Krestes e tiri a gemeente fu en
Krestes e tiri a gemeente fu en
„Luku! mi de nanga unu ala den dei teleki a kaba fu a seti fu sani.”—Mateyus 28:20.
1, 2. (a) San Yesus di ben kisi wan opobaka, pramisi den bakaman fu en di a gi den a komando fu meki disipel? (b) San Yesus ben du fu tiri a fosi Kresten gemeente?
BIFO Yesus Krestes, a Fesiman fu wi di kisi wan opobaka, opo go na hemel, dan a ben kon na den disipel fu en èn a ben taki: „Mi kisi ala makti na ini hemel èn na grontapu. Go fu dati ede, èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu. Èn, luku! mi de nanga unu ala den dei teleki a kaba fu a seti fu sani.”—Mateyus 23:10; 28:18-20.
2 Yesus no ben gi den disipel fu en a prenspari wroko wawan fu meki moro disipel, ma a pramisi den tu taki a ben o de nanga den. A Bijbel buku Tori fu den Apostel di e taki fu a bigin fu Krestendom, e sori krin taki Krestes ben gebroiki a makti di a kisi, fu tiri a nyun gemeente. Soleki fa a pramisi, a ben seni a „yepiman”, noso santa yeye, gi den bakaman fu en fu gi den deki-ati èn fu tiri a wroko fu den (Yohanes 16:7; Tori fu den Apostel 2:4, 33; 13:2-4; 16:6-10). Baka di Yesus kisi wan opobaka, a ben gebroiki engel fu yepi den disipel fu en (Tori fu den Apostel 5:19; 8:26; 10:3-8, 22; 12:7-11; 27:23, 24; 1 Petrus 3:22). Boiti dati, dan fu man tiri a gemeente, a Fesiman fu wi ben poti wan grupu getrow man na wroko tu fu teki fesi na ini a gemeente.—Tori fu den Apostel 1:20, 24-26; 6:1-6; 8:5, 14-17.
3. Fu sortu aksi wi sa taki na ini na artikel disi?
3 Ma fa a de nanga a ten fu wi, noso „a kaba fu a seti fu sani”? Fa Yesus Krestes e tiri a Kresten gemeente na ini a ten disi? Fa wi kan sori taki wi e teki a tiri fu en?
A Masra abi wan getrow srafu
4. (a) Suma na „a getrow èn koni srafu”? (b) Sortu wroko a srafu kisi fu a Masra?
4 Di Yesus fruteri sma fa den ben o man si a denoya fu en, a ben taki: „Suma trutru na a getrow èn koni srafu, di en masra poti fu luku den oso-futuboi fu en, fu gi den nyanyan na a reti ten? Koloku a srafu dati de di, te en masra e doro, e feni en e du so. Fu tru, mi e taigi unu: A sa poti en fu luku ala den gudu fu en” (Mateyus 24:45-47). A „masra” na wi Fesiman, Yesus Krestes, èn a poti „a getrow èn koni srafu”, namku a grupu fu salfu Kresten na grontapu, fu sorgu den afersi fu en na grontapu.
5, 6. (a) San na „den seibi gowtu kandratiki” nanga „den seibi stari” di na apostel Yohanes ben kisi fu si na ini wan fisyun? (b) San a wani taki dati „den seibi stari” de na ini Yesus en reti-anu?
5 A Bijbel buku Openbaring e sori taki a getrow èn koni srafu e kisi tiri fu Yesus Krestes srefi. Na ini wan fisyun fu „a dei fu Masra”, na apostel Yohanes ben si „seibi gowtu kandratiki, èn na mindri den kandratiki wan sma di gersi wan manpikin fu libisma”. A sma disi „ben abi seibi stari na ini en reti-anu”. Yesus ben fruklari a fisyun disi gi Yohanes. A taki: „Èn fu a sei fu a santa kibritori fu den seibi stari di yu ben si na tapu mi reti-anu, èn fu den seibi gowtu kandratiki: Den seibi stari wani taki den engel fu den seibi gemeente, èn den seibi kandratiki wani taki seibi gemeente.”—Openbaring 1:1, 10-20.
6 „Den seibi gowtu kandratiki” na ala den gemeente fu tru Kresten na ini „a dei fu Masra”, di bigin na ini 1914. Ma fa a de nanga „den seibi stari”? Na a fosi presi, den stari ben de ala den salfu opziener di ben e sorgu gi den fosi yarihondro gemeente. * Den opziener ben de na ini a reti-anu fu Yesus. Dati wani taki dati den ben musu gi yesi na Yesus. Iya, Krestes Yesus ben tiri den difrenti sma disi di makandra ben de a srafu grupu. Ma na ini a ten disi, den salfu opziener no de nanga furu sma moro. Fa Krestes e tiri den moro leki 93.000 gemeente fu Yehovah Kotoigi na heri grontapu?
