Yehovah e gi a moro bun eksempre fa fu sori bunfasi
Yehovah e gi a moro bun eksempre fa fu sori bunfasi
„Prèise Yehovah fu den legre, bika Yehovah bun!”—YEREMIA 33:11.
1. San e meki wi prèise Gado gi a bunfasi fu en?
YEHOVAH GADO bun na wan volmaakti fasi. „En bunfasi bigi fu tru!”, na so a profeiti Sakaria ben taki (Sakaria 9:17). Iya, wi kan si bunfasi ini ala den sani di Gado du fu sreka grontapu na so wan fasi, taki wi kan nyan bun fu en (Genesis 1:31). Noiti wi sa man frustan den frekti wet di Gado gebroiki fu meki ala sani (Preikiman 3:11; 8:17). Ma a pikinso sabi di wi abi fu den sani di Gado meki, e meki wi prèise Gado gi a bunfasi fu en.
2. San na bunfasi?
2 San na bunfasi? Wan sma di abi bunfasi e prakseri bun sani; a e du san bun, a no e du ogri. Ma dati no wani taki nomo taki a sma no e du nowan ogri. Bunfasi na wan fu den froktu fu a yeye, èn wan sma e sori a fasi disi te a e du bun (Galasiasma 5:22, 23). Wi e sori bunfasi te wi e du bun sani fu yepi trawan. Na ini a seti fu sani disi, a de so taki sani di son sma feni bun, tra sma no e si leki bun sani. Ma efu wi wani abi vrede èn efu wi wani de koloku, dan wán markitiki musu de gi bunfasi. Suma kan sori soifri san bun?
3. Suma e poti a markitiki gi bunfasi soleki fa Genesis 2:16, 17 e sori?
3 Gado e poti a markitiki gi bunfasi. Na a bigin fu a libisma historia, Yehovah ben gi a fosi libisma a komando: „Fu ibri bon fu a dyari yu mag nyan te yu bere furu. Ma fu a bon fu sabi bun nanga ogri, fu dati yu no musu nyan, bika na a dei di yu sa nyan fu dati, yu sa dede nomonomo” (Genesis 2:16, 17). Iya, libisma musu luku go na a Mekiman fu den, fu kon sabi san bun èn san ogri.
Gado sori wi bunfasi, aladi wi no frudini dati
4. San Gado du gi a libisma famiri di Adam sondu?
4 Libisma ben o de koloku èn volmaakti fu têgo. Ma dati no go doro, fu di Adam sondu èn a no ben wani erken taki na Gado abi a reti fu taki san bun (Genesis 3:1-6). Den bakapikin fu Adam gebore leki sma di kisi sondu nanga dede, ma Gado ben taki dati wan volmaakti Siri ben o kon. Te yu e luku en bun, dan Yehovah ben taki nanga „a fosi sneki”, Satan Didibri, di a ben fruklari: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na a ede èn yu sa masi en na a bakafutu” (Openbaring 12:9; Genesis 3:15). Yehovah ben abi na prakseri fu frulusu a sondu libisma famiri. A sori wi bunfasi aladi wi no frudini dati; a seti wan sani trutru gi den wan di e sori bribi na ini a frulusu-ofrandi fu a lobi Manpikin fu en, so taki den kan kisi frulusu.—Mateyus 20:28; Romesma 5:8, 12.
5. Fu san ede wi kan sori pikinso bunfasi, aladi a de so taki wi kisi takru fasi na ini wi ati?
5 A no de fu taki dati a sondu di Adam du, meki taki wi kisi takru fasi na ini wi ati (Genesis 8:21). Ma koloku taki Yehovah e yepi wi so taki wi kan sori pikinso bunfasi. Efu wi e tan du den sani di wi leri fu den warti santa buku fu en, dan wi sa kon ’koni fu kisi frulusu’ èn wi sa de ’srekasreka gi ibri bun wroko’. Boiti dati, wi sa man du san Gado feni bun (2 Timoteyus 3:14-17). Ma efu wi wani kisi wini fu a rai fu Bijbel èn efu wi wani sori bunfasi, dan a denki fu wi musu de leki di fu a psalm skrifiman di ben singi: „Yu [Yehovah], bun èn e du bun. Leri mi yu wet.”—Psalm 119:68.
A bunfasi fu Yehovah e kisi prèise
6. Baka di Kownu David ben meki sma tyari na ark fu a frubontu go na Yerusalem, dan sortu wortu den Leifisma ben gebroiki na ini a singi fu den?
