Yu kisi „a yeye fu waarheid”?
Yu kisi „a yeye fu waarheid”?
„A Tata . . . sa gi unu wan tra yepiman di sa de nanga unu fu têgo, a yeye fu waarheid.”—YOHANES 14:16, 17.
1. Sortu prenspari sani Yesus ben fruteri den apostel fu en na a ten fu den lasti yuru di a ben de nanga den na ini a tapusei kamra?
„MASRA, pe yu e go?” Dati ben de wan fu den aksi di den apostel fu Yesus ben poti gi en, na ten fu den lasti yuru di a ben de makandra nanga den na ini wan tapusei kamra na Yerusalem (Yohanes 13:36). Baka di den ben de makandra wan pisi ten, dan Yesus taigi den taki a ten ben doro now fu gowe libi den èn fu drai go baka na en Tata (Yohanes 14:28; 16:28). Ensrefi no ben o de nanga den moro fu gi den rai èn fu piki den aksi fu den. Ma a trowstu den nanga den wortu disi: „Mi sa aksi a Tata èn a sa gi unu wan tra yepiman [noso wan trowstuman] di sa de nanga unu fu têgo.”—Yohanes 14:16.
2. San Yesus ben pramisi fu seni gi den disipel, baka te a ben gowe?
2 Yesus ben taigi den disipel fu en san na a yepiman dati èn a ben tyari kon na krin sosrefi fa a yepiman disi ben o yepi den. A ben taigi den: „Ma den sani disi mi no ben taigi unu na a bigin, bika mi ben de nanga unu. Ma now mi e go na en di seni mi . . . A de fu a bun fu unu taki mi e gowe. Bika efu mi no e gowe, dan a yepiman no sa kon na unu kwetikweti; ma efu mi e gowe, mi sa seni en kon na unu . . . . Te a wan dati doro, a yeye fu waarheid, dan a sa tiri unu na ini ala waarheid.”—Yohanes 16:4, 5, 7, 13.
3. (a) O ten Yesus ben seni „a yeye fu waarheid” gi den fosi Kresten? (b) San na wan prenspari fasi fa a yeye ben de wan „yepiman” gi den?
3 A pramisi disi ben kon tru na a Pinksterfesa fu 33 G.T., soleki fa na apostel Petrus ben sori: „Gado ben gi a Yesus disi wan opobaka, èn fu a sani disi wi alamala na kotoigi. Dati meki, fu di Gado ben poti en hei na a reti-anu fu en èn fu di a ben kisi a pramisi santa yeye fu a Tata, meki a kanti a sani disi kon di unu e si èn e yere” (Tori fu den Apostel 2:32, 33). Soleki fa wi sa si, dan a santa yeye di den fosi Kresten ben kisi tapu a Pinksterfesa, ben du furu sani gi den. Ma Yesus ben pramisi den taki „a yeye fu waarheid” ben o ’tyari ala den sani di a ben fruteri den, kon baka na ini a prakseri fu den’ (Yohanes 14:26). A yeye disi ben o yepi den fu memre a fasi fa Yesus ben du en diniwroko èn sosrefi den sani di a ben leri sma. A yeye ben o yepi den fu memre den wortu srefi di Yesus ben gebroiki, so taki den ben kan skrifi den poti na tapu papira. Disi ben o de wan yepi spesrutu gi a grani apostel Yohanes di ben bigin skrifi na Evangelietori fu en na a kaba fu a fosi yarihondro G.T. Na Evangelietori dati e taki fu a prenspari rai di Yesus ben gi, di a ben seti a Memrefesa fu a dede fu en.—Yohanes kapitel 13-17.
4. Fa „a yeye fu waarheid” ben yepi den fosi salfu Kresten?
4 Yesus ben pramisi den fosi disipel dati sosrefi taki a yeye ben o ’leri den ala sani’ èn taki a ben o ’tiri den na ini ala waarheid’. A yeye ben o yepi den fu frustan den moro dipi sani di skrifi na ini den Buku fu Bijbel èn a ben o yepi den fu tan abi wán denki, wán fasi fu frustan sani, èn wán marki (1 Korentesma 2:10; Efeisesma 4:3). Na so wan fasi a santa yeye ben gi den fosi Kresten dati a frantwortu fu wroko makandra leki wan „getrow èn koni srafu”, so taki den ben kan gi ibri salfu Kresten yeye „nyanyan na a reti ten”.—Mateyus 24:45.
