„Kon Na Mi, . . . Èn Mi Sa Gi Unu Krakti Baka”

Konmakandra di e tranga wi fu sori lobi èn fu du bun wroko

AWINSI den de na Toronto, na Tokio, na Moskow noso na Montevideo, iya, awinsi pe den de, milyunmilyun Yehovah Kotoigi nanga den mati fu den e go na den presi pe den e kon makandra fu anbegi. Den e du dati ibri wiki, wan tu leisi na ini a wiki. Na mindri den sma di e go na den konmakandra disi yu e si na osofamiri edeman di e wroko tranga, èn di weri fu di den ben e wroko heri dei. Yu e si sosrefi wefi di ala ten e wroko tranga, èn mama makandra nanga den nyofi pikin fu den. Yongusma di abi furu krakti èn di ben de na skoro heri dei, e kon na den konmakandra tu. Na a tra sei, yu e si owru sma di kon swaki pikinso èn di no man waka so esi fu di den abi skin-ati. Boiti dati yu abi weduwe nanga pikin di no abi papa nanga mama èn sosrefi sma di abi deki-ati fanowdu fu di den firi brokosaka. Ala den sma disi e go na den konmakandra.

Yehovah Kotoigi abi difrenti fasi fa den e go na konmakandra. Sonwan e go nanga loko di e go so esi taki a de neleki den e frei, trawan e go nanga buriki. Sonwan e go nanga loko di de na ondro gron èn di sontron e furu te na a noko, aladi trawan e go nanga bigi truck. Trawan abi fu koti liba abra di lai nanga bun bigi kaiman, aladi ete trawan abi fu meki furu muiti fu pasa na ini den bigi foto di lai nanga someni wagi taki a no makriki fu pasa. Fu san ede meki den sma disi e du so furu muiti fu go na den konmakandra?

Na a fosi presi den e du dati fu di den e si en leki wan prenspari sani fu de na den Kresten konmakandra èn fu teki prati na den. Dati na wan fasi fa den e anbegi Yehovah Gado (Hebrewsma 13:15). Na apostel Paulus ben kari ete wan sani. A ben skrifi: „Meki wi poti ai na makandra, so taki wi e tranga makandra fu sori lobi èn fu du bun wroko, fu no libi a kon di wi e kon makandra, . . . ma fu gi makandra deki-ati, èn dati moro furu, fu di unu e si a dei e kon krosibei” (Hebrewsma 10:24, 25). Dyaso Paulus e taki wan sani di e memre wi na a fasi fa a psalm skrifiman David ben firi, di a ben singi: „Mi ben prisiri di den ben taigi mi: ’Meki wi go na a oso fu Yehovah.’”—Psalm 122:1.

Fu san ede Kresten e prisiri sote fu de na den konmakandra? Fu di den wan di de na den konmakandra a no soso sma di e kon sidon fu luku san trawan e du. Na presi fu dati, den konmakandra e gi den na okasi fu leri sabi makandra. Moro prenspari srefi, den konmakandra disi e gi den na okasi fu gi sani èn no fu kisi sani wawan, èn den kan gi makandra deki-ati fu sori lobi èn fu du bun wroko. Disi e meki taki den konmakandra na okasi pe sma e leri furu bun sani. Boiti dati, den Kresten konmakandra na wan fu den fasi fa Yesus e meki a pramisi fu en kon tru:  „Kon na mi, . . . èn mi sa gi unu krakti baka.”—Mateyus 11:28.

Wan presi pe sma e trowstu èn e yepi makandra

Yehovah Kotoigi e si den konmakandra fu den leki okasi di e meki sma kisi krakti baka. Wan tu prenspari sani de di e meki taki dati de so. Wan sani na taki tapu den konmakandra disi den e kisi yeye nyanyan di „a getrow èn koni srafu” sreka gi den (Mateyus 24:45). Den konmakandra prenspari tu fu di den e leri den futuboi fu Yehovah fa fu tron bun èn fayafaya leriman fu a Wortu fu Gado. Moro fara a de so tu, taki na den Kownukondre konmakandra-presi sma e feni furu mati di abi trutru lobi; sma di de klariklari fu yepi èn trowstu trawan te den de na ini nowtu.—2 Korentesma 7:5-7.

