Leti fu Gado e puru wi na dungru!
Leti fu Gado e puru wi na dungru!
„Na Yehovah e leti a dungru pasi fu mi.”—2 SAMUEL 22:29.
1. San leti abi fu du nanga libi?
„GADO ben taki moro fara: ’Meki leti kon.’ Ne leti kon” (Genesis 1:3). Den prenspari wortu disi na ini Genesis di e taki fu den sani di meki, e sori taki leti e komoto fu Yehovah. Nowan sani na grontapu ben sa man tan na libi sondro a leti dati. Yeye leti e komoto tu fu Yehovah, èn wi abi a leti disi tranga fanowdu fu man sabi fa fu tyari wi libi (Psalm 43:3). Kownu David ben sori taki yeye leti abi furu fu du nanga a libi fu wi, di a ben skrifi: „Yu na a Sma fu pe a libi komoto; nanga a leti fu yu, wi kan si leti.”—Psalm 36:9.
2. Nanga san yeye leti abi furu fu du, soleki fa Paulus sori?
2 Sowan 1000 yari baka di David ben de na libi, na apostel Paulus sori go na a pisi tori di e taki fu den sani di Gado meki. Na ini a brifi di a ben e skrifi a Kresten gemeente na ini Korente, a ben taki: „Na Gado ben taki: ’Meki leti skèin komoto fu a dungru.’” Baka dati, Paulus sori taki yeye leti abi furu fu du nanga sabi fu Yehovah, di a taki moro fara: „A skèin kon na tapu wi ati fu gi den leti nanga a glori sabi fu Gado di de fu si na ini a fesi fu Krestes” (2 Korentesma 4:6). Fa a leti dati e doro wi?
Bijbel e gi wi leti
3. San na a leti di Yehovah e gi wi nanga yepi fu Bijbel?
3 Na a fosi presi, Yehovah e gi wi yeye leti nanga yepi fu en Wortu, Bijbel. Sobun, te wi e studeri Bijbel èn te wi e teki a sabi fu Gado, dan wi e gi a leti fu en na okasi fu kon na wi tapu. Yehovah e gebroiki a Bijbel fu meki wi frustan krin san a abi na prakseri èn fa wi kan du en wani. Disi e yepi wi fu abi wan marki na ini wi libi èn a e yepi wi sosrefi na yeye fasi (Preikiman 12:1; Mateyus 5:3). Yesus ben gebroiki wortu fu a Wet fu Moses, fu poti krakti na tapu taki wi musu sorgu wisrefi bun na yeye fasi. A ben taki: „Buku skrifi: ’Libisma no musu libi fu brede wawan, ma fu ibri wortu di e kon fu Yehovah en mofo.’”—Mateyus 4:4; Deuteronomium 8:3.
4. Fa Yesus de „a leti fu grontapu”?
4 Bijbel e sori taki Yesus abi furu fu du nanga a yeye leti. Iya, Yesus ben kari ensrefi „a leti fu grontapu”, èn a ben taki: „A sma di e waka na mi baka, no sa waka na ini dungru kwetikweti, ma sa abi a leti fu libi” (Yohanes 8:12). Den wortu disi e yepi wi fu frustan taki na Yesus e tyari a waarheid fu Yehovah kon na krin gi a libisma famiri. Fu man wai pasi gi dungru, so taki wi kan waka na ini a leti fu Gado, dan wi musu arki ala san Yesus e taki. Wi musu du sani soifri leki en, èn wi musu gi yesi na den sani di a e leri wi na ini Bijbel.
5. San den bakaman fu Yesus ben musu du baka a dede fu en?
5 Wan tu dei bifo a dede, dan Yesus kari ensrefi a leti ete wan tron, èn a taigi den disipel fu en: „A leti sa de nanga unu pikinso moro langa. Waka aladi unu abi a leti, so taki dungru no e kon na un tapu; èn a sma di e waka na ini dungru no sabi pe a e go. Aladi unu abi a leti, poti bribi na ini a leti, so taki unu kan tron manpikin fu a leti” (Yohanes 12:35, 36). Den sma di ben tron manpikin fu leti, ben kon leri sabi na „eksempre fu gosontu wortu” na ini Bijbel (2 Timoteyus 1:13, 14). Baka dati den gebroiki den wortu disi fu hari reti-ati sma puru na a dungru, fu tyari den kon na ini a leti fu Gado.
