Ondrofenitori

Mi du mi diniwroko sondro fu prakseri misrefi

SOLEKI FA DON RENDELL FRUTERI

Mi mama dede na ini 1927 di mi ben abi feifi yari nomo. Ma a bribi fu en ben abi bigi krakti tapu mi libi. Fa dati du kon?

MI MAMA ben de wan getrow memre fu a Kerki fu Ingrisikondre na a ten di a trow nanga mi papa. Mi papa ben de wan srudati. Na a ten dati, a Fosi Grontapufeti no ben bigin ete. A feti disi broko na ini 1914, èn mi mama no ben agri nanga a domri taki a ben e gi sma na ini a kerki deki-ati fu go teki prati na a feti disi. Disi na san a domri ben piki en: „Go na yu oso, èn no broko yu ede nanga a sani dati!” Mi mama no ben lobi a piki disi kwetikweti.

Na ini 1917, na a heimarki fu a feti, dan mi mama go luku a „Photo-Drama der Schepping”. Fu di a ben abi a fasti overtoigi taki a ben feni a tru bribi, dan a gowe libi a kerki fu en wantewante fu abi demakandra nanga den Bijbel Ondrosukuman. Na so sma ben e kari Yehovah Kotoigi na a ten dati. Mi mama ben go na den konmakandra fu wan gemeente na ini Yeovil, a foto di ben de a moro krosibeiwan fu a dorpu pe wi ben tan. A dorpu disi ben nen West Coker, èn a ben de na ini a distrikt Somerset na Ingrisikondre.

Wan syatu pisi ten baka di mi mama ben kon sabi a tru bribi, dan a taki fu a bribi disi nanga den dri sisa fu en. Wan tu fu den owru sma fu a gemeente Yeovil fruteri mi fa mi mama nanga en sisa Millie ben gwenti fu go nanga baisigri na ala sei fu a bigi distrikt pe wi ben e tan, fu prati a bijbelstudie buku Studies in the Scriptures (Studie fu den Buku fu Bijbel). Ma a de wan sari taki mi mama no ben man du noti moro na ini den lasti 18 mun fu en libi, fu di a ben kisi tuberculose. Na a ten dati dresi no ben de gi a siki disi.

Mi tanta sorgu wi sondro fu prakseri ensrefi

Mi tanta Millie, di ben e tan nanga wi na a ten dati, sorgu mi mama di a ben kon siki èn a sorgu mi nanga mi sisa Joan tu. Na a ten dati, Joan ben abi seibi yari. Di mi mama dede, dan mi tanta  Millie ben de klariklari wantewante fu teki a frantwortu na en tapu fu sorgu wi. Fu di mi papa ben breiti taki ensrefi no ben abi fu du dati moro, meki a ben agri wantewante taki mi tanta ben musu froisi kon tan nanga wi.

Wi ben kon lobi mi tanta èn wi ben breiti taki a ben o tan nanga wi. Ma fu san ede a ben teki so wan bosroiti? Furu yari baka dati, mi tanta Millie fruteri wi taki a ben sabi taki a ben musu go doro nanga san mi mama ben bigin du. A ben musu go doro fu leri mi nanga Joan a waarheid fu Bijbel, bika a ben kon si taki mi papa noiti ben o du dati, fu di a no ben e poti prakseri na sani di abi fu du nanga bribi.

Baka dati, wi kon sabi sosrefi taki tanta Millie ben teki wan tra bosroiti. A ben bosroiti fu no trow, so taki a ben man sorgu wi bun. A gi ensrefi trutru! Mi nanga Joan de nanga tangi na ati trutru fu di a du dati. Te nanga now wi e kisi wini fu den sani di tanta Millie leri wi èn fu a tumusi bun eksempre di a gi wi.

Wan ten fu teki bosroiti

Mi nanga Joan ben go na a skoro na ini a dorpu, èn a skoro disi ben de fu a Kerki fu Ingrisikondre. Tanta Millie ben fruteri na uma di de na edeman fu a skoro disi nanga wan fasti overtoigi, taki wi ben abi wan tra bribi. Dati meki te den tra skoropikin ben e waka go na kerki, dan wi ben e go na oso. Te a domri ben e kon na skoro fu gi den pikin kerki leri, dan wi ben e sidon aparti fu den tra skoropikin èn wi ben e kisi bijbeltekst di wi ben musu leri sabi dorodoro. Mi kisi wini fu a sani disi bakaten, fu di mi noiti no frigiti den tekst disi.

