Wan foto na tapu wan bergi

„UNU na a leti fu grontapu. Wan foto di de na tapu wan bergi, den no kan kibri.” Dati na san Yesus ben fruteri den disipel fu en di a ben e hori a barinen Bergitaki fu en.​—Mateyus 5:14.

Furu foto fu Yudea nanga Galilea ben de na tapu wan bergi, den no ben de na ini lagipresi na den futu fu den bergi. Moro furu a ben de so taki sma ben e bow wan foto na tapusei fu wan bergi, fu di na so wan fasi feanti no man teki en abra makriki. Boiti den legre di ben kan broko kon na ini wan foto, dan yu ben abi grupu fufuruman tu di ben gwenti fu go fufuru èn fu go pori sani na ini den presi pe den Israelsma ben e libi (2 Kownu 5:2; 24:2). A ben moro makriki gi borgu di abi deki-ati, fu kibri wan foto pe ala den oso ben de krosibei fu makandra na tapu wan bergi. Fu kibri wan foto di de na ini wan lagipresi ben o moro hebi, èn so wan foto ben sa abi wan moro hei skotu fanowdu tu.

Den skotu fu den oso fu den Dyu ben pleister nanga karki. Te den oso dati ben de na ini grupu krosibei fu makandra na tapusei fu wan pikin bergi, dan sma ben kan si den oso disi awinsi den ben de bun fara (Tori fu den Apostel 23:3). Na ini a leti fu a son na Palestina, den foto disi di de na tapu pikin bergi ben e skèin leki wan flambo, neleki fa a de nanga den foto na a Mindrikondre Se na ini a ten disi.

Nanga yepi fu a sani disi di de wan prenspari pisi fu a kontren fu Galilea nanga Yudea, dan Yesus sori den bakaman fu en fa wan tru Kresten musu tyari ensrefi. A ben taki: „Sosrefi, meki un leti skèin na fesi sma, so taki den kan si den bun wroko fu unu èn kan gi glori na un Tata, di de na hemel” (Mateyus 5:16). Aladi Kresten no e du bun sani fu meki sma gi den glori, toku a bun fasi fa den e tyari densrefi de krin fu si.—Mateyus 6:1.

So wan bun fasi fu tyari yusrefi e hari a prakseri fu sma trutru, spesrutu te den Distrikt Kongres fu Yehovah Kotoigi e hori. Wan koranti na ini Spanyorokondre ben skrifi wan tori fu wan Kongres di ben hori no so langa pasa: „Sma fu tra kerki no e broko den ede so furu moro nanga Bijbel tori, ma nanga Yehovah Kotoigi dati no de so. Fu di den no wani meki a Bijbel lasi en krakti, meki den e du san a Wortu fu Gado e taki.”

Thomas na wan man di abi a frantwortu fu sorgu gi wan stadion na a noord-westsei fu Spanyorokondre. Kotoigi e hori konmakandra furufuru na ini a stadion dati. A man disi ben prisiri fu de na mindri sma di e du san a Wortu fu Gado e taki. A ben skoifi a dei di a pensyun fu en ben o bigin nanga wan tu wiki, soso fu ben kan de na wan Distrikt Kongres fu Yehovah Kotoigi. Baka a Kongres furu sma ben kon na en fu taigi en tangi fu a moi fasi fa a ben wroko makandra nanga den èn fu winsi en wan bun ten te a ben sa go nanga pensyun. Na a momenti dati a no ben man hori ensrefi moro èn a bigin krei. A ben taki: „Mi breiti srefisrefi taki mi kon sabi unu. Dati de wan fu den moro prisiri sani na ini mi libi.”

Wan foto na tapu wan bergi e hari a prakseri fu sma di e tanapu e luku en. A moi fu si so wan foto di de so hei, nanga a blaw loktu na en baka, èn den weti oso fu a foto disi di e brenki na ini a leti fu a son. Na a srefi fasi sma e si wantewante taki tru Kresten na sma di de tra fasi, fu di den e meki muiti fu libi akruderi den hei markitiki fu Bijbel, soleki eerlijkfasi, sari-ati, èn fu libi akruderi bun gwenti nanga gronprakseri.

Moro fara a de so taki, Kresten e skèin a waarheid leti, fu di den e du a preikiwroko. Na apostel Paulus ben taigi den fosi yarihondro Kresten:  „Fu di wi abi a diniwroko disi akruderi a sari-ati di wi ben kisi, wi no e gi abra . . . ma fu di wi e meki a waarheid kon de fu si, meki wi e rikomanderi wisrefi na a konsensi fu ibri sma, na fesi na ai fu Gado” (2 Korentesma 4:1, 2). Aladi den ben e kisi gens na ala sei pe den ben e preiki, toku Yehovah blesi a diniwroko fu den so taki na wan sani fu 60 G.T., Paulus ben kan skrifi taki a bun nyunsu ben preiki kaba „gi ala sma na ondro hemel”.—Kolosesma 1:23.

Na ini a ten disi, Yehovah Kotoigi e teki a komando fu Yesus, fu meki ’a leti fu den skèin na fesi ala sma’, leki wan seryusu sani. Yehovah Kotoigi e panya a bun nyunsu fu a Kownukondre na ini 235 kondre na heri grontapu. Den e taki nanga sma fu a bun nyunsu disi èn den e prati buku fu den sma kan leisi. Den Kotoigi wani taki a leti fu Bijbel waarheid musu skèin gi someni sma leki den man miti. Fu dati ede meki den e tyari buku nanga tori fu Bijbel kon na doro na ini sowan 370 tongo.—Mateyus 24:14; Openbaring 14:6, 7.

Den Kotoigi teki a tyalensi fu leri a tongo fu sma di froisi kon fu libi ini a kondre fu den. Den sma disi komoto na ini kondre pe lanti tapu a preikiwroko fu wi. Prakseri den furu sma fu China nanga Rosiakondre di froisi go na den bigi foto fu Noord Amerika. Kotoigi fu den difrenti presi drape ben meki muiti fu leri Sneisitongo, Rosiatongo, nanga tra tongo soso fu man preiki a bun nyunsu gi den sma dati. Fu taki en leti, na a momenti disi sma de di e leri trawan difrenti tongo na ini wan syatu pisi ten. Na so fasi a bun nyunsu kan preiki gi moro furu sma, now di a gron „weti kaba fu go koti”.—Yohanes 4:35.

A profeiti Yesaya ben taki na fesi: „A musu pasa na ini a kabapisi fu den dei taki a bergi fu na oso fu Yehovah sa poti kon steifi moro hei leki na ede fu den bergi, èn fu tru den sa opo en kon moro hei leki den pikin bergi; èn na en ala den nâsi musu go.” Nanga a fasi fa den e tyari densrefi èn nanga a diniwroko fu den, Yehovah Kotoigi e yepi sma na ala sei fu kon na „a bergi fu na oso fu Yehovah” fu leri fu Gado, èn fu leri fu waka den pasi fu En (Yesaya 2:2, 3). A prisiri bakapisi de neleki fa Yesus ben taki na fesi, taki leki wán man den ’e gi glori na a hemel Tata fu den’, Yehovah Gado.—Mateyus 5:16; 1 Petrus 2:12.