6. San 1 Yohanes 1:5 e fruteri wi fu leti nanga dungru?
6 Na apostel Yohanes ben skrifi: „Gado na leti, èn ini wánfasi nanga en nowan dungru no de kwetikweti” (1 Yohanes 1:5). Luku a difrenti dyaso na mindri leti nanga dungru. Yeye leti e komoto fu Yehovah, èn a no abi noti fu du kwetikweti nanga yeye dungru. Pe a dungru e komoto dan?
A sma di e tyari dungru kon na yeye fasi
7. Suma e meki taki grontapu de na ini yeye dungru? Sortu krakti a abi na sma tapu?
7 Na apostel Paulus ben taki fu „a gado fu a seti fu sani disi”. A ben gebroiki den wortu dati fu taki fu Satan Didibri. Paulus ben taki moro fara taki Satan „breni a frustan fu sma di no e bribi, so taki a krin leti fu a glori bun nyunsu fu Krestes, di de a prenki fu Gado, no ben sa skèin kon doro” (2 Korentesma 4:4). Furu sma e taki dati den e bribi na ini Gado. Ma furu fu den sma disi no e bribi taki wan Didibri de trutru. Fu san ede? Den no wani bribi taki wan ogri krakti de di tranga moro libisma èn di kan abi krakti tapu a denki fu den. Ma soleki fa Paulus e sori, Didibri de trutru èn a trutru abi krakti tapu sma, so taki den no man si a leti fu waarheid. A krakti di Satan abi tapu a denki fu libisma, de fu si na ini a profeititori di e taki fu en leki „a wan . . . di e kori ala sma na heri grontapu” (Openbaring 12:9). Yesaya ben taki na fesi san ben o de den bakapisi fu den wroko fu Satan: „Luku! dungru srefi sa tapu grontapu, èn deki dungru den nationaal grupu” (Yesaya 60:2). Nownowde a heri libisma famiri, boiti den wan di e dini Yehovah, e kisi fu du nanga den bakapisi disi.
8. Fa den sma di de na ini yeye dungru, e sori taki den e bruya?
8 Te wan sma de na ini wan bun dungru presi, dan a no man si noti. Heri esi a no e si moro pe a musu waka, a kan bruya srefi. Na a srefi fasi, sma di de na ini yeye dungru, no man si sani krin èn den e bruya esi-esi. Kande den no sa man si krin moro san tru èn san no tru, san bun èn san ogri. A profeiti Yesaya ben taki fu den wan di ben de na ini a yeye dungru dati, di a ben skrifi: „Helu fu den wan di e taki dati bun na ogri èn ogri na bun, di e meki dungru de leti èn leti de dungru, di e meki san bita de sukru èn san sukru de bita!” (Yesaya 5:20) Den sma di e tan na ini yeye dungru, e meki a gado fu dungru, Satan Didibri, abi krakti na den tapu èn te fu kaba den e drai den baka gi a Sma di e gi leti nanga libi.—Efeisesma 4:17-19.
Den problema di sma musu wini fu man komoto na dungru fu go na ini a leti
9. Fu san ede wi kan taki dati ogriman lobi trutru dungru èn sosrefi yeye dungru?
9 A getrow man Yob ben sori fa ogriman lobi dungru. A ben taki: „Na ai fu a sutaman, a wakti te mofoneti doro, èn a e taki: ’Nowan ai sa si mi!’ Èn tapu en fesi a e poti wan sani fu tapu en” (Yob 24:15). Ogriman de na ini yeye dungru tu, èn a dungru dati kan abi bigi krakti na den tapu. Na apostel Paulus ben taki dati hurudu, fufuru, gridifasi, drungufasi, kosikosi, nanga krukafasi, na aladei sani gi den sma di de na ini a trapu fu a dungru dati. Ma iniwan sma kan kenki te a e teki a leti fu Gado Wortu. Paulus ben sori na ini a brifi di a skrifi den Korentesma, taki sma man kenki. Furu Kresten na ini Korente ben e du wroko fu a dungru fosi, ma Paulus ben taigi den: „Ma unu wasi kon krin, ma unu kon santa, ma den fruklari unu regtfardiki ini a nen fu wi Masra Yesus Krestes èn nanga a yeye fu wi Gado.”—1 Korentesma 6:9-11.