Di mi ben abi 14 yari, dan mi gowe libi skoro fu go teki leri fo yari langa na ini wan kasi fabriki na ini a dorpu pe wi ben e tan. Mi leri sosrefi fu prei piano, èn mi ben lobi fu prei poku èn fu dansi. Aladi a waarheid fu Bijbel ben teki rutu na ini mi ati, toku mi no ben abi a deki-ati ete fu tron wan futuboi fu Yehovah. Ne wan dei na ini maart 1940, wan owru Kotoigi aksi mi fu go nanga en na wan bigi konmakandra na ini a foto Swindon, di ben de sowan 110 kilometer pasa a dorpu pe mi ben e tan. Albert D. Schroeder, a brada di ben tiri a wroko fu Yehovah Kotoigi na ini Ingrisikondre, ben hori a publikitaki. A konmakandra dati meki taki mi drai mi libi.

A di fu Tu Grontapufeti ben de fayafaya na a ten dati. Mi ben feni taki mi ben musu du wan bun sani nanga mi libi. Mi bosroiti fu go baka na a Yeovil Kownukondre zaal. Na a fosi konmakandra di mi go, a gemeente kisi fu yere taki den ben o preiki na wan nyun fasi now. Den ben o gi kotoigi na strati. Aladi mi no ben sabi furu, toku mi bosroiti fu teki prati na a wroko disi. A sani disi fruwondru furu fu den sokari mati fu mi èn den spotu mi di den ben e waka pasa na strati!

Na ini yuni 1940, mi teki dopu na ini a foto Bristol. Wán mun baka dati mi tron wan gewoon pionier, wan sma di e du furuten diniwroko. A no ben teki langa baka dati di mi sisa teki dopu tu, fu sori taki a ben gi ensrefi abra na Gado. Mi ben breiti trutru di dati ben pasa.

Mi e du pionierwroko na a ten fu a grontapufeti

Wan yari baka di a feti ben bigin, mi kisi a kari fu go feti na ini a legre. Di mi ben e tan na ini a foto Yeovil, dan mi ben skrifi na tapu papira taki mi e weigri fu go na ini a legre fu di mi ben e hori misrefi na Bijbel gronprakseri. Fu a sani dati ede, mi ben musu go na fesi krutu na ini a foto Bristol. Mi ben go pionier makandra nanga Yohanes Wynn na ini a foto Cinderford di ben de na ini a distrikt Gloucestershire, èn baka dati wi ben e pionier na ini den foto Haverfordwest nanga Carmarthen di de na ini a distrikt Wales. * Bakaten, mi go na fesi  krutu na ini Carmarthen, pe mi kisi dri mun strafu na ini Swansea strafu-oso, èn mi ben musu pai £25 (moni fu Ingrisikondre) sosrefi. Na a ten dati, disi ben de bun furu moni srefisrefi. Baka dati, mi kisi ete dri mun strafu fu di mi no ben man pai a moni dati.

A di fu dri leisi di mi go na fesi krutu, dan a krutuman aksi mi: „Yu no sabi taki Bijbel e taki, ’Pai Caesar den sani baka di de fu Caesar’?” „Iya”, mi piki, „mi sabi dati, ma meki mi klari a tekst dati: ’ma Gado den sani di de fu Gado.’ Na dati mi e du” (Mateyus 22: 21). Wan tu wiki baka dati, mi kisi wan brifi di ben skrifi taki mi no ben abi fu go feti na ini a legre moro.

Na a bigin fu 1945, mi kisi wan kari fu tron wan memre fu a Bethelfamiri fu London. A winter baka dati Nathan H. Knorr, di ben e teki fesi fu orga a preikiwroko na heri grontapu, makandra nanga Milton G. Henschel, a sekretarsi fu en, kon na London. Aiti Kresten yonkuman fu Ingrisikondre ben kisi okasi fu go na a di fu aiti klas fu a Waktitoren Bijbelskoro Gilead, èn mi ben de wan fu den. Wi ben o kisi leri drape fu tron zendeling.

