Ondrofenitori

Yehovah leri wi fa fu horidoro sondro fu gi abra

SOLEKI FA ARISTOTELIS APOSTOLIDIS FRUTERI

Na den pikin bergi di de na a noordsei fu a Kaukasusbergi, wan presi de di nen Pyatigorsk. Dati na wan foto na ini Rosiakondre di abi den barinen fonten pe watra e kuku komoto na ini a gron. A kondre switi fu tan tu fu di a presi no kowru tumusi, ma a no faya tumusi tu. Drape mi mama meki mi na ini 1929. Mi papa nanga mama ben de loweman di komoto fu Grikikondre. Tin yari na baka wi ben tron loweman baka. Dati ben de baka di na ogri-ati komunist tirimakti ben e yagi sma di no ben e agri nanga a denki fu den, èn di a situwâsi ben kon takru srefisrefi tu bika den ben e kiri sma di ben de fu wan tra ras. Ala den sani disi ben meki taki wi ben abi fu froisi go na Grikikondre.

BAKA di wi ben froisi go na Piraeus, na ini Grikikondre, dan a wortu „loweman” ben wani taki wan heri tra sani gi wi. Wi ben firi leki wi ben tron sma di nowan sma no sabi. Aladi mi nanga mi bigi brada ben abi nen fu tu barinen Griki filosofiaman, Sokrates nanga Aristoteles, toku pikinmoro noiti wi yere sma kari wi na den nen dati. Ala sma ben e kari wi, den pikin Rosiaman.

Syatu baka di a di fu Tu Grontapufeti bigin, dan mi mama di mi ben lobi sote ben kon lasi libi. Mi mama ben e du bun furu gi na osofamiri. Dati meki a dede fu en ben hebi gi wi srefisrefi. Fu di a ben siki wan moi pisi ten kaba, meki a ben leri mi fu du difrenti osowroko. San mi ben leri yepi mi bun furu na ini mi libi bakaten.

Orloku nanga a fri di sma kon fri

Na orloku, a teki di Doisrikondre ben teki a kondre abra na a ten fu den Nazi, nanga a trowe di den tra kondre di ben feti makandra nanga Doisrikondre ben e trowe bom, ben e meki a gersi leki ibri dei ben kan de wi lasti dei. Furu sma ben pôti, sma ben e pina fu di den no ben abi nyanyan, èn wan lo sma ben e dede. Fu sensi di mi ben abi 11 yari, mi ben abi fu wroko tranga makandra nanga mi papa fu sorgu gi den dri fu wi. Tu sani meki taki mi no ben man kisi bun  skoroleri. Wan sani na taki mi no ben sabi Grikitongo so bun èn a trawan ben de na orloku di ben e feti na ini a kondre nanga den bakapisi di kon fu dati.

Doisrikondre ben tiri Grikikondre wan pisi ten. Ma dati ben kon na wan kaba na ini oktober 1944. Syatu baka dati, mi kon miti nanga Yehovah Kotoigi. Fu di someni bruya nanga so furu problema ben de, meki a howpu di Bijbel e gi fu wan tumusi moi tamara ben naki mi ati trutru (Psalm 37:29). Fu tru, a ben de leki switismeri oli gi den soro fu mi fu sabi taki Gado pramisi taki a sa gi libisma têgo libi na ini wan grontapu pe vrede sa de (Yesaya 9:7). Na ini 1946 mi nanga mi papa ben teki dopu, fu sori taki wi ben gi wisrefi abra na Yehovah.

A yari baka dati, mi ben prisiri fu di mi ben kisi mi fosi frantwortu na ini a gemeente. Mi ben musu sorgu gi den tijdschrift (bakaten den ben kon kari a brada di ben e du a wroko dati tijdschrift dinari) na ini a di fu tu gemeente di ben seti na ini Piraeus. A kontren pe wi ben musu du a preikiwroko ben de fu Piraeus te go miti Eleusis, dati ben de sowan 50 kilometer. Na a ten dati furu salfu Kresten ben e dini na ini a gemeente dati. Mi ben abi a grani fu wroko makandra nanga den èn fu leri fu den. Mi ben lobi a demakandra nanga den, fu di den ben fruteri mi so furu ondrofenitori fu den tranga muiti di den ben musu du fu tan du a preikiwroko. A heri libi fu den ben sori krin taki efu wan sma wani dini Yehovah na wan getrow fasi, dan a musu abi furu pasensi èn a musu tan go doro sondro fu tapu (Tori fu den Apostel 14:22). Mi breiti srefisrefi taki nownow, moro leki 50 gemeente fu Yehovah Kotoigi de na ini a kontren dati!

