Yu teki Krestes trutru leki yu fesiman?
Yu teki Krestes trutru leki yu fesiman?
„No meki sma kari unu ’fesiman’, bika wán sma nomo na un Fesiman, a Krestes.”—MATEYUS 23:10.
1. Suma wawan na a Fesiman fu tru Kresten?
A BEN de tudewroko, 11 Nisan. Dri dei baka dati, Yesus Krestes ben o kisi dedestrafu. Disi ben de a lasti leisi di a kon na a tempel. Tapu a dei disi, Yesus ben leri den sma nanga den disipel fu en di kon drape, wan prenspari sani. A ben taki: „No meki sma kari unu Rabi, bika wán na un leriman, aladi unu alamala na brada. Sosrefi unu no musu kari nowan sma na grontapu un tata, bika unu abi wán Tata nomo, di de na hemel. No meki sma kari unu ’fesiman’, bika wán sma nomo na un Fesiman, a Krestes” (Mateyus 23:8-10). A de krin taki Yesus Krestes na a Fesiman fu tru Kresten.
2, 3. Sortu winimarki wi sa kisi te wi e gi yesi na Yehovah èn na a sma di a poti leki Fesiman?
2 Te wi e teki Yesus leki wi fesiman, dan dati trutru e tyari winimarki kon gi wi! Di Yehovah Gado taki fu a Fesiman disi di ben o kon, dan a taki nanga yepi fu a profeiti Yesaya: „Un alamala di e drei watra! Kon na a watra. Èn den sma di no abi moni! Kon, un bai, un nyan. Iya, kon, bai win nanga merki, sondro moni èn sondro wan prijs srefi. . . . Arki bun na mi èn nyan san bun èn meki un sili feni switi prisiri ini fatu srefi. . . . Luku! Mi gi en leki wan kotoigi gi den nâsi, leki wan fesiman nanga kapten gi den nâsi.”—Yesaya 55:1-4.
3 Yesaya ben gebroiki aladei sani soleki watra, merki, nanga win, fu sori wi fa wi libi e kenki te wi e gi yesi na Yehovah èn te wi e waka baka a Fesiman nanga Kapten di a gi wi. Te wi e du dati, dan a de neleki wi e dringi switi kowru watra tapu wan faya dei. Wi e kisi krakti baka fu di wi e kon sabi san tru èn san regtfardiki. Merki e meki wan beibi kon tranga èn a e yepi en gro. Na so ’a merki fu a wortu’ e meki wi kon tranga tu èn a e yepi wi fu gro na yeye fasi, so taki wi e kon abi wan bun matifasi nanga Gado (1 Petrus 2:1-3). Ibri sma sa agri taki win e meki wan fesa tron wan moro prisiri okasi. Na a srefi fasi wi e kon „de nanga prisiri nomo” te wi e anbegi Gado èn e waka baka a sma di a poti leki Fesiman (Deuteronomium 16:15). Fu dati ede a prenspari taki wi alamala, yongusma nanga owrusma, mansma nanga umasma, e sori taki wi teki Krestes trutru leki wi fesiman. Ma fa wi kan sori na ini wi aladei libi taki a Mesias na wi Fesiman?
Yonguwan—Tan du muiti fu „kisi moro koni”
4. (a) San ben pasa di Yesus, di a ben abi 12 yari, ben go na Yerusalem gi a Paskafesa? (b) O furu sabi Yesus ben abi di a ben abi 12 yari nomo?
4 Prakseri na eksempre di a Fesiman fu wi poti gi yongusma. Wi no sabi furu fu a pikin-nengreten fu Yesus. Toku wi kan kon sabi wan tu sani fu en te wi e luku san ben pasa di a ben abi 12 yari. Ibri yari a papa nanga mama fu en ben go na Yerusalem gi a Paskafesa èn den ben tyari en go nanga den. Na a okasi disi, a ben abi wan faya takimakandra fu Bijbel, èn sondro fu sabi, a famiri fu en gowe libi en. Dri dei baka dati, Yosef nanga Maria di ben broko den ede nanga en, ben feni en na ini a tempel. Drape a ben „e sidon nanga den leriman èn e arki den èn e poti aksi gi den”. Boiti dati, „ala den sma di ben e arki en, ben fruwondru ala ten baka fu a fasi fa a ben frustan sani èn fu den piki fu en”. Prakseri a sani disi. Yesus ben abi 12 yari nomo. Toku a ben man hari sma prakseri nanga den aksi fu en di ben abi fu du nanga yeye afersi. Boiti dati, a ben man piki den aksi disi nanga furu koni! A no de fu taki dati a ben man du disi, fu di a kisi leri fu a papa nanga mama fu en.—Lukas 2:41-50.
