„Kon na mi, . . . èn mi sa gi unu krakti baka”

Wi e kisi krakti baka te wi e ’preiki a Wortu’

A BEN de wan man sondro fowtu, di ben abi wan prenspari wroko fu du. „Den ipi sma ben fruwondru fu a fasi fa a e gi leri”, fu di a ben bun srefisrefi (Mateyus 7:28). A ben de wan fayafaya preikiman tu. A ben gi pikinmoro ala en ten, krakti, èn sosrefi ala san a ben abi, fu preiki fu Gado Kownukondre. Iya, Yesus Krestes ben de wan preikiman nanga leriman di no abi speri fu di a ben waka go na ala uku fu a kondre pe a ben e libi fu du a wroko disi.—Mateyus 9:35.

Yesus ben kisi a tumusi prenspari wroko fu preiki „a bun nyunsu fu a kownukondre” gi den sma di ben e libi na a ten dati èn fu leri den disipel fu en fa fu du a srefi wroko dati na heri grontapu (Mateyus 4:23; 24:14; 28:19, 20). Den disipel kisi a frantwortu fu du a tumusi prenspari preikiwroko. Dati ben de wan hebi frantwortu trutru. Yu denki taki den disipel di no ben de volmaakti sma, ben man tyari a bigi frantwortu disi?

A wroko disi no ben hebi tumusi gi den! Baka di a ben taigi den disipel fu en fu begi Yehovah Gado, „a Masra fu a kotiwroko”, fu seni moro wrokoman, dan Yesus seni den go fu gi sma leri (Mateyus 9:38; 10:1). Baka dati a gi den a dyaranti taki a frantwortu fu de wan bakaman fu en di musu du a preikiwroko disi, ben sa tyari frulusu nanga kowru-ati kon gi den sma di ben o e arki den. Yesus ben taki: „Kon na mi, . . . èn mi sa gi unu krakti baka.”—Mateyus 11:28.

Wan sani di e gi prisiri

A kari dati di Yesus ben gi, na wan sani di e sori taki a abi switifasi, sari-ati nanga lobi gi sma! A e sori fa Yesus e broko en ede trutru nanga den bakaman fu en. A no de fu taki dati den disipel fu en e kisi krakti te den e tyari a frantwortu fu preiki „a bun nyunsu” fu Gado Kownukondre. Disi e gi den trutru prisiri nanga a firi taki den e du wan bun sani.—Yohanes 4:36.

Langa ten bifo Yesus kon na grontapu, dan den Buku fu Bijbel ben taki kaba dati den sma di e du santa diniwroko gi Gado, sa prisiri srefisrefi. Disi ben kon na krin di a psalm skrifiman ben singi: „Ala un pipel fu grontapu, un bari singi gi Yehovah fu di un abi bigi prisiri. Dini Yehovah nanga prisiri. Kon na en fesi nanga wan prisiri babari” (Psalm 100:1, 2). Na ini a ten disi sma fu ala nâsi e prisiri pasa marki na ini Yehovah, èn den prèisesingi fu den de leki a prisiri babari fu wan legre di wini wan feti. Den wan di e dini Gado fayafaya, e kon na en fesi „nanga wan prisiri babari”. Na so a musu de tu, fu di Yehovah na „a koloku Gado”. A wani taki den dinari fu en prisiri te den e du san den ben pramisi en di den gi densrefi abra na en.—1 Timoteyus 1:11.

Futuboi di kisi krakti baka

Aladi wi e wroko tranga na ini a diniwroko, toku wi no e weri. Na presi fu dati wi e kisi krakti baka. Fa dati kan? We, Yesus ben e si a du di a e du a wroko fu Yehovah leki nyanyan di e gi en krakti baka. A ben taki: „Mi nyanyan de, fu mi du a wani fu en di ben seni mi kon èn fu kaba a wroko fu en.”—Yohanes 4:34.