A yeye e gi kotoigi
5. (a) Sortu nyun howpu Yesus ben gi den disipel fu en tapu a neti fu 14 Nisan 33 G.T.? (b) Fa a santa yeye ben o yepi fu meki a pramisi fu Yesus kon tru?
5 Tapu a neti fu 14 Nisan 33 G.T., Yesus fruteri den disipel fu en taki a ben o meki den kon na en bakaten, fu tan makandra nanga en èn nanga en Tata na ini hemel. A ben taigi den: „Na ini na oso fu mi Tata furu tanpresi de. Efu dati no ben de so, mi ben o taigi unu, bika mi e gowe fu sreka wan presi gi unu. Sosrefi, te mi e gowe èn e sreka wan presi gi unu, dan mi sa kon baka èn misrefi sa teki unu na mi oso, so taki unu kan de tu pe mi de” (Yohanes 13:36; 14:2, 3). Den ben o tiri makandra nanga en na ini en Kownukondre (Lukas 22:28-30). Fu man kisi a libi disi na ini hemel, dan den ben musu „gebore fu a yeye” leki yeye manpikin fu Gado, èn Gado ben musu salfu den fu dini leki kownu nanga priester makandra nanga Krestes na ini hemel.—Yohanes 3:5-8; 2 Korentesma 1:21, 22; Titus 3:5-7; 1 Petrus 1:3, 4; Openbaring 20:6.
6. (a) O ten a hemel kari bigin, èn omeni sma kisi a kari disi? (b) San na a dopu fu den wan di kisi kari?
6 Soleki fa a sori, dan a „hemel kari” disi di ben bigin tapu a Pinksterfesa fu 33 G.T., kon na wan kaba na wan sani fu 1935 (Hebrewsma 3:1). Ala nanga ala, 144.000 sma kisi a santa yeye fu tron memre fu a yeye Israel. Den sma disi „ben bai puru na mindri libisma” (Openbaring 7:4; 14:1-4). Den dopu kon tron a yeye skin fu Krestes, den dopu kon tron a gemeente fu en, èn den dopu fu dede a srefi dede leki en (Romesma 6:3; 1 Korentesma 12:12, 13, 27; Efeisesma 1:22, 23). Baka di den teki dopu na ini watra èn baka di den salfu nanga santa yeye, dan den bigin libi wan libi pe den musu tan hori a soifri retifasi fu den teleki den dede.—Romesma 6:4, 5.
7. Fu san ede salfu Kresten wawan abi a reti fu nyan fu a brede èn fu dringi fu a win na a Memrefesa?
7 Den salfu Kresten disi, di ben de Israelsma na yeye fasi, ben de na ini a nyun frubontu di Yehovah ben meki nanga „na Israel fu Gado” (Galasiasma 6:16; Yeremia 31:31-34). A brudu di Krestes trowe, e horibaka gi a nyun frubontu disi. Yesus ben taki fu disi di a ben seti a Memrefesa fu a dede fu en. Lukas e skrifi: „A teki wan brede . . . , a taki tangi, a broko en, èn ben gi en na den, aladi a taki: ’Disi wani taki mi skin, di sa gi fu a bun fu unu. Tan du disi fu memre mi.’ A teki a beker tu, baka di den nyan, èn a taki: ’A beker disi wani taki a nyun frubontu akruderi a brudu fu mi, di sa kanti trowe fu a bun fu unu’” (Lukas 22:19, 20). A fikapisi wawan, noso den wan fu den 144.000 sma di de na grontapu ete, abi a reti fu nyan fu a brede èn fu dringi fu a win na a Memrefesa fu a dede fu Krestes.
8. Fa den salfuwan sabi taki den kisi a kari fu go na hemel?
8 Fa den salfuwan sabi taki den kisi a kari fu go na hemel? A santa yeye e gi den wan krinkrin kotoigi fu dati. Na apostel Paulus ben skrifi gi den sortu sma disi: „Ala sma di e kisi tiri fu a santa yeye fu Gado, na manpikin fu Gado. . . . A yeye srefi e gi kotoigi nanga a yeye fu wi taki wi na pikin fu Gado. Fu dati ede, efu wi na pikin, dan wi na erfgenaam tu, trutru erfgenaam fu Gado, ma kompe erfgenaam nanga Krestes, ma soso te wi e pina nanga makandra, so taki makandra wi tu kan kisi glori” (Romesma 8:14-17). A kotoigi disi di a yeye e gi, trutru abi bigi krakti na sma tapu. Dati meki den sma di e tweifri pikinso nomo efu den kisi a hemel kari, kan sabi wantewante taki dati no de so. Fu dati ede, den no sa nyan fu a brede èn dringi fu a win na a Memrefesa.