10, 11. (a) Fa Yesus ben sori bun-ati gi wan breniman di a ben dresi? (b) Fu san ede furu sma no e teki a leti?
10 Te wan sma e komoto na ini wan bun dungru presi kon na ini a leti, dan den ai fu en musu kon gwenti a leti baka. Na ini Betsaida, Yesus ben dresi wan breniman, ma a no ben meki a man si ala sani krin wantewante. „A teki a man na en anu, a tyari en go na dorosei fu a dorpu, èn, baka di a spiti na tapu den ai fu en, dan a poti den anu fu en na tapu a man, èn a bigin aksi en: ’Yu e si wan sani?’ A man opo en ai luku, èn a bigin taki: ’Mi e si libisma, bika mi e si sani di gersi bon, ma den e waka lontu. Baka dati, a poti den anu fu en baka na tapu den ai fu a man, èn a man ben man si krin, èn a kon betre, èn a ben si ala sani bun” (Markus 8:23-25). Soleki fa a sori, dan Yesus ben meki a man kon si moro bun pikinsopikinso, so taki a ben kan kon gwenti a krin leti fu a son. Wi kan frustan taki a man dati ben musu prisiri srefisrefi fu di a ben man si.
11 Ma a prisiri di a man dati ben firi, no e doro a prisiri fu den sma di kisi yepi fu komoto safrisafri na ini yeye dungru, fu go na ini a leti fu waarheid. Te wi si fa den sma disi e prisiri, dan wi ben kan aksi wisrefi fu san ede furu sma no lobi a leti. Yesus e fruteri fu san ede dati de so: „Now disi na a fondamenti fu a krutu, taki a leti kon na grontapu, ma libisma lobi a dungru moro leki a leti, bika den wroko fu den ben takru. Bika a sma di e du tegu sani, no wani si a leti na ai èn a no e kon na a leti, so taki sma no kan krutu den wroko fu en” (Yohanes 3:19, 20). Iya, furu sma lobi fu du „tegu sani”. Fu eksempre, den lobi fu du hurudu, fu pina sma, fu lei, fu du kruktudu èn fu fufuru. Den lobi a yeye dungru di e komoto fu Satan, bika drape den kan du san den wani.
Fa fu go na fesi na ini a leti
12. Sortu winimarki wi kisi fu di wi kon na a leti?
12 Sortu kenki wi tyari kon sensi wi kon sabi a leti? Son leisi a bun fu poti prakseri na a tori dati èn fu ondrosuku sortu bun kenki wi tyari kon na yeye fasi. Nanga sortu takru gwenti wi tapu? Sortu problema wi ben man lusu? Wan kenki kon na ini den prakseri di wi ben abi gi a ten di e kon? Nanga a krakti fu Yehovah èn nanga yepi fu en santa yeye, wi kan go doro fu kenki den fasi nanga den denki di wi abi. Na so fasi wi sa sori taki wi e meki a leti abi krakti na wi tapu (Efeisesma 4:23, 24). Paulus ben taki en so: „Wan ten unu ben dungru, ma now unu tron leti na ini Masra. Tan waka leki pikin fu a leti, bika a froktu fu a leti e sori na ini ibri bunfasi nanga regtfardikifasi nanga waarheid” (Efeisesma 5:8, 9). Te wi e meki a leti fu Yehovah sori wi fa fu tyari wi libi, dan dati e gi wi wan howpu nanga wan marki na ini wi libi èn a e gi prisiri tu na den sma na wi lontu. Den kenki disi di wi e tyari kon, trutru e prisiri na ati fu Yehovah!—Odo 27:11.
