Den kakafutu gi problema di ben de leki maka na ini den skin
Den kakafutu gi problema di ben de leki maka na ini den skin
„Mi ben kisi wan maka na ini a skin, wan engel fu Satan, fu tan naki mi.”—2 KORENTESMA 12:7.
1. San na wan tu problema di e miti sma na ini a ten disi?
YU ABI wan problema di yu musu feti nanga en doronomo? Efu na so a de, yu no de a wan-enkri sma di musu du dati. Na ini a ’muilek ten disi di tranga fu pasa’, getrow Kresten musu kakafutu gi hebi frufolgu. Den abi fu du nanga problema na ini na osofamiri, problema nanga a gosontu fu den èn problema na ekonomia sei. Trawan e firi brokosaka, noso den lasi wan lobiwan fu den na ini dede, èn tra problema sosrefi e miti den (2 Timoteyus 3:1-5). Na ini wan tu kondre, furu sma kan dede fu di den no abi nofo nyanyan èn fu di sma e feti.
2, 3. Fa wi kan bigin denki te wi abi problema di wi musu feti nanga den doronomo? Fa a denki dati kan du wi ogri?
2 Den problema disi kan meki wan sma firi brokosaka, spesrutu te a e kisi furu problema na a srefi ten. Luku san Odo 24:10 e taki: „Yu sori taki yu lasi-ati tapu a dei fu banawtu? A krakti fu yu sa de pikinso nomo.” Iya, den problema fu wi kan meki wi lasi-ati èn lasi-ati kan meki taki wi e lasi a krakti di wi abi tranga fanowdu. Boiti dati, a kan meki taki wi no abi so wan fasti bosroiti moro fu horidoro te na a kaba. Fa so?
3 We, lasi-ati kan meki taki wi no e si sani na a yoisti fasi moro. Fu eksempre, makriki wi kan meki den problema fu wi gersi moro seryusu leki den de trutru, èn dati kan meki wi bigin firi sari gi wisrefi. Kande son sma di e sari e aksi Gado srefi: „Fu san ede yu e meki a sani disi pasa nanga mi?” Wan sma di e tan prakseri nomo fu san ede den sani disi e pasa, kan pori a prisiri nanga a frutrow fu en. A prakseri disi kan meki wan futuboi fu Gado kon lasi-ati srefisrefi, èn disi kan meki srefi taki a no man feti „a tumusi bun feti fu a bribi” moro.—1 Timoteyus 6:12.
4, 5. San Satan abi fu du nanga den problema fu wi son leisi? Ma fu sortu sani wi kan de seiker?
4 Yehovah Gado no e tyari problema kon na wi tapu kwetikweti (Yakobus 1:13). Son problema e kon na wi tapu, soso fu di wi e pruberi fu de getrow na en. Fu taki en leti, Satan Didibri, a moro ogri feanti fu Yehovah, e gens ala sma di e dini Yehovah. Na ini a syatu pisi ten di a abi ete, na ogri „gado fu a seti fu sani disi”, e pruberi fu meki ibri sma di lobi Yehovah, no du a wani fu Yehovah moro (2 Korentesma 4:4). Satan e du ala muiti fu pina a heri libimakandra fu brada na heri grontapu (1 Petrus 5:9). A tru taki a no Satan e tyari ala problema kon na wi tapu, ma a kan gebroiki den problema disi fu meki wi kon moro swaki.
5 Toku wi kan wini Satan awinsi o krakti den fetisani fu en de! Fu san ede wi kan de seiker taki wi man du dati? Fu di Yehovah Gado e feti gi wi. A e sorgu taki den futuboi fu en sabi sortu triki Satan e gebroiki (2 Korentesma 2:11). Fu taki en leti, Gado Wortu e fruteri wi furu fu den tesi di tru Kresten e kisi. Na ini a kefal fu Paulus, Bijbel ben gebroiki den wortu „wan maka na ini a skin”. Fu san ede? Meki wi luku fa Gado Wortu e tyari den wortu disi kon na krin. Na so fasi wi sa si taki a no wi wawan abi yepi fu Yehovah fanowdu fu wini den tesi fu wi.