A yeye nanga den tra skapu
9. Sortu tu difrenti grupu den Evangelietori nanga a buku Openbaring e taki fu den?
9 Fu di Yesus ben sabi taki wan pikin grupu Kresten nomo ben kisi a kari fu tron memre fu a yeye Israel, meki a kari den a „pikin ipi”. Den kisi okasi fu go na ini a „koi” fu a nyun frubontu. Disi de heri tra fasi leki a bigi ipi fu „tra skapu” di a musu tyari kon makandra sosrefi, soleki fa a ben taki (Lukas 12:32; Yohanes 10:16). Den tra skapu di Yesus e tyari kon makandra na ini a ten fu a kaba, sa de a „bigi ipi” di sa pasa „a bigi banawtu”, èn den sa abi a howpu sosrefi fu libi fu têgo na tapu wan paradijs grontapu. Ma a fisyun di Yohanes ben kisi na a kaba fu a fosi yarihondro G.T., e poti prakseri na a difrenti na mindri a bigi ipi disi nanga den 144.000 memre fu a yeye Israel (Openbaring 7:4, 9, 14). Den tra skapu e kisi a santa yeye tu? Efu dati de so, dan fa disi abi krakti tapu a libi fu den?
10. Fa den tra skapu e teki dopu „na ini a nen fu a Tata èn fu a Manpikin èn fu a santa yeye”?
10 A de so trutru taki a santa yeye abi krakti tapu a libi fu den tra skapu. Fu sori taki den gi densrefi abra na Yehovah, dan den e teki dopu „na ini a nen fu a Tata èn fu a Manpikin èn fu a santa yeye” (Mateyus 28:19). Den e erken taki Yehovah abi a reti fu tiri. Den e teki Krestes leki a Kownu nanga a Frulusuman fu den. Boiti dati, den e meki a yeye fu Gado, noso a wroko krakti fu en, wroko tapu a libi fu den. Ibri dei den e du muiti fu sori „a froktu fu a yeye”, namku „lobi, prisiri, vrede, langa pasensi, switifasi, bun-ati, bribi, safri-atifasi, [nanga] a dwengi di wan sma e dwengi ensrefi”.—Galasiasma 5:22, 23.
11, 12. (a) Fa den salfuwan kon santa na wan spesrutu sortu fasi? (b) Na sortu fasi den tra skapu kon santa?
11 Den tra skapu musu meki a Wortu nanga a santa yeye fu Gado wroko na den tapu, so taki den e kon santa. Den salfuwan kon santa kaba na wan spesrutu sortu fasi, fu di Gado fruklari taki den regtfardiki èn taki den santa fu di den na Krestes en trowmisi (Yohanes 17:17; 1 Korentesma 6:11; Efeisesma 5:23-27). A profeiti Danièl e taki fu den leki „den santawan fu a Moro Heiwan”. Den e kisi a Kownukondre di abi a „manpikin fu libisma”, Krestes Yesus, leki tiriman (Danièl 7:13, 14, 18, 27). Yehovah ben taigi a nâsi Israel wan leisi kaba nanga yepi fu Moses nanga Aron: „Mi na Yehovah, un Gado; èn unu musu santa unsrefi èn unu musu sori taki unu de santa, bika mi de santa.”—Lefitikus 11:44.
12 Te wan sma „kon santa”, dan dati wani taki dati a sma disi poti aparti fu du diniwroko gi Yehovah Gado. Na ini 1938, The Watchtower (A Waktitoren) ben skrifi kaba taki den Yonadabsma, noso den tra skapu, „musu kon frustan taki ibri sma di wani kon na ini a bigi grupu èn di wani libi na grontapu, musu gi ensrefi abra na Gado èn a musu kon santa sosrefi”. A buku Openbaring di e taki fu a fisyun fu a bigi ipi, e sori taki den sma disi „wasi den langa krosi fu den èn meki den kon weti na ini a brudu fu a Pikin Skapu”. A buku e taki sosrefi taki den „e du santa diniwroko gi [Yehovah] na ini a tempel fu en dei nanga neti” (Openbaring 7:9, 14, 15). Nanga a yepi fu a santa yeye, den tra skapu e du ala muiti fu doro den markitiki di Yehovah poti gi santafasi.—2 Korentesma 7:1.