13. Fa wi kan sori taki wi de nanga tangi na ati gi a leti fu Yehovah, èn san wi musu abi fu man du dati?
13 Wi e sori taki wi de nanga tangi na ati taki wi abi wan moro koloku libi, te wi e prati a leti fu Yehovah. Wi kan du dati te wi e taki fu den sani di wi leri fu Bijbel nanga famiriman, nanga mati, èn nanga birtisma (Mateyus 5:12-16; 24:14). A preikiwroko fu wi nanga a bun fasi fa wi e tyari wisrefi leki Kresten, e krutu den sma di no wani arki wi. Paulus e taki: „Unu musu tan ondrosuku fu kon sabi san e plisi Masra; èn no teki prati nanga den moro na den soso wroko di de fu a dungru, ma na presi fu dati, unu musu warskow den srefi” (Efeisesma 5:10, 11). Wi musu abi deki-ati te wi wani yepi trawan fu gowe libi a dungru èn fu teki a leti. Boiti dati, wi musu abi sari-ati gi trawan èn wi musu sori taki wi e broko wi ede nanga den. Sosrefi wi musu angri fu prati a leti fu waarheid nanga den, so taki den kan kisi wini fu têgo.—Mateyus 28:19, 20.
Luku bun nanga falsi leti!
14. Na sortu warskow wi musu gi yesi, te a abi fu du nanga leti?
14 Sma di de na se teneti, breiti srefisrefi te den e si wan leti. Fosi, sma ben leti faya na tapu den stonbergi na Ingrisikondre. Den leti disi ben sori sma pe den ben kan kibri te wan hebi sekiwatra ben de. Den sma na ini den sipi ben breiti trutru nanga den leti disi di ben e tyari den go na kibripresi. Ma sonwan fu den faya ben de falsiwan. Na presi taki den ben e tyari den sipi go na wan kibripresi, den ben e tyari den go tuka na a sekanti pe stonbergi ben lai. Drape fufuruman ben e teki den lai na ini den sipi disi tyari gowe. Na ini a grontapu disi di e kori sma, wi musu luku bun nanga falsi leti di kan tyari wi go fu go kisi pori na yeye fasi. „Satan srefi e tan kenki ensrefi na ini wan engel fu leti”, na so Bijbel e taki. Na a srefi fasi, den dinari fu Satan, sosrefi den sma di fadon komoto na bribi, na „bedrigi wrokoman” di „e tan kenki densrefi na ini dinari fu regtfardikifasi”. Te wi e poti prakseri na den falsi denki fu den sma disi, dan a frutrow di wi abi na ini Bijbel, Yehovah en Wortu fu waarheid, kan kon swaki èn wi kan lasi a bribi fu wi.—2 Korentesma 11:13-15; 1 Timoteyus 1:19.
15. San sa yepi wi fu tan waka na tapu a pasi di e tyari sma go na libi?
15 A psalm skrifiman ben skrifi: „Yu wortu na wan lampu gi mi futu, èn wan leti na tapu mi pasi” (Psalm 119:105). Iya, a ’smara pasi di e tyari sma go na libi’ trutru e kisi leti fu wi lobi-ati Gado, Yehovah, „di wani taki ala sortu sma musu kisi frulusu èn kon kisi wan soifri sabi fu waarheid” (Mateyus 7:14; 1 Timoteyus 2:4). Te wi e hori wisrefi na den gronprakseri fu Bijbel, dan dati sa kibri wi fu no gowe libi a smara pasi fu go na tapu dungru pasi. Paulus ben skrifi: „Na Gado ben meki sma skrifi ala den Buku fu Bijbel nanga yepi fu en santa yeye èn den bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi” (2 Timoteyus 3:16). Aladi wi e gro na yeye fasi, wi e kisi moro leri fu Gado Wortu. Nanga yepi fu a leti fu Gado Wortu wi kan piri-ai gi wisrefi, noso skapuman na ini a gemeente kan piri-ai gi wi te dati de fanowdu. Wi kan poti sani kon reti baka sosrefi èn wi kan sori sakafasi fu di wi e teki a trangaleri di wi e kisi na ini regtfardikifasi. Disi sa yepi wi fu tan waka na tapu a pasi di e tyari sma go na libi.