Fu san ede wi kan taki dati tesi de leki maka
6. San Paulus ben wani taki nanga „wan maka na ini a skin”, èn san a maka dati ben kan de?
6 Paulus, di ben kisi bun furu tesi, skrifi nanga yepi fu santa yeye: „Mi ben kisi wan maka na ini a skin, wan engel fu Satan, fu tan naki mi, so taki mi no ben sa hei misrefi tumusi” (2 Korentesma 12:7). San ben de a maka disi na ini Paulus skin? We, efu wan maka ben o fasi dipi na ini wi skin, dan dati ben o hati srefisrefi. Sobun, na agersitori disi e sori taki wan sani ben hati Paulus. Kande en skin ben hati en, kande wan sani ben hati den firi fu en, èn kande ala tu sani ben hati en. A kan, taki Paulus en ai ben muilek en, noso kande a ben abi wan tra siki. Ma a maka ben kan de den sma tu di ben feni taki Paulus no bun nofo fu de wan apostel, èn di ben krutu a fasi fa a ben preiki èn ben leri sma (2 Korentesma 10:10-12; 11:5, 6, 13). Awinsi san a ben de, a maka dati ben tan fasi na Paulus èn a no ben man puru en.
7, 8. (a) San den wortu „tan naki” e sori? (b) Fu san ede a prenspari taki wi e kakafutu gi iniwan problema di e trobi wi now?
7 Luku taki a sani ben tan naki Paulus, neleki fa wan maka tan fasi na ini a skin. A Griki wortu di Paulus ben gebroiki dyaso, e kon fu wan wortu di wani taki „koko”. Mateyus 26:67 e taki fu naki wan sma trutru èn 1 Korentesma 4:11 e taki fu naki na wan agersi fasi. Na ini den vers dati, den wortu e sori go na a fonfon di wan sma e kisi nanga kofu. Satan no wani si Yehovah nanga den futuboi fu En na ai. Dati meki wi no musu fruwondru taki Didibri ben breiti fu si taki wan sani ben tan naki Paulus, neleki fa wan maka tan fasi na ini a skin. Na ini a ten disi, Satan breiti srefisrefi tu te wi abi wan problema di de leki wan maka na ini a skin.
8 Fu dati ede, neleki Paulus wi musu kon sabi fa fu feti nanga den maka disi. A prenspari taki wi e du dati, fu di a abi fu du nanga wi libi! Yu musu hori na prakseri taki Yehovah wani meki wi libi fu têgo na ini a nyun grontapu fu en, pe nowan problema no sa trobi wi moro. Fu man yepi wi kisi a bun libi disi, dan Gado gi wi en santa Wortu, Bijbel. Drape a gi wi furu eksempre di e sori taki den getrow futuboi fu en ben man kakafutu gi problema, di ben de leki maka na ini den skin. Den sma disi ben de leki fa wi de, den no ben de volmaakti sma. Te wi e poti prakseri na wan tu sma fu a bigi ’wolku fu kotoigi’, dan dati kan yepi wi fu „horidoro fu lon a streilon di poti na wi fesi” (Hebrewsma 12:1). Te wi e denki dipi fu a fasi fa den ben horidoro, dan dati kan gi wi na overtoigi taki wisrefi kan kakafutu gi iniwan problema di Satan e tyari kon na wi tapu fu gens wi.
Den maka di ben hati Mefibosèt
9, 10. (a) Fa Mefibosèt ben kon abi wan maka na ini en skin? (b) Fa Kownu David ben sori switifasi gi Mefibosèt, èn fa wi kan de leki David?
9 Prakseri na eksempre fu Mefibosèt, a manpikin fu Yonatan di ben de wan mati fu David. Di Mefibosèt ben abi feifi yari, dan nyunsu doro en taki sma kiri en papa, Yonatan, nanga en granpapa, Kownu Saul. A nyunsu disi bruya na uma di ben sorgu a boi. Na uma „opo en . . . , ma di a ben de na pasi fu lowe, a kon bruya srefisrefi, dan a boi fadon èn a ben kon malengri” (2 Samuel 4:4). A de di a ben de malengri, trutru ben musu de leki wan maka gi Mefibosèt di a ben e gro kon bigi.
10 Wan tu yari baka dati, Kownu David ben sori lobi bun-ati gi Mefibosèt. A ben du dati, fu di a ben lobi Yonatan srefisrefi. David ben gi Mefibosèt a gron fu Saul èn a ben gi Siba, a dinari fu Saul, a frantwortu fu sorgu a gron disi. David ben taigi Mefibosèt tu: ’Yu sa nyan brede na mi tafra doronomo’ (2 Samuel 9:6-10). A musu de so, taki a lobi bun-ati fu David ben gi Mefibosèt trowstu èn a ben yepi en fu no firi a hebi fu en siki so. Disi e sori wi wan moi sani trutru! Wisrefi musu abi switifasi tu gi den wan di musu feti nanga wan maka na ini a skin.
