Wi de srekasreka fu de leriman fu Gado Wortu
Wi de srekasreka fu de leriman fu Gado Wortu
„Gado . . . trutru meki wi de koni nofo fu de dinari.”—2 KORENTESMA 3:5, 6.
1, 2. Sortu muiti sma e meki son leisi fu preiki gi trawan? Fu san ede den no abi bun bakapisi furu tron?
FA YU ben o firi efu wan sma gi yu wan wroko di yu no man klari? Prakseri disi: den wrokosani di yu abi fanowdu, de leti na yu fesi. Yu kan gebroiki den efu yu wani. Ma yu no sabi kwetikweti fa yu musu gebroiki den. Moro ogri srefi, a wroko musu klari esi-esi. Sma e frutrow na yu tapu. A ben o de wan fruferi sani srefisrefi efu yu no ben man klari a wroko!
2 A sani disi e pasa trutru. Luku wan eksempre. Son leisi, wan fu den kerki fu Krestenhèit pruberi fu orga sani fu go preiki oso fu oso. Furu tron den no abi bun bakapisi. Baka wan tu wiki noso wan tu mun, den tapu nanga a wroko. Fu san ede? Krestenhèit no yepi den bribiman fu en fu kon sabi fa a wroko musu du. Srefi den kerki tiriman no sabi du a preikiwroko dati, awinsi den go na den skoro pe den kisi kerki leri someni yari langa. Ma fu san ede wi kan taki dati?
3. Sortu wortu 2 Korentesma 3:5, 6 e gebroiki dri leisi, èn san den wani taki?
3 Gado Wortu e sori san e meki wan sma koni nofo fu de wan tru preikiman fu a Kresten bun nyunsu. Nanga yepi fu santa yeye, na apostel Paulus ben skrifi: „A no de so, taki fu wisrefi wi koni nofo fu si wan sani leki a e kon fu wisrefi, ma taki wi koni nofo, e kon fu Gado, di trutru meki wi de koni nofo fu de dinari” (2 Korentesma 3:5, 6). Luku taki a tekst e taki dri leisi fu den wortu „koni nofo”. San den wortu dati wani taki? Na ini Vine’s Expository Dictionary of Biblical Words (wan buku di e fruklari Bijbel wortu) skrifi: „Te a e sori go na wan sani, dan a [wortu di den Grikisma ben gebroiki] wani taki dati a sani ’nofo’ . . . ; te a e sori go na wan sma, dan a wani taki dati a sma ’bun’ noso ’warti’ fu du wan sani.” Sobun, te wan sma „koni nofo”, dan a bun èn a warti fu du a wroko di a kisi. Iya, tru dinari fu a bun nyunsu sabi fa fu preiki a bun nyunsu. Den abi a koni fu du a wroko disi, den doro den markitiki fu preiki gi sma, noso den warti fu du dati.
4. (a) Fa na eksempre fu Paulus e sori taki a no wan pikin grupu sma nomo e kisi a koni fu du a Kresten preikiwroko? (b) San na dri sani di Yehovah e gebroiki fu gi wi a koni fu de preikiman?
4 Ma fa sma e kisi a koni fu preiki? Den abi a koni dati fu densrefi kaba? A de so taki den koni so kefalek? Den kisi spesrutu leri na barinen skoro? Soleki fa a sori, dan na apostel Paulus ben abi ala den sani disi (Tori fu den Apostel 22:3; Filipisma 3:4, 5). Ma toku a ben abi sakafasi. A ben sori taki a koni di a ben abi fu du a preikiwroko, no ben kon fu den heiskoro pe a ben go, ma fu Yehovah Gado. Wan pikin grupu sma nomo e kisi a koni disi? Di Paulus ben skrifi a gemeente fu Korente, dan a ben taigi den taki „wi koni nofo”. Disi e sori krin taki Yehovah e sorgu taki ala den getrow futuboi fu en kan du a wroko di a gi den fu du. Fa Yehovah e gi tru Kresten koni na ini a ten disi? Meki wi taki fu dri sani di a e gebroiki fu du dati: (1) en Wortu, (2) en santa yeye, nanga (3) en organisâsi na grontapu.
A Wortu fu Yehovah e gi wi koni
5, 6. Sortu krakti den Santa Buku fu Bijbel abi tapu tru Kresten?
