Leri wan sani fu Nikodeimus

„EFU iniwan sma wani waka na mi baka, dan meki a drai en baka gi ensrefi èn meki a teki en pina-udu ibri dei baka èn waka na mi baka doronomo” (Lukas 9:23). Wan tu pôti fisiman nanga wan wisiwasi belastingman (wan sma di e piki moni gi lanti), teki a kari dati wantewante. Den libi ala sani fu waka na Yesus baka.—Mateyus 4:18-22; Lukas 5:27, 28.

Na ini a ten disi, Yesus e tan gi sma a kari fu waka na en baka, èn furu sma teki a kari. Ma son sma di lobi studeri Bijbel nanga Yehovah Kotoigi, e draidrai fu ’drai den baka gi densrefi èn fu teki a pina-udu fu den’. Den no wani teki a frantwortu nanga a grani na den tapu di wan sma e kisi te a tron wan disipel fu Yesus.

San e tapu son sma fu teki a kari di Yesus e gi? San e tapu den fu gi densrefi na Yehovah Gado? A tru taki son sma no leri fu bribi na ini wán Gado nomo, soleki fa a Dyu bribi nanga a Kresten bribi  ben leri dati. Fu dati ede a kan de so, taki den sma disi abi furu ten fanowdu fu kon frustan finifini taki wan almakti Mekiman de trutru. Ma srefi te den kon frustan heri bun taki Gado na wan trutru Sma, toku sonwan fu den e suku ala sortu fasi fu no waka na Yesus baka. Kande den e frede taki den famiriman noso den mati fu den no sa lobi taki den tron Yehovah Kotoigi. Trawan, di e frigiti taki wi e libi na ini wan ten pe a kaba no fara moro srefisrefi, e go suku biginen nanga gudu gi densrefi (Mateyus 24:36-42; 1 Timoteyus 6:9, 10). Awinsi san e meki sma draidrai fu tron bakaman fu Yesus, den kan leri wan sani fu a tori fu Nikodeimus, wan gudu Dyu tiriman di ben e libi na ini a ten fu Yesus.

Nikodeimus ben kisi moi okasi

Soso siksi mun baka di Yesus bigin en diniwroko na grontapu, Nikodeimus ben si taki Yesus ben de ’wan leriman di kon fu Gado’. No so langa pasa, Yesus ben du wondru na ini Yerusalem, na a Paskafesa fu 30 G.T. Den wondru disi ben naki na ati fu Nikodeimus. Fu dati ede a ben kon na Yesus, ma a ben du dati na neti. A ben wani fu taigi Yesus taki a ben bribi na ini en èn a ben wani kon sabi a leriman disi moro bun. Baka di Nikodeimus taki disi, dan Yesus fruteri en wan dipi tori. Yesus sori en taki wan sma musu „gebore ete wan tron” fu man kon na ini a Kownukondre fu Gado. Na a okasi dati, Yesus taki sosrefi: „Gado ben lobi grontapu sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi.”—Yohanes 3:1-16.

Nikodeimus ben kan abi wan moi howpu!  A ben kan tron wan bun mati fu Yesus èn na so fasi a ben sa man si nanga en eigi ai fa Yesus ben tyari ensrefi na grontapu. Nikodeimus ben de wan tiriman fu den Dyu èn wan leriman na ini Israel. Sobun, a ben sabi furu fu Gado Wortu. Fu di a ben abi a koni fu man si sani krin, meki a ben man si taki Yesus ben de wan leriman di Gado seni. Nikodeimus ben lobi yeye afersi, èn a ben de wan sma di e sori sakafasi trutru. A ben musu de wan muilek sani gi en, leki wan memre fu a moro hei krutubangi fu den Dyu, fu bribi taki na Gado ben seni a manpikin fu wan pôti temreman kon! Fu man tron wan disipel fu Yesus, dan a de tumusi prenspari taki wi e sori den fasi disi di Nikodeimus ben abi.

Soleki fa a sori, Nikodeimus no frigiti a man disi fu Nasaret. Tu nanga afu yari baka dati, na a Wiwirikampu-fesa, Nikodeimus go na wan konmakandra fu a Sanhedrin. Na a ten dati, Nikodeimus ben de „wan fu den” ete. Den granpriester nanga den Fariseiman seni ofsiri go fu teki Yesus tyari go sroto. Den ofsiri drai kon baka èn den taki: „Noiti ete wan tra sma taki na so wan fasi.” Den Fariseiman bigin wisiwasi den ofsiri: „Unu meki a man disi kori unu tu? Iniwan fu den tiriman noso Fariseiman poti bribi na ini en? Ma na ipi disi di no sabi a Wet, na frufruktu sma.” Nikodeimus no ben man tan tiri moro. A taki: „A no de so taki a wet fu wi e krutu wan man nomo, baka di a yere san a abi fu taki, èn baka di a kon sabi san a e du?” Di a taki dati, den tra Fariseiman bigin krutu en: „Yu komoto na Galilea tu? Go ondrosuku, dan yu sa si taki nowan profeiti sa komoto na Galilea.”—Yohanes 7:1, 10, 32, 45-52.