5. Fa yongusma kan ondrosuku a fasi fa den e si na osofamiri studie?
5 Kande yu na wan yongu sma. Efu yu papa nanga mama de fayafaya diniman fu Gado, dan a kan de so taki ala wiki na osofamiri fu yu e studeri Bijbel makandra. Fa yu e si na osofamiri studie? A ben sa de wan bun sani fu prakseri fu wan tu aksi, soleki: ’Mi e du muiti trutru fu horibaka gi a bijbelstudie na ini mi osofamiri? Mi e wroko makandra nanga den trawan na ini mi osofamiri? Mi e du muiti fu no du sani di kan gens a studie?’ (Filipisma 3:16). ’Mi e teki prati na a studie fayafaya? Mi e poti aksi te mi abi na okasi fu du dati? Mi e pruberi fu taki tu fa wi kan gebroiki den sani di wi e studeri? Aladi mi e gro na yeye fasi, mi e sori tu taki mi lostu a „tranga nyanyan di de gi lepi sma”?’—Hebrewsma 5:13, 14.
6, 7. O prenspari a kan de gi yongusma fu leisi Bijbel ibri dei?
6 A prenspari sosrefi fu leisi Bijbel ibri dei. A psalm skrifiman ben singi: „Koloku fu a sma di no waka na ini a rai fu den godelowsuwan, . . . ma en prisiri de na ini a wet fu Yehovah, èn na ini en wet a e leisi nanga wan safri sten dei nanga neti” (Psalm 1:1, 2). Yosua, di ben teki abra fu Moses, ’ben leisi na ini a buku fu a wet nanga wan safri sten dei nanga neti’. Fu dati ede a ben man handri nanga koni èn a ben man du a wroko di Gado ben gi en fu du (Yosua 1:8). A Fesiman fu wi, Yesus Krestes, ben taki: „Buku skrifi: ’Libisma no musu libi fu brede wawan, ma fu ibri wortu di e kon fu Yehovah en mofo’” (Mateyus 4:4). Efu a de prenspari fu nyan ibri dei, dan a de moro prenspari fu tan teki yeye nyanyan doronomo!
7 Di Nicole ben abi 13 yari, a ben sabi taki a ben abi yepi fanowdu na yeye fasi. Dati meki a bigin leisi Bijbel ibri dei. * Now a abi 16 yari èn a leisi a heri Bijbel wán leisi. A bigin baka fu leisi a Bijbel èn a leisi afu fu en kaba. A fasi fa a e du dati, no muilek. A e taki: „Mi teki a bosroiti fu leisi ibri dei, awinsi na wán kapitel nomo.” Fa a leisi di a leisi Bijbel ibri dei, yepi en? A e fruteri wi: „So furu sani kan du wi ogri nownowde. Ala dei, problema e miti mi na skoro èn na tra presi. Den sani disi e dwengi mi fu sori mi bribi. Fu di mi e leisi Bijbel ibri dei, meki mi man memre den komando nanga gronprakseri fu Bijbel heri esi. Den e gi mi deki-ati fu kakafutu gi den problema disi. Fu di mi e du dati, meki mi e firi moro krosibei na Yehovah èn na Yesus.”
8. Sortu gwenti Yesus ben abi te a ben de na ini a snoga, èn fa yongusma kan abi a srefi gwenti dati?
8 Yesus ben abi a gwenti fu arki te sma ben e leisi den Buku fu Bijbel na ini a snoga èn ensrefi ben e leisi den tu (Lukas 4:16; Tori fu den Apostel 15:21). Yongusma sa kisi furu wini te den abi a srefi gwenti dati fu go na Kresten konmakandra pe sma e leisi èn e studeri Bijbel! Richard di abi 14 yari, abi furu warderi gi den konmakandra disi. Fu dati ede a taki: „Den konmakandra de prenspari gi mi. Drape mi e yere ibri tron baka san bun èn san ogri, san krin èn san no krin, èn san Kresten musu du èn san den no musu du. Mi no abi fu kon sabi den sani disi nanga tranga. Mi no abi fu ondrofeni den takru bakapisi fosi fu sabi san bun èn san ogri.” Iya, „a frumane fu Yehovah de getrow, a e meki a sma di no abi ondrofeni kon koni” (Psalm 19:7). Nicole srefi teki a bosroiti tu fu go na ala den feifi gemeente konmakandra ibri wiki. Boiti dati a e teki tu noso dri yuru fu sreka ensrefi gi den konmakandra disi.—Efeisesma 5:15, 16.
