Wan kibripresi gi a winti

NA TAPU den hei pisi fu den Alpenbergi ini Europa wan bromki e gro di nen alpen-rowsu. A bromki disi e gro plata na tapu a gron na mindri a kapuweri na tapu den bergi èn a no e gro kon bigi. Disi e kibri en gi den tranga winti di e wai na den hei pisi disi fu den bergi. A tranga winti dati kan kiri den bromki di e gro drape. Fu di a winti kowru, meki a loktu e kon drei èn sosrefi a gron lontu den bromki di e gro na tapu den bergi. A winti tranga sote taki a kan rutu den bromki dati puru.

Na alpen-rowsu e kibri ensrefi gi a tranga winti dati, fu di a e gro na ini olo na mindri den ston fu a bergi. Aladi furu doti no de na tapu a gron na den presi dati, toku den olo dati e kibri na alpen-rowsu gi a winti, èn dati e meki taki a bromki no e drei gowe. Pikinmoro a heri yari a e kibri ini den olo na mindri den ston fu den bergi, ma wan tu mun fu a yari, dan den alpen-rowsu e moi den bergi disi nanga tumusi moi redi bromki.

A profeiti Yesaya e fruteri wi taki Gado ben o poti „granman” na wroko èn taki ibriwan fu den ben sa de leki „wan kibripresi gi a winti” (Yesaya 32:1, 2). Na ondro a tiri fu a Kownu, Krestes Yesus, den granman disi na yeye fasi, noso den opziener disi, ben o de leki den ston fu wan bergi di ben o tanapu steifi, spesrutu na ini ten pe sma ben o lasi-ati noso te den ben o de na ini nowtu. Den opziener disi ben o de leki wan tranga kibripresi gi sma, awinsi gens ben o miti den sma dati. Den opziener ben o yepi den wan sosrefi di de na ini nowtu. Na so fasi den sma disi no e drei gowe na yeye fasi bika den e tan hori a watra di den e kisi nanga yepi fu a Wortu fu Gado.

Frufolgu, a lasi-ati di sma e lasi-ati, nanga siki, kan de leki wan tranga winti di kan rutu wan Kresten puru fu a bribi. Disi kan meki taki a bribi fu a sma e kon swaki efu nowan sma no e yepi en fu kibri a bribi fu en. Den Kresten owruman kan de leki wan kibripresi gi sowan sma te den e arki en nanga ala den prakseri, te a e fruteri den fu a problema fu en. Dan nanga yepi fu Bijbel den sa gi a sma deki-ati noso den sa gi en rai di kan yepi en fu lusu a problema fu en. Neleki Krestes Yesus, a Kownu fu den di poti na wroko, na so den owruman wani yepi den wan di ben e „waka bruyabruya” (Mateyus 9:36). Den wani fu yepi trawan tu di kisi mankeri na yeye fasi, di den winti fu falsi leri ben naki den (Efeisesma 4:14). Te sowan yepi e gi na a yoisti ten dan a sa tyari winimarki kon.

Wan uma di nen Miriam e fruteri: „Wan pisi ten mi ben firi broko-saka trutru. Dati ben de di wan tu mati fu mi ben gowe libi a waarheid, èn na a srefi ten, mi papa ben kisi wan berurtu. Fu di mi ben e suku fu kakafutu gi a firi di mi ben e firi broko-saka, meki mi ben bigin hori nanga wan man di no ben de na bribi. No tumusi langa baka dati, mi bigin firi leki mi no warti noti. Mi ben fruteri den owruman na ini a gemeente taki mi ben teki a bosroiti fu gowe libi a waarheid, fu di a fasi fa mi ben e si en, dan Yehovah no ben kan lobi mi moro.

Di mi ben firi so, wan owruman di abi sari-atifasi kon taki nanga mi. A memre mi na ala den yari di mi ben dini leki wan gewoon pionier. A fruteri mi taki ala ten a ben warderi a getrowfasi fu mi. A aksi mi na wan switi fasi fu gi den owruman na okasi fu yepi mi, so taki mi ben kan kon kisi a frutrow baka taki Yehovah lobi mi trutru. Neleki wan presi pe wan sma e lon go kibri gi wan sibibusi, na so den owruman disi ben de leki ’wan kibripresi’ gi mi. Den ben yepi mi na wan lobi-ati fasi, di mi ben abi bigi problema na yeye fasi. A no doro wan mun baka dati srefi taki mi gowe libi a man. Sensi a ten dati mi tan waka na ini a pasi fu a tru anbegi.”

Owruman e firi bun te den e si taki tra Kresten e gro bun na yeye fasi, fu di den ben kisi kibri na a yoisti ten di den abi dati fanowdu. Den „kibripresi” disi e yepi wi fu frustan sortu bigi yepi wi sa kisi na yeye fasi na a ten fu a Dusun Yari Tiri fu Krestes.