Wan tyalensi di mi no ben fruwakti

Baka wan pisi ten, mi ben kon leri sabi Eleni, wan moi yongu Kresten uma di ben de wan fayafaya preikiman èn di ben e libi na ini a foto Patras. Na a kaba fu 1952 wi ben meki mofo fu trow. Ma wan tu mun baka dati, Eleni ben kon siki trutru. Datra ben kon si taki a ben abi wan takru sweri na ini en edetonton. Sani no ben sori bun kwetikweti. Datra ben o abi fu puru a sweri wantewante. Baka di wi du furu muiti, dan te fu kaba wi kon feni wan datra na Ateine di ben e lespeki a bribi fu wi. A ben de klariklari fu yepi Eleni sondro brudu, aladi na ini a ten dati den datra no ben abi so wan bun fasi fu yepi siki sma di no wani teki brudu (Lefitikus 17:10-14; Tori fu den Apostel 15:28, 29). Baka di den ben puru a sweri na ini en edetonton, den datra no ben man taki soifri fa a libi fu na uma di mi ben meki mofo nanga en fu trow ben o de bakaten. Den no ben man gi wi a dyaranti taki a siki no ben o kon baka.

San mi ben musu du now? Mi ben musu broko a mofo di mi ben meki nanga Eleni fu trow di mi ben si san pasa nanga en? Nôno! Di mi nanga en ben meki mofo fu trow, dan mi ben meki wan pramisi, sobun mi ben wani taki di mi taki iya dan a ben musu tan iya (Mateyus 5:37). Mi no ben gi misrefi na okasi kwetikweti fu denki tra fasi. Nanga yepi fu en bigi sisa, dan Eleni ben kon betre pikinso, èn wi ben trow na ini december 1954.

Dri yari baka dati, Eleni kon siki agen, èn a srefi datra ben abi fu yepi ete wan tron. Disi leisi a go moro dipi na ini na edetonton fu man puru a rutu srefi fu a sweri. A bakapisi fu dati ben de taki a wefi fu mi ben kon lan na wan sei fu en skin, èn taki a pisi fu en edetonton di ben e sorgu taki a ben man taki, ben kisi hebi mankeri. Now mi nanga en ben kisi fu du nanga wan lo tra  frekti problema. Fu du pikinpikin sani srefi ben kon tron bigi problema gi a lobi wefi fu mi. A fasi fa a ben e go na baka esi-esi, ben meki taki wi ben abi fu kenki wan tu sani na ini wi libi wantewante. Ma boiti dati, a ben de fanowdu taki wi ben musu horidoro sondro fu gi abra.

Na a ten dati a leri di mi mama ben leri mi fa fu du osowroko ben kon de wan bigi yepi gi mi. Fruku mamanten mi ben sreka ala den sani di ben de fanowdu fu bori a nyanyan gi a dei dati, dan Eleni srefi ben e bori a nyanyan. Furu tron wi ben e gi tra sma a kari fu kon nyan nanga wi. Sontron wi ben e gi furuten bedinari wan kari, sosrefi sma nanga suma wi ben studeri, tra Kresten na ini a gemeente di abi yepi fanowdu, noso tra sma. Den alamala ben e taki dati a nyanyan ben switi sote! Mi nanga Eleni ben e wroko makandra tu fu du tra osowroko, so taki na oso ben kan tan moi èn krin. Dritenti yari langa wi ben abi fu libi na a fasi disi.