6 Kownu David fu owruten Israel ben sabi taki Gado abi bunfasi, èn a ben suku a tiri fu En. „Yehovah bun èn opregti”, na so David ben taki. „Dati meki a e leri sondari a pasi” (Psalm 25:8). A leri di Gado ben gi den Israelsma ben abi tin prenspari wet. Den wet disi na den Tin Komando di ben skrifi na tapu tu plata ston èn den ben tan na ini a santa kisi di nen na ark fu a frubontu. Baka di David ben meki sma tyari na Ark go na Yerusalem, a mamafoto fu Israel, dan den Leifisma ben singi wan singi di ben abi den wortu disi: „Taki Yehovah tangi, un pipel, bika a bun, bika en lobi bun-ati de te ten di no skotu” (1 Kroniki 16:34, 37-41). Fu tru, a ben musu fu de wan prisiri sani fu yere fa den Leifi singiman ben e singi den wortu dati!
7. San pasa baka di den ben tyari na Ark na ini a Moro Santapresi? Èn san pasa baka di Salomo ben begi fu gi a tempel abra na Yehovah?
7 Den Leifisma ben poti krakti baka tapu den srefi wortu fu prèise dati. Disi ben de na a ten di den ben gi a tempel abra di David en manpikin Salomo ben bow gi Yehovah. Baka di den poti na ark fu a frubontu na ini a Moro Santapresi fu a nyun tempel, dan den Leifisma bigin prèise Yehovah nanga den wortu disi: „Bika a bun, bika en lobi bun-ati de te ten di no skotu.” Na a okasi dati, a tempel ben kon furu na wan wondru fasi nanga wan wolku. A wolku disi ben sori taki Yehovah ben de drape ini glori (2 Kroniki 5:13, 14). Di den ben gi a tempel abra na Yehovah, dan Salomo begi. Di a ben kaba begi, dan „faya srefi ben komopo fu hemel èn a ben bron a bron-ofrandi nanga den srakti-ofrandi”. Di „den manpikin fu Israel” si disi, dan „wantronso . . . den alamala boigi dipi nanga den fesi na gron na tapu a ston èn den go didon langalanga na tapu a gron èn den taki Yehovah tangi ’bika a bun, bika en lobi bun-ati de te ten di no skotu’” (2 Kroniki 7:1-3). Baka di den Israelsma ben hori wan fesa 14 dei langa, dan den drai go baka na den oso fu den. Den ben e „prisiri èn breiti na ini den ati fu a bunfasi di Yehovah ben sori David, nanga Salomo, nanga Israel, a pipel fu en”.—2 Kroniki 7:10.
8, 9. (a) Den Israelsma ben prèise Yehovah gi a bunfasi fu en, ma fa den ben tyari densrefi te fu kaba? (b) San Yeremia ben taki fu Yerusalem, èn fa a profeititori dati ben kon tru?
8 A de wan sari sani, ma den Israelsma ben tapu fu libi akruderi den prèisesingi di den ben singi gi Gado. Baka wan pisi ten, a pipel fu Yuda ’ben e gi Yehovah glori nanga den mofobuba fu den nomo’ (Yesaya 29:13). Na presi taki den ben du san Gado ben feni bun, den ben bigin du san ben ogri. Sortu ogri sani den ben du? We, den ben anbegi kruktu gado, den ben du hurudu, den ben kwinsi den pôtiwan, èn den ben du tra seryusu sondu! A bakapisi ben de taki Yerusalem kisi pori, èn den sma di ben libi na ini Yuda ben musu go na ini katibo na Babilon, na ini 607 b.G.T.
9 Na so fasi Gado ben gi en pipel trangaleri. Ma nanga yepi fu a profeiti Yeremia, Gado ben taki na fesi dati na ini Yerusalem, sma ben o yere a sten ete fu den wan di e taki: „Prèise Yehovah fu den legre, bika Yehovah bun; bika en lobi bun-ati de te ten di no skotu!” (Yeremia 33:10, 11). Na so a pasa tu. Baka di a kondre ben pori 70 yari langa, dan wan Dyu fikapisi drai go baka na Yerusalem na ini 537 b.G.T. (Yeremia 25:11; Danièl 9:1, 2). Den bow na altari baka na a presi pe a tempel ben de na tapu a Moriabergi, èn den bigin tyari ofrandi drape. Tu yari baka di den ben drai go baka, den poti a fondamenti fu a tempel. Dati ben de wan span ten srefisrefi! „Di den bowman ben poti a fondamenti fu a tempel fu Yehovah,” na so Esra ben taki, „dan den priester na ini den spesrutu krosi, nanga den trompeti, èn den Leifisma, den manpikin fu Asaf, nanga den dyendyen, opo tanapu fu prèise Yehovah, soleki fa David, a kownu fu Israel, ben taigi den fu du. Èn den ben bigin fu piki nanga prèisesingi èn fu di den ben e taki Yehovah tangi, ’bika a bun, bika a lobi bun-ati fu en di a e sori Israel de te ten di no skotu.’”—Esra 3:1-11.
