Suma na a moro bun fesiman di kan tiri wi?

„IBRI oso abi wan sma di meki en, ma a sma di meki ala sani, na Gado”, na so Bijbel e taki (Hebrewsma 3:4; Openbaring 4:11). Fu di a tru Gado, Yehovah, de a Mekiman fu wi, dati meki a „sabi heri bun fa wi meki” (Psalm 103:14). A sabi heri bun san wi no man du èn san wi abi fanowdu. Fu di a de wan lobi-ati Gado, meki a wani gi wi den sani dati di wi abi fanowdu (Psalm 145:16; 1 Yohanes 4:8). Sobun, fu di a sabi taki wi abi wan bun fesiman fanowdu, meki a sa gi wi dati tu.

Yehovah ben meki a profeiti Yesaya taki a sani disi: „Luku! Mi gi en leki wan kotoigi gi den nâsi, leki wan fesiman nanga kapten gi den nâsi” (Yesaya 55:4). Na ini a ten disi, sma e feti fu feni bun fesiman. Fu man lusu a problema disi, dan a de prenspari fu kon sabi suma na a sma di na Almaktiwan srefi poti leki Fesiman èn wi musu teki a tiri fu a sma dati tu. Suma na a Fesiman nanga Kapten disi di Gado pramisi? Fa wi sabi taki a de wan bun fesiman? Pe a sa tyari wi go? San wi musu du fu kisi wini fu a tiri fu en?

A tiriman doro di Gado pramisi

Sowan 2500 yari pasa, na engel Gabrièl ben kon na a profeiti Danièl èn a ben taigi en: „Yu musu sabi èn abi a koni fu man  si sani krin taki fu sensi a wortu go na doro fu meki Yerusalem kon bun baka èn fu bow en baka te na a Mesias a Fesiman, seibi wiki sa de, sosrefi siksitenti na tu wiki. A sa drai kon baka èn trutru den sa bow en baka, nanga wan publiki pren èn nanga wan bigi gotro, ma na ini a banawtu fu a ten.”—Danièl 9:25.

A de krin, taki na engel ben e fruteri Danièl soifri o ten Yehovah ben o seni a sma disi kon di a poti leki Fesiman. Na ini a yari 455 b.G.T., sma ben panya a boskopu taki den ben o bow Yerusalem baka. „Mesias a Fesiman” ben o kon na a kaba fu 69 wiki, noso 483 yari baka a yari dati * (Nehemia 2:1-8). San pasa na a kaba fu a pisi ten dati? Na Evangelie skrifiman Lukas ben fruteri: „Na ini a di fu tinafeifi tiri yari fu Tiberius Caesar, di Pontius Pilatus ben de foto tiriman fu Yudea, èn Herodes ben de distrikt tiriman fu Galilea [dati na 29 G.T.], . . . Gado ben meki sani bekènti na Yohanes, a manpikin fu Sakarias, na ini a gran sabana. Na so a ben kon na ini a heri kontren lontu a Yordan, èn ben e preiki a dopu leki wan simbôl fu berow fu kan kisi pardon fu sondu.” Na a ten dati, „a pipel ben e fruwakti” Mesias a Fesiman (Lukas 3:1-3, 15). Bun furu sma ben kon na Yohanes, ma en no ben de a Fesiman dati.

Dan na ini wan sani fu oktober 29 G.T., Yesus fu Nasaret ben kon na Yohanes fu teki dopu. Yohanes ben gi kotoigi fu disi èn a ben taki: „Mi ben si a yeye e saka kon neleki wan doifi fu hemel, èn a ben tan na en tapu. Misrefi no ben sabi en, ma a Sma di ben seni mi fu dopu sma na ini watra ben taigi mi: ’A sma di yu si a yeye e saka kon na en tapu èn e tan, na en na a sma di e dopu na ini santa yeye.’ Èn mi si en, èn mi gi kotoigi taki a sma disi na a Manpikin fu Gado” (Yohanes 1:32-34). Gado ben salfu Yesus leki Fesiman, leki a Mesias noso Krestes, di a teki dopu.

Iya, a pramisi „fesiman nanga kapten gi den nâsi” ben de Yesus Krestes. Na ini a ten disi, sma e fruwakti furu fu wan bun fesiman. Ma te wi e luku a fasi fa Yesus e du en wroko leki fesiman, dan wi e si wantewante taki a e du en moro bun leki san sma e fruwakti.