5 Na a fosi presi, fa Gado Wortu e gi wi a koni fu de preikiman? Paulus ben skrifi: „Na Gado ben meki sma skrifi ala den Buku fu Bijbel nanga yepi fu en santa yeye èn den bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi, so taki a sma di de fu Gado kan koni dorodoro, de srekasreka dorodoro gi ibri bun wroko” (2 Timoteyus 3:16, 17). Sobun, den Santa Buku fu Bijbel e yepi wi fu de „koni dorodoro”, fu de „srekasreka dorodoro”, so taki wi kan du a „bun wroko” fu leri sma a Wortu fu Gado. Ma fa a de nanga ala den bribiman fu den kerki fu Krestenhèit? Den sma dati abi a Bijbel. Ma fa Bijbel e yepi wan tu sma fu tron bun preikiman, ma a no e yepi trawan? Efu wi wani sabi a piki tapu na aksi dati, dan wi musu ondrosuku fa wi e denki fu Bijbel.
6 A de wan sari sani taki furu sma di e go na kerki, no e teki a Bijbel boskopu „leki san a de trutru, leki a wortu fu Gado” (1 Tesalonikasma 2:13). Krestenhèit no abi wan bun nen srefisrefi ini a tori disi. Den kerki tiriman go na spesrutu skoro fu studeri furu yari langa fu Gado tori. Ma den de srekasreka fu de leriman fu Gado Wortu? Kwetikweti. Iya, son sma e go na den skoro disi leki bribiman fu Bijbel. Ma te den kaba den skoro, dan den de sma di e tweifri na den sani fu Bijbel! Fu di furu fu den no e bribi moro na ini a Wortu fu Gado, meki den no e preiki dati moro. Na presi fu dati, den e preiki na tra fasi. Den e teki partèi na ini politiek takimakandra, den e taigi sma taki den musu gebroiki Kresten gronprakseri fu lusu problema na ini a libimakandra, noso den e poti prakseri na libisma denki te den e hori wan preiki (2 Timoteyus 4:3). Heri tra fasi leki den sma disi, tru Kresten e du san Yesus Krestes ben du.
7, 8. Fa Yesus ben denki fu Gado Wortu, èn fa dati ben de heri tra fasi leki a denki fu den kerki fesiman na ini a ten fu en?
7 Yesus no ben gi den kerki fesiman na ini a ten fu en na okasi fu abi krakti tapu a denki fu en. Te Yesus ben gi sma leri, efu na wan pikin grupu sma leki a grupu apostel fu en, noso wan ipi sma, Yesus ben gebroiki den santa buku furu tron (Mateyus 13:10-17; 15:1-11). Fu di a ben du dati, meki a ben de heri tra fasi leki den kerki fesiman fu a ten dati. Den kerki fesiman ben suku ala sortu fasi fu tapu tra sma fu ondrosuku den dipi sani fu Gado. Fu taki en leti, nofotron den leriman fu a ten dati ben feni taki spesrutu pisi fu Bijbel muilek tumusi fu frustan. Den ben feni taki den ben kan taki fu den pisi dati nanga a studenti wawan di den lobi. Ma srefi te den ben taki nanga a studenti dati, toku den ben taki nanga wan safri sten èn ben tapu den ede nanga wan sani! Den kerki fesiman dati ben abi a kruktubribi taki sma no musu taki a nen fu Gado. Na so den ben bribi tu taki sma no musu taki fu spesrutu pisi fu a Bijbel!
8 Krestes no ben de leki den kerki fesiman dati. A no ben feni taki wan pikin grupu sma nomo musu ondrosuku „ibri wortu di e kon fu Yehovah en mofo”, ma a ben feni taki ala sma musu du dati. Yesus no ben wani gi wan pikin grupu sabiman a koni fu frustan den Buku fu Bijbel. A ben taigi den disipel fu en: „San mi e taigi unu na ini dungru, taki fu dati na ini leti, èn a syusyu di unu e yere, preiki dati komoto fu den daki” (Mateyus 4:4; 10:27). Yesus ben de fayafaya fu prati a sabi fu Gado nanga someni sma leki a ben man du dati.
9. Fa tru Kresten e gebroiki a Bijbel?
9 Gado Wortu musu de a moro prenspari wrokosani te wi e gi sma leri. Fu eksempre, te wi e hori wan lezing na wan Kownukondre zaal fu Yehovah Kotoigi, dan furu tron a no de nofo fu leisi wan tu vers fu a Bijbel nomo. Wi musu teki a ten fu fruklari den tekst, fu meki sma frustan den tekst moro bun nanga yepi fu agersitori, èn fu sori fa den kan fiti den na ini den libi. Wi wani meki a boskopu fu Bijbel bekènti nanga ala overtoigi, so taki a kan saka go dipi na ini na ati fu den sma di e arki wi (Nehemia 8:8, 12). Owruman musu gebroiki a Bijbel sosrefi te a de fanowdu fu gi sma rai, noso fu piri-ai gi den. Awinsi a pipel fu Yehovah e taki difrenti tongo èn e difrenti na someni tra fasi, toku den alamala abi lespeki gi a Bijbel, a moro bun buku di de.
