Aksi fu leisiman

Na ini Hebrewsma 12:4 skrifi: „Noiti ete unu ben abi fu feti teleki brudu fadon”. San dati wani taki?

„Feti teleki brudu fadon” wani taki, dati yu e feti nanga wan sani teleki yu dede. Fu taki en so, yu de klariklari fu lasi yu libi.

Na apostel Paulus ben sabi taki son Hebrew Kresten ben ’horidoro na ini hebi strei na ondro furu pina’. Disi den ben du fu a bribi fu den ede (Hebrewsma 10:32, 33). Di Paulus ben tyari a tori disi kon na fesi, dan a ben e teki a sani disi gersi nanga wan strei pe atleet ben e strei nanga makandra na ini den Griki wega soleki: streilon, aswa, boks, trowe discus (wan hebi lontu plata pisi isri noso udu) nanga trowe lansri. Fu dati ede meki a gi den Kresten brada fu en a deki-ati di skrifi na Hebrewsma 12:1: „Meki wi puru sosrefi ibri hebi nanga a sondu di e kisi wi makriki, èn meki wi horidoro fu lon a streilon di poti na wi fesi.”

A gersi leki dri vers moro fara Paulus e tapu nanga a tori fu a streilon, èn e bigin taki fu wan boks wega. (Na ini 1 Korentesma 9:26 a e taki na wan agersi fasi fu sma di e lon, èn sosrefi fu sma di e boks.) Den sma di ben e boks fositen ben e tai leribuba na den anu. A kan srefi taki den ben e meki den leribuba kon moro hebi nanga yepi fu „loto, isri, noso isri linga; den sani disi ben kan gi den man di ben e boks hebi mankeri”. Den ogri feti dati ben e meki taki sma skin ben e lon brudu noso taki sma dede srefi.

Awinsi fa a no fa, den Hebrew Kresten ben abi bun eksempre fu den wan di ben tan getrow leki futuboi fu Gado, sma di ben kisi frufolgu na wan tumusi ogri-ati fasi, teleki den dede srefi, iya, ’teleki brudu fadon’. Luku den tra tekst pe Paulus ben e poti prakseri na den sani di den getrow wan fu fositen ben ondrofeni:

„Sma ben ston den, sma ben tesi den, sma ben sa den na pisi, den ben dede fu di sma ben kiri den nanga a feti-owru, den ben waka na ini skapububa, na ini krabitabuba, aladi den ben de na ini nowtu èn den ben de na ini banawtu èn sma ben libi takru nanga den.” Baka dati Paulus poti prakseri na Yesus, a Sma di e meki a bribi fu wi kon bun dorodoro: „A ben horidoro na wan pina-udu, a ben wisiwasi syen, èn a go sidon na a reti-anu fu a kownusturu fu Gado.”—Hebrewsma 11:37; 12:2.

Iya, furu sma ben de di ben ’abi fu feti teleki brudu fadon’, dati wani taki teleki den dede. Den no ben abi fu feti nanga densrefi nomo gi a sondu taki den lasi bribi. Nôno, den ben tan getrow di sma ben pina den na wan ogri-ati fasi èn den tan hori den getrowfasi te na dede.

Na ini a gemeente na Yerusalem wan tu nyun sma ben de di ben kon na ini a gemeente na a ten di na ogri-ati frufolgu ben pasa gowe kaba. Noiti ete den wan disi ben ondrofeni den sortu hebi tesi dati (Tori fu den Apostel 7:54-60; 12:1, 2; Hebrewsma 13:7). Toku a ben de so taki srefi pikinpikin tesi ben e meki taki sonwan fu den nyun sma disi ben e lasi-ati. Den no ben man go doro nanga a strei fu den. Den ben ’kon weri èn brokosaka na ini den sili’ (Hebrewsma 12:3). A de krin taki den ben abi fu gro kon tron lepi sma. Dati ben sa yepi den fu kisi a krakti fu horidoro awinsi san ben sa miti den. Den ben o man horidoro srefi efu a pina di sma ben e pina den na skin sei ben sa abi dede leki bakapisi.—Hebrewsma 6:1; 12:7-11.

Na ini a ten fu wi sosrefi, furu Kresten de di ’feti teleki brudu fadon’, fu di sma kiri den di den no ben wani du sani di no de akruderi Bijbel gronprakseri. Den wortu fu Paulus na ini Hebrewsma 12:4 no musu tapu skreki gi wi, ma wi musu si den leki wan sani di e sori wi o fara wi musu de klariklari fu go fu tan getrow na Gado. Baka dati, Paulus ben skrifi na ini a srefi brifi gi den Hebrewsma: „Meki wi tan abi a bun-ati fu Gado, so taki wi kan du santa diniwroko gi Gado na wan fasi di a feni bun, nanga frede èn lespeki gi Gado.”—Hebrewsma 12:28.