Krinfasi—San dati wani taki trutru?

NA INI a di fu 18 nanga a di fu 19 yarihondro, a situwâsi na ini Europa nanga Amerkankondre ben takru sote, taki a no ben bun srefisrefi gi a gosontu fu den sma di ben libi drape. Fu dati ede den zendeling fu a pisi ten dati ben preiki san sma kan kari „wan leri fu krinfasi”. A leri disi ben sori taki doti nanga sondu na a srefi, ma taki krinfasi e tyari sma go krosibei na Gado. Kande na disi meki taki furu sma bigin gebroiki den wortu fu wan domri di ben taki: „Efu krinfasi no de, dan gadofasi no sa de.”

Di William nanga Catherine Booth seti a Leger des Heils, dan den bigin gi sma deki-ati tu fu sori krinfasi. Soleki fa a buku Health and Medicine in the Evangelical Tradition (wan buku di e sori fa kerkisma musu sorgu gi a gosuntu fu den) e sori, dan na organisâsi dati bigin hari a prakseri fu sma nanga yepi fu den wortu disi: „Sopo, Supu, nanga Frulusu.” Baka dati, a sabiman Louis Pasteur nanga trawan bigin gi sma krinkrin buweisi taki bakterie e meki sma kon siki. A sani disi ben abi leki bakapisi taki lanti bigin du moro muiti fu sorgu taki sma no ben kon siki.

Wantewante kotoigi na krutubangi no ben abi fu bosi a Bijbel moro èn sma no ben musu dringi fu a srefi kan na skoro èn na den loko station. Wan kenki kon sosrefi na ini a gwenti di ben de fosi taki ala sma na kerki ben musu dringi win na ini a srefi kan. Ibri sma ben musu dringi win now  na ini wan tra kan. Iya, den fosi sma di ben bigin gi sma deki-ati fu abi krinfasi, trutru ben abi bun bakapisi nanga dati. Soleki fa wan skrifiman ben taki, dan sma ben kenki na so wan fasi taki a ben gersi taki krinfasi nomo ben de na den ede.

Ma dati no ben de fu langa. Heri esi bisnisman meki taki sma kon si sopo, wan aladei sani, leki wan sani di ben de fanowdu fu kon moi. Den bisnisman meki reklame na ala sortu koni fasi, fu meki sma denki taki den no ben bun nofo efu den no ben gebroiki spesrutu sortu sopo. A sani disi ben meki taki den sma disi ben dyarusu tapu den wan di ben gebroiki den sortu sopo disi. Telefisi e tan kori sma na a fasi disi. Wi no gwenti fu si tapu telefisi taki den pôpi sma na ini den reklame èn na ini den felem, e krin oso, e sibi prasi, e puru doti, noso e krin pupe fu den pusipusi noso fu den dagu fu den.

Sma de tu di feni taki a wroko di den e du gi trawan, e gi den moni fu sorgu densrefi èn fu bai den sani di den abi fanowdu. Den feni taki den no e kisi moni te den e tan na oso fu du den eigi osowroko. Fu san ede den ben sa hori a tanpresi fu den krin, efu den no e kisi moni gi dati? A denki disi meki taki sma na ini a ten disi feni taki krinfasi abi fu du nanga den eigi skin nomo.

A fasi fa Gado e denki fu krinfasi

Sondro tweifri, a muiti di sma ben du fosi fu leri trawan fu de krin, ben meki taki sma no ben libi na so wan morsu fasi moro. Dati ben de wan bun sani, bika krinfasi na wan sani di komoto fu Yehovah, a santa èn krin Gado. A e leri wi fa fu kisi winimarki, fu di wi e kon santa èn krin na ini ala den fasi fa wi e tyari wisrefi.—Yesaya 48:17; 1 Petrus 1:15.

Yehovah Gado de wan tumusi bun eksempre gi wi te a abi fu du nanga krinfasi. A krinfasi fu Gado, makandra nanga den tra fasi di a abi, de krin fu si na ini den sani di a meki (Romesma 1:20). A krin fu si taki den sani di Gado meki no e tyari pori kon fu wan langa pisi ten. Grontapu meki na so wan wondru fasi taki a man hori ensrefi krin, èn leki bakapisi fu dati, libisma nanga tra mekisani kan abi wan krin èn bun libi. Soso wan Mekiman di wani taki ala sani e tan krin, ben kan sorgu gi disi. A sani disi e meki wi frustan taki den sma di e anbegi Gado musu de krin na ini ala fasi fu den libi.