7. (a) Fa Yesus e gebroiki a Tiri Skin fu tiri den gemeente na heri grontapu? (b) Fu san ede wi kan taki dati a santa yeye poti den Kresten opziener na wroko?
7 Soleki fa a ben de na ini a fosi yarihondro, na so wan pikin grupu fu salfu opziener e dini now leki wan Tiri Skin, di e teki presi gi a heri grupu fu a getrow èn koni srafu. A Fesiman fu wi e gebroiki a Tiri Skin disi fu poti getrow man na wroko leki owruman na ini den gemeente. Den getrow man disi kan de sma di salfu nanga santa yeye, noso sma di no salfu. A santa yeye di Yehovah gi Yesus fu gebroiki, na wan prenspari sani na ini a seti disi (Tori fu den Apostel 2:32, 33). Na a fosi presi, den opziener disi musu doro den markitiki na ini Gado Wortu, di skrifi nanga yepi fu santa yeye (1 Timoteyus 3:1-7; Titus 1:5-9; 2 Petrus 1:20, 21). Bifo den owruman e poti brada fu teki fesi na ini a gemeente, den e begi fosi èn den e du dati na ondro a tiri fu santa yeye. Boiti dati, den sma di poti fu teki fesi na ini a gemeente musu sori den froktu fu a yeye (Galasiasma 5:22, 23). Sobun, ala owruman, efu den salfu noso den no salfu, musu gi yesi na a rai fu Paulus: „Poti prakseri na unsrefi èn na a heri ipi, di santa yeye ben poti unu fu wroko leki opziener na den mindri” (Tori fu den Apostel 20:28). Den man disi di poti fu teki fesi na ini a gemeente e kisi rai fu a Tiri Skin, èn den de klariklari fu yepi a gemeente. Na so wan fasi Krestes de nanga wi now èn e tiri a gemeente.
8. Fa Krestes e gebroiki engel fu tiri den bakaman fu en?
8 Yesus e gebroiki engel sosrefi fu tiri den bakaman fu en na ini a ten disi. Soleki fa na agersitori fu a tarwe nanga a takru wiwiri e sori, dan a kotiten ben o de na „a kaba fu a seti fu sani”. Suma a Masra ben o gebroiki fu du a kotiwroko? „Den kotiman na den engel”, Krestes taki. A taki moro fara: „A Manpikin fu libisma sa seni den engel fu en go èn den sa tyari ala sani kon na makandra di e meki sma naki futu èn sma di e du kruktudu, èn puru den na ini en kownukondre” (Mateyus 13:37-41). Boiti dati, neleki fa wan engel ben tyari Filipus go fu feni na Etiopia eunuch, na so wi abi furu buweisi na ini a ten disi taki Krestes e gebroiki den engel fu en fu tiri a wroko fu tru Kresten, so taki den kan feni reti-ati sma.—Tori fu den Apostel 8:26, 27; Openbaring 14:6.
9. (a) Fa Krestes e tiri a Kresten gemeente na ini a ten disi? (b) Sortu sani wi musu aksi wisrefi efu wi wani kisi wini fu a tiri fu Krestes?
9 A de trutru wan bigi trowstu fu sabi taki Yesus Krestes e tiri den disipel fu en na ini a ten disi nanga yepi fu a Tiri Skin, a santa yeye, èn den engel! A kan taki wan tu anbegiman fu Yehovah no man kisi tiri fu a Tiri Skin fu wan syatu pisi ten fu di den e kisi frufolgu noso fu di wan srefi sortu problema e miti den. Ma srefi te dati pasa, toku Krestes sa tiri den nanga yepi fu a santa yeye èn nanga yepi fu den engel. Ma wi sa kisi wini nomo fu a tiri fu en, te wi e teki a tiri dati trutru. Fa wi kan sori taki wi teki Krestes trutru leki wi fesiman?