11. San Siba ben taki fu Mefibosèt? Ma fa wi sabi taki na leitori a ben taki? (Luku a futuwortu.)
11 Bakaten, Mefibosèt ben musu feti nanga wan tra maka na ini en skin. Siba, a futuboi fu en, ben fruteri Kownu David ogri-ati lei fu en. Na a ten dati, David lowe komoto na Yerusalem fu di Absalom, a manpikin fu David, opo ensrefi fu feti nanga David. Siba taki dati Mefibosèt no ben de getrow; a taki dati Mefibosèt tan na ini Yerusalem fu di a ben wani tron kownu. * David bribi den ogri-ati lei fu Siba, èn a gi a gron fu Mefibosèt na a leiman dati!—2 Samuel 16:1-4.
12. Fa Mefibosèt ben handri na ini a situwâsi fu en, èn fa a de wan heri moi eksempre gi wi?
12 Ma di Mefibosèt miti nanga David, dan a fruteri a kownu san ben pasa trutru. Mefibosèt ben seti sani kaba fu go na David, ma Siba ben kori en èn ben taki dati a ben o go na ini a presi fu Mefibosèt. David ben poti na ogri disi kon bun baka? Na wan noso tra fasi a ben du dati. A ben prati a gron na mindri den tu man disi. A sani disi ben kan tron leki wan tra maka na ini Mefibosèt skin. Mefibosèt kon mandi fu di David du wan sani di a no fruwakti? A ben e krutu a bosroiti fu David? A ben e kragi taki David no ben handri na wan reti fasi? Nôno, a saka ensrefi na a wani fu a kownu. A ben poti prakseri na den bun sani; a ben breiti fu si a reti kownu fu Israel drai kon baka na wan bun fasi. Mefibosèt trutru ben poti wan heri moi eksempre, fu di a ben horidoro awinsi a ben malengri, awinsi sma ben fruteri ogri-ati lei fu en, èn awinsi sani ben pasa di a no fruwakti.—2 Samuel 19:24-30.
Nehemia ben kakafutu gi den tesi di a kisi
13, 14. Nanga sortu maka Nehemia ben musu feti, di a drai kon baka fu bow den skotu fu Yerusalem?
13 Prakseri den agersi maka di Nehemia ben musu feti nanga den, di a drai kon baka na a foto Yerusalem na ini a di fu feifi yarihondro b.G.T. Nowan skotu no ben de fu kibri a foto. Den Dyu di drai kon baka no ben orga, den ben brokosaka, èn den no ben krin na ini na ai fu Yehovah. Nehemia ben kisi a makti fu Kownu Artakserkses fu bow den skotu fu Yerusalem baka. Ma no langa baka dati, Nehemia kon si taki den tiriman fu den birtikondre no ben lobi a wroko di a ben e du. „Den ben si en leki wani takru sani srefisrefi taki wan man ben kon fu suku wan bun sani gi den manpikin fu Israel.”—Nehemia 2:10.
14 Den gensman dati fu den tra kondre, ben du ala muiti fu tapu a wroko fu Nehemia. Den taigi en taki den ben o du en ogri, den fruteri ogri-ati lei fu en, èn den tapu skreki gi en. Boiti dati, den seni sma go na en fu meki en lasi-ati. Den sani disi trutru ben musu de leki maka di no wani komoto na ini en skin. Den triki fu den feanti disi ben meki en lasi-ati? Nôno! A ben poti ala en frutrow tapu Gado, a no ben go na baka. Sobun, di den ben kaba bow den skotu fu Yerusalem te fu kaba, dan den skotu trutru ben de wan buweisi fu a lobi-ati fasi fa Yehovah ben horibaka gi Nehemia.—Nehemia 4:1-12; 6:1-19.