A ben de fayafaya aladi a ben siki

A ben naki na ati fu mi nanga di fu trawan, fu si taki noti no ben kan meki a wefi fu mi lasi en lobi gi Yehovah, nanga a faya di a ben abi gi a diniwroko. Baka wan pisi ten èn baka di a ben du furu muiti, dan Eleni ben man taki pikinso, awinsi dati ben de wan tu wortu nomo. A ben lobi fu taki nanga sma na strati fu a bun nyunsu fu Bijbel. Te mi ben e go na tra presi fu du bisnis, dan mi ben tyari en go tu. Mi ben e sorgu taki mi poti a wagi na wan presi pe furu sma ben e waka pasa. Eleni ben e opo a fensre fu a wagi èn a ben e pristeri A Waktitoren nanga Ontwaakt! na den sma di ben e waka pasa. Na wan fu den okasi dati a ben prati sowan 80 tijdschrift na ini soso tu yuru. Furu tron a ben e teki ala den owru tijdschrift di ben de fu kisi ete na ini a gemeente. Eleni ben e preiki fayafaya na difrenti tra fasi tu.

Na ini ala den yari di mi wefi ben de wan malengrisma, a noiti no misi wan konmakandra, ala ten a ben e go nanga mi. A noiti no misi wan Kongres noso wan Kring Konmakandra, srefi te wi ben abi fu go na wan bigi konmakandra na ini tra kondre, fu di Yehovah Kotoigi ben e kisi frufolgu na ini Grikikondre. Aladi furu sani ben de di a no ben man du, toku a ben go nanga mi na den Kongres na ini Oostenrijk, Doisrikondre, Siprus, nanga tra kondre. Noiti Eleni no kragi èn noiti a ben dwengi mi fu poti moro prakseri na en tapu. Mi ben kisi moro frantwortu srefi na ini a diniwroko fu Yehovah. Ma dati ben meki taki sontron sani ben e kon pikinso moro hebi gi Eleni. Toku noiti a no kragi fu dati.

A heri tori disi ben leri mi fu tan horidoro ala ten sondro fu gi abra. Furu tron mi si fa Yehovah yepi mi. Den brada nanga sisa ben du ala san den man fu yepi wi, èn den ben yepi wi bun furu. Den datra sosrefi ben de wan bigi yepi gi wi. A fasi fa sani waka na ini den yari dati, meki taki mi no ben man abi wan fasti furuten wroko. Toku wi noiti no mankeri den sani di wi ben abi fanowdu. Ala ten wi ben e poti den afersi nanga a diniwroko fu Yehovah na a fosi presi na ini wi libi.—Mateyus 6:33.

Furu sma aksi wi san ben yepi wi fu tan go doro na ini den tranga ten dati. Now di mi sidon denki a tori, dan mi kon si taki wi ben kisi krakti fu horidoro sondro fu gi abra: fu di wi ben studeri Bijbel, èn ben e begi Gado komoto fu wi ati. Sosrefi fu di wi ben tan go na den konmakandra,  èn ben tan teki prati fayafaya na a preikiwroko. Noiti wi no frigiti den wortu fu Psalm 37:3-5 di e gi deki-ati: „Frutrow tapu Yehovah èn du bun; . . . Abi switi prisiri na ini Yehovah . . . Poti yu pasi na tapu Yehovah, èn frutrow na en tapu, èn ensrefi sa handri.” Wan tra tekst di ben de wan bigi yepi gi wi ben de Psalm 55:22: „Trowe yu hebi na Yehovah srefi tapu, èn ensrefi sa horibaka gi yu.” Leki wan pikin di e frutrow nanga en heri ati tapu en papa, na so wi ben trowe wi hebi tapu Yehovah. Ma a no dati wawan, wi ben libi den na En tu.—Yakobus 1:6.

Tapu 12 april 1987, mi wefi ben e preiki na wi mofodoro. Ne wan hebi isri doro naki tapu na en baka. Na a srefi ten a doro fringi en go te na sei pasi. Dati meki a ben kon kisi hebi mankeri. A bakapisi fu dati ben de taki, dri yari langa, a ben de na ini wan coma (dati na te wan sma fadon flaw èn a no man wiki moro). Te fu kaba, a dede na ini a fosi pisi fu a yari 1990.

Mi e dini Yehovah so bun leki mi man

Na ini 1960 den ben poti mi na wroko leki wan gemeente dinari na ini Nikaia, ini Piraeus. Fu sensi a ten dati mi kisi na okasi fu dini na ini furu tra gemeente na ini Piraeus. Aladi misrefi no abi pikin, toku mi ben abi a prisiri fu yepi furu pikin na yeye fasi fu kon tanapu kánkan na ini a tru anbegi. Sonwan fu den e dini now leki gemeente owruman, dinari ini a diniwroko, pionier, èn leki memre fu a Bethelfamiri.