10. Nanga sortu prenspari wortu Psalm 118 e bigin èn nanga sortu wortu a e kaba?
10 Na ini wan tu psalm, den skrifiman gebroiki den srefi sortu wortu fu prèise Yehovah gi a bunfasi fu en. Psalm 118 na wan fu den, èn den osofamiri fu Israel ben singi a psalm disi na a kaba fu a Paskafesa. A psalm dati e bigin èn e kaba nanga den wortu disi: „Taigi Yehovah tangi, bika a bun; bika a lobi bun-ati fu en de te ten di no skotu” (Psalm 118:1, 29). Kande disi ben de a lasti prèisesingi di Yesus ben singi nanga den getrow apostel fu en na a neti bifo a dede na ini 33 G.T.—Mateyus 26:30.
„Grantangi, meki mi si yu glori”
11, 12. Sortu fruklari Moses ben yere di a ben si pikinso fu Gado en glori?
11 Wan tu yarihondro bifo a ten fu Esra, sma ben si fu a fosi leisi taki a bunfasi fu Yehovah abi fu du nanga a lobi bun-ati fu en. Syatu baka di den Israelsma ben anbegi a gowtu pikin kaw na ini a sabana èn den ogriman ben kisi pori, dan Moses ben begi Yehovah: „Grantangi, meki mi si yu glori.” Fu di Yehovah ben sabi taki Moses no ben kan tan na libi efu a ben si En fesi, dati meki A ben taki: „Misrefi sa meki ala mi bunfasi pasa na yu fesi.”—Exodus 33:13-20.
12 A dei baka dati, di Moses ben de na tapu a Sinaibergi, dan a si a bunfasi fu Yehovah. Na a ten dati, Moses ben si pikinso fu a glori fu Gado èn a ben yere wan sten e fruklari: „Yehovah, Yehovah, wan Gado di abi sari-ati nanga switifasi, di no e atibron esi-esi èn di abi lobi bun-ati nanga waarheid pasa marki, di e kibri lobi bun-ati gi dusundusun sma, di e gi pardon fu fowtu èn fu a pasa di sma pasa en wet èn sosrefi fu sondu, ma di no sa gi fri fu strafu kwetikweti, fu di a e tyari strafu fu a fowtu fu papa kon na tapu manpikin nanga granpikin, na tapu a di fu dri geslakti èn na tapu a di fu fo geslakti” (Exodus 34:6, 7). Den wortu disi e sori taki a bunfasi fu Yehovah abi fu du nanga en lobi bun-ati èn nanga tra fasi di a abi. Te wi e poti prakseri na den fasi disi, dan dati sa yepi wi fu sori bunfasi. Meki wi bigin luku wan fu den fasi fu Gado di kari tu leisi na ini a kefalek moi fruklari disi di e taki fu Gado en bunfasi.
„Wan Gado . . . di abi lobi bun-ati pasa marki”
13. Sortu fasi fu Gado kari tu leisi na ini a fruklari di e taki fu Gado en bunfasi, èn fu san ede disi fiti?
13 „Yehovah [na] wan Gado . . . di abi lobi bun-ati pasa marki . . . , di e kibri lobi bun-ati gi dusundusun sma.” A Hebrew wortu di den ben gebroiki gi „lobi bun-ati” wani taki sosrefi „getrow lobi”. Disi na a wan-enkri fasi di kari tu leisi na ini a fruklari di Gado ben gi Moses. Disi fiti srefisrefi, fu di lobi na a moro prenspari fasi di Yehovah abi! (1 Yohanes 4:8). Dati de krin fu si na den wortu disi di Bijbel e gebroiki furutron fu prèise Yehovah: „Bika a bun, bika en lobi bun-ati de te ten di no skotu.”
14. Sortu sma spesrutu e nyan bun fu a bunfasi nanga a lobi bun-ati fu Gado?
14 Wan fasi fa Yehovah sori bunfasi, na taki a „abi lobi bun-ati pasa marki”. Disi de fu si spesrutu na ini a bun fasi fa a e sorgu den getrow futuboi fu en na grontapu di gi densrefi abra na en (1 Petrus 5:6, 7). Kotoigi fu Yehovah kan taki trutru dati A e ’sori lobi bun-ati’ na den wan di lobi en èn e dini en (Exodus 20:6). A nâsi fu den trutru Dyu no ben kisi a lobi bun-ati, noso a getrow lobi fu Yehovah moro, fu di den no ben wani teki en Manpikin. Ma a bunfasi fu Gado èn a getrow lobi di a abi gi getrow Kresten fu ala nâsi, sa tan fu têgo.—Yohanes 3:36.