A Mesias na a moro bun fesiman di libisma kan abi

Wan bun fesiman e gi bun tiri èn a e yepi sma fu kisi deki-ati nanga koni, so taki den kan lusu problema. ’Wan sma musu man du den sani disi efu a wani de wan bun fesiman na ini a di fu 21 yarihondro’, na so a buku e taki di nen 21st Century Leadership: Dialogues With 100 Top Leaders (Takimakandra nanga 100 fu den moro prenspari fesiman na ini a di fu 21 yarihondro). Yesus ben sreka den arkiman fu en bun fu basi aladei problema! Prakseri a moro pôpi takimakandra di a ben hori. Dati ben de a Bergitaki. Wi kan feni furu bun rai na ini den wortu di skrifi na ini Mateyus kapitel 5 te nanga kapitel 7.

Prakseri fu eksempre san Yesus ben taki fu a fasi fa wi musu lusu kesekese. A ben gi a rai: „Fu dati ede, te yu e tyari yu presenti go na a altari èn drape yu e memre taki a brada fu yu abi wan sani nanga yu, dan libi yu presenti drape na fesi na altari èn gowe; suku vrede fosi nanga a brada fu yu, èn baka dati, te yu drai kon baka, òfer a presenti fu yu” (Mateyus 5:23, 24). A fosi sani di wi musu du, na fu suku vrede nanga trawan. Disi de moro prenspari srefi leki den wroko di wi musu du gi na anbegi, soleki a poti di sma ben musu poti presenti na tapu a tempel altari na Yerusalem akruderi a Wet fu Moses. Efu wi no ben o suku vrede nanga trawan, dan Gado no ben o teki na anbegi fu wi. Na ini a ten disi, a rai fu Yesus e wroko bun, neleki fa a ben wroko bun someni hondro yari pasa.

Yesus ben yepi den arkiman fu en tu fu tan fara fu hurudu. A ben frumane den: „Unu ben yere taki den ben taki: ’Yu no mag du sutadu.’ Ma mi e taigi unu taki ibriwan sma di e tan luku wan uma fu kan abi tranga lostu gi en, na ini en ati a du sutadu kaba nanga en” (Mateyus 5:27, 28). A rai disi e fiti fu tru! Iya, wi no musu  bigin prakseri fu sutadu srefi, fu di dati kan meki taki wi e go du en tu. Yesus ben taki dati sutadu nanga hurudu e komoto fu na ati (Mateyus 15:18, 19). Wi e handri nanga koni te wi e kibri wi ati.—Odo 4:23.

Na ini a Bergitaki, Yesus ben gi tra bun rai di e sori wi taki wi musu lobi den feanti fu wi èn taki wi musu lobi fu gi sani. A ben gi wi a rai tu fu abi wan yoisti denki fu gudu èn fu yeye sani, nanga den sortu sani dati (Mateyus 5:43-47; 6:1-4, 19-21, 24-34). Yesus ben sori den arkiman fu en srefi fa den kan suku yepi na Gado, fu di a ben leri den fa fu begi (Mateyus 6:9-13). Na ini a ten disi, Mesias a Fesiman e tan gi den bakaman fu en a krakti nanga den sani di den abi fanowdu fu man kakafutu gi problema di libisma e kisi na ini den libi.

Ibri tron te Yesus ben bigin wan nyun tori na ini a Bergitaki, dan a ben gebroiki den wortu: „Unu ben yere taki den ben taki”, noso „den ben taki moro fara”. A ben du dati siksi tron. Ma na a kaba fu ibri tori a ben tyari wan nyun prakseri kon na fesi, èn a ben taki: „Ma mi e taigi unu” (Mateyus 5:21, 22, 27, 28, 31-34, 38, 39, 43, 44). Dati e sori taki den sma di ben arki en, ben gwenti fu du sani na wan spesrutu sortu fasi; den ben du sani akruderi den wet fu den Fariseiman. Ma now Yesus ben sori den wan tra fasi fu du sani. A fasi fa en ben du sani, ben meki den kon frustan san a Wet fu Moses ben wani taki trutru. Sobun, Yesus ben tyari kenki kon, èn a ben du dati na so wan fasi taki den bakaman fu en ben man teki den kenki dati abra makriki. Iya, Yesus ben gi sma deki-ati fu tyari bigi kenki kon na ini den libi. A ben gi den deki-ati fu tyari kenki kon na yeye fasi èn sosrefi na a fasi fa den ben tyari densrefi. A sma di man du den sani disi, na wan tru fesiman.

