Den Waldensen—Gensman fu a Lomsu Kerki tron Protestantsma

A ben de na ini a yari 1545 na ini a moi kontren fu Lubéron ini a distrikt Provence, di de na a zuidsei fu Fransikondre. Wan legre ben kon makandra fu du wan ogri sani nanga sma fu di den ben de fu wan tra bribi. Wan heri wiki langa brudu fadon di a legre kiri den sma na ini Lubéron.

DEN srudati pori den dorpu na ini a kontren disi dorodoro, den poti sma fu den dorpu disi na strafu-oso, noso den kiri trawan fu den. Den ogri-ati srudati disi ben du bun takru sani nanga ipi-ipi sma di den kiri, èn a san disi ben seki heri Europa. Sowan 2700 mansma dede, èn 600 trawan ben kisi strafu leki paribotoman na tapu wan sipi. Boiti dati, uma nanga pikin ben musu nyan bun furu pina. A Fransi kownu èn sosrefi a pawsu ben prèise a srudati komandanti di ben sorgu taki na ogri-ati sani disi ben pasa.

Di grupu fu Lomsu kerkiman ben opo densrefi teige a Lomsu Kerki fu man seti a Protestant bribi, dan dati tyari bigi prati kon na ini Doisrikondre. Ma a Kownu Frans I fu Fransikondre ben de wan Lomsusma èn a no ben wani taki sma na ini en kondre ben musu teki a Protestant bribi. Fu dati ede, a bigin ondrosuku efu sma ben de na ini a kownukondre fu en di no ben agri nanga den leri fu a Lomsu bribi. Tiriman na ini Provence kon feni taki, a no wan tu gensman nomo fu a Lomsu bribi ben e libi na ini a distrikt disi. Na presi fu dati, den ben feni dorpu di ben lai nanga den sma disi. A kownu gi a komando fu kiri ala den sortu sma disi, èn te fu kaba dati pasa tu nanga bun furu fu den na ini a yari 1545.

Suma ben de den sma disi di ben drai baka gi den leri fu a Lomsu Kerki? Èn fu san ede sma frufolgu den na so wan ogri-ati fasi fu di den ben e bribi tra sani?

Wan guduman tron wan pôtiman

Den ipi-ipi sma di a legre ben kiri ben de memre fu wan kerki grupu di ben seti na ini a di fu 12 yarihondro. Den sma disi ben de fu feni na ini furu kondre fu Europa. A fasi fa a kerki grupu disi panya go na difrenti kondre na ini Europa, èn a fasi fa a kakafutu omeni yarihondro, e meki taki a grupu disi na wan tumusi aparti wan te yu e agersi en nanga tra grupu di ben opo densrefi teige a Lomsu Kerki. Furu historia skrifiman e agri taki a grupu disi ben seti wan sani fu a yari 1170. Na ini a Fransi foto Lyons, wan gudu seriman di ben nen Vaudès, ben wani kon sabi nomonomo fa fu tron wan sma di Gado feni bun. Soleki fa a ben sori, dan a ben wani handri akruderi a rai di Yesus Krestes ben gi wan guduman fu seri den sani fu en èn fu gi a moni dati na den pôtiwan. Leki bakapisi fu dati, Vaudès seti sani so taki a famiri fu en ben sa abi nofo moni, èn baka dati a go libi leki wan pôtiman fu preiki a bun nyunsu (Mateyus 19:16-22). Heri esi a  ben abi bakaman di sma kon sabi bakaten leki den Waldensen. *

Den moro prenspari sani na ini a libi fu Vaudès ben de pôtifasi, a preikiwroko, nanga Bijbel. A no ben de wan nyun sani taki sma ben e opo den sten fu sori taki den no ben agri nanga a gudu libi fu den kerki tiriman. Wan pisi ten, wan tu kerki tiriman ben krutu a krukafasi fu kerki èn sosrefi a fasi fa kerki ben e mesbroiki a makti fu en. Ma Vaudès no ben de wan kerki tiriman, èn wan lo fu den bakaman fu en no ben de dati tu. Sondro tweifri a sani disi e fruklari fu san ede Vaudès ben feni taki a Bijbel ben musu vertaal na ini a tongo di a pipel fu a kondre ben e taki. * Fu di soso kerki tiriman ben kan gebroiki a Latijn Bijbel, meki Vaudès sorgu taki sma meki wan vertaling fu den Evangelietori èn fu tra Bijbel buku na ini wan sortu Fransitongo di a pipel na a owstusei fu a mindrisei pisi fu Fransikondre ben e taki. Fu di den Pôtiwan fu Lyons ben wani gi yesi na a komando di Yesus ben gi fu preiki, meki den ben preiki a boskopu fu den na publiki (Mateyus 28:19, 20). A historia skrifiman Gabriel Audisio e fruklari taki a moro prenspari sani di meki taki a Lomsu Kerki no ben lobi den Waldensen, na fu di a grupu disi no ben wani tapu fu preiki na publiki.