Yehovah abi sari-ati nanga switifasi
15. (a) Nanga sortu wortu a fruklari ben bigin di Moses ben yere na tapu a Sinaibergi? (b) San sari-ati wani taki?
15 A fruklari di Moses ben yere na tapu a Sinaibergi ben bigin nanga den wortu disi: „Yehovah, Yehovah, wan Gado di abi sari-ati nanga switifasi.” A kan taki a Hebrew wortu di gebroiki dyaso gi „sari-ati” abi fu du nanga na inibere fu wan sma, èn a abi furu fu du nanga a wortu di den Hebrewsma e gebroiki gi „muru”. Fu dati ede sari-ati abi fu du nanga den dipi firi di wan sma abi. Ma sari-ati wani taki moro leki fu firi trutru sari nomo gi wan sma. Sari-ati musu gi wi deki-ati fu du wan sani fu yepi trawan te den e pina. Fu gi wan eksempre, lobi-ati Kresten owruman sabi taki a de fanowdu fu sori sari-ati gi tra bribiman. Den musu ’sori sari-ati nanga wan prisiri ati’ te disi fiti.—Romesma 12:8; Yakobus 2:13; Yudas 22, 23.
16. Fu san ede wi kan taki dati Yehovah abi switifasi?
16 Wi kan si a bunfasi fu Gado tu na ini a switifasi di a abi. Wan sma di abi switifasi e du muiti fu hori den firi fu trawan na prakseri èn a e sori switifasi spesrutu gi den wan di lagi moro leki en. A fasi fa Yehovah e handri nanga en getrow futuboi, na a moro bun eksempre fa fu sori switifasi. Fu gi wan eksempre: Gado ben sori switifasi di a gebroiki engel fu gi na owru profeiti Danièl krakti; a ben gebroiki engel sosrefi fu fruteri a nyunwenke Maria fu a grani di a ben o kisi fu tron a mama fu Yesus (Danièl 10:19; Lukas 1:26-38). Leki a pipel fu Yehovah, wi e warderi en trutru taki A e sori switifasi te a e taki nanga wi nanga yepi fu Bijbel. Wi e prèise en fu di a sori en bunfasi na so wan fasi, èn wi e pruberi fu sori switifasi tu na trawan. Te den wan di lepi na yeye fasi e poti wan tra bribiman kon reti baka, dan den e du dati „ini wan yeye fu safri-atifasi”, èn den e pruberi fu sori switifasi.—Galasiasma 6:1.
Wan Gado di no e atibron esi-esi
17. Fu san ede wi de nanga tangi na ati taki Yehovah „no e kisi atibron esi-esi”?
17 „Wan Gado . . . di no e atibron esi-esi.” Den wortu dati e poti krakti tapu ete wan tra fasi fa Yehovah e sori en bunfasi. Yehovah no de gaw fu strafu wi te wi e meki wan fowtu, ma a abi pasensi nanga wi. Na so fasi a e gi wi ten fu wini seryusu swakifasi, so taki wi kan go na fesi na yeye fasi (Hebrewsma 5:12–6:3; Yakobus 5:14, 15). Den sma di no tron anbegiman fu Gado ete, e kisi wini tu fu a pasensi fu en. Ten de ete fu den teki a Kownukondre boskopu èn fu sori taki den abi berow (Romesma 2:4). Ma aladi Yehovah abi pasensi nanga wi, toku a bunfasi fu en e meki taki son leisi a e sori en atibron. A ben du dati di den Israelsma ben anbegi a gowtu pikin kaw na a Sinaibergi. Heri esi Gado sa sori en atibron na wan moro bigi fasi srefi, te a sa tyari wan kaba kon na a ogri seti fu sani fu Satan.—Esekièl 38:19, 21-23.
