Heri grontapu ben kisi pori!

Luku lontu yu. Yu e si grontapu nanga ala den foto, den difrenti kulturu, den koni sani di libisma du, nanga ala den milyardmilyard sma di e libi na tapu. Fu di a gersi leki ala sani seti so moi, meki wi kan denki taki den sani disi sa tan fu têgo, a no so? Yu denki taki wan dei o kon pe a grontapu disi no sa de moro? A no de fu taki dati a no makriki fu bribi so wan sani. Ma langa ten pasa wan heri libimakandra ben kisi pori. A sani disi skrifi na ini wan buku di abi tru tori na ini. Yu ben sabi dati?

WI NO e taki fu wan libimakandra fu sma di ben abi so furu koni èn di no ben seti so bun. Nôno. A libimakandra di ben kisi pori, ben seti heri bun. Den sma ben abi koni fu du furu sani, den ben e libi na ini foto, èn den ben e meki moi sani. Toku, Bijbel e fruteri wi taki wantronso wan bigi frudu ben kon di ben pori heri grontapu. A sani disi pasa tapu a di fu 17 dei fu a di fu tu mun, sowan 352 yari bifo a famiri-edeman Abraham ben gebore. *

 A tori disi tru? So wan sani ben pasa trutru? Wan libimakandra ben de trutru na ini owruten pe sani ben waka bun, ma di ben kisi pori bakaten? Efu dati de so, dan fu san ede meki dati pasa? San ben de a problema? Wi kan leri wan sani fu a pori di a libimakandra dati ben kisi pori?

Grontapu ben kisi pori trutru na ini owruten?

Efu so wan bigi rampu pasa trutru, dan sma no ben sa frigiti en makriki. Dati meki furu folku fu grontapu abi sani di e memre wi fu a bigi rampu dati. Fu eksempre, prakseri taki Bijbel e kari a soifri dei di a sani disi pasa. A di fu tu mun fu a kalender di sma ben abi fositen ben e bigin mindrisei fu oktober te go miti mindrisei fu november. Sobun, a di fu 17 dei fu a di fu tu mun, pikinmoro musu de a srefi leki a fosi dei fu november. Sobun, a no e fruwondru wi taki na ini furu kondre sma e hori fesa gi den dedewan na a pisi ten dati fu a yari.

Moro sani de di e sori krin taki a tori fu a Frudu na wan pisi fu den fositen tori di libisma gwenti fu fruteri. Pikinmoro ala den fositen folku e fruteri wan tori fu a fasi fa den afo fu den libi pasa wan bigi frudu di ben kon na heri grontapu. Folku soleki den Inkasma na ini Zuid Amerika, den Keltsma na ini Europa, nanga den Pygmeisma fu Afrika, abi den srefi sortu fositen tori leki den sma fu Alaska, Australia, China, India, Litonia, Meksikow, Mikronesia, Nyun Zeeland, èn wan tu presi na Noord Amerika.

Fu di sma tan fruteri den sortu tori disi yari go yari kon èn fu di sma e poti moro sowtu gi a tori ibri yuru baka, meki taki den tori e kenki pikinso. Ma ala den fositen tori abi wan tu prenspari sani na ini di e sori taki a rutu fu den tori disi na a srefi: Gado ben atibron nanga na ogridu fu libisma. A ben tyari wan bigi frudu kon. A heri libisma famiri ben kisi pori. Ma wan tu regtfardiki sma nomo ben tan na libi. Den sma disi ben bow wan sipi pe libisma nanga meti ben kisi kibri. Baka wan pisi ten den ben seni fowru go na doro fu go suku drei gron. Te fu kaba, a sipi kon fasi na tapu wan bergi. Di den sma di ben tan na libi ben go na dorosei, dan den tyari wan srakti-ofrandi.

San disi e sori wi? A no kan taki den tori disi gersi makandra nomo. Te yu luku ala den fositen tori disi makandra, dan yu e si krin taki den e horibaka gi a tori di Bijbel e fruteri, taki ala libisma komoto fu den sma di ben libi pasa a frudu di ben pori grontapu na ini owruten. Sobun, wi no abi fositen tori noso anansitori fanowdu fu kon sabi san ben pasa. Wi abi den tori fu den Hebrew Buku fu Bijbel pe ala den sani disi skrifi soifri gi wi.—Genesis, kapitel 6-8.

Bijbel abi tori na ini di komoto fu Gado. Drape wi e leisi fu a historia fu libisma, fu sensi a ten di a libi bigin. Toku, a de krin taki a no wan tori nomo  fu sani di pasa na ini historia. Gado e taki nanga libisma nanga yepi fu Bijbel. Disi de so fu di Bijbel abi profeititori di e kon tru ala ten èn fu di den tori di skrifi na ini e sori a bigi koni fu Gado. Bijbel de trafasi leki den anansitori. Te a e fruteri fu sani di pasa na ini a historia, dan a e kari den nen fu sma, den famirilin fu den, a e kari sosrefi a dei di a sani pasa, èn a e taki finifini fu kondre noso presi pe sani pasa. A e yepi wi tu fu frustan fa a libi ben de bifo a Frudu èn a e fruteri wi fa a du kon taki a libi na grontapu kon na wan kaba na a ten dati.

San ben de a problema nanga a libimakandra di ben de bifo a Frudu? A pisi di e kon e gi piki tapu na aksi dati. Na aksi disi prenspari gi iniwan sma di wani sabi san o pasa nanga a disiten libimakandra, noso fa sani sa waka na ini a tamara fu en.

[Futuwortu]

[Faki na tapu bladzijde 4]

(Efu yu wani si pe den sani disi skrifi, luku a tijdschrift)

Fositen tori fu a Frudu na heri grontapu

Kondre Pisi di de a srefi 1 2 3 4 5 6 7 8 9 10

Grikikondre 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Litonia 6 ◆ ◆ ◆ ◆ ◆ ◆

Asiria 9 ◆ ◆ ◆ ◆ ◆ ◆ ◆ ◆ ◆

Tansania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

Nyun Zeeland - Maori 5 ◆ ◆ ◆ ◆ ◆

Mikronesia 7 ◆ ◆ ◆ ◆ ◆ ◆ ◆

Washington VS - Yakima 7 ◆ ◆ ◆ ◆ ◆ ◆ ◆

Misisipi VS - Choctaw 7 ◆ ◆ ◆ ◆ ◆ ◆ ◆

Meksikow - Michoacan 5 ◆ ◆ ◆ ◆ ◆

Zuid-Amerika - Quechua 4 ◆ ◆ ◆ ◆

Bolifia - Chiriguano 5 ◆ ◆ ◆ ◆ ◆

Gayana - Arawak 6 ◆ ◆ ◆ ◆ ◆ ◆

1: Gado ben atibron nanga na ogridu

2: Wan Frudu tyari pori kon

3: A Frudu komoto na Gado

4: Gado ben gi wan warskow

5: Soso wan tu sma tan na libi

6: Den kisi kibri na ini wan sipi

7: Meti ben kisi kibri tu

8: Wan fowru noso wan tra meti seni go na dorosei

9: Te fu kaba, a kon fasi na tapu wan bergi

10: Den ben tyari srakti-ofrandi