Fu san ede wi musu gebroiki wi frustan fu man bribi wan sani?
Fu san ede wi musu gebroiki wi frustan fu man bribi wan sani?
„Tumusi furu sma e tron ’kerkisma’ soso fu di den no wani gebroiki den frustan te den e anbegi”, na so wan fu den edeman fu wan hei kerkiskoro na Amerkankondre skrifi. A e taki moro fara: „Den de klariklari fu bribi ala sani, ’sondro fu ondrosuku efu den sani dati tru’.”
A SANI disi e sori taki furu sma di abi wan kerki bribi, no sabi fu san ede den e bribi san den e leri, èn den no e ondrosuku efu den leri disi tru. Fu dati ede a no e fruwondru wi taki furu sma no wani taki fu kerki bribi.
A de wan sari sani taki sma e gebroiki kerki prenki èn taki den e begi ibri tron baka, sondro fu poti prakseri na san den e taki. Den sani disi e meki taki sma no e gebroiki den frustan te den e anbegi. Boiti den sani disi, a kerki bribi fu milyunmilyun sma abi fu du nanga bigi bow wroko, moi bigi grasi fensre, nanga poku di e hari sma. Ma dati na ala san den abi fu gi sma. Aladi wan tu kerki e taki dati a bribi fu den e komoto fu Bijbel, toku den no e meki sma kisi soifri sabi fu Bijbel, fu di den e leri sma nomo fu ’bribi na ini Yesus èn den sa kisi frulusu’. Tra kerki e gebroiki a Wortu fu Gado soso fu taki fu problema na ini a libimakandra, noso fu taki fu politiek afersi. San na a bakapisi fu ala den sani disi?
Wan kerki skrifiman ben taki fu a situwâsi na Amerkankondre: „Krestenhèit . . . e gi sma frafra leri fu Bijbel, [èn] a no gi den bakaman fu en nofo leri.” Wan ondrosukuman ben taki srefi dati den sma na Amerkankondre no sabi noti fu Bijbel. Fu taki en leti, a sani disi de so tu nanga den sokari Kresten na ini tra kondre. Furu fu den bribi di no de Kresten bribi, e meki sosrefi taki den bakaman fu den e du sani sondro fu denki, te den e anbegi. Dati e kon fu di den bribi disi no e gi den bakaman fu den deki-ati fu poti bun prakseri na den sani di den e leri. Na presi fu dati, den bribi disi e poti krakti tapu singi, seremonia begi, nanga difrenti sortu fasi fa sma kan denki dipi fu dangra tori.
Ma den srefi sma disi di no e suku fu kon sabi efu den sani di den e bribi na tru tori, furu tron e poti bun furu prakseri na tra sani na ini na aladei libi fu den. Son sma e ondrosuku sani finifini te den wani bai wan oto nomo di a sa musu fringi trowe wan dei. Ma na a tra sei den sma disi e taki fu a bribi fu den: ’Efu mi papa nanga mama ben feni en bun, dan mi e feni en bun tu’.
Efu wi wani sabi trutru fa fu plisi Gado, dan wi musu du muiti fu kon sabi efu den sani di wi