Na ini 1975 a demokrasia ben seti baka na ini Grikikondre. Dati ben gi Yehovah Kotoigi na okasi fu bigin hori den Kongres fu den na wan fri fasi. Den no ben abi fu du dati na wan kibri fasi moro na ini busi. Wan tu fu wi ben yepi fu orga Kongres na ini tra kondre. Na ondrofeni di wi ben kisi fu dati, sori fu de wan yepi gi wi now. Fu dati ede, mi ben kisi a grani nanga a prisiri fu dini na ini difrenti Kongres Komte, furu yari langa.

Na ini 1979 wi ben bigin seti sani fu bow wi fosi bigi konmakandra-presi na ini Grikikondre, na a lanki fu a foto Ateine. Mi ben kisi a wroko fu yepi fu orga èn fu du a bigi bow-wroko disi. Fu ben man du a wroko disi mi ben abi fu tan horidoro tu sondro fu gi abra. Den dri yari di mi ben wroko makandra nanga hondrohondro brada nanga sisa di ben gi ala den krakti, ben meki taki wi ben kon kisi wan krosibei matifasi nanga makandra fu lobi nanga wánfasi. Noiti mi no sa frigiti den moi sani di wi ben ondrofeni di wi ben e du a bow-wroko dati.

Mi yepi strafuman fu feni a waarheid

Wan tu yari baka dati wan nyun okasi ben opo gi mi. Krosibei fu a kontren pe a gemeente fu mi ben e du a preikiwroko na ini Korydallos, yu abi wan fu den moro bigi strafu-oso fu Grikikondre. Sensi April 1991, mi leki wan dinari fu Yehovah Kotoigi kisi a wroko fu go na a strafu-oso dati ibri wiki. Mi kisi primisi fu studeri Bijbel nanga den strafuman di wani sabi moro èn fu hori Kresten konmakandra nanga den. A de krin taki a Wortu fu Gado abi furu krakti na tapu sma, fu di furu fu den strafuman tyari bigi kenki kon na ini den libi (Hebrewsma 4:12). Disi ben naki na ati fu den sma di e wroko na ini a strafu-oso èn sosrefi fu tra strafuman. Sonwan fu den strafuman nanga suma mi studeri komoto na strafu-oso kaba èn now den de preikiman fu a bun nyunsu.

Wan pisi ten mi studeri nanga dri ogri man, di ben sroto fu di den ben e seri drugs. Baka di den ben go na fesi na ini den sani di den leri, dan den bigin sorgu den skin moro bun. Te den ben e kon fu studeri, dan den ben e krabu den barba puru, èn den ben e kan den wiwiri moi. Augustus na wan fu den moro faya mun na ini Grikikondre! Toku den man ben weri empi nanga das. A driktoro fu a strafu-oso, na edeman fu den sma di e luku den strafuman nanga wan tu wrokoman ben lon komoto na ini den kantoro fu kon luku san e pasa. Den ben fruwondru srefisrefi fu san den ben si!

Wan tra moi ondrofeni di mi ben abi ben pasa na ini a pisi fu a strafu-oso pe den e hori den uma strafuman. Mi ben bigin studeri nanga wan uma di musu koti strafu en heri libi langa, fu di a ben kiri sma. Ala sma ben sabi en leki wan uma di ben ogri srefisrefi. Heri esi den Bijbel waarheid di a ben e leri meki taki a bigin kenki a fasi fa a ben e tyari ensrefi na so wan fasi taki furu sma ben feni taki a ben e kenki fu wan lew kon tron wan skapu! (Yesaya 11:6, 7) Heri esi a driktoro fu a strafu-oso ben bigin kisi moro lespeki gi en èn  a ben bigin frutrow en moro nanga moro tu. Mi ben breiti fu si fa a ben e tan go na fesi na yeye fasi, teleki a ben gi ensrefi abra na Yehovah.