Wi musu du bun gi den brada fu Krestes
13, 14. (a) Fa den skapu kan kisi frulusu, soleki fa na agersitori fu den skapu nanga den bokoboko e sori? (b) Fa den tra skapu yepi den Kresten brada fu den na ini a ten disi fu a kaba?
13 Na ini na agersitori fu den skapu nanga den bokoboko, Yesus ben poti krakti tapu a bun matifasi di den tra skapu nanga a pikin ipi abi. A ben gebroiki na agersitori disi di a ben taki na fesi fu „a bosroiti fu a seti fu sani”. Na ini na agersitori dati, Krestes sori krin taki a frulusu fu den tra skapu abi furu fu du nanga a fasi fa den ben o handri nanga den salfuwan di a ben kari „mi brada”. Krestes ben taki: „A kownu sa taigi den wan di de na en reti-anusei: ’Un kon, unu di mi Tata blesi, teki a kownukondre di sreka gi unu sensi di grontapu seti.’ . . . Fu tru, mi e taigi unu: ’Efu unu du disi nanga wan fu den moro mendriwan fu den brada disi fu mi, dan unu du en nanga mi.’”—Mateyus 24:3; 25:31-34, 40.
14 Den wortu „efu unu du disi”, e sori go na den lobi-ati sani di sma du fu yepi den salfu brada fu Krestes. Ma a grontapu fu Satan si den leki freimdesma, èn a poti den na dungru-oso srefi. Den salfuwan ben abi nyanyan, bun krosi, nanga datrayepi fanowdu (Mateyus 25:35, 36, futuwortu). Na ini a ten disi fu a kaba, furu fu den salfuwan kisi fu du nanga den srefi sortu situwâsi disi, èn dati de so sensi 1914. A disiten historia fu Yehovah Kotoigi e sori taki den kisi yepi fu den getrow kompe fu den, namku den tra skapu di handri akruderi a tiri fu a yeye.
15, 16. (a) Nanga sortu wroko den tra skapu yepi den salfu brada fu Krestes na grontapu? (b) Fa den salfuwan sori den tra skapu taki den e warderi den?
15 Wan spesrutu fasi fa den salfu brada fu Krestes kisi yepi na ini a ten disi fu a kaba, na taki den tra skapu yepi den fu du a wroko di Gado gi den fu du, èn dati na fu ’preiki a bun nyunsu disi fu a kownukondre na heri grontapu pe sma e libi, leki wan kotoigi gi ala nâsi’ (Mateyus 24:14; Yohanes 14:12). Na ini den yari di pasa, a grupu fu salfuwan na grontapu kon moro pikin, ma den tra skapu kon tron so furu taki milyunmilyun fu den de now. Dusundusun fu den dini leki furuten preikiman, leki pionier èn leki zendeling, èn den panya a bun nyunsu fu a Kownukondre „te na a moro farawe presi fu grontapu” (Tori fu den Apostel 1:8). Trawan fu den e du ala muiti fu teki prati na a kotoigiwroko èn den de klariklari fu gebroiki a moni fu den fu horibaka gi a prenspari wroko disi.
16 Den salfu brada fu Krestes trutru e warderi a getrow fasi fa den tra skapu disi e yepi den! Disi ben de krin fu si na ini a buku di a srafu grupu tyari kon na doro na ini 1986. A buku dati nen Wereldomvattende zekerheid onder de „Vredevorst” (Seikerfasi na heri grontapu ondro a „Kownu fu vrede”). A buku e taki: „Sensi a Di fu Tu Grontapufeti, den sani di Yesus ben taki na fesi fu ’a bosroiti fu a seti fu sani’, e kisi wan kontru. Dati e kon moro furu fu di a ’bigi ipi’ fu ’tra skapu’ yepi wi bun furu. Fu dati ede wi de nanga tangi na ati trutru gi a ’bigi ipi’ fu sma disi di de na heri grontapu èn di e taki someni difrenti tongo. Den du bun furu fu yepi taki den sani di Yesus ben taki na fesi na Mateyus 24:14, e kisi wan kontru.”