Mi kisi toewijzing fu wroko leki zendeling

Tapu 23 mei 1946, wi seiri gowe libi a pikin lanpe na ini a foto Cornwall di de na ini a distrikt Fowey. Wi gowe libi drape nanga wan sipi di ben e tyari lai na a ten fu a grontapufeti. Kapten Collins, a man di ben abi a frantwortu na a lanpe, ben de wan Kotoigi fu Yehovah, èn na a ten di wi ben e seiri gowe fu drape, a bari a sirene. A no de fu taki, dati wi alamala ben e sari pikinso di wi si taki wi ben e gowe libi Ingrisikondre. A no ben de makriki fu abra na Atlantisch Se, ma 13 dei baka dati wi doro na Amerkankondre, sondro taki wan takru sani ben pasa nanga wi.

Mi ben prisiri trutru fu de aiti dei langa na a Theocratishe Congres der Verheugde Natiën (Theokrasia Kongres fu Prisiri Nâsi). Na internationaal kongres disi ben de na ini a foto Cleveland di de na ini a distrikt Ohio. A kongres disi ben hori fu 4 augustus te nanga 11 augustus 1946, èn a ben de wan ondrofeni di mi noiti sa frigiti. Aititenti dusun sma ben de na a kongres disi, sosrefi 302 sma fu 32 tra kondre. Na a kongres dati a tijdschrift Ontwaakt! * tyari kon na doro fu a fosi leisi, èn den sma drape ben prisiri trutru di a buku „God zij waarachtig” („Meki Gado de tru”), tyari kon na doro.

Wi klari Gileadskoro nanga bun bakapisi na ini 1947, èn mi nanga Bill Copson ben kisi a wroko fu go na Egepte. Ma bifo wi ben go drape, dan mi kisi wini fu a bun leri di Richard Abrahamson gi mi na Brooklyn Bethel. A brada disi ben leri mi fa fu du kantorowroko. Di wi ben doro na ini Aleksandria, dan mi fiti misrefi heri esi na a fasi fa den sma na a Mindri Owstusei e libi. Ma a ben de wan tyalensi fu leri Arabiatongo, èn te mi ben e du preikiwroko, dan mi ben musu gebroiki kotoigikarta na ini fo difrenti tongo.

Bill Copson tan drape seibi yari langa, ma baka di mi ben tan drape wan yari kaba, lanti no ben wani gi mi primisi fu tan moro langa, èn fu dati ede mi ben musu gowe libi a kondre. A yari dati di mi ben e du zendelingwroko, ben de a moro bun yari fu mi heri libi. Mi ben abi a grani fu studeri Bijbel nanga moro leki 20 sma ibri wiki, èn wan tu fu den sma dati di kon sabi waarheid na a ten dati, e dini Yehovah fayafaya ete. Mi gowe libi Egepte fu go du zendelingwroko na Siprus.

 Siprus nanga Israel

Mi bigin leri wan nyun tongo, Grikitongo, èn mi du muiti fu kon frustan a fasi fa den sma fu Siprus ben e taki a tongo disi. Wan syatu pisi ten baka dati, Anthony Sideris kisi a wroko fu go dini na ini Grikikondre, èn mi ben musu tiri a wroko na ini Siprus. Na a ten dati, a bijkantoro fu Siprus ben sorgu tu gi den Kotoigi na ini Israel, èn makandra nanga tra brada, mi ben abi a grani fu go luku a pikin grupu fu Kotoigi drape son leisi.

A fosi leisi di mi go na Israel, dan wi hori wan konmakandra na ini wan restaurant na ini Haifa, èn sowan 60 sma ben de na a konmakandra disi. Wi ben e meki grupu fu den sma di ben e taki a srefi tongo, èn leki bakapisi fu dati wi hori a konmakandra disi na ini siksi difrenti tongo! Wan tra leisi di mi ben de na ini Yerusalem, dan mi ben man sori den sma drape wan felem di Yehovah Kotoigi meki. Mi ben hori wan publikitaki tu èn na Ingrisitongo koranti ben skrifi bun sani fu a publikitaki disi.