9. Fa yonguwan kan tan du muiti fu „kisi moro koni”?
9 Den yongu yari na a moro bun ten fu kisi ’sabi fu a wan-enkri tru Gado èn fu en di a seni kon, Yesus Krestes’ (Yohanes 17:3). Kande yu sabi wan tu yongu sma di e gebroiki furu ten fu leisi buku, fu luku telefisi, fu prei video game, noso fu sidon luku sani nomo tapu computer. No teki den yongu sma disi leki eksempre, bika yu abi a volmaakti eksempre fu a Fesiman fu wi. Di a ben de wan yongu boi ete, a ben lobi fu leri sani fu Yehovah. San ben de a bakapisi? Yesus ben „kisi moro koni”, fu di a ben lobi yeye sani (Lukas 2:52). Yu kan kisi moro koni tu.
„Saka unsrefi na makandra ondro”
10. San kan tyari vrede nanga koloku kon na ini na osofamiri?
10 Na oso kan de wan switi presi fu tan, noso a kan de wan presi pe feti nanga strei de (Odo 21:19; 26:21). Te wi e teki a tiri fu Krestes, dan dati e tyari vrede nanga koloku kon na ini wi osofamiri. Te yu luku en bun, a fasi fa Yesus ben tyari ensrefi e sori krin fa sma na ini osofamiri musu libi nanga makandra. Bijbel e taki: „Saka unsrefi na makandra ondro na ini a frede fu Krestes. Meki den wefi saka densrefi na den masra fu den ondro neleki na Masra, bika wan masra na a edeman fu en wefi soleki fa Krestes na a edeman fu a gemeente tu, en leki wan frulusuman fu a skin disi. . . . Masra, tan lobi a wefi fu unu, neleki fa Krestes ben lobi a gemeente tu èn ben gi ensrefi abra gi en” (Efeisesma 5:21-25). Na apostel Paulus ben skrifi a gemeente na Kolose: „Un pikin, un gi yesi na un papa nanga mama na ini ala sani, bika disi e plisi Masra srefisrefi.”—Kolosesma 3:18-20.
11. Fa wan masra kan sori taki a teki Krestes trutru leki en fesiman?
11 A rai disi e sori taki a masra musu teki fesi na ini na osofamiri, a wefi fu en musu yepi en ala ten èn den pikin musu gi yesi na a papa nanga mama fu den. A masra sa tyari koloku kon nomo te a e du en wroko leki edeman na wan yoisti fasi. Wan koni masra kan leri fa fu tyari ensrefi leki edeman te a e du neleki en eigi Edeman nanga Fesiman, Krestes Yesus (1 Korentesma 11:3). Bakaten Yesus ben kon de „edeman na tapu ala sani fu a gemeente”. Toku a no ben kon na grontapu „fu sma dini en, ma fu dini sma” (Efeisesma 1:22; Mateyus 20:28). Na a srefi fasi, wan Kresten masra no e du en wroko leki edeman fu di a wani kisi wini gi ensrefi, ma fu di a wani sorgu en wefi nanga den pikin fu en—iya, en heri osofamiri (1 Korentesma 13:4, 5). A e suku fu abi den srefi fasi nanga maniri leki na edeman fu en, Yesus Krestes. Neleki Yesus, a abi safrifasi nanga sakafasi (Mateyus 11:28-30). Te a e meki fowtu, dan a no e draidrai fu taigi a tra sma: „Gi mi pardon, grantangi”, noso „yu abi leti”. Te a masra de wan bun eksempre, dan a sa de moro makriki gi a wefi fu de wan „yepiman”, wan „fitipisi”, nanga wan „patna” gi en. A wefi sa wani leri fu en èn wroko makandra nanga en.—Genesis 2:20; Maleaki 2:14.
12. San o yepi wan wefi fu lespeki a markitiki di e sori taki a masra na edeman?
12 A wefi fu en sei, musu saka ensrefi na en masra ondro. Ma te a wefi e meki a denki fu grontapu trubu a denki fu en, dan a no sa feni en makriki fu gi yesi na a markitiki di e sori taki a masra na edeman; a no sa wani saka ensrefi moro na en masra ondro. Bijbel no e taki dati a man musu basi en wefi, ma a e aksi fu wefi fu den saka densrefi na den masra ondro (Efeisesma 5:24). Bijbel e sori tu taki a masra noso papa abi a frantwortu na ini na osofamiri. Te a e hori ensrefi na a rai disi, dan dati sa tyari vrede kon na ini na osofamiri èn sani sa waka bun.—Filipisma 2:5.