„Gi yesi na den . . . saka unsrefi na den ondro”
10. Fa wi kan sori taki wi e warderi den owruman di poti fu teki fesi na ini a gemeente?
10 A Fesiman fu wi seni „presenti ini libisma” gi den gemeente; a seni „sonwan leki evangelie preikiman, sonwan leki skapuman nanga leriman” (Efeisesma 4:8, 11, 12). A fasi fa wi e denki fu den man disi di lepi na yeye fasi èn a fasi fa wi e handri nanga den, e sori krin efu wi teki Krestes leki wi fesiman. A bun fu ’sori taki wi de nanga tangi na ati’ gi den man disi di Krestes seni gi wi (Kolosesma 3:15). Boiti dati, den warti fu kisi lespeki. Na apostel Paulus ben skrifi: „Meki den owruman di e tiri na wan bun fasi, de warti fu kisi dobru grani” (1 Timoteyus 5:17). Fa wi kan sori taki wi e warderi èn e lespeki den owruman noso opziener na ini a gemeente? Paulus e taki: „Gi yesi na den wan di e teki fesi na un mindri èn saka unsrefi na den ondro” (Hebrewsma 13:17). Iya, wi musu gi yesi na den èn saka wisrefi na den ondro.
11. Fu san ede wi kan taki dati wi e handri akruderi a dopu fu wi te wi e lespeki a seti fu owruman?
11 A Fesiman fu wi volmaakti. Den man di a gi wi leki presenti no de volmaakti sma. Sobun, den kan meki fowtu son leisi. Toku a de tumusi prenspari taki wi e tan saka wisrefi na a seti fu Krestes. Fu taki en leti, wi e sori taki wi e frustan trutru san a wani taki fu gi wisrefi abra èn teki dopu, te wi e erken taki den sma di e teki fesi na ini a gemeente, trutru poti na wroko nanga yepi fu santa yeye. Wi sa de klariklari tu fu saka wisrefi na den ondro. A teki di wi teki dopu ’na ini a nen fu a santa yeye’, e sori taki wi sabi san na a santa yeye èn taki wi e frustan taki Yehovah e gebroiki a yeye dati fu du san a abi na prakseri (Mateyus 28:19). A dopu disi wani taki dati wi musu du soleki fa a yeye e sori wi, èn wi no musu du nowan sani di kan tapu a yeye disi fu wroko tapu den bakaman fu Krestes. Sobun, a santa yeye prenspari srefisrefi fu poti sma leki owruman. Wi kan taki dan dati wi gi wisrefi abra trutru te wi no e saka wisrefi na a seti fu owruman na ini a gemeente?
12. Sortu eksempre Yudas e kari, di e sori taki sma no ben lespeki den wan di kisi frantwortu? San den eksempre disi e leri wi?
12 Den Buku fu Bijbel e gi wan tu eksempre di e leri wi o prenspari a de fu gi yesi na den owruman èn fu saka wisrefi na den ondro. A disipel Yudas ben kari na eksempre fu dri sma di ben kosi den man di ben poti fu teki fesi na ini a gemeente. Den eksempre disi musu de wan warskow gi wi. A ben taki: „Sari fu den, bika den waka a pasi fu Kain èn den feti go na tapu a takru pasi fu Bileam fu kan kisi wan paiman èn den dede na ini na opruru taki fu Korak!” (Yudas 11) Kain no ben wani arki a lobi-ati rai fu Yehovah èn bita-ati meki taki a ben suku fu kiri en brada (Genesis 4:4-8). Aladi Bileam kisi someni warskow fu Gado, toku a ben pruberi fu fluku a pipel fu Gado fu man feni moni gi ensrefi (Numeri 22:5-28, 32-34; Deuteronomium 23:5). Korak ben abi bigi frantwortu na ini Israel, ma dati no ben sari gi en. A ben meki sma opo densrefi teige Gado en futuboi Moses, di ben de a moro safri-ati man na grontapu (Numeri 12:3; 16:1-3, 32, 33). Rampu ben miti Kain, Bileam, nanga Korak. Den eksempre disi de krin; den e leri wi taki wi musu arki den rai fu den sma di Yehovah gi a frantwortu èn a e leri wi fu lespeki den!
13. Sortu winimarki den sma sa kisi di e saka densrefi na a seti fu owruman, soleki fa a profeiti Yesaya ben taki na fesi?