Mi yepi den sikiwan nanga den owruwan

Fu di mi ben si fa mi wefi ben pina so langa nanga a siki fu en, meki mi ben man poti moro prakseri na a nowtu fu den sikiwan nanga den owruwan di de na wi mindri. Ibritron te mi ben e leisi na ini den publikâsi fu wi fu a fasi fa wi musu meki muiti fu yepi den sortu sma dati na wan lobi-ati fasi, dan mi ben wani srefisrefi fu du dati. Mi ben tyari den pisi tori dati kon na wan èn mi ben e kibri den bun. Baka wan tu yari mi ben abi so furu fu den tori dati, taki a ben kon de leki wan buku fu moro leki wan hondro bladzijde. A fosi tori di mi ben kibri, ben de “Consideratie met oudere en in moeilijkheden verkerende personen” (Hori den owrusma nanga den wan di e pina na prakseri), di mi ben teki puru na ini De Wachttoren fu 15 Oktober 1962. Furu fu den tori dati ben e sori taki a ben sa de wan bun sani taki a gemeente e seti sani fu sorgu gi den sikiwan nanga den owruwan na den mindri.—1 Yohanes 3:17, 18.

Den owruman ben seti wan grupu fu brada nanga sisa di ben de klariklari fu sorgu gi den sani di den sikiwan nanga den owruwan ini wi gemeente abi fanowdu. Wi ben prati den friwani wrokoman dati na ini grupu. Wan grupu ben e gi yepi na deiten, wan trawan ben e yepi neti yuru. Wan tra grupu di ben abi wagi ben e tyari sma nanga wagi, èn wan grupu ben de tu di ben kan gi yepi awinsi sortu yuru. Den wan disi ben de wan grupu fu sma di ben kan gi yepi wantewante te dati ben sa de fanowdu.

Den muiti dati di sma ben du, ben tyari furu winimarki kon. Fu gi wan eksempre, na wan okasi wi ben go luku wan siki sisa tapu wan yuru di wi ben gwenti fu go luku en ibri dei. Di wi doro wi kon si taki a e didon na gron, a ben fadon flaw. Wi ben aksi wan sisa di ben e tan krosibei, fu kon nanga en wagi. Na ini tin miniti nomo a ben tyari a siki sisa go na a ati-oso di ben moro krosibei! Datra ben taki dati a tyari di den tyari en kon wantewante ben meki taki a ben tan na libi.

A warderi di den sikiwan nanga den owruwan e sori gi a yepi di den kisi fu sma fu a grupu, na wan sani di e gi furu prisiri. Wi ati e prisiri fu tru taki wi abi a howpu fu libi nanga den brada nanga sisa disi na ini wan ten pe sani o de tra fasi, na ini a nyun grontapu fu Gado. Wi breiti sosrefi taki a yepi di wi ben man yepi den ben meki taki den ben man tan horidoro di den ben e pina. Dati na wan moi pai gi a wroko fu wi.

Fu di mi tan go doro meki mi kisi pai

Now mi e dini leki owruman na ini wan gemeente na ini Piraeus. Aladi mi kon owru èn abi problema nanga mi gosontu, toku mi de koloku èn mi e tan abi wan fayafaya prati na den sani di a gemeente seti.

Na ini den yari di pasa, dan muilek situwâsi, hebi tesi, nanga sani di pasa di mi no ben fruwakti, ben meki taki furu tron mi ben musu abi deki-ati fu tan tanapu steifi èn fu no gi abra. Ma alaten Yehovah gi mi a krakti fu man wini den problema disi. Ibri leisi baka mi ondrofeni taki den wortu disi fu a psalm skrifiman tru: „Di mi ben taki: ’Mi futu seiker no sa buweigi ensrefi stanfaste’, dan a ben de yu eigi lobi bun-ati, o Yehovah, di ben tan horibaka gi mi. Te den prakseri fu mi di e trubu mi, ben kon furu na inisei fu mi, dan a ben de den trowstu fu yu di ben bigin boboi mi sili.”—Psalm 94:18, 19.

[Prenki na tapu bladzijde 25]

Nanga mi wefi, Eleni, baka di a ben kisi wan oparâsi a di fu tu leisi, na ini 1957

[Prenki na tapu bladzijde 26]

Na wan Kongres fu Neurenberg, na ini Doisrikondre, na ini 1969

[Prenki na tapu bladzijde 28]

A grupu fu brada nanga sisa di ben e yepi den sikiwan nanga den owruwan