Lomsusma e tron gensman fu a Lomsu Kerki

Na ini den dei dati, kerki tiriman wawan ben abi primisi fu preiki, èn a kerki ben abi a reti fu gi sma a primisi fu preiki. Den kerki tiriman ben feni taki den Waldensen no ben kisi nofo leri fu man preiki a bun nyunsu, ma na ini a yari 1179, Vaudès aksi Pawsu Alexander III srefi fu gi a grupu fu en primisi fu preiki. A pawsu gi den a primisi disi, ma a ben wani taki den priester fu Provence ben musu agri nanga a tori disi fosi. A historia skrifiman Malcolm Lambert e taki dati disi pikinmoro ben de a srefi leki te a pawsu no ben gi primisi kwetikweti. Iya, Beskopu Jean Bellesmains fu Lyons ben taigi a pipel taki kerkiman no ben abi primisi fu preiki. Tapu a sani dati Vaudès ben piki nanga den wortu di skrifi na Tori fu den Apostel 5:29: „Wi musu gi yesi na Gado leki tiriman, moro leki na libisma.” Fu di Vaudès no ben gi yesi na den tirilin fu a kerki, meki den puru en leki memre fu a kerki na ini a yari 1184.

Aladi den Waldensen no ben de memre fu a kerki fu Lyons moro èn aladi sma ben yagi den puru na ini a foto, toku den no kisi frufolgu dorodoro. Na opregtifasi fu den Waldensen èn sosrefi a fasi fa den ben e libi, ben meki taki furu sma ben e lespeki den. Srefi kerki tiriman ben tan abi demakandra nanga den.

Soleki fa a historia skrifiman Euan Cameron e taki, dan a sori taki den Waldensen preikiman no ben „opo densrefi teige a Lomsu Kerki fu di den no ben e agri nanga den leri fu a kerki dati”. A ben de so nomo taki den „ben wani preiki Gado Wortu èn den ben wani gi sma leri.” Historia skrifiman e taki dati a sani di trutru meki taki a grupu disi opo ensrefi teige a kerki, na di a kerki meki wan lo wet fu tapu den, so taki a no ben makriki moro gi den fu meki tra sma tron memre fu a kerki grupu fu. A Lomsu Kerki tan krutu den Waldensen, èn a heimarki fu dati ben de taki, na ini a yari 1215, a Vierde Lateraans Concilie (wan grupu fu feifi kerki komte) komanderi a pipel fu Fransikondre fu si a grupu disi leki wan ogri grupu. Sortu krakti a sani disi ben abi tapu a preikiwroko fu den?

Den e bosroiti fu preiki na wan kibri fasi

Vaudès dede na ini a yari 1217, èn fu di sma ben e frufolgu den bakaman fu en, meki den go tan na ini dorpu na ini den Alpen fu Fransikondre, na ini  Doisrikondre, na a noordsei fu Italiakondre, èn sosrefi na kondre na a mindrisei pisi fu Europa, èn sosrefi na Owstu Europa. Fu di sma ben e frufolgu den Waldensen, meki den go tan na boitipresi, èn a sani disi ben abi leki bakapisi taki den no ben man preiki so furu moro.