Sowan 100 Kotoigi ben de na ini Siprus na a ten dati, èn den ben kisi bigi tesi tapu a bribi fu den. Priester fu a Griki Orthodox Kerki ben e sutu faya gi grupu sma di ben e pruberi fu tapu den konmakandra fu wi, èn mi ben musu kon gwenti taki sma ben e trowe ston na mi tapu te mi ben e preiki na ini den boitipresi. Mi ben musu leri fu gowe libi den presi disi esi-esi! Fu di sma ben e frufolgu wi na so wan ogri-ati fasi, dan a bribi fu mi kon moro tranga di moro zendeling kisi a wroko fu kon dini na a èilanti. Dennis nanga Mavis Mateyuss èn sosrefi Joan Hulley nanga Beryl Heywood kon dini makandra nanga mi na ini a foto Famagusta. Tom nanga Mary Goulden èn sosrefi Nina Constanti, wan sisa fu Siprus di ben gebore na ini London, go dini na Limassol. Na a srefi ten dati Bill Copson ben kisi wan tra wroko na ini Siprus, èn bakaten Bert nanga Beryl Vaisey go dini drape tu.

Mi e fiti misrefi na den kenki di e kon

Na a kaba fu 1957, mi kon siki èn leki bakapisi fu dati mi ben musu tapu nanga a zendelingwroko fu mi. Nanga sari na ini mi ati mi bosroiti fu go baka na Ingrisikondre, so taki mi ben kan kon betre baka. Drape mi du pionierwroko teleki 1960. Mi sisa nanga en masra teki mi na wan lobi-ati fasi na ini den oso, ma a libi no ben de a srefi moro. A libi ben kon muilek srefisrefi gi Joan. Na ini den 17 yari di mi ben gowe libi Ingrisikondre, a ben e sorgu en masra èn sosrefi a yongu umapikin fu den. Boiti dati, a ben e sorgu mi papa nanga tanta Millie na wan lobi-ati fasi sosrefi. Mi papa nanga tanta Millie ben kon owru now èn den ben e siki. A ben de krin fu si taki mi ben musu teki na eksempre fu mi tanta di ben gi ensrefi fu sorgu trawan. Fu dati ede mi tan nanga mi sisa teleki mi tanta nanga mi papa dede.

A ben sa de makriki gi mi fu tan na ini Ingrisikondre now, ma baka di mi ben rostu wan pisi ten, dan mi firi taki mi ben musu drai go baka na Siprus fu go doro nanga a zendelingwroko di mi ben kisi fu du drape. Bika te yu luku en bun, a no Yehovah en organisâsi ben pai so furu moni fu gi mi leri? Sobun, na ini 1972 misrefi pai fu go baka na Siprus so taki mi ben kan pionier drape baka.

Nathan H. Knorr ben doro drape fu seti sani gi wan kongres di ben o hori a yari baka dati. Di a kon sabi taki mi ben drai kon baka, dan a taigi den brada fu meki mi tron kringopziener gi a heri èilanti. Mi ben abi a grani fu tan du a wroko disi fo yari langa. Ma a wroko disi ben de wan tyalensi, fu di mi ben musu taki Grikitongo moro furu.

 Wan ten fu problema

Mi ben libi makandra nanga Paul Andreou na ini wan oso na ini a dorpu Karakoumi. A dorpu disi no ben de fara fu na owstusei fu Kyrenia di de na a noordsei syoro fu Siprus. Paul Andreou ben de wan Kotoigi fu Siprus, èn a ben taki Grikitongo. A bijkantoro fu Siprus ben de na ini a foto Nicosia di de na a zuidsei fu den Kyreniabergi. Na a bigin fu yuli 1974, mi ben de na ini Nicosia di wan grupu fu srudati opo densrefi teige a tirimakti, fu puru Presidenti Makarios. Mi si nanga mi eigi ai fa a paleisi fu en teki faya. Di sma ben man reis baka sondro problema, dan mi go esi-esi baka na Kyrenia, pe wi ben e seti sani fu hori wan kring konmakandra. Tu dei baka dati mi yere fa a fosi bom fadon na tapu a lanpe èn mi si fa a loktu ben lai nanga helicopter di ben e tyari Torku srudati kon fu kon feti.

Fu di mi ben de wan borgu fu Ingrisikondre, dan den Torku srudati teki mi tyari go na a lanki fu Nicosia. Drape den sma fu den Verenigde Nâsi poti wan lo aksi gi mi, èn bakaten den meki kontakti nanga a bijkantoro. Fu man doro den farawe oso pe nowan sma ben libi, na a tra sei fu a kontren pe den srudati ben e feti, dan mi ben musu teki a tyalensi fu waka na mindri wan heri ipi fu telefonkabel nanga stroomkabel di ben e didon na gron. Mi ben breiti srefisrefi taki noti no ben man tapu mi fu taki nanga Yehovah Gado! Mi kisi krakti fu den begi fu mi na a ten dati di mi ben de na ini bigi banawtu.