10. Fa a boskopu di Gado poti na ini a Bijbel, kan abi krakti na wi tapu?
10 Te sma e gebroiki Bijbel na so wan lespeki fasi, dan a boskopu fu en abi krakti na den tapu (Hebrewsma 4:12). A e meki sma tyari kenki kon na ini den libi. Fu eksempre, a e meki den drai baka gi sani di Bijbel e krutu, soleki hurudu, sutadu, afkodrei, drungufasi, nanga fufuru. A yepi bun furu sma fu puru den owru fasi fu den, èn fu teki a nyun fasi fa den musu de (Efeisesma 4:20-24). Iya, wi musu abi moro lespeki gi Bijbel leki gi den denki nanga den gwenti fu libisma, èn wi musu gebroiki Bijbel ala ten. Te wi e du dati, dan Bijbel kan gi wi a koni fu de leriman fu Gado Wortu. A kan meki wi de srekasreka fu du a wroko dati.
A yeye fu Yehovah e gi wi koni
11. Fu san ede a fiti taki Yesus ben kari a santa yeye fu Yehovah „a yepiman”?
11 Meki wi taki now fu a fasi fa a santa yeye, noso a wroko krakti fu Yehovah, e yepi wi fu de srekasreka. Noiti wi musu frigiti taki a yeye fu Yehovah na a moro tranga krakti di de. Yehovah gi en lobi Manpikin a makti fu gebroiki a kefalek bigi krakti dati fu yepi ala tru Kresten. Fu dati ede a fiti taki Yesus ben taki fu a santa yeye leki „a yepiman” (Yohanes 16:7). A ben taigi den bakaman fu en taki den musu aksi Yehovah a yeye dati, èn a ben taigi den taki Yehovah trutru ben o gi den furu fu a krakti dati.—Lukas 11:10-13; Yakobus 1:17.
12, 13. (a) Fu san ede a prenspari taki wi e begi meki santa yeye yepi wi na ini wi preikiwroko? (b) Fa den Fariseiman ben sori taki a santa yeye no ben wroko na den tapu?
12 Wi musu begi ibri dei fu kisi santa yeye, spesrutu fu yepi wi na ini wi preikiwroko. San na a bakapisi te a krakti dati e wroko na wi tapu? Fu di a kan wroko tapu a denki nanga na ati fu wi, meki a kan yepi wi fu tyari kenki kon, fu gro na yeye fasi, èn fu puru den owru fasi fu wi fu teki a nyun fasi fa wi musu de (Kolosesma 3:9, 10). A kan yepi wi fu kweki den srefi maniri di Yesus ben abi. Furu fu wi sabi Galasiasma 5:22, 23 na ede. Den tekst dati e kari den froktu fu Gado en yeye. A fosi froktu na lobi. A prenspari taki wi abi dati na ini wi preikiwroko. Fu san ede?
13 Lobi e gi wi deki-ati fu du sani. Lobi gi Yehovah èn gi tra sma e meki tru Kresten prati a bun nyunsu nanga trawan (Markus 12:28-31). Te wi no abi a lobi disi, dan wi no kan de wan tru leriman fu Gado Wortu. Luku a difrenti na mindri Yesus nanga den Fariseiman. Mateyus 9:36 e taki fu Yesus: „Di a ben si na ipi a ben firi sari nanga den, bika den ben kisi kwinsi èn den ben panya leki skapu sondro skapuman.” Fa den Fariseiman ben denki fu den sma di no kisi a hei skoroleri leki den? Den ben taki: „Na ipi disi di no sabi a Wet, na frufruktu sma” (Yohanes 7:49). Den Fariseiman dati no ben lobi den sma kwetikweti; na presi fu dati, den ben wisiwasi den. A de krin taki a yeye fu Yehovah no ben wroko na den tapu.
14. San wi musu du te wi e luku a fasi fa Yesus ben sori lobi te a ben preiki gi sma?
14 Yesus ben firi gi sma. A ben sabi taki den ben pina. A ben sabi taki sma ben du den ogri, èn taki den ben panya go na ala sei neleki skapu di no abi wan skapuman fu tyari den. Yohanes 2:25 e fruteri wi taki Yesus „ben sabi san ben de na ini libisma”. Yesus ben de a Tumusi Bun Wrokoman fu Yehovah di A ben meki sani na grontapu. Dati meki Yesus ben frustan heri bun fa libisma de (Odo 8:30, 31). Fu di a ben sabi libisma so bun, meki a kon lobi den moro. Meki wi abi so wan lobi gi sma ala ten te wi e du wi preikiwroko! Efu wi e feni taki wi kan du moro fu sori a lobi dati, dan meki wi begi Yehovah fu gi wi en santa yeye, èn meki wi du muiti fu du san wi aksi na ini begi. Yehovah sa piki wi. A sa seni a bigi krakti disi fu yepi wi fu de leki Krestes, di ben de a moro koni sma fu preiki a bun nyunsu.