Na ini a yari 1229, a Lomsu Kerki ben tapu fu frufolgu a kerki grupu fu den Katharen, noso den Albigensen, na a zuidsei fu Fransikondre. * Baka dati a kerki bigin frufolgu den Waldensen. A no ben o teki langa bifo a kerki ben o bigin frufolgu ala tra gensman. Fu di den Waldensen ben e frede gi a sani disi, meki den bosroiti fu preiki na wan kibri fasi. Na a ten fu a yari 1230, den no ben e preiki na publiki moro. A historia skrifiman Audisio e fruklari: „Na presi taki den ben e go suku moro bakaman . . . , den ben e teki ten fu luku den memre fu a grupu fu den, èn den ben e gi den tranga fu no lasi ati, aladi sma ben e kwinsi èn frufolgu den.” Audisio e taki moro fara taki „a preikiwroko ben tan wan prenspari sani gi a grupu disi, ma den ben du dati na wan heri tra fasi now”.

A bribi nanga den gwenti fu den

Na a ten fu a di fu 14 yarihondro, mansma nanga umasma no ben e teki prati na a preikiwroko fu den Waldensen. Na presi fu dati den Waldensen ben abi wan grupu fu preikiman nanga wan grupu fu bribiman. Soso mansma di ben kisi nofo leri, ben e go na den memre fu a grupu fu gi den tranga. Den dinari disi ben e go na difrenti presi fu luku den memre fu a grupu, èn bakaten sma kon sabi den leki barbes, san wani taki ’omu’.

Den barbes, di ben e go na den oso fu Waldensen osofamiri, no ben du muiti fu suku moro memre gi a grupu, ma na presi fu dati den ben e du muiti fu sorgu taki sani ben e waka bun nanga a grupu. Ala den barbes ben man leisi èn skrifi, èn a leri di den ben e kisi siksi yari langa, ben komoto fu Bijbel. Den ben e gebroiki a Bijbel na ini a tongo fu den fu man fruklari Gado Wortu gi den bakaman fu den. Srefi den gensman fu den Waldensen ben e erken taki a grupu disi, sosrefi den pikin fu den, ben e libi soifri akruderi Bijbel, èn taki den ben kan kari bigi pisi fu den Buku fu Bijbel, sondro taki den ben abi a Bijbel na den.

Den fositen Waldensen no ben lobi lei, den no ben e bribi na ini hel, den no ben e hori spesrutu okasi fu memre den dedewan fu den, èn den no ben feni en bun taki pawsu ben e gi sma pardon fu sondu te den sma disi ben pai gi dati. Den ben e weigri sosrefi fu anbegi Maria nanga den „santawan”. Den Waldensen ben e hori a Memrefesa fu Masra ala yari tu. Soleki fa a historia skrifiman Lambert e taki, dan na anbegi fu den, „ben de, fu taki en leti, a bribi di aladei kerkiman ben abi”.

„Wan dobru libi”

Den sma na ini den libimakandra fu den Waldensen ben abi heri bun banti nanga makandra. Den ben e trow soso nanga sma fu a grupu, èn na ini den yarihondro di pasa, a sani disi tyari famirinen kon di abi fu du spesrutu nanga den Waldensen. Fu di den Waldensen no ben wani taki wan kaba ben kon na a grupu fu den, meki den ben tapu fu prati den leri fu den nanga trawan. Fu di a grupu disi ben e du sani na wan kibri fasi, meki gensman ben kisi okasi fu fruteri wan lo lei fu den. Fu gi wan eksempre, sma ben taki dati den ben e anbegi Didibri. *

Wan sani di ben meki taki sma ben e gi den Waldensen den porinen dati, na fu di, soleki fa a historia skrifiman Cameron e taki, den ben e tan hori densrefi na wan tu fu den leri fu a Lomsu bribi. Furu fu den Waldensen ben e tyari den sondu fu den kon na krin na Lomsu priester, den ben e go na a Memrefesa, den ben e gebroiki santa watra, èn den ben e go sosrefi na santa presi fu anbegi Gado. A historia skrifiman Lambert e taki: „Den ben du furu sani di Lomsusma ben e du.” Audisio e taki sondro draidrai taki na a ten dati, den Waldensen „ben e libi wan dobru libi”. A e taki moro fara: „Na a wan sei, den ben e tyari densrefi neleki den ben de Lomsusma, so taki sma no ben e du den ogri; na a tra sei, den ben abi wan tu gwenti di ben e meki taki a grupu no ben lasi gowe.