Mi ben lasi ala san mi ben abi, ma mi ben breiti fu feni kibri na a bijkantoro. Ma dati no ben de fu langa. Wan tu dei baka dati den grupu di ben kon feti nanga a kondre, ben teki wan pisi na a noordsei fu na èilanti abra. Den memre fu a Bethelfamiri ben musu gowe libi Bethel, èn wi froisi go tan na Limassol. Mi ben breiti fu man wroko drape nanga wan komte di ben seti fu yepi den 300 brada di ben kisi fu du nanga a muilek situwâsi disi. Furu fu den Kotoigi disi ben lasi den oso.

Moro nyun wroko

Na ini yanuari 1981, a Tiri Skin aksi mi fu go na Grikikondre fu tron wan memre fu a Bethelfamiri na ini Ateine. Ma na a kaba fu a yari dati, mi ben de baka na ini Siprus èn mi tron fesiman fu a Bijkantoro Komte. Andreas Kontoyiorgis nanga en wefi, di de fu Siprus ma di den seni kon fu Londen, ben de wan „bigi yepi” gi mi.—Kolosesma 4:11.

Brada Theodore Jaracz ben kon na Siprus na ini 1984, leki zone opziener. Di a ben de fu gowe, dan mi kisi wan brifi fu a Tiri Skin, pe den ben skrifi: „Te Brada Jaracz kaba nanga en diniwroko drape, dan wi ben sa wani fu yu go nanga en na Grikikondre.” A brifi no ben taki fu san ede mi ben musu du dati, ma di mi doro na Grikikondre dan a Bijkantoro komte drape kisi fu yere san ben skrifi na ini wan tra brifi di a Tiri Skin ben seni go gi den. A brifi dati ben skrifi taki mi ben kisi a toewijzing fu tron fesiman fu a Bijkantoro Komte na ini a kondre dati.

Na a ten dati Grikikondre ben e kisi fu du nanga sma di ben fadon komopo na bribi. Boiti dati, sma ben e kragi wi furu tron taki wi ben e preiki sondro taki wi ben abi primisi fu du dati èn taki wi ben dwengi tra sma fu teki a bribi fu wi. Ibri dei lanti ben e grabu sma fu a pipel fu Yehovah fu tyari den na fesi krutu. A ben de wan grani trutru fu kon sabi brada nanga sisa di ben hori den soifri retifasi di den ben kisi hebi tesi! Wan tu fu den krutu afersi fu den ben tyari go na fesi wan hei krutubangi  na Europa di e feti gi a reti fu libisma. Den krutu afersi disi ben abi tumusi moi bakapisi, èn dati ben abi wan bun krakti tapu a preikiwroko na ini Grikikondre. *

Di mi ben e dini na ini Grikikondre, dan mi go na wan tu kongres na ini Ateine, na Tesalonika, èn sosrefi na den èilanti Rodes nanga Kreita. Mi noiti no sa frigiti den kongres disi. Den fo yari disi di mi ben de na Grikikondre ben gi mi furu prisiri èn den tyari bun bakapisi kon. Ma wan tra kenki ben o kon. Na ini 1988, mi ben musu go baka na Siprus.

Mi go na Siprus fu drai go baka na Grikikondre

Na a ten di mi gowe libi Siprus, dan den brada kisi wan nyun bijkantoro na ini a foto Nissou, di ben de wan tu kilometer pasa Nicosia. Carey Barber di ben de fu na edekantoro fu Yehovah Kotoigi na Brooklyn, ben hori a lezing fu gi a bijkantoro abra na Yehovah. Sani ben e waka moro bun now na a èilanti, èn mi ben breiti taki mi ben de drape baka. Ma a situwâsi ben o kenki heri esi.

A Tiri Skin ben gi den brada primisi fu bow wan nyun Bethel-oso na ini Grikikondre, wan tu kilometer na a noordsei fu Ateine. Fu di mi ben man taki Ingrisitongo nanga Grikitongo, dan mi kisi kari fu drai go baka na Grikikondre na ini 1990 fu wroko leki wan vertaler gi den brada nanga sisa fu tra kondre, di ben kon drape fu yepi bow a Bethel-oso. Mi e memre ete fa mi ben e prisiri fu de na a wrokopresi siksi yuru mamanten na ini zomer ten, fu gi den hondrohondro Griki brada nanga sisa wan switikon. Den alamala ben kon fu wroko makandra nanga den tra Kotoigi wrokoman fu tra kondre! Mi noiti sa frigiti fa den ben koloku, èn fa den ben e wroko fayafaya.

