfasi di a Kotoigi ben sori en, ben abi bun bakapisi. Na uma teki wan oso-bijbelstudie èn a bigin teki leri fu Gado Wortu.

22. San na wan trutru prenspari fasi fa wi kan „tan du bun”?

²² Kande yu kan fruteri ondrofenitori di e sori o prenspari a de fu sori bunfasi. Wan trutru prenspari fasi fa wi kan „tan du bun” na te wi e meki a bun nyunsu fu Gado en Kownukondre bekènti doronomo (Mateyus 24:14). Meki wi tan teki prati fayafaya na a wroko disi di de wan grani trutru, fu di wi sabi taki disi na wan fasi fa wi kan du bun, spesrutu gi den wan di e arki a bun nyunsu. Ma a moro prenspari sani na taki a diniwroko fu wi èn a fasi fa wi e tyari wisrefi, e gi glori na Yehovah, a sma fu pe bunfasi e komoto.—Mateyus 19:16, 17.

Tan „du san bun”

23. Fu san ede a Kresten diniwroko na wan bun wroko?

²³ Sondro tweifri, wi kan taki dati a diniwroko fu wi na wan bun wroko. A kan tyari frulusu kon gi wi, èn sosrefi gi den sma di e arki a Bijbel boskopu. Na so fasi den kan kon na tapu a pasi di sa tyari den go na têgo libi (Mateyus 7:13, 14; 1 Timoteyus 4:16). Fu di wi wani du bun, meki son leisi te wi musu teki bosroiti, wi ben sa kan aksi wisrefi: ’Fa a bosroiti disi sa abi krakti tapu mi Kownukondre preikiwroko? A sani di mi wani du, na trutru wan koni sani? A sa yepi mi fu leri trawan fu a „têgo bun nyunsu”, so taki den kan kisi wan bun matifasi nanga Yehovah Gado? (Openbaring 14:6). Wi sa firi koloku srefisrefi te wi e teki wan bosroiti di sa gi wi na okasi fu du moro na ini a Kownukondre diniwroko.—Mateyus 6:33; Tori fu den Apostel 20:35.

24, 25. Na sortu fasi wi kan du bun na ini a gemeente, èn sortu frutrow wi kan abi te wi e tan sori bunfasi?

²⁴ Ala ten wi musu hori na prakseri taki bunfasi abi furu winimarki. Wi kan tan sori a fasi disi, fu di wi e horibaka gi a Kresten gemeente èn fu di wi e du ala san wi man fu sorgu taki sani e waka bun nanga a gemeente. A no de fu taki dati wi e du bun te wi e go na den Kresten konmakandra doronomo èn te wi abi wan prati na den. Te wi de na den konmakandra, dan dati kan gi tra anbegiman deki-ati kaba. Èn den moi piki di wi e gi fu di wi sreka wisrefi bun, sa meki den kon tranga na yeye fasi. Wi e du bun sosrefi te wi e gebroiki den gudu fu wi fu ondrow a Kownukondre zaal èn te wi e yepi fu krin a zaal (2 Kownu 22:3-7; 2 Korentesma 9:6, 7). Iya, „so langa a ten bun gi wi ete, meki wi du bun na ala sma, ma spesrutu gi den wan di de na ini a srefi bribi leki wi”.—Galasiasma 6:10.

²⁵ Wi no kan taki fu ibri situwâsi pe wi ben sa musu sori bunfasi. Te wi e kisi fu du nanga nyun tyalensi, dan meki wi suku rai na ini den Buku fu Bijbel. Meki wi begi Yehovah taki a e gi wi en santa yeye, èn meki wi du muiti fu du a bun en volmaakti wani fu en (Romesma 2:9, 10; 12:2). Wi kan abi a frutrow taki wi sa kisi furu blesi fu Yehovah efu wi e tan sori bunfasi.

San yu ben sa piki?

• San na a moro bun sani di wi kan du?

• Fu san ede Bijbel e kari bunfasi wan ’froktu fu a leti”?

• Fu san ede Bijbel e kari bunfasi wan ’froktu fu a yeye’?

• San na a bakapisi te wi e tyari wisrefi na wan bun fasi?

[Aksi fu a tori disi]

[Prenki na tapu bladzijde 17]

A Wortu fu Gado nanga en santa yeye e yepi wi fu sori bunfasi

[Prenki na tapu bladzijde 18]

Te wi e sori bunfasi, dan dati e tyari tumusi moi winimarki kon