15. Sortu problema na mindri den Dyu ben gi Nehemia furu broko-ede?
15 Di Nehemia ben de tiriman, dan a ben kisi fu du sosrefi nanga den furu problema di a pipel fu Gado ben abi. Den problema disi ben de leki maka di ben hati en srefisrefi, bika den problema ben abi krakti tapu a matifasi fu a pipel nanga Yehovah. Gudusma ben aksi moro moni baka leki san sma ben leni fu den. Fu man pai a paiman èn sosrefi a lantimoni fu Persia, den pôti brada fu den ben musu gi den gron leki panti, èn den ben musu seri den pikin fu den srefi leki srafu (Nehemia 5:1-10). Furu Dyu no ben hori a Sabadei, èn den no ben horibaka gi den Leifisma nanga a tempel. Boiti dati, son wan fu den trow nanga „wefi fu den foto Asdod, Amon, nanga Moab”. A san disi ben hati Nehemia fu tru! Ma nowan fu den maka disi tapu en fu dini Gado. Ibritron baka a ben meki ala muiti fu hori den regtfardiki wet fu Gado hei. Meki wi de neleki Nehemia. Meki wi no gi pasi taki sma di no e tyari densrefi na wan getrow fasi, e tapu wi fu dini Yehovah getrow.—Nehemia 13:10-13, 23-27.
Moro getrow sma ben feti nanga maka na ini a skin
16-18. Fa problema na ini na osofamiri ben trobi Isak nanga Rebeka, Hana, David, nanga Hosea?
16 Bijbel e taki fu moro sma di kakafutu gi problema di ben de leki maka. Den problema disi ben gi den furu sari. Nofotron, problema na ini na osofamiri meki den maka disi kon. Den tu wefi fu Esau „ben sari na ati fu Isak nanga Rebeka”, a papa nanga mama fu Esau. Rebeka ben taki srefi dati a ben fuga fu libi nanga den wefi dati (Genesis 26:34, 35; 27:46). Poti prakseri now na Hana èn a fasi fa en feanti Penina, a tra wefi fu en masra, „ben tanteri en doronomo” bika Hana no ben man kisi pikin. Kande Hana ben gwenti fu yere a spotu disi te den ben de na oso. Penina ben tanteri en sosrefi na fesi tra sma, na fesi famiriman nanga mati, te den ben go leki osofamiri na a fesa na ini Silo. Disi ben de leki a ben sutu a maka go moro dipi na ini Hana skin.—1 Samuel 1:4-7.
17 Prakseri fa David ben nyan pina di a papa fu en wefi, Kownu Saul, ben dyarusu na en tapu. Fu man kibri en libi, David ben musu libi na ini ston-olo na ini a gran sabana fu En-gedi. Drape David ben musu kren go na tapu ston pasi di ben takru èn hei srefisrefi. A kruktudu disi ben musu fu tanteri David, bika a no ben du Saul nowan ogri. Toku David ben musu lowe doronomo fu a wan presi go na a tra presi, soso fu di Saul ben dyarusu na en tapu.—1 Samuel 24:14, 15; Odo 27:4.
18 Prakseri a trobi di opo kon na ini na osofamiri fu a profeiti Hosea. A wefi fu en ben bigin du sutadu. A hurudu fu en wefi ben musu de leki maka di sutu go na ini en ati. Èn fa a ben musu sari, di en wefi kisi tu pikin nanga wan tra man!—Hosea 1:2-9.
19. San na a frufolgu di a profeiti Mikaya ben kisi?
19 Wan tra maka na ini a skin na frufolgu. Prakseri na ondrofenitori fu a profeiti Mikaya. Na ogri Kownu Akab ben arki rai fu falsi profeiti èn a ben bribi den seryusu lei fu den. Disi ben musu hati a regtfardiki Mikaya srefisrefi. Mikaya taigi Akab taki ala den profeiti ben e taki nanga yepi fu „wan yeye di e bedrigi sma”. San a fesiman fu den falsi profeiti du di Mikaya taki dati? We, a „naki Mikaya na en fesi”! Akab ben du wan moro ogri sani di a kisi a warskow fu Yehovah taki a no man teki Ramot-gilead baka. Akab ben gi sma a komando fu poti Mikaya na dungru-oso, èn den ben musu gi en pikinso nyanyan nanga dringi nomo (1 Kownu 22:6, 9, 15-17, 23-28). Prakseri Yeremia sosrefi èn den sani di den frufolguman ben du nanga en fu di den ben wani kiri en.—Yeremia 20:1-9.