Disi na san Phillis, wan weduwe ben ondrofeni di lasi en masra di den umapikin fu en ben abi feifi nanga aiti yari. Phillis ben fruteri sortu krakti den Kresten konmakandra ben abi tapu en èn tapu den pikin fu en. A ben taki: „Wi ben e kisi trowstu te wi ben go na a Kownukondre konmakandra-presi. Alaten den brada nanga sisa ben kon brasa wi, den ben e gi wi deki-ati nanga yepi fu Bijbel, noso den ben e hori wi anu. Na so fasi den sori taki den lobi wi èn taki den ben wani yepi wi. Dati na a presi pe mi wani de alaten.”—1 Tesalonikasma 5:14.

Marie ben kisi wan hebi oparâsi. Baka na oparâsi dati a datra fu en taigi en taki a ben kan teki sowan siksi wiki fosi a kisi ensrefi baka. Na ini den fosi wiki baka di a komoto na ati-oso, Marie no ben man go na den konmakandra. A datra fu en ben kon si taki a no ben e prisiri leki fosi. Di a datra kon frustan taki Marie no ben e go na den konmakandra, dan a ben gi Marie deki-ati fu bigin du dati baka. Marie fruteri a datra taki en masra a no wan Kotoigi èn taki a no ben o wani taki a go na den konmakandra fu di a masra e broko en ede nanga a gosontu fu en. Fu dati ede a datra skrifi wan datra papira nanga wan dresi gi en. A dresi ben de taki Marie ben „musu go nomonomo na a Kownukondre konmakandra-presi” fu kisi deki-ati èn fu abi bun demakandra nanga den wan di de drape. Marie e taki te fu kaba: „Baka a fosi konmakandra mi ben bigin firi moro bun. Mi ben bigin nyan sani baka, mi ben man sribi heri neti, mi no ben abi fu dringi so furu dresi moro fu safu a pen fu mi èn mi ben e lafu baka!”—Odo 16:24.

Sma di a no Kotoigi e si tu taki wi e sori lobi gi makandra na den Kresten konmakandra fu wi. Wan studenti di e go na heiskoro ben musu skrifi wan tori gi a etnologie les fu en na skoro (etnologie na a ondrosuku di sma e ondrosuku pe den difrenti ras komoto, fa den panya na grontapu èn fa den e libi nanga makandra). A studenti disi ben teki a bosroiti fu ondrosuku san Yehovah Kotoigi e du, fu man skrifi fu den. Di a skrifi fu a fasi fa sani de na den konmakandra fu wi, dan a taki: „Den kari mi kon na inisei na wan lobi-ati fasi . . . èn dati ben naki mi ati trutru. . . . A switifasi fu Yehovah Kotoigi na wan prenspari sani di den e sori. Mi denki taki dati na wan fu den moro prenspari sani di mi ben si na den konmakandra fu den.”—1 Korentesma 14:25.

A Kresten gemeente de leki wan tumusi switi presi pe sma kan feni kowru-ati na ini a grontapu disi di bruya srefisrefi. A de wan presi pe furu lobi nanga vrede de. Te yu de na den konmakandra, dan yusrefi e ondrofeni taki a psalm skrifiman ben abi leti di a taki: „Luku! O bun èn o switi a de te brada e libi makandra na ini wánfasi!”—Psalm 133:1.

[Faki/Prenki na tapu bladzijde 25]

DEN SETI SANI FU GI A YEPI DI DE FANOWDU

Fa den wan di no man yere kan nyan bun fu den Kresten konmakandra? Na heri grontapu, Yehovah Kotoigi e opo gemeente pe sma e gebroiki gebaartongo. Na ini den 13 yari di pasa, 27 fu den sortu gemeente dati, nanga 43 grupu seti na ini Amerkankondre. Sowan 40 tra kondre de pe yu abi ala nanga ala moro leki 140 gebaartongo gemeente. Den poti den Kresten buku fu wi na tapu video na ini 13 difrenti gebaartongo.

A Kresten gemeente e gi dofusma na okasi fu prèise Yehovah. Odile na wan uma na ini Fransikondre di fosi ben de wan Lomsusma. A ben abi furu momenti na ini en libi pe a ben firi brokosaka trutru èn a ben prakseri fu kiri ensrefi. Now a de nanga tangi srefisrefi fu a Bijbel leri di a kisi na ini a Kresten gemeente. „Mi kon kisi wan bun gosontu baka èn mi e prisiri na ini a libi baka”, na so a e taki. „Ma san moro prenspari srefi na taki mi feni a waarheid. Now mi libi abi wan marki.”