Na a srefi fasi Kresten preikiman di e wroko fayafaya na ini a ten disi e firi prisiri te den e „preiki a wortu” (2 Timoteyus 4:2). Connie na wan Kresten uma di pasa 40 yari kaba èn ibri mun a e wroko moro leki 70 yuru na ini a preikiwroko. A e taki: „Baka te mi du a preikiwroko, dan mi e firi bun èn mi e prisiri srefisrefi, awansi mi weri na a kaba fu a dei.”

Ma fa a de te sma no wani arki a Kownukondre boskopu? Connie e taki moro fara: „Awansi sma e arki noso no e arki, toku a no hati mi noiti taki mi go na ini a preikiwroko. Mi sabi taki mi e meki Yehovah  firi prisiri. Mi e prisiri tu te mi e taki fu a waarheid, fu di dati e meki a tumusi moi Bijbel howpu kon moro tranga na ini mi ati.”

Tra sma e taki dati te den e yepi wan sma fu kisi soifri sabi fu Gado, dan dati e meki den firi taki den abi wan marki na ini a libi. Meloney na wan yongu uma di e preiki sowan 50 yuru ibri mun. A e taki: „A diniwroko e gi mi krakti baka fu di a e meki mi tyari misrefi na wan bun fasi èn a e gi mi wan marki na ini mi libi. Te mi de na ini a preikiwroko, dan mi no e prakseri mi eigi problema èn den broko-ede fu a libi.”

Millicent sosrefi, na wan Yehovah Kotoigi di de wan fayafaya preikiman. A e taki: „Ibri dei di mi de na ini a preikiwroko na wan prisiri, fu di mi e taki nanga trawan fu san Gado o du gi libisma èn fu a fasi fa grontapu sa tron wan paradijs baka. Dati e gi mi prisiri na ini a libi. Dati e meki mi si Yehovah leki wan trutru sma ibri dei baka èn a e gi mi vrede. A e meki mi feni koloku tu di mi no kan kisi na nowan tra fasi.”

Sma di kisi krakti baka

A no de fu taki dati a Kresten diniwroko e gi den Kownukondre preikiman krakti baka, èn a e trowstu den wan di e teki a boskopu fu libi. Aladi wan skoromisi na ini Potogisikondre ben kisi leri fu priester nanga den non fu a kerki, toku a ben firi leki a kerki no ben man gi en san a ben abi fanowdu trutru na yeye fasi. A no ben e kisi piki tapu den Bijbel aksi di a ben abi. Di a bigin studeri Bijbel doronomo nanga wan Kotoigi fu Yehovah, dan a ben kon si taki ibri leisi a ben e kon frustan den tori fu Bijbel moro bun. A skoromisi disi ben breiti srefisrefi. A e taki: „Ibri dridewroko mi ben e angri fu a studie, fu di mi ben e kisi piki tapu den aksi fu mi nanga yepi fu den krin tori fu Bijbel.” Now na uma disi na wan dopu futuboi fu Yehovah, èn ensrefi e gi trawan krakti baka nanga yepi fu den tru tori fu Bijbel.

A no de fu taki dati Yehovah Kotoigi no e bruya te den e kon si taki a komando fu preiki na wan seryusu sani, noso te den kon si taki den musu du a wroko disi na heri grontapu. Mi-no-ke fasi noso gens no e meki den lasi-ati. Den e wroko fayafaya fu du a Kownukondre preikiwroko di den kisi fu du. Den e prati a bun nyunsu nanga sma, awansi den sma dati de na presi pe bigi wagi musu stop na ini Amerkankondre (fowtow 1), na wan opolani presi fu Korea (fowtow 2), na tapu den Andesbergi (fowtow 3), noso na wan wenkri na ini a foto Londen (fowtow 4). Na ini a ten disi, den bakaman fu Yesus e du a diniwroko di e gi sma winimarki, na heri grontapu. Den e du dati nanga furu prisiri. Neleki fa Yesus ben pramisi, dan a e gi den disipel fu en krakti baka èn nanga yepi fu den a e gi furu tra sma krakti tu.—Openbaring 22:17.