20. Nanga sortu maka Naomi ben musu feti èn sortu grani a kisi fu di a horidoro?
20 A lasi di wi lasi wan lobiwan na ini dede, na wan tra sari sani di kan de leki wan maka na ini a skin. Naomi ben lasi en masra nanga en tu manpikin na ini dede, wan sani di meki en firi sari srefisrefi. Aladi a ben firi brokosaka ete fu san ben pasa, toku a drai go baka na Betlehem. A ben taigi den mati fu en taki den no musu kari en Naomi, ma Mara, bika a nen disi ben sori o bigi a sari fu en ben de. Ma te fu kaba, Yehovah pai en fu di a ben horidoro. A kisi wan granpikin di kon tron wan afo fu a Mesias.—Rut 1:3-5, 19-21; 4:13-17; Mateyus 1:1, 5.
21, 22. San Yob ben lasi, èn san a ben du di a lasi den sani dati?
21 Prakseri fa Yob skreki srefisrefi di a yere taki den tin lobi pikin fu en dede wantronso na wan ogri-ati fasi, èn taki a lasi ala den meti nanga dinari fu en. Wantronso a gersi leki en heri libi drai tapu! Ma baka den rampu di Yob kisi, Satan naki en nanga wan siki. A kan de so, taki Yob prakseri taki a takru siki disi ben o kiri en. A ben pina so kefalek, taki a ben wani dede nomo fu no firi a pen moro.—Yob 1:13-20; 2:7, 8.
22 Efu dati no ben sari, dan en wefi di ben de nanga sari nanga bruya, kon na en èn a taki: „Fluku Gado èn dede!” A maka disi ben hati kefalek! Boiti dati, den dri kompe fu Yob ben taki falsi sani. Na presi taki den ben trowstu Yob, den ben krutu en taki a ben du sondu kibrikibri èn taki den rampu miti en fu di a ben du den sondu dati. A taki di den ben taki den fowtu sani disi, ben de neleki den ben sutu den maka go moro dipi na ini en skin. Hori na prakseri tu, taki Yob no ben sabi fu san ede den sari sani disi ben pasa nanga en; a no ben sabi tu, taki a ben o tan na libi. Toku „na ini ala den sani disi, Yob no ben du sondu, èn a no ben sori taki na Gado meki taki ogri de” (Yob 1:22; 2:9, 10; 3:3; 14:13; 30:17). Aladi den problema fu Yob ben kon na a srefi ten, toku a ben tan hori en soifri retifasi. Na eksempre fu en e gi wi deki-ati trutru!
23. Fu san ede den getrow sma ben man kakafutu gi ala sortu problema di wi kan agersi nanga maka na ini a skin?
23 Moro furu eksempre de ete na ini Bijbel leki den wan di wi luku. Ala den getrow futuboi disi ben kisi fu du nanga den eigi problema di wi kan agersi nanga maka. Den ben abi fu du nanga ala sortu problema! Ma wán sani den no ben du! Nowan fu den ben tapu fu dini Yehovah. Awinsi sortu tesi den ben kisi, den ben wini Satan nanga a krakti di Yehovah ben gi den. Fa den ben du dati? A tra artikel sa piki na aksi disi èn a sa sori wi fa wisrefi kan kakafutu gi iniwan problema di de leki wan maka na ini wi skin.
[Futuwortu]
^ paragraaf 11 Mefibosèt no ben o du so wan ogri sani kwetikweti, bika a ben de wan man di ben abi warderi èn a ben abi sakafasi. A ben musu fu sabi heri bun taki en papa, Yonatan, ben de wan getrow sma. Aladi Yonatan ben de a manpikin fu Kownu Saul, toku a ben saka ensrefi na a bosroiti fu Yehovah fu teki David leki kownu fu Israel (1 Samuel 20:12-17). Yonatan, a papa fu Mefibosèt, ben abi frede gi Gado, èn a ben de wan getrow mati fu David. Sobun, Yonatan no ben sa leri a yongu manpikin fu en fu suku fu tron kownu.
San yu ben sa piki?
• Fu san ede wi kan agersi den problema fu wi nanga maka na ini a skin?
• Nanga sortu maka Mefibosèt nanga Nehemia ben musu feti?
• Bijbel e taki fu eksempre fu man nanga uma di ben abi fu du nanga ala sortu problema di ben de leki maka na ini a skin. Sortuwan fu den eksempre disi ben naki yu ati, èn fu san ede?
[Aksi fu a tori disi]
[Prenki na tapu bladzijde 15]
Boiti taki Mefibosèt ben malengri, a ben musu frudrage den ogri-ati lei fu trawan, èn sosrefi wan sani di ben pasa sondro taki a fruwakti dati
[Prenki na tapu bladzijde 16]
Nehemia ben horidoro awinsi sma ben gens en