Sowan siksi mun baka dati, tapu a Paskafesa Dei fu 33 G.T., Nikodeimus si fa sma teki Yesus skin fu a pina-udu. A yepi Yosef fu Arimatea, wan tra memre fu a Sanhedrin, fu sreka a skin fu Yesus fu beri en. Fu man du dati, dan Nikodeimus tyari „mire nanga alowei” di ben e wegi sowan 100 pontu, akruderi den wegi di sma ben gebroiki na ini Rome. Dati na 33 kilo. A sani disi ben kostu bun furu moni. Nikodeimus ben musu abi a deki-ati sosrefi fu abi wan sani fu du nanga Yesus, fu di den tra  Fariseiman ben e kari Yesus „a bedrigiman”. Esi-esi den tu man ben sreka a skin fu Yesus, dan den beri en na ini a nyun memregrebi di ben de krosibei. Srefi na a momenti dati, Nikodeimus no ben sori sma ete efu a ben de wan disipel fu Yesus!—Yohanes 19:38-42; Mateyus 27:63; Markus 15:43.

Fu san ede a no ben teki wan bosroiti?

Yohanes no tyari kon na krin fu san ede Nikodeimus ben draidrai fu „teki en pina-udu” èn fu waka na Yesus baka. Ma Yohanes fruteri wan tu sani di kan meki wi frustan fu san ede a Fariseiman disi no ben man teki wan bosroiti.

Na a fosi presi, Yohanes sori taki a Dyu tiriman „ben kon na [Yesus] na neti” (Yohanes 3:2). Wán Bijbel sabiman e taki fu a tekst disi: „A no fu di Nikodeimus ben frede sma, meki a kon na neti. Ma Nikodeimus no ben wani miti nanga den ipi-ipi sma, di ben o koti en mofo te a ben o taki nanga Yesus.” Ma Yohanes kari Nikodeimus „a man di ben kon na [Yesus] na neti, a fosi leisi di a kon”. Na ini a tekst na fesi, Yohanes kari Yosef fu Arimatea ’wan man di de wan disipel fu Yesus, ma na wan kibri fasi, fu di a frede den Dyu’ (Yohanes 19:38, 39). Furu sma na ini a ten fu Nikodeimus ben e frede fu abi wan sani fu du nanga Yesus. Sobun, a kan de so taki Nikodeimus go na Yesus na neti fu di a ben „frede den Dyu”.—Yohanes 7:13.

Fu san ede yu e draidrai fu teki a bosroiti fu tron wan disipel fu Yesus? Yu e frede san den famiriman, den mati, noso den sma na yu wrokope o taki? „A frede gi libisma, na dati e seti wan trapu”, na so wan odo e taki. San yu kan du te yu frede? Na odo e taki moro fara: „Ma a sma di e frutrow tapu Yehovah, sa kisi kibri” (Odo 29:25). Fu man abi a frutrow dati na ini Yehovah, dan yu musu kon si gi yusrefi taki A sa yepi yu te yu abi bigi problema. Begi Yehovah èn aksi en efu a kan gi yu krakti, srefi te yu musu teki pikin bosroiti di abi fu du nanga yu anbegi. Safrisafri, a bribi nanga a frutrow di yu abi na ini Yehovah sa kon so tranga, taki yu sa man teki bigi bosroiti di e kruderi nanga Gado wani.

A kan de so tu, taki a prenspari wroko nanga a biginen di Nikodeimus ben abi leki wan fu den fesiman fu a kondre, tapu en fu teki a prenspari bosroiti fu drai en baka gi ensrefi. Na a ten dati, a musu de so taki a ben lobi en wroko srefisrefi leki wan memre fu a Sanhedrin. Yu e draidrai fu tron wan bakaman fu Krestes, fu di yu e frede taki yu o lasi yu biginen na ini a libimakandra? Yu e frede taki yu o abi fu libi wan tu sani fu man go na fesi? Nowan fu den sani disi man pasa a grani di wi e kisi te wi e dini a Moro Heiwan fu hemel nanga grontapu, di kan gi wi ala san wi e aksi akruderi a wani fu en.—Psalm 10:17; 83:18; 145:18.

Wan tra sani di kande meki taki Nikodeimus ben draidrai fu teki wan bosroiti, kan abi fu du nanga den gudu fu en. A kan de so taki Nikodeimus, wan Fariseiman, ben kon abi a srefi denki neleki den tra Fariseiman di ben de „sma di lobi moni” (Lukas 16:14). A bai di a ben man bai diri mire nanga alowei e sori taki a ben de wan guduman. Son sma na ini a ten disi e draidrai fu teki den frantwortu di Kresten e tyari, bika den e broko den ede nanga den gudu fu den. Ma Yesus ben memre den bakaman fu en: „Unu no musu broko un ede nanga un sili, fu san unu sa nyan noso san unu sa dringi, noso san unu sa weri na un skin. . . . Bika un hemel Tata sabi taki unu abi ala den sani disi fanowdu. Fu dati ede, tan suku fosi a kownukondre nanga en regtfardikifasi, èn ala den tra sani disi unu sa kisi tu.”—Mateyus 6:25-33.