13. Fa Yesus sori taki pikin-nengre musu gi yesi na a papa nanga mama fu den?
13 Pikin-nengre musu gi yesi na a papa nanga mama fu den. Yesus ben gi wan heri moi eksempre fu disi di a ben abi 12 yari. Den ben libi en na baka na ini a tempel dri dei langa. Syatu baka dati, „a saka go nanga [en papa nanga mama] èn a doro na Nasaret, èn a tan saka ensrefi na den ondro” (Lukas 2:51). Te pikin-nengre e gi yesi na a papa nanga mama fu den, dan dati sa meki vrede nanga wánfasi kon na ini na osofamiri. Te ala sma na ini na osofamiri e saka densrefi na ondro a tiri fu Krestes, dan den sa de wan koloku osofamiri.
14, 15. San o yepi wi fu meki sani waka bun te wi e kisi problema na ini na osofamiri? Gi wan eksempre.
14 Awinsi problema e opo kon na ini na osofamiri, toku sani kan go bun te wi e handri neleki Yesus èn e teki a tiri fu en. Fu eksempre, Jerry di abi 35 yari, trow nanga Lana di abi wan yongu umapikin. Nowan fu den ben fruwakti a problema di opo kon. Jerry e fruteri: „Mi ben sabi taki efu mi ben wani de wan bun edeman, dan mi musu gebroiki den srefi Bijbel gronprakseri di e meki sani waka bun na ini tra osofamiri. Ma heri esi mi kon si taki mi ben musu gebroiki den gronprakseri dati nanga moro koni.” Na umapikin fu en wefi ben feni taki Jerry ben kon fu tyari trobi kon na mindri en nanga en mama èn a ben atibron srefisrefi nanga Jerry. Jerry ben abi a koni fanowdu fu frustan taki a denki disi ben abi krakti tapu den sani di na umapikin ben taki èn den sani di a ben du. Fa Jerry lusu a problema disi? A e fruteri: „Mi nanga Lana ben taki fu a tori. Wi bosroiti taki Lana ben o teki a frantwortu na en tapu fu wan pisi ten nomo fu gi na umapikin trangaleri. Mi ben o du muiti fu kon abi wan bun matifasi nanga na umapikin fu mi wefi. Baka wan pisi ten, sani ben waka bun trutru.”
15 Te wi e kisi problema na ini na osofamiri, dan wi musu pruberi fu frustan fu san ede son sma na ini na osofamiri e taki èn e du sani di e tyari problema kon. Wi musu abi a koni sosrefi fu si krin fa wi kan gebroiki den gronprakseri fu Gado na a yoisti fasi. Fu eksempre, Yesus ben frustan krin fu san ede wan uma ben fasi en, aladi na uma dati ben abi wan siki di ben meki en lasi brudu. Yesus ben handri nanga koni èn a ben abi sari-ati gi na uma (Lefitikus 15:25-27; Markus 5:30-34). A Fesiman fu wi na wan sma di abi koni èn a e frustan bun fa sma e denki èn e firi (Odo 8:12). Wi sa de koloku te wi e du sani neleki fa en ben o du den.
„Tan suku fosi a kownukondre”
16. San musu de a moro prenspari sani na ini wi libi? Sortu eksempre Yesus ben gi wi?
16 Yesus ben sori krin san musu de a moro prenspari sani na ini a libi fu den wan di e teki en leki fesiman. A ben taki: „Tan suku fosi a kownukondre nanga [Gado] en regtfardikifasi” (Mateyus 6:33). Yesus sori wi fa fu du disi. Baka di Yesus teki dopu, dan a teki 40 dei fu faste, fu denki dipi fu sani èn fu begi. Na a kaba fu den dei disi, a ben kisi wan tesi. Satan Didibri ben wani gi en a makti fu tiri „ala den kownukondre fu grontapu”. Prakseri sortu libi Yesus ben kan abi efu a ben teki a makti dati di Didibri ben wani gi en! Ma Krestes ben suku fu du a wani fu en Tata. A ben frustan sosrefi taki wan libi na ini a grontapu fu Satan ben o de fu wan syatu pisi ten nomo. Wantewante a drai baka gi Didibri, a taki: „A skrifi na Buku: ’Na Yehovah, yu Gado, yu musu anbegi, èn gi en wawan yu musu du santa diniwroko.’” No langa baka dati, Yesus „ben bigin preiki èn a ben taki: ’Abi berow, bika a kownukondre fu hemel kon krosibei’” (Mateyus 4:2, 8-10, 17). Den tra yari di a ben de na grontapu, Krestes ben de wan furuten preikiman fu a Kownukondre fu Gado.