Den Griki Orthodox priester makandra nanga den bakaman fu den, pruberi fu kon na ini a presi pe wi ben bow a bijkantoro, fu tapu a wroko fu wi. Ma Yehovah yere den begi fu wi, èn wi kisi kibri. Mi tan na a presi pe den ben e bow a Bethel-oso èn mi ben de drape ete di den ben abi na inwijding fu a nyun Bethel-oso disi tapu 13 april 1991.

Mi e yepi mi lobi sisa

A yari baka dati, mi drai go baka na Ingrisikondre fu hori fakansi èn mi go tan nanga mi sisa nanga a masra fu en. A de wan sari taki a masra fu mi sisa kon siki tu tron na en ati na a ten di mi ben de drape, èn a dede leki bakapisi fu dati. Mi sisa Joan trutru ben horibaka gi mi na a ten di mi ben e du zendelingwroko. Pikinmoro ala wiki a ben e skrifi wan brifi gi mi fu gi mi deki-ati. A sani disi de wan blesi trutru gi wan zendeling! Now Joan na wan weduwe di e kon swaki moro nanga moro, èn a abi yepi fanowdu. San mi musu du?

Thelma, na umapikin fu Joan, makandra nanga en masra, ben e sorgu wan tra getrow weduwe fu a gemeente fu den kaba. A weduwe disi ben de wan fu den nicht fu wi di ben e siki srefisrefi. Sobun, baka di mi begi Gado furu leisi, dan mi teki a bosroiti fu tan na ini Ingrisikondre fu man yepi sorgu Joan. A no ben makriki gi mi fu fiti misrefi na a situwâsi disi, ma mi abi a grani fu dini leki wan owruman na ini a gemeente Pen Mill, wan fu den tu gemeente na ini a foto Yeovil.

Den brada di mi ben dini na dorosei kondre makandra nanga den, e tan bel mi noso den e tan skrifi mi, èn mi de nanga tangi na ati trutru gi dati. Efu oiti mi ben sa wani go baka na Grikikondre noso na Siprus, dan mi sabi dati den brada ben o seni ticket wantewante gi mi fu reis go drape. Ma mi abi 80 yari now, èn mi ai nanga mi gosontu no bun so moro. A fruferi srefisrefi taki mi no man du so furu moro leki fa mi ben gwenti bifo, ma den yari di mi dini na Bethel yepi mi fu kweki furu gwenti di mi kan gebroiki bun na ini a ten disi. Fu gi wan eksempre, mi e leisi a deitekst ibri dei bifo mi e nyan mi mamanten nyanyan. Mi leri sosrefi fu abi bun matifasi nanga trawan èn fu lobi trawan sosrefi, bika disi e meki taki wan zendeling e kisi bun bakapisi na ini a wroko fu en.

Te mi e luku den pikinmoro 60 moi yari di mi prèise Yehovah kaba, dan mi sabi taki a furuten diniwroko na a moro bun fasi fa wan sma kan kisi kibri èn a e gi a moro bun leri. Nanga mi heri ati mi kan taki den srefi wortu di David ben taigi Yehovah: „Bika yu sori fu de wan hei presi gi mi pe kefar no de èn wan presi pe mi e lowe go te mi de na ini banawtu.”—Psalm 59:16.

[Futuwortu]

[Karta na tapu bladzijde 24]

(Efu yu wani si pe den sani disi skrifi, luku a tijdschrift)

GRIKIKONDRE

Ateine

SIPRUS

Nicosia

Kyrenia

Famagusta

Limassol

[Prenki na tapu bladzijde 21]

Mi mama na ini 1915

[Prenki na tapu bladzijde 22]

Mi nanga tra brada fu a di fu aiti klas fu Gilead, na tapu a daki fu Brooklyn Bethel na ini 1946 (mi na a di fu fo sma komoto fu a kruktu-anusei)

[Prenki na tapu bladzijde 23]

Mi nanga tanta Millie, a fosi leisi di mi drai go baka na Ingrisikondre