Sori warderi gi a leti
16. Fa wi kan sori warderi gi a moi leti di Yehovah e gi wi?
16 Fa wi kan sori warderi gi a moi leti di Yehovah e gi wi? Yohanes kapitel 9 e fruteri taki baka di Yesus ben dresi wan breniman, dan a man disi sori warderi gi san Yesus ben du gi en. Fa a man sori warderi? A poti bribi na ini Yesus leki a Manpikin fu Gado èn a fruteri ala sma taki Yesus ben de „wan profeiti”. Boiti dati, a man ben e taki sondro frede te sma ben pruberi fu spotu a wondru di Yesus ben du (Yohanes 9:17, 30-34). Na apostel Paulus e kari den salfu memre fu a Kresten gemeente „wan pipel di de wan spesrutu gudu”. Fu san ede? Fu di den abi warderi. Neleki a breniman di Yesus ben dresi, den e sori warderi gi Yehovah tu, a Sma di e gi den bun sani, fu di den ’e meki den moi sani bekènti fu a sma di kari den puru fu dungru kon na ini en tumusi moi leti’ (1 Petrus 2:9; Kolosesma 1:13). Den sma di abi a howpu fu libi na grontapu abi warderi tu gi a leti, èn den e yepi den salfu brada fu den fu meki den „moi sani” bekènti na ala sma. Disi na trutru wan bun bigi grani di Gado gi libisma di no de volmaakti!
17, 18. (a) Sortu frantwortu ibri sma abi? (b) Fa ibri Kresten musu du leki Timoteyus?
17 A de prenspari taki wi abi trutru warderi gi a leti fu waarheid. Wi musu hori na prakseri taki nowan sma gebore nanga sabi fu waarheid. Son sma e kon sabi waarheid te den de bigisma kaba, èn den e kon si esi-esi taki a leti krakti moro leki a dungru. Trawan abi a moi okasi fu kisi leri fu papa nanga mama di e frede Gado. Den sortu sma disi makriki ben kan teki a leti disi leki wan soso sani. Wan Kotoigi, di a papa nanga mama fu en ben e dini Yehovah kaba fosi a gebore, ben taki dati a ben teki furu ten nanga bun furu muiti fu frustan èn fu warderi a waarheid di a ben leri sensi a ben pikin (2 Timoteyus 3:15). Ibriwan fu wi, awansi wi yongu noso owru, musu kisi trutru warderi gi a waarheid di Yehovah tyari kon na krin gi wi.
18 A yonkuman Timoteyus ben leri sabi „den santa buku” sensi a ben pikin, ma na fu di ensrefi ben meki furu muiti na ini a diniwroko, meki a gro kon tron wan lepi Kresten (2 Timoteyus 3:15). Fu dati ede a ben man yepi apostel Paulus, di ben frumane en: „Du ala san yu man fu sori yusrefi na Gado leki wan sma di a feni bun, leki wan wrokoman di no abi fu syen fu noti, di e gebroiki a wortu fu waarheid na wan reti fasi.” Meki wi alamala du leki Timoteyus. Meki wi no du sani di kan gi wi syen, noso sani di kan meki Yehovah syen gi wi.—2 Timoteyus 2:15.
19. (a) Sortu wortu di David ben taki, wi alamala ben sa musu taki tu? (b) Sortu tori wi sa taki na ini na artikel di e kon?
19 Wi trutru musu prèise Yehovah, di gi wi a leti fu en waarheid. Neleki Kownu David, wi e taki: „Yu na mi lampu, o Yehovah, èn na Yehovah e leti a dungru pasi fu mi” (2 Samuel 22:29). Toku, wi no musu denki taki wi no abi fu broko wi ede moro, bika disi kan meki wi fadon go baka na ini a dungru pe wi komoto. Fu dati ede, na artikel di e kon sa yepi wi fu ondrosuku o prenspari a waarheid fu Gado de na ini wi libi.
San yu leri?
• Fa Yehovah e gi wi yeye leti?
• Nanga sortu problema wi e kisi fu du, fu di a yeye dungru e lontu wi?
• Nanga sortu kefar wi musu luku bun?
• Fa wi kan sori warderi gi a leti fu waarheid?
[Aksi fu a tori disi]
[Prenki na tapu bladzijde 8]
Trutru leti nanga yeye leti e komoto fu Yehovah
[Prenki na tapu bladzijde 10]
Neleki fa Yesus ben dresi wan breniman pikinsopikinso, na so a e yepi wi fu komoto na ini yeye dungru
[Prenki na tapu bladzijde 11]
Te wi e meki den falsi leti fu Satan kori wi, dan dati sa meki wi kisi pori na yeye fasi