15. Fa den wortu na ini Yesaya 61:1-3 ben fiti Yesus? Ma fu san ede den wortu dati ben krutu den leriman fu Wet nanga den Fariseiman?
15 San meki taki Yesus ben koni nofo fu gi sma leri? „A yeye fu Yehovah de na mi tapu”, na so a ben taki (Lukas 4:17-21). Iya, Yehovah srefi ben poti Yesus na wroko nanga yepi fu santa yeye. Yesus no ben abi noti moro fanowdu fu sori taki a bun nofo fu du a wroko. Fa a de nanga den kerki fesiman na ini a ten fu en? Santa yeye ben poti den na wroko? Nôno. Den no ben abi a koni srefi fu du a wroko di skrifi na ini Yesaya 61:1-3, di Yesus ben leisi nanga tranga sten èn di a ben fiti gi ensrefi. Grantangi, leisi den vers dati. Yu sa si taki den bedrigi leriman fu Wet nanga den Fariseiman no ben du san skrifi na ini den vers dati. Den no ben abi nowan bun nyunsu fu fruteri den mofinawan. Fa den ben kan preiki a fri fu den wan di de na ini katibo? Fa den ben kan preiki fu den ai fu den breniwan kon betre? Densrefi ben breni na yeye fasi èn densrefi ben de na ini katibo fu di den ben hori densrefi nomonomo na den gwenti fu libisma! Fa a de nanga wi? Wi de tra fasi leki den Fariseiman dati? Wi e doro den markitiki fu gi sma leri?
16. Fu san ede a pipel fu Yehovah na ini a ten disi kan abi a frutrow taki den koni nofo fu de preikiman?
16 A tru taki wi no go na den heiskoro fu Krestenhèit. Nowan skoro pe den e gi kerki leri, poti wi na wroko leki leriman. Dati wani taki dati wi no bun nofo fu gi sma leri? Kwetikweti! Na Yehovah poti wi na wroko leki Kotoigi fu en (Yesaya 43:10-12). Te wi e begi Gado fu gi wi a santa yeye fu en, èn te wisrefi e wroko tranga tu, dan wi abi ala san wi abi fanowdu fu gi sma leri. A no de fu taki, wi no de volmaakti èn wi no man du soifri san wi Bigi Leriman, Yesus, ben du. Ma toku Yehovah e gebroiki a yeye fu en fu meki wi de koni èn srekasreka fu de leriman fu en Wortu. Wi no breiti taki A e du dati?
Na organisâsi fu Yehovah e gi wi koni
17-19. Fa den feifi alawiki konmakandra di na organisâsi fu Yehovah seti e yepi wi fu de bun preikiman?
17 Meki wi taki now fu a di fu dri sani di Yehovah e gebroiki fu meki wi de srekasreka leki leriman fu en Wortu. A e gebroiki en gemeente noso en organisâsi na grontapu di e leri wi fa fu preiki. Fa a e leri wi disi? Prakseri den sani nomo di seti fu gi wi leri! Na ini wán wiki, wi e go na feifi Kresten konmakandra (Hebrewsma 10:24, 25). Wi e kon makandra na ini pikin grupu na a Gemeente Bukustudie. Drape wi e studeri Bijbel finifini nanga wan buku di wi kisi nanga yepi fu na organisâsi fu Yehovah. Te wi e arki èn e gi komentaar, dan wi e leri fu makandra èn wi e gi makandra deki-ati. A bukustudie fesiman e poti prakseri na ibriwan fu wi èn a e gi wi rai tu. Na a Publiki Konmakandra nanga a Waktitoren-studie, wi e kisi moro yeye nyanyan di e bow wi.