Wan buku di e leri sma fa fu orga sani, e sori taki a muilek srefisrefi fu meki sma tyari so wan kenki kon. A buku e taki: ’A sma di wani tyari a kenki kon [a fesiman] musu abi firi gi sma, a musu man frustan bun fa sma e denki, a musu horidoro, a no musu lasi-ati esi, a musu de seiker taki a man du sani ensrefi, èn a musu abi bigi pasensi. Ma awinsi a abi ala den fasi nanga maniri disi, toku dati no de wan dyaranti taki sani sa waka bun.’

Wan artikel ben abi leki nen „Fesiman: a de prenspari fu luku sortu maniri den abi?” A ben taki: „Fesiman musu tyari densrefi neleki fa den wani taki den bakaman musu tyari densrefi.” Fu tru, wan bun fesiman e du san a e taki. Yesus Krestes ben de so wan sma! Iya, a ben leri den sma di ben waka nanga en taki den musu abi sakafasi, ma a ben gi den wan bun eksempre tu fu di a ben wasi den futu fu den (Yohanes 13:5-15). Yesus ben seni den disipel fu en fu go preiki a bun nyunsu fu Gado en Kownukondre, ma ensrefi ben du a wroko dati fayafaya tu (Mateyus 4:18-25; Lukas 8:1-3; 9:1-6; 10:1-24; Yohanes 10:40-42). Yesus ben gi wi na eksempre fa fu gi yesi na den wan di poti leki fesiman. A ben taki fu ensrefi: „A Manpikin no kan du noti fu ensrefi, ma soso den sani di a e si a Tata e du.”—Yohanes 5:19.

Den sani di Yesus ben taki èn den sani di a ben du, e sori krin taki en na a moro bun Fesiman. Fu taki en leti, a de wan moro bun fesiman leki san libisma e fruwakti. Yesus de volmaakti. Baka a dede nanga na opobaka fu en, a kisi wan libi pe a no man dede moro. Dati meki a e libi fu têgo (1 Petrus 3:18; Openbaring 1:13-18). Sortu libisma fesiman man de neleki en?

San wi musu du?

„Mesias a Fesiman” di e tiri leki a Kownu fu Gado en Kownukondre, sa blesi a libisma famiri di e gi yesi na en. Bijbel e pramisi: „Grontapu sa kon furu trutru nanga a sabi fu Yehovah, soleki fa watra e tapu se” (Yesaya 11:9). „Den safri-atisma srefi sa abi grontapu leki a gudu fu den, èn den trutru sa feni switi prisiri na ini vrede pasa marki” (Psalm 37:11). „Den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi” (Mika 4:4). „Gado srefi sa de nanga den. Èn a sa figi puru ala watra na den ai, èn dede no sa de moro, nowan sari,  nowan babari, nowan pen no sa de moro. Den fositen sani pasa kaba.”—Openbaring 21:3, 4.

A grontapu fu tide e feti fu feni bun fesiman. Ma Yesus Krestes e tyari den safri-atisma go na ini wan nyun grontapu pe vrede sa de. Drape a libisma famiri di e gi yesi, sa anbegi Yehovah Gado makandra, èn den sa kon volmaakti. A prenspari trutru taki wi e teki a ten fu kon sabi a tru Gado èn a sma di a poti leki Fesiman èn fu du san wi kon sabi!—Yohanes 17:3.

Wan moro moi fasi fu sori lespeki gi wan sma, na fu handri leki a sma dati. A no de so dan taki wi musu du muiti fu handri leki Yesus Krestes, a moro bigi Fesiman na ini a heri libisma historia? Fa wi kan du dati? Fa a libi fu wi sa de te wi e teki en leki wi fesiman? Den tu artikel di e kon sa taki fu den aksi disi nanga tra aksi tu.

[Futuwortu]

[Prenki na tapu bladzijde 4]

Danièl ben fruteri sma fu a Fesiman di Gado ben o seni kon

[Prenki na tapu bladzijde 7]

Den leri fu Yesus ben yepi sma fu basi den problema fu a libi

[Prenki na tapu bladzijde 7]

Yesus sa tyari a libisma famiri di e arki en, go na ini wan nyun grontapu pe vrede sa de