13 Suma no ben sa wani kisi den winimarki fu a moi seti fu owruman di wi Fesiman poti na ini a Kresten gemeente? A profeiti Yesaya ben taki fu den bun bakapisi di a seti disi ben o abi: „Luku! Wan kownu sa tiri gi regtfardikifasi nomo; èn fu a sei fu den granman, den sa tiri leki granman gi retidu nomo. Èn ibriwan musu buweisi fu de leki wan kibripresi gi a winti èn wan kibripresi gi a sibibusi, leki watra di e lon na ini wan kondre sondro watra, leki a kowrupe fu wan bigi klepston di tanapu leti-opo na ini wan kondre di drei” (Yesaya 32:1, 2). Ibriwan fu den owruman musu de so wan „kibripresi” gi trawan. Srefi te wi abi problema fu saka wisrefi na sma ondro di e teki fesi ini na aladei libi, toku wi kan begi èn du muiti fu gi yesi èn fu saka wisrefi na den sma ondro di Gado poti fu teki fesi na ini a gemeente.
Fa owruman e saka densrefi na a tiri fu Krestes
14, 15. Fa den wan di e teki fesi na ini a gemeente e sori taki den e saka densrefi na a tiri fu Krestes?
14 Ibri Kresten, spesrutu den owruman, musu waka baka a fasi fa Krestes ben handri leki fesiman. Na ini a gemeente, den opziener, noso owruman, abi a reti fu gi rai. Ma den no e suku fu de ’basi fu a bribi fu den bribiman’; den no e pruberi fu basi a libi fu trawan (2 Korentesma 1:24). Den owruman e gi yesi na Yesus, di ben taki: „Unu sabi taki den tiriman fu den nâsi e basi den èn den bigiman abi makti na den tapu. A no de so nanga unu” (Mateyus 20:25-27). Te den owruman e du a wroko fu den, dan den e suku fu dini trawan nanga den heri ati.
15 Kresten e kisi a deki-ati: „Memre den wan di e teki fesi na un mindri, . . . èn waka baka a bribi fu den, aladi unu e luku fa a waka nanga libi fu den e go” (Hebrewsma 13:7). Owruman e teki fesi na ini a gemeente, ma a no fu dati ede meki wi musu waka na den baka. Yesus ben taki: „Wán sma nomo na un Fesiman, a Krestes” (Mateyus 23:10). Wi musu sori a srefi bribi di den owruman e sori, bika den e waka na baka wi tru Fesiman, Krestes (1 Korentesma 11:1). Poti prakseri na wan tu fasi fa owruman e pruberi fu de leki Krestes te den e handri nanga trawan na ini a gemeente.
16. Fa Yesus ben libi nanga den bakaman fu en, awinsi a ben abi makti?
16 Yesus ben du ala sani moro bun leki libisma, èn a ben kisi moro bigi makti fu en Tata. Toku a ben handri nanga sakafasi te a ben de nanga den disipel fu en. A no ben meki den arkiman fu en kisi a firi taki en ben abi ala koni. Yesus ben firi gi den bakaman fu en èn a ben abi sari-ati gi den. A ben hori den nowtu fu den sma na prakseri (Mateyus 15:32; 26:40, 41; Markus 6:31). Noiti a ben fruwakti moro fu den disipel fu en leki san den man gi, èn noiti a ben meki den du moro leki san den man du (Yohanes 16:12). Yesus ben abi „safrifasi nanga sakafasi”. Dati meki a no musu fruwondru wi taki furu sma ben kisi deki-ati nanga trowstu fu en.—Mateyus 11:28-30.
17. Fa owruman kan sori taki den abi sakafasi neleki Krestes, te den e handri nanga trawan na ini a gemeente?
17 Efu Krestes a Fesiman ben handri nanga sakafasi, dan den wan di e teki fesi na ini a gemeente musu handri nanga sakafasi tu! Iya, den wan di kisi a frantwortu disi, musu luku bun taki den no e gebroiki en na wan fowtu fasi. Den no e „kon nanga tumusi furu wortu” tu, fu hei densrefi (1 Korentesma 2:1, 2). Na presi fu dati, den e du muiti fu taki a waarheid fu Bijbel nanga den heri ati, èn den e pruberi fu du dati na so wan fasi taki sma man frustan en. Boiti dati, owruman e pruberi fu no fruwakti tumusi furu fu trawan, èn den e pruberi fu hori den nowtu fu trawan na prakseri (Filipisma 4:5). Fu di den sabi taki ibri sma abi wan tu sani di a no man du, meki den e hori den sani disi na prakseri te den e handri nanga den brada nanga sisa fu den (1 Petrus 4:8). Owruman di abi sakafasi nanga safrifasi e gi trowstu trutru, a no so? Iya, na so a de.