Gensman fu a Lomsu Kerki e tron Protestantsma

Na ini a di fu 16 yarihondro, wan bigi kenki kon na ini a fasi fa kerki bribi ben de na ini Europa. Disi ben pasa di Lomsusma ben opo densrefi teige a Lomsu Kerki. Den sma di ben e kisi problema nanga  trawan fu di den ben drai baka gi a Lomsu bribi, ben kan suku yepi na lanti so taki sma ben e erken den leki wan kerki grupu. Noso, den ben kan froisi go tan na wan tra kondre pe sma no ben e muilek den. A ben de so tu taki sma no ben e frufolgu gensman fu a Lomsu Kerki so furu moro, bika furu sma ben bigin krutu den owru kerki leri.

Na ini a yari 1523, wan pôpi sma di ben opo ensrefi teige a Lomsu bribi, ben bigin kaba fu taki fu den Waldensen. A sma disi ben de Maarten Luther. Na ini a yari 1526, wan fu den barbes fu den Waldensen drai go baka na den Alpen nanga a bun nyunsu taki wan kenki ben kon na ini a kerki bribi fu Europa. Leki bakapisi fu a sani disi, den Prostestantsma bigin kenki prakseri nanga den Waldensen wan pisi ten. Den Protestantsma gi den Waldensen deki-ati fu pai a moni di ben de fanowdu fu meki a fosi Fransitongo vertaling fu den Hebrew nanga den Griki Buku fu Bijbel. A Bijbel disi meki na ini a yari 1535, èn bakaten sma kon sabi en leki a Olivétan Bijbel. San na a moi fu a tori, na taki furu fu den Waldensen no ben man frustan Fransitongo.

Fu di a Lomsu Kerki ben e tan frufolgu den Waldensen, meki bun furu fu den go tan na ini a kontren fu Provence di de na a zuidsei fu Fransikondre. Drape den no ben e kisi so furu problema èn furu Protestantsma go tan drape tu. Den tiriman fu a kontren heri esi kon si a sani disi. Aladi sma ben e taki furu bun sani fu a fasi fa den Waldensen ben e libi èn fu a fasi fa den ben e tyari densrefi, toku son sma ben feni taki den no ben de getrow èn taki den ben kan tyari problema kon na ini a distrikt. A Mérindol wet di ben meki, ben abi leki bakapisi taki srudati kiri ipi-ipi sma soleki fa a skrifi na a bigin fu na artikel disi.

A trobi fu den Lomsusma nanga den Waldensen ben kon moro bigi. Den Waldensen gebroiki fetisani sosrefi fu man kibri densrefi teige den Lomsusma di ben e kon fu feti nanga den. A trobi disi meki taki den go suku yepi na den Protestantsma. Na so wan fasi den Waldensen tron bakaman fu a Protestant bribi.

Na ini den yarihondro di pasa, den kerki fu den Waldensen seti na ini kondre di de bun fara fu Fransikondre. Disi ben de kondre soleki Urugwei nanga Amerkankondre. Ma furu historia skrifiman e agri nanga Audisio di e taki dati a bribi fu den Waldensen kon na wan kaba na a ten di Lomsusma bigin opo densrefi teige a Lomsu Kerki, èn leki bakapisi fu dati a bribi fu den sosrefi tron wan Protestant bribi. Fu taki en leti, a Waldensen kerki grupu no ben de so fayafaya moro leki fa a ben de wan tu hondroyari bifo. Dati ben pasa di den memre fu a grupu disi tapu nanga a Bijbel preikiwroko fu den èn nanga a Bijbel leri di den ben e gi trawan.

[Futuwortu]

[Karta/​Prenki na tapu bladzijde 23]

(Efu yu wani si pe den sani disi skrifi, luku a tijdschrift)

Kontren pe den Waldensen ben abi bakaman

FRANSIKONDRE

Lyons

PROVENCE

Lubéron

Straatsburg

Milaan

Rome

Berlijn

Praag

Wenen

[Prenki]

Den Waldensen sorgu taki a vertaling fu a Olivétan Bijbel fu 1535 meki

[Sma di abi a reti fu a prenki]

Bible: © Cliché Bibliothèque nationale de France, Paris

[Prenki na tapu bladzijde 20, 21]

VAUDÈS

Den e bron tu owru uma fu den Waldensen

[Sma di abi a reti fu a prenki]

Bladzijde 20 nanga 21: © Landesbildstelle Baden, Karlsruhe