Fu san ede grontapu ben kisi pori na ini owruten?

A FRUDU di ben de na heri grontapu no ben de wan bigi rampu nomo. A ben de wan krutustrafu di komoto fu Gado. Ala sma ben kisi fu yere a warskow fu san ben o pasa, ma moro furu fu den no ben arki. Fu san ede? Yesus ben taki: „Na ini den dei dati bifo a frudu, den ben e nyan èn den ben e dringi, mansma ben e trow èn umasma den ben e gi fu trow, teleki a dei taki Noa ben go na ini na ark, èn den no ben poti prakseri na tapu, teleki a frudu ben kon èn ben figi den alamala puru.”—Mateyus 24:38, 39.

Wan libimakandra di ben seti bun

Den sma fu a libimakandra di ben de bifo a Frudu ben abi difrenti winimarki di wi no abi na ini a ten disi. Wan sani na taki ala libisma ben e taki wán tongo (Genesis 11:1). Disi ben meki taki a ben moro makriki gi den fu du wroko pe furu sma musu wroko makandra. Fu eksempre, te den ben wani meki moi sani na wan koni fasi èn te den wani du sani na a sei fu sabidensi. Den sma fu a ten dati ben e libi moro langa tu. Dati meki den ben abi moro ten fu kon sabi moro sani fu den wroko nanga tra sani di den ben leri na ini ala den hondrohondro yari di den ben de na libi kaba.

Son sma e taki dati a no tru taki libisma ben man libi so langa na ini a ten dati. Den e taki dati den yari di Bijbel e kari a no trutru yari ma taki na soso mun. Ma dati de tru? We, prakseri a tori fu Mahalalel. Bijbel e taki: „Mahalalel ben libi ete siksitenti na feifi yari. Ne a tron a papa fu Yared. . . . Ala nanga ala, Mahalalel ben libi aiti hondro neigitenti na feifi yari, ne a dede” (Genesis 5:15-17). Efu a de so, taki wan yari wani taki wan mun, dan Mahalalel ben abi feifi yari nomo di a kisi en  manpikin! Ma a no de so kwetikweti taki wan yari ben de wan mun nomo. Libisma na a ten dati ben de moro krosibei fu a volmaaktifasi fu a fosi libisma, Adam. Iya, a tru taki den ben libi hondrohondro yari langa. Ma san den ben du na ini a ten dati?

Hondrohondro yari bifo a Frudu, den sma na grontapu ben kon so furu taki Kain, a manpikin fu Adam, ben man bow wan foto. A ben kari a foto dati Heinok (Genesis 4:17). Na ini den yarihondro bifo a Frudu sma ben seti difrenti sortu bisnis kaba. Sma ben de di ben e meki „ala sortu wrokosani fu kopro nanga isri” (Genesis 4:22). A no de fu taki dati den wrokosani disi ben meki fu bow oso, fu du temrewroko, fu meki krosi, èn fu wroko gron. Na ini den tori di sma ben skrifi fu den fosi libisma na grontapu, wi kan leisi fu ala den sortu wroko disi di sma ben du.

Libisma ben e feni fasi fu du den wroko disi moro bun. Na so a ben de nanga ibri geslakti di ben kon. Te fu kaba, den ben man du sani, soleki wroko isri, sorgu wan gron so taki sani kan gro bun, sorgu èn kweki skapu nanga kaw, skrifiman wroko, èn meki sani na wan koni fasi. Yubal, fu eksempre, ben de „a tata fu ala den sma di e prei a harpu nanga a froiti” (Genesis 4:21). A libimakandra dati ben e go na fesi na furu difrenti fasi. Ma wantronso ala sani ben kon na wan kaba. San ben pasa?

San ben de a problema?

Aladi a libisma libimakandra di ben de bifo a Frudu ben abi na okasi fu du someni bun sani, toku a fasi fa a libimakandra dati bigin no ben bun. Adam di ben seti a libimakandra dati, ben trangayesi Gado. Kain di ben bow a fosi foto di Bijbel e taki fu en, ben kiri en eigi brada. Wi kan frustan fu dati ede taki ogridu ben e panya esi-esi! Fu di Adam no ben gi den bakapikin fu en wan bun eksempre, meki a bakapisi ben de taki den bakapikin fu en kon ogri moro nanga moro.—Romesma 5:12.

Neleki fa a sori, dan na ogridu fu den sma dati ben e doro en heimarki. Ne Yehovah teki a bosroiti taki a ben o gi pasi meki libisma go doro nanga na ogridu dati ete 120 yari (Genesis 6:3). Bijbel e taki: „Na ogridu fu libisma ben kon furu na grontapu èn taki ala prakseri di ben de na ini en ati, ala ten ben de soso takru. . . . Grontapu ben kon furu nanga ogri di sma e du nanga tranga.”—Genesis 6:5, 11.

Te fu kaba, Gado ben taigi Noa krinkrin taki ala skin ben sa kisi pori na ini wan frudu (Genesis 6:13, 17). Aladi Noa ben tron wan „preikiman fu regtfardikifasi”, toku a sori leki a no ben makriki gi den sma fu bribi taki ala sani di ben e lontu den ben o kisi pori (2 Petrus 2:5). Soso aiti sma ben gi yesi na a warskow, èn soso den aiti sma dati tan na libi (1 Petrus 3:20). Fu san ede a tori dati prenspari gi wi na ini a ten disi?