18. San owruman kan leri fu a fasi fa Yesus ben handri nanga pikin-nengre?
18 Sma no ben draidrai fu taki nanga Yesus, srefi den pikin-nengre ben lobi fu go na en. Luku san a piki den disipel fu en di den ben piri-ai gi den sma di ben „tyari yongu pikin kon na en”. „Meki den yongu pikin kon na mi”, na so Yesus taki, „no pruberi fu tapu den”. Baka dati, „a ben teki den pikin ini den anu fu en èn a ben bigin blesi den, aladi a ben e poti den anu fu en na den tapu” (Markus 10:13-16). Yesus ben abi switifasi èn sma ben lobi en. Sma no ben frede Yesus. Srefi pikin-nengre no ben frede fu go na en. Owruman musu de so tu. Sma no musu frede fu go na den. Den musu abi firi nanga switifasi gi trawan, so taki tra sma, srefi pikin-nengre, no sa frede fu go na den.
19. San a wani taki fu abi „a denki fu Krestes”, èn san wi musu du fu abi a denki dati?
19 O moro owruman sabi Krestes Yesus, o moro den sa man handri neleki en. Paulus ben aksi: „Suma kon sabi a denki fu Yehovah, taki a kan gi en leri?” Dan a taki moro fara: „Ma wi trutru abi a denki fu Krestes” (1 Korentesma 2:16). San a wani taki fu abi a denki fu Krestes? Dati wani taki dati wi musu sabi fa a e denki èn wi musu sabi heri bun sortu sma a de. Na so wi sa kon sabi san a ben o du na ini wan spesrutu situwâsi. Prakseri fa a ben o de efu wi ben sabi a Fesiman fu wi so bun! Iya, fu man du dati, dan wi musu poti furu prakseri na den Evangelietori èn prakseri doronomo fu a libi nanga na eksempre fu Yesus. Te owruman e du muiti fu handri na a srefi fasi leki Krestes, dan a sa de moro makriki gi den sma na ini a gemeente fu sori a srefi bribi leki den. Èn den owruman breiti te den e si taki trawan e prisiri fu waka baka a Fesiman fu den.
Tan saka yusrefi na a tiri fu Krestes
20, 21. Sortu bosroiti wi musu teki te wi e prakseri a pramisi nyun grontapu?
20 A de prenspari srefisrefi taki wi alamala e tan saka wisrefi na a tiri fu Krestes. Aladi wi e doro a kaba fu a seti fu sani disi, wi de leki den Israelsma na den opo presi fu Moab na ini 1473 b.G.T. Den ben de leti fesi a Pramisi Kondre, èn nanga yepi fu a profeiti Moses, Gado ben fruklari: „Yu [Yosua] sa tyari a pipel disi go na ini a kondre di Yehovah pramisi fu gi na den fositen tata fu den” (Deuteronomium 31:7, 8). Gado ben poti Yosua leki fesiman. Fu man go na ini a Pramisi Kondre, den Israelsma ben musu saka densrefi na a tiri fu Yosua.
21 Bijbel e taigi wi: „Wán sma na yu Fesiman, a Krestes.” Krestes wawan sa tyari wi go na ini a pramisi nyun grontapu pe regtfardikifasi sa de (2 Petrus 3:13). Fu dati ede, meki wi teki a bosroiti fu saka wisrefi ala ten na a tiri fu en na ini ala afersi fu wi libi.
[Futuwortu]
^ paragraaf 6 Den „stari” dyaso a no trutru engel. Yesus noiti no ben o gebroiki wan libisma fu skrifi boskopu gi yeye di sma no man si. Fu dati ede den „stari” musu fu de den libisma opziener, noso owruman, na ini den gemeente, di de leki boskopuman fu Yesus. A nomru seibi e sori taki den doro a markitiki fu Gado krinkrin.
Yu e memre disi ete?
• Fa Krestes ben tiri a fosi gemeente?
• Fa Krestes e tiri a gemeente fu en na ini a ten disi?
• Fu san ede wi musu saka wisrefi na den sma ondro di e teki fesi na ini a gemeente?
• Fa owruman kan sori taki Krestes na a Fesiman fu den?
[Aksi fu a tori disi]
[Prenki na tapu bladzijde 15]
Krestes e tiri a gemeente fu en èn a e hori den opziener na ini en reti-anu
[Prenki na tapu bladzijde 16]
„Un gi yesi na den wan di e teki fesi na un mindri èn saka unsrefi na den ondro”
[Prenki na tapu bladzijde 18]
Yesus ben firi gi sma èn sma no ben frede fu go na en. Kresten owruman e pruberi fu de leki en