18 Wi Theokrasia Diniwroko-skoro seti fu sori wi fa wi musu gi sma leri. Te wi e sreka wisrefi fu hori wan takimakandra tapu a skoro, dan wi e leri fa fu gebroiki Gado Wortu fu leri sma furu sani (1 Petrus 3:15). Oiti a gersi taki yu ben sabi wan tori finifini kaba di yu kisi a grani fu hori wan takimakandra? Yu kon si taki te fu kaba yu leri wan nyun sani baka fu a tori? Na so a de nofotron. A moro bun fasi fu kon frustan wan tori moro bun, na fu leri tra sma fu a tori dati. Srefi te wi no abi fu hori wan takimakandra, toku wi e leri fa wi kan de moro bun leriman. Te wi e luku den studenti, dan wi e si taki ibriwan fu den e du wan tu sani heri bun, èn wi kan sidon prakseri fa wisrefi kan du den sani dati tu.
19 Sosrefi a Diniwroko Konmakandra seti fu meki wi de srekasreka fu de leriman fu Gado Wortu. Ibri wiki wi e prisiri fu yere takimakandra di brada e hori nanga faya. Boiti dati, wi e yere sani èn wi e si demonstrâsi di wi kan gebroiki na ini wi preikiwroko. Fa wi sa pristeri wan buku? San wi kan du te wi e tuka nanga problema na ini a preikiwroko fu wi? Na sortu tra fasi wi kan du a preikiwroko tu? San o yepi wi fu tron moro bun leriman te wi e go baka na sma èn e hori bijbelstudie? (1 Korentesma 9:19-22) Na a Diniwroko Konmakandra wi e taki finifini fu den aksi disi. Furu fu den lezing na a konmakandra abi fu du nanga den artikel na ini Wi Kownukondre diniwroko. Disi na wan tra sani di wi kisi fu yepi wi de srekasreka fu du a tumusi prenspari wroko fu wi.
20. Fa wi kan kisi wini fu den gemeente konmakandra nanga den bigi konmakandra?
20 Wi e kisi a moro bun leri te wi e sreka wisrefi gi den konmakandra fu wi, te wi de drape, èn te wi e gebroiki den sani di wi leri na ini wi preikiwroko. Ma tra sani de ete di kan yepi wi. Wi abi moro bigi konmakandra tu, soleki kring-konmakandra nanga kongres. Den konmakandra disi seti fu sreka wi moro bun fu de leriman fu Gado Wortu. Wi trutru wani poti yesi arki bun èn wi wani gebroiki a rai di wi e kisi!—Lukas 8:18.
21. San e sori taki a leri di wi e kisi abi bun bakapisi? Suma e meki sani waka bun?
21 A leri di Yehovah e gi wi abi bun bakapisi? Meki wi luku efu dati de so trutru. Ibri yari, dusundusun sma e kisi yepi fu leri den moro prenspari sani fu Bijbel èn fu du san Gado e aksi fu den. A grupu sma di e du san Gado wani e kon moro bigi. Ma nowan fu wi kan taki dati na wi e meki dati pasa. Wi musu si sani na a yoisti fasi, soleki fa Yesus ben du dati. A ben taki: „Nowan sma kan kon na mi, boiti efu a Tata, di ben seni mi kon, e hari en kon.” Neleki den apostel fu owruten, furu fu wi no sabi leisi nanga skrifi èn no kisi hei skoroleri (Yohanes 6:44; Tori fu den Apostel 4:13). Sani e waka bun gi wi fu di wi e frutrow tapu Yehovah, di e hari opregti sma kon na waarheid. Paulus ben taki en heri moi: „Mi ben prani, Apolos ben gi watra, ma Gado ben tan meki sani gro.”—1 Korentesma 3:6.
22. Fu san ede wi noiti no musu brokosaka tumusi te wi e feni taki wi no e teki prati dorodoro na a Kresten preikiwroko?
22 Iya, Yehovah Gado trutru e yepi wi fu du wi wroko leki leriman fu en Wortu. Kande a no ala ten wi e firi bun nofo fu de leriman. Ma hori na prakseri taki na Yehovah e hari sma kon na ensrefi èn na en Manpikin. Na Yehovah e poti wi na wroko fu preiki gi den nyun sma dati. A e du dati nanga yepi fu en Wortu, en santa yeye, èn nanga en organisâsi na grontapu. Meki wi teki a leri di Yehovah e gi. Meki wi gebroiki den bun sani di a e gi now fu meki wi de srekasreka fu de leriman fu Gado Wortu!
San yu ben sa piki?
• Fa a Bijbel e sreka wi gi a preikiwroko?
• Fa a santa yeye e yepi wi fu de koni nofo fu de preikiman?
• Fa Yehovah en organisâsi na grontapu yepi yu fu de wan bun preikiman fu a bun nyunsu?
• Fu san wi kan de seiker te wi e du a preikiwroko?
[Aksi fu a tori disi]
[Prenki na tapu bladzijde 25]
Yesus, di ben de wan leriman fu Gado Wortu, ben sori taki a lobi sma