17. Fa wi kan sori taki wi e poti Kownukondre afersi tapu a fosi presi na ini wi libi?
17 Wi musu pruberi fu de neleki wi Fesiman èn wi no musu meki a grontapu fu Satan kori wi. Wi no musu meki taki wan wroko di e pai furu moni, nanga wan barinen wroko, de a moro prenspari sani na ini wi libi (Markus 1:17-21). A ben o de wan don sani srefisrefi efu wi ben o feti baka den sani fu grontapu èn poti Kownukondre afersi na wan sei! Yesus gi wi a wroko fu preiki a Kownukondre èn fu meki disipel (Mateyus 24:14; 28:19, 20). Iya, kande wi abi a frantwortu fu sorgu gi wan osofamiri noso gi tra sani. Ma wi no breiti fu gebroiki a ten di wi abi na mofoneti èn na a kaba fu a wiki fu du wi Kresten wroko fu preiki èn fu leri sma? A e gi wi deki-ati sosrefi taki na ini a dienstyari 2001, sowan 780.000 sma ben man dini leki furuten preikiman, noso pionier!
18. San sa yepi wi fu abi prisiri na ini a preikiwroko?
18 Den Evangelietori e sori taki Yesus no ben taki sani nomo, ma a ben handri tu èn a ben firi gi sma. Di a si taki sma no ben kisi yepi na yeye fasi, dan a ben firi sari gi den èn a yepi den wantewante (Markus 6:31-34). Wi sa prisiri fu du a preikiwroko te wi e teki prati na en fu di wi lobi trawan èn fu di wi trutru e suku fu yepi den. Ma fa wi kan kweki a lobi disi? Wan yonguman di nen Jayson, e taki: „Di mi ben de wan tini ete, dan mi no ben lobi a preikiwroko trutru.” San yepi en fu kon lobi a wroko disi? Jayson e fruteri: „Ala satra mamanten mi famiri ben go na ini a preikiwroko. Disi ben de wan bun sani gi mi. O moro mi ben go na ini a preikiwroko, o moro mi kon si den bun bakapisi di a preikiwroko e tyari kon. Dati meki mi kon lobi a preikiwroko moro.” Wisrefi tu musu de fayafaya fu teki prati doronomo na a preikiwroko.
19. San musu de wi bosroiti te wi teki Krestes leki wi fesiman?
19 Te wi e teki Krestes leki a fesiman fu wi, dan dati trutru e gi wi krakti èn a e tyari winimarki kon. Te wi e du dati, dan wi sa gebroiki den yongu yari fu wi fu kisi moro sabi nanga koni. Wi sa de wan koloku osofamiri pe vrede de. Wi sa lobi fu du a preikiwroko èn a sa gi wi furu prisiri. Sobun, meki wi teki a fasti bosroiti fu sori taki wi teki Krestes trutru leki wi fesiman. Meki wi sori dati nanga a fasi fa wi e tyari wisrefi na ini wi aladei libi èn nanga den bosroiti di wi e teki (Kolosesma 3:23, 24). Ma wan tra fasi de fa Yesus Krestes e tiri wi, namku nanga a Kresten gemeente. Na artikel di e kon, sa fruteri fa wi kan nyan bun fu a seti disi.
[Futuwortu]
^ paragraaf 7 Wan tu nen kenki.
Yu e memre disi ete?
• Fa wi e kisi wini te wi e handri neleki a sma di Gado poti leki Fesiman?
• Fa yongusma kan sori taki den wani gi yesi na Yesus?
• San na a bakapisi te osofamiri e saka densrefi na ondro a tiri fu Krestes?
• Fa a preikiwroko fu wi kan sori taki wi teki Krestes trutru leki wi fesiman?
[Aksi fu a tori disi]
[Prenki na tapu bladzijde 9]
Den yongu yari na wan bun ten fu kon sabi Gado èn a sma di a poti leki wi Fesiman
[Prenki na tapu bladzijde 10]
Wi kan abi wan koloku osofamiri libi te wi e saka wisrefi na a tiri fu Krestes
[Prenki na tapu bladzijde 12]
Yesus ben suku a Kownukondre fosi. Yu e du dati tu?