Den gronprakseri di yu feni bun

YU NA wan sma di e tyari ensrefi akruderi gronprakseri? Noso yu feni taki na ini a ten disi wi no abi fu libi moro akruderi gronprakseri di e sori wi san bun èn san ogri? Fu taki en leti, ibri sma e libi akruderi son gronprakseri di ensrefi feni prenspari. Wan gronprakseri kan de wan markitiki di wan sma e suku fu doro, so taki a kan handri na wan bun fasi. Gronprakseri abi krakti tapu den bosroiti di wi e teki èn tapu a fasi fa wi e tyari wi libi. Gronprakseri kan de leki wan kompas di e sori wi pe wi musu go.

Fu gi wan eksempre, Yesus ben gi den bakaman fu en deki-ati fu hori densrefi na a gronprakseri di skrifi na Mateyus 7:12. Drape skrifi: „Ala sani, fu dati ede, di unu wani fu sma du gi unu, unu musu du gi den sosrefi.” Den bakaman fu Confucius ben libi akruderi den gronprakseri fu li nanga jen, di abi fu du nanga bunfasi, sakafasi, lespeki, nanga getrowfasi. Srefi sma di no de kerkisma e hori densrefi na wan tu prenspari tirilin noso markitiki fu man sabi fa fu tyari densrefi.

Na sortu gronprakseri wi musu hori wisrefi?

Ma wi musu sabi taki bun gronprakseri nanga takru gronprakseri de. Fu gi wan eksempre, moro nanga moro sma e handri na wan fasi di e sori taki den e prakseri densrefi nomo. Aladi furu sma feni taki densrefi no de so, toku furu sma e libi na a fasi disi nanga trawan, na presi taki den e tyari densrefi na wan fasi di fiti. Awansi fa a no fa, den sma di e libi na a fasi disi e prakseri densrefi nomo èn furu tron den e tan feti na baka gudu, wan sani di e tyari takru bakapisi kon. Wan edeman fu wan telefisistation na ini Sneisikondre ben taki: „Wi abi tu gronprakseri nomo”. „Wán na fu gi sma san den wani. A trawan na fu meki moni.”

Te wan sma e prakseri ensrefi nomo, dan a fasi disi di a abi kan wroko leki wan magneiti. Sortu krakti wan magneiti abi tapu wan kompas? Te yu e poti den tu sani disi sei makandra, dan a nanai fu a kompas no e sori go moro pe a musu sori. Na a srefi fasi, wan sma di e prakseri ensrefi nomo, no sa tyari ensrefi moro na a yoisti fasi, fu di a sa suku nomonomo fu kisi san a wani.

Yu sabi taki a prakseri di sma e prakseri densrefi nomo, a no wan nyun sani? Na ini a dyari fu Eden den fosi tata fu wi ben bigin libi na a fasi disi. Den no ben wani tyari densrefi moro na a fasi fa wi Mekiman ben wani taki libisma musu tyari densrefi. A sani dati meki taki den no ben tyari densrefi na a yoisti fasi moro. Fu di ala libisma na bakapikin fu Adam nanga Efa, meki den sosrefi e prakseri densrefi nomo.—Genesis 3:6-8, 12.

Bijbel profeititori e sori taki moro nanga moro sma ben o libi na a fasi disi na ini „den lasti dei” pe „muilek ten sa kon, di tranga fu pasa”. Furu sma „lobi densrefi nomo”. Fu dati ede, a no e fruwondru wi taki a fasi fa sma e libi na ini a ten disi e dwengi wi sosrefi fu no broko wi ede  nanga trawan.—2 Timoteyus 3:1-5.

Kande yu sa agri nanga wan yonkuman di nen Olaf. A yonkuman disi ben skrifi wan brifi go na wan bijkantoro fu Yehovah Kotoigi na Europa: „A muilek srefisrefi gi sma fu tan tyari densrefi na wan yoisti fasi, èn dati de so spesrutu gi wi leki yonguwan. Grantangi tan memre wi o prenspari a de taki wi e tan hori wisrefi na Bijbel gronprakseri.”

Olaf ben sori taki a ben frustan wan sani bun. Gronprakseri fu Gado kan yepi wi, yonguwan nanga owruwan, fu tan tyari wisrefi akruderi a fasi fa Gado wani taki wi musu tyari wisrefi. Den gronprakseri disi kan meki tu taki wi e weigri fu prakseri wisrefi nomo. Efu yu wani sabi moro fara fa Bijbel gronprakseri trutru kan yepi yu, grantangi luku na artikel di e kon now.

[Prenki na tapu bladzijde 4]

Furu sma na ini a ten disi no e broko den ede kwetikweti nanga den nowtu fu trawan