Fo prenspari fasi fa wi musu tan krin

Bijbel e taki dati anbegiman fu Gado musu de krin na fo difrenti fasi. Meki wi luku iniwan fu den fo fasi disi.

Na yeye fasi. Disi na a moro prenspari fasi fa wi musu de krin, bika a abi fu du nanga a fruwakti di wan sma abi fu kisi têgo libi. Ma furu sma no e du muiti fu de krin na yeye fasi. Fu taki en leki fa a de, fu man de krin na yeye fasi wani taki dati wi noiti musu du sani di abi fu du nanga falsi anbegi, bika Gado e si iniwan sortu falsi anbegi leki wan sani di no krin. Na apostel Paulus ben skrifi: „’Fu dati ede komoto na den mindri, èn poti yusrefi aparti’, na so Yehovah e taki, èn no fasi moro san no krin’; ’èn mi sa teki unu’” (2 Korentesma 6:17). A disipel Yakobus e taki krin fu a tori disi tu: „A fasi fu anbegi di krin èn di no pori, leki fa wi Gado èn Tata e si en, na disi: . . . fu no meki grontapu flaka yu.”—Yakobus 1:27.

Gado sori krin taki a no e feni en bun te sma e moksi falsi anbegi nanga a tru anbegi fu en. Falsi anbegi furutron abi fu du nanga sani di Yehovah e tegu gi èn nanga tegu kruktugado (Yeremia 32:35). Fu dati ede, Bijbel e gi tru Kresten deki-ati fu no abi noti fu du nanga falsi anbegi.—1 Korentesma 10:20, 21; Openbaring 18:4.

Na a fasi fa wi e tyari wisrefi. Gado e sori wi soifri tu san krin èn san no krin. Efeisesma 4:17-19 e taki disi fu heri grontapu: „Den de na dungru na frustan sei èn den drifi komoto fu a libi di de fu Gado . . . Fu di den lasi ala syen firi, den gi densrefi abra na wan lusu fasi fu tyari densrefi, fu libi ala sortu doti libi na wan gridi fasi.” Sma di abi den fisti denki disi kan sori dati na furu difrenti fasi. Den kan du den sani disi na so wan fasi taki ala sma kan si, noso den kan du den na wan kibri fasi. Fu dati ede Kresten musu luku bun.

Sma di lobi Gado, sabi taki den no musu libi  wan hurulibi, den no musu libi wan homo-sekslibi, den no musu abi seks bifo den trow, èn den no musu luku doti seksbuku nanga felem. Efu den ben o du den sani disi, dan den no ben o de krin na yeye fasi. Ma den pôpi sma na ini showbisnis di e gi trawan prisiriten èn den wan di e meki èn e sori sma modokrosi di de fu bai, na sma di gwenti fu du den sani disi di kari na fesi. Kresten musu luku bun nanga den sani dati. Te wan Kresten e go na den Kresten konmakandra noso te a abi switi demakandra nanga trawan, dan a no musu weri tumusi syatu krosi di e sori furu fu en skin. A sani dati sa meki taki a skin fu a sma disi sa hari a prakseri fu trawan èn nanga dati a sma disi sa sori sosrefi taki a no abi sakafasi. Wan sma di e weri den sortu krosi dati e tyari grontapu denki di no krin, kon na mindri den Kresten brada nanga sisa. Boiti dati, a kan meki sosrefi taki trawan e kisi prakseri di no krin. Kresten musu du ala muiti fu sori „a koni fu tapusei” te a abi fu du nanga den krosi di den e weri.—Yakobus 3:17.

Na frustan sei. Wi no musu tan prakseri sani di no krin. Yesus ben warskow wi gi a sani dati di a ben taki: „Ibriwan sma di e tan luku wan uma fu kan abi tranga lostu gi en, na ini en ati a du sutadu kaba nanga en” (Mateyus 5:28; Markus 7:20-23). Den wortu disi wani taki sosrefi dati wi no musu luku doti seks prenki nanga felem, wi no musu leisi doti sekstori, èn wi no musu arki singi di abi fu du nanga sani di no fiti. Fu dati ede, Kresten musu sorgu taki den no e flaka densrefi fu di den e tan prakseri sani di no krin. Den sortu prakseri disi ben sa kan meki taki wi e taki noso du sani di no bun srefisrefi.—Mateyus 12:34; 15:18.

Na skin sei. Soleki fa Bijbel e sori, dan santafasi nanga a krin di sma de krin na skin sei abi furu fu du nanga makandra. Fu gi wan eksempre, Paulus ben skrifi: „Lobiwan, fu di wi abi den pramisi disi, meki wi krin wisrefi fu ibri doti fu a skin èn fu a yeye, èn meki wi suku fu kon santa dorodoro, fu di wi abi frede gi Gado” (2 Korentesma 7:1). Fu dati ede, tru Kresten musu du ala san den man fu hori a skin fu den krin èn sosrefi na oso nanga a tanpresi fu den. Awansi Kresten no abi nofo watra fu wasi, toku den musu du ala muiti fu tan krin èn fu weri bun krosi.

Krinfasi na skin sei wani taki sosrefi taki wi no musu gebroiki nowan enkri sortu tabaka, wi no musu dringi tumusi furu sopi, èn wi no musu gebroiki drugs. Den sani disi sa meki a skin fu wi kon doti èn a sa kisi pori sosrefi. A skapuman di Heisingi e taki fu en, ben lobi a switi smeri fu den krosi fu a meisje fu Sulem (Heisingi 4:11). A bun fu sorgu wi skin, bika wi no wani prati tingi smeri gi sma. Aladi a bun fu gebroiki switismeri, toku wi musu tan wasi wi skin nanga den krosi fu wi doronomo.

Abi wan yoisti denki fu krinfasi

Son sma e du tumusi furu muiti fu sori krinfasi. Te wi e broko wi ede tumusi nanga krinfasi, dan dati kan meki taki a libi no e gi prisiri moro.  A sani disi kan teki furu fu wi ten sosrefi. Na a tra sei, te wi oso doti èn wi no e sorgu en bun, dan dati kan meki taki wi musu pai furu moni fu seti en baka. Fu dati ede, a moro bun sani di wi kan du, na fu krin wi oso doronomo, so taki a e fiti ai.

No poti tumusi furu sani na ini yu oso. Te wan oso abi tumusi furu sani na ini, dan a sa de muilek fu krin, èn wi no sa man doro ala uku fu na oso makriki fu si efu doti de drape. Te wi no abi tumusi furu sani na ini wi oso, dan wi kan krin en moro esi. Bijbel e gi wi a tumusi bun rai fu libi wan libi sondro tumusi furu pranpran: „Te wi abi nyanyan, krosi nanga wan presi fu tan, dan wi sa de tevrede nanga den sani disi.”—1 Timoteyus 6:8.

Hori yu oso krin. Ibriwan sma di e libi na ini na oso musu yepi fu hori en krin. Te sma no e hori den kamra fu wan oso krin, dan bakaten a heri oso sa kon doti. Te wan oso krin, dan dati wani taki dati ala sani na ini na oso dati de na tapu a yoisti presi. Fu gi wan eksempre, doti krosi no musu de na tapu a gron fu a sribikamra. Èn san de moro seryusu, na taki preisani nanga wrokosani no musu tan didon na tapu a gron, fu di den kan gi wan sma seryusu mankeri. Furu fu den ongoloku di e pasa nanga sma, e kon fu di den sma dati abi morsu fasi.

A krin fu si taki Kresten musu abi krinfasi. A profeiti Yesaya ben sori taki te wi libi na a fasi fa Gado wani, dan wi e waka „a Pasi fu Santafasi”. Baka dati a ben taki wan tra seryusu sani. A ben taki: „A wan di no krin no sa waka na en tapu” (Yesaya 35:8). Iya, te wi e suku fu abi krinfasi now, dan dati e sori krin taki wi abi frutrow na ini a pramisi di Gado gi taki a sa seti wan krin paradijs grontapu heri esi. Na a ten dati, na ala uku fu a moi grontapu disi, ala sma sa gi Yehovah Gado glori fu di den e hori densrefi soifri na den markitiki di a poti gi krinfasi.—Openbaring 7:9.

[Prenki na tapu bladzijde 6]

Ibriwan sma di e tan na ini wan oso musu yepi fu hori en krin

[Prenki na tapu bladzijde 7]

Grontapu e hori ensrefi krin na wan wondru fasi