’A lobi fu wi kon moro tranga’

TAPU freida 31 maart 2000, na Usubergi na tapu na èilanti Hokkaido, na Yapan, spiti faya. A lasti leisi di a bergi disi ben spiti faya, ben de 23 yari pasa. Dusundusun sma di ben tan na tapu na èilanti ben musu lowe gowe fu drape fu no kisi mankeri. Furu fu den sma disi ben lasi den oso nanga den wroko, ma koloku taki nowan fu den no lasi den libi. Makandra nanga den sma dati, 46 Koitoigi fu Yehovah ben musu lowe gowe sosrefi, ma den no tan sondro yepi.

A srefi dei di a bergi spiti faya, wan Kresten opziener di e reis ben de na ini a kontren dati. Na opziener yepi fu seti sani so taki den sma di ben lowe gowe ben kan kisi yepi. A no ben teki langa baka dati di den yepisani di den krosibei gemeente ben seni kon, ben doro drape. A bijkantoro fu Yapan heri esi seti wan komte di ben musu sorgu taki den sma disi ben e kisi yepi. Leki bakapisi fu dati, Yehovah Kotoigi na heri Yapan seni bun furu yepisani kon gi den sma di ben de na nowtu. A bijkantoro seni dinari na ini a furuten diniwroko fu Yehovah Kotoigi go na gemeente di ben abi furu yepi fanowdu. Sosrefi, a kringopziener go luku den gemeente na ini a kontren doronomo fu gi den brada nanga sisa tranga nanga deki-ati.

Na ini a muilek pisi ten dati, den Kotoigi na ini a kontren pe a bergi ben spiti faya, ben tan hori den Kresten konmakandra fu den. Den ben e kon makandra na ini oso fu Kotoigi di ben e libi na ini wan kontren pe so furu kefar no ben de. Di sma ben kisi primisi baka fu go na a kontren pe a Kownukondre zaal ben de, dan den brada drai baka go drape, èn den si taki a zaal no ben bun moro srefisrefi. A bergi di no ben de fara fu a Kownukondre zaal, ben e puru deki smoko ete. Den Kotoigi ben aksi densrefi efu a ben de wan bun fu tan hori konmakandra na a presi disi. Den ben sa man seti a Kownukondre zaal baka soleki fa a ben de?

Den brada teki a bosroiti fu bow wan nyun Kownukondre zaal na wan tra presi pe so furu kefar no ben de. A Regionaal Bowkomte yepi nanga a wroko disi. Kotoigi na ini a heri kondre ben gi moni leki bijdrage, èn a bijkantoro gebroiki a moni disi fu yepi bow a zaal. Heri esi a bijkantoro feni wan pisi gron, èn tangi fu a yepi fu hondrohondro sma di ben de klariklari fu yepi, meki a nyun Kownukondre zaal ben klari na ini wan syatu pisi ten. Tapu sonde 23 yuli 2000, a fosi konmakandra ben hori na ini a nyun Kownukondre zaal disi, èn 75 sma ben de na konmakandra disi. Furu fu den sma di ben de drape ben e krei fu di den ben breiti. Den brada gi a Kownukondre zaal abra na Gado na ini oktober fu a srefi yari dati. Na a okasi dati, wan fu den owruman fu a gemeente dati ben taki: „Furu problema nanga pina miti wi fu di a bergi spiti faya. Ma a bow-wroko disi gi wi prisiri, èn a meki taki wi no e frede moro. A lobi di wi abi gi Yehovah nanga wi lobi Kresten brada kon moro tranga!”

[Sma di abi a reti fu a prenki na tapu bladzijde 19]

Na Usubergi ben e spiti faya: AP Photo/Koji Sasahara