’Sondro wi, den no sa kon de volmaakti’
17. Fa den getrow sma fu owruten di sa kisi wan opobaka na grontapu no ’sa kon de volmaakti sondro’ den salfuwan?
17 Na apostel Paulus di ben de wan fu den salfuwan, ben taki fu getrow man nanga uma di ben libi na ini a ten bifo Krestes, di a ben skrifi: „Ala den wan disi, aladi a bribi fu den ben kotoigi gi den, no ben kisi a kontru fu a pramisi, fu di Gado ben si wan moro bun sani gi wi na fesi [dati wani taki gi den salfuwan], so taki sondro wi den no ben sa kan kon de volmaakti” (Hebrewsma 11:35, 39, 40). Na ini a Dusun Yari Tiri, Krestes nanga den 144.000 salfu brada fu en na hemel, sa dini leki kownu nanga priester èn den sa meki sma na grontapu kisi wini fu a frulusu-ofrandi fu Krestes. Na so fasi den tra skapu sa „kon de volmaakti” na skin sei èn na frustan sei.—Openbaring 22:1, 2.
18. (a) San den tru tori na ini Bijbel musu yepi den tra skapu fu kon frustan? (b) Sortu howpu den tra skapu abi, aladi den e wakti „a tyari di den manpikin fu Gado o tyari kon na krin”?
18 Ala den sani disi musu meki den tra skapu frustan bun fu san ede den Griki Buku fu Bijbel e poti so furu prakseri na Krestes nanga den salfu brada fu en, èn na a prenspari wroko di den e du fu yepi meki den prakseri fu Yehovah kon tru. Dati meki den tra skapu e si en leki wan grani fu yepi a salfu grupu na ala sortu fasi fa den man yepi den. Na a srefi ten den e wakti „a tyari di den manpikin fu Gado o tyari kon na krin” na Armagedon èn na ini a Dusun Yari Tiri. Den abi a howpu taki den „sa kon fri tu fu a katibo fu porifasi èn den sa abi a glori fri fu den pikin fu Gado”.—Romesma 8:19-21.
Meki wi de wán na ini a yeye na a Memrefesa
19. San „a yeye fu waarheid” du gi den salfuwan èn gi den tra skapu? Fa den sa de na ini wánfasi tapu a neti fu 28 maart?
19 Tapu 14 Nisan 33 G.T., Yesus ben taki na ini a lasti begi fu en: „Mi e aksi . . . so taki den alamala kan de wán, neleki fa yu, Tata, de na ini wánfasi nanga mi èn mi de na ini wánfasi nanga yu, so taki den kan de sosrefi na ini wánfasi nanga wi, so taki grontapu kan bribi taki yu ben seni mi kon” (Yohanes 17:20, 21). Fu di Gado lobi den salfuwan èn a libisma famiri di e arki en, dati meki a seni en Manpikin kon fu gi en libi, so taki den kan kisi frulusu (1 Yohanes 2:2). „A yeye fu waarheid” tyari wánfasi kon na mindri den brada fu Krestes nanga den tra skapu. A neti fu 28 maart, baka sondongo, den tu grupu disi sa kon makandra fu memre a dede fu Krestes èn fu memre ala san Yehovah du gi den nanga yepi fu na ofrandi fu en lobi Manpikin, Krestes Yesus. Meki a de so taki a wánfasi fu den sa kon moro tranga fu di den sa de na a prenspari okasi disi èn meki a de so tu taki den e kisi wan moro fasti bosroiti fu tan du Gado wani. Na so fasi den sa sori taki den e prisiri fu de sma di Yehovah lobi.
Luku baka san wi leri
• O ten Yesus ben seni „a yeye fu waarheid” gi den fosi Kresten, èn fa disi ben de wan „yepiman” trutru?
• Fa den salfuwan sabi taki den kisi a kari fu go na hemel?
• Fa a yeye fu Gado e wroko tapu den tra skapu?
• Fa den tra skapu du bun gi den brada fu Krestes, èn fu san ede den no ’sa kon de volmaakti sondro’ den salfuwan?
[Aksi fu a tori disi]
[Prenki na tapu bladzijde 21]
Den disipel ben kisi „a yeye fu waarheid” tapu a Pinksterfesa fu 33 G.T.
[Prenki na tapu bladzijde 23]
Den tra skapu du bun gi den brada fu Krestes fu di den yepi den fu du a preikiwroko di Gado gi den fu du