18. Fa Yehovah de tra fasi leki libisma tiriman te a abi fu du nanga waarheid?
18 „Yehovah [na] wan Gado . . . di abi . . . waarheid pasa marki.” Yehovah de heri tra fasi leki libisma tiriman! Den tiriman disi e pramisi bigi sani, ma den no e du srefisrefi san den pramisi. Tra fasi leki dati, den anbegiman fu Yehovah kan frutrow tapu ibri sani di taki na ini a Wortu fu en di skrifi nanga yepi fu santa yeye. Fu di Gado abi waarheid pasa marki, dati meki wi kan frutrow tapu den pramisi fu en ala ten. A bunfasi di wi hemel Tata abi, e meki taki a e piki den begi fu wi ala ten te wi e aksi en fu gi wi yeye waarheid èn a e gi wi a waarheid disi bogobogo.—Psalm 43:3; 65:2.
19. Na sortu moi fasi Yehovah sori bunfasi na sondari di abi berow?
19 „Yehovah [na] wan Gado . . . di e gi pardon fu fowtu èn fu a pasa di sma e pasa en wet èn sosrefi fu sondu.” Fu di Yehovah abi bunfasi, dati meki a de klariklari fu gi pardon na sondari di e sori berow. Wi de nanga tangi na ati trutru taki wi lobi-ati hemel Tata seti sani gi wi, so taki wi kan kisi pardon nanga yepi fu na ofrandi fu Yesus (1 Yohanes 2:1, 2). Wi breiti trutru taki ala sma di e sori bribi na ini a lusu-paiman, man abi wan bun matifasi nanga Yehovah. Den abi a howpu tu fu kisi têgo libi na ini a nyun grontapu di A pramisi wi. Den sani disi trutru e meki wi prèise Yehovah fu a bunfasi di a sori a libisma famiri!—2 Petrus 3:13.
20. Sortu buweisi wi abi taki Gado no e gi pardon na ogridu?
20 „[Yehovah] no sa gi fri fu strafu kwetikweti.” Te yu e luku en bun, dan disi na ete wan sani fu san ede wi musu prèise Yehovah gi a bunfasi fu en. Fu san ede? Fu di bunfasi noiti no e gi pardon na ogridu. Boiti dati, ’te Masra Yesus sa tyari kon na krin makandra nanga den tranga engel fu en’, dan Gado sa krutu ’den wan di no sabi En èn den wan di no e gi yesi na a bun nyunsu’. Den „sa kisi a krutu strafu fu têgo pori” (2 Tesalonikasma 1:6-9). Baka dati, den sma di e anbegi Yehovah èn di tan na libi sa man nyan bun fu a libi trutru. Takru sma di ’no lobi bun sani’, no sa bruya a libi fu den.—2 Timoteyus 3:1-3.
Pruberi fu de leki Yehovah te yu e sori bunfasi
21. Fu san ede wi musu sori bunfasi?
21 Sondro tweifri, furu sani de di e meki wi prèise Yehovah èn di e meki wi gi en tangi fu a bunfasi fu en. Wi no musu du furu muiti fu sori a fasi disi, fu di wi na futuboi fu Yehovah? Iya, bika na apostel Paulus ben gi tra Kresten a deki-ati: „Unu musu de sma di e waka baka na eksempre fu Gado, leki lobi pikin” (Efeisesma 5:1). Wi hemel Tata e sori bunfasi ala ten, èn wi musu du dati tu.
22. San wi sa luku na ini na artikel di e kon?
22 Efu wi gi wisrefi fu dini Yehovah nanga wi heri ati, dan a no de fu taki dati wi e du ala muiti fu sori bunfasi na a fasi fa En e sori dati. Fu di wi na bakapikin fu Adam di ben sondu, dati meki a no makriki gi wi fu du san bun. Ma na ini na artikel di e kon, wi sa si fu san ede wi kan sori bunfasi. Wi sa luku difrenti fasi tu fa wi kan sori bunfasi èn fa wi musu du dati akruderi na eksempre fu Yehovah, a Sma di e gi wi a moro bun eksempre fa fu sori bunfasi.
San yu ben sa piki?
• San na bunfasi?
• Sortu wortu fu Bijbel e poti krakti tapu a bunfasi fu Gado?
• Na sortu fasi Yehovah e sori en bunfasi?
• Fu san ede wi musu pruberi fu de leki Yehovah te wi e sori bunfasi?
[Aksi fu a tori disi]
[Prenki na tapu bladzijde 12]
Yehovah ben gi en pipel fu owruten trangaleri, fu di den no ben libi akruderi den wortu di den ben e gebroiki fu prèise En
[Prenki na tapu bladzijde 12]
Wan getrow fikapisi drai go baka na Yerusalem
[Prenki na tapu bladzijde 13]
Moses ben yere wan kefalek moi fruklari di e taki fu Gado en bunfasi
[Prenki na tapu bladzijde 15]
A bunfasi fu Yehovah de fu si na a fasi fa a e taki nanga wi nanga yepi fu Bijbel