San wi e leri fu a tori disi?

Wi kan teki a ten fu wi gersi nanga a ten fu Noa. Ibri tron baka wi e yere fu ogri-ati sani di sma e du fu gens tirimakti èn fu a kiri di sma e kiri ipi-ipi sma fu ras, politiek noso kulturu ede. Wi e yere sosrefi fu a sutu di sma e sutu bigi grupu sma kiri fu soso, èn na ogri di e du nanga tranga na ini osofamiri di panya na alape. Ete wan tron grontapu kon lai nanga ala sortu ogridu, èn fu dati ede meki a libisma famiri kisi wan warskow taki wan krutu de na pasi e kon. Yesus srefi ben taki dati a ben o kon leki a Krutuman di Gado poti na wroko èn taki a ben o prati sma fu makandra neleki fa wan skapuman e prati den skapu fu den bokoboko. Yesus ben taki dati den wan di no warti, „sa go na ini a têgo koti puru” (Mateyus 25:31-33, 46). Ma Bijbel e taki dati disi leisi milyunmilyun sma sa tan na libi, iya, wan bigi ipi fu sma di e anbegi a wan-enkri tru Gado. Na ini a grontapu di e kon, den wan disi sa nyan bun fu têgo libi na ini vrede nanga seikerfasi. Den o nyan bun fu den sani disi na wan fasi, di sma noiti no ondrofeni ete.—Mika 4:3, 4; Openbaring 7:9-17.

Furu sma e spotu nanga den sortu tori disi di skrifi na ini Bijbel. Den e spotu sosrefi nanga den warskow fu a krutu di de na pasi e kon. A krutu disi sa sori taki den sani di Bijbel e taki na tru tori. Ma na apostel Petrus ben taki dati den sortu sma dati no e si san e pasa trutru. A ben skrifi: „Na ini den lasti dei spotuman sa kon . . . den e taki: ’Pe a denoya disi fu en de di den ben pramisi?’ . . . Bika, akruderi a wani fu den, den no e teki notisi fu a tori disi, taki nanga a wortu fu Gado, den hemel  ben de fositen kaba èn wan grontapu, di ben komoto leki wán pisi na ini watra èn na mindri fu watra; èn nanga den sani dati a grontapu fu a ten dati ben kisi pori di watra ben sungu en. Ma nanga a srefi wortu, hemel nanga grontapu di de now, kibri gi a faya èn den e poti den na wan sei gi a dei fu krutu èn gi a pori di ogri sma sa kisi.”—2 Petrus 3:3-7.

Na ini a ten disi sma de di e preiki fayafaya fu a krutudei disi di e kon esi-esi. Sosrefi den e fruteri sma na heri grontapu taki baka a krutudei dati vrede sa kon. Na so fasi den e du san Yesus ben komanderi na fesi (Mateyus 24:14). Wi no musu si a warskow disi leki wan lawlaw sani. Na Almakti Gado e du san a pramisi.

A grontapu di o kon

Efu a bigi kenki dati o kon trutru, dan san o pasa nanga a libisma famiri? Yesus ben pramisi wan sani na a bigin fu a barinen Bergitaki fu en, di a ben taki: „Koloku fu den safri-atiwan, bika den sa kisi grontapu.” Baka dati a leri den disipel fu en fa fu begi Gado: „Meki yu kownukondre kon. Meki yu wani pasa, soleki na hemel, so tu na grontapu” (Mateyus 5:5; 6:10). Iya, Yesus srefi ben leri sma taki na ini a ten di e kon a libisma famiri sa abi wan tumusi moi tamara dyaso na grontapu. A ben kari a ten dati, a ten „te sani o meki kon nyun baka”.—Mateyus 19:28.

Sobun te yu e sidon denki a tamara, yu no musu gi spotuman na okasi fu meki yu go tweifri na den warskow fu Gado. A grontapu pe wi e libi now de someni langa kaba èn a kan gersi leki sani e waka bun. Toku wi no musu poti wi frutrow na en tapu. A libisma famiri disi kisi krutu kaba. Sobun, teki deki-ati fu den wortu na a kaba fu a brifi fu na apostel Petrus:

„Now di ala den sani disi sa smèlter, sortu sma unu musu de fu tyari unsrefi na wan santa fasi èn fu du sani di e sori taki unu gi unsrefi na ini a dini fu Gado, e fruwakti èn e hori a denoya fu a dei fu Yehovah bun na prakseri . . . Fu di unu e fruwakti den sani disi, meki unu musu du ala muiti fu a feni unu sondro flaka èn sondro fowtu èn na ini vrede. . . . Tan gro na ini a bun-atifasi nanga sabi fu wi Masra èn Frulusuman Yesus Krestes” (2 Petrus 3:11, 12, 14, 18). Fu dati ede a bun fu leri fu san pasa na ini a ten fu Noa. Kweki wan bun matifasi nanga Gado. Meki muiti fu kon sabi Yesus Krestes moro bun. Dini Gado fayafaya èn du muiti fu de na mindri den milyunmilyun sma di wani libi pasa a kaba fu a grontapu disi, fu go na ini a nyun grontapu pe vrede sa de.

[Prenki na tapu bladzijde 5]

Bifo a Frudu sma ben sabi kaba fa fu meki isri wrokosani

[Prenki na tapu bladzijde 7]

Wan tumusi moi tamara e wakti wi