A ben kan misi furu sani

Na Evangelie fu Yohanes nomo e taki fu a tori fu Nikodeimus. Ma a no e fruteri efu Nikodeimus tron wan bakaman fu Yesus. Sma taki dati Nikodeimus teki a sei fu Yesus èn taki a teki dopu. Fu di a du dati, meki den Dyu  frufolgu en. Den puru en na a wroko fu en, èn te fu kaba den seni en gowe na Yerusalem. Awinsi san pasa, toku wan sani de tru: Nikodeimus ben kan misi furu sani, fu di a ben draidrai fu teki wan bosroiti di Yesus ben de dyaso na grontapu.

Efu Nikodeimus ben bigin waka nanga Yesus baka a fosi leisi di a miti a Masra, dan a ben kan wroko skinskin nanga Yesus leki wan disipel fu en. Nikodeimus ben sabi furu sani, a ben abi a koni fu man si sani krin, a ben abi sakafasi, èn a ben frustan taki a ben abi yepi fanowdu na yeye fasi. Den sani disi ben kan meki a tron wan bun disipel. Iya, a ben kan yere den kefalek moi taki fu a Bigi Leriman. A ben kan leri prenspari sani fu den agersitori di Yesus ben fruteri. A ben kan si den kefalek moi wondru di Yesus ben e du, èn a ben man kisi krakti sosrefi fu den frumane di Yesus ben gi den apostel fu en bifo a gowe. Ma Nikodeimus ben misi ala den sani disi.

Fu di Nikodeimus no ben teki wan bosroiti, meki a ben misi furu sani. Wan fu den sani di a misi na a switi kari di Yesus e gi sma: „Kon na mi, un alamala di e wroko tranga èn di abi hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi safrifasi nanga sakafasi, èn unu sa kisi krakti baka. Bika mi tyatyari safu èn mi lai lekti” (Mateyus 11:28-30). Nikodeimus ben misi na okasi fu kisi a krakti disi fu Yesus srefi!

Fa a de nanga yu?

Sensi 1914, Yesus Krestes de na ini hemel leki a Kownu fu Gado en hemel Kownukondre. Yesus ben taki na fesi san ben o pasa na ini a denoya fu en, èn wan fu den sani dati na taki: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon” (Mateyus 24:14). Fosi a kaba doro, wi musu du a preikiwroko na heri grontapu. Yesus Krestes e prisiri taki libisma di no volmaakti, e teki prati na a wroko disi. Yu srefi kan abi wan prati na a wroko disi.

Nikodeimus ben frustan taki Yesus ben kon fu Gado (Yohanes 3:2). A kan, taki wan studie fu Bijbel meki yu kon frustan disi tu. A kan de so, taki yu kenki a fasi fa yu e libi, so taki a libi fu yu e kruderi nanga den markitiki fu Bijbel. Kande yu e go na den konmakandra fu Yehovah Kotoigi sosrefi fu kon sabi moro fu Bijbel. A de wan bun sani trutru taki yu e meki a muiti disi. Ma Nikodeimus ben musu du moro leki fu frustan nomo taki Yesus na a sma di Gado seni kon. A ben musu ’drai en baka gi ensrefi èn teki en pina-udu ibri dei baka èn waka na [Yesus] baka doronomo’.—Lukas 9:23.

Poti prakseri na san na apostel Paulus e fruteri wi. A skrifi: „Fu di wi e wroko makandra nanga en, wi e aksi unu nanga tranga fu no teki a bun-ati fu Gado èn misi a marki fu dati. Bika a e taki: ’Na ini wan bun ten mi ben yere unu, èn tapu wan dei fu frulusu, mi ben yepi unu.’ Luku! Now na a spesrutu bun ten. Luku! Now na a dei fu frulusu.”—2 Korentesma 6:1, 2.

Now na a ten fu kweki a bribi di sa yepi yu fu teki wan bosroiti. Fu man du dati, yu musu denki dipi fu den sani di yu e leri te yu e studeri Bijbel. Begi Yehovah, èn aksi en efu a kan yepi yu fu sori a bribi dati. Te yu e firi fa a e yepi yu, dan yu sa kisi warderi nanga lobi gi en, èn dati sa meki yu ’drai yu baka gi yusrefi èn teki yu pina-udu ibri dei baka èn waka baka Yesus Krestes doronomo’. Yu sa du dati nownow?

[Prenki na tapu bladzijde 9]

Fosi, Nikodeimus ben abi deki-ati fu teki a sei fu Yesus

[Prenki na tapu bladzijde 9]

Aladi sma ben gens Nikodeimus, toku a yepi fu sreka a skin fu Yesus fu beri en

[Prenki na tapu bladzijde 10]

Studie fu Bijbel nanga begi kan yepi yu fu teki wan bosroiti

[Prenki na tapu bladzijde 10]

Yu o teki a grani fu du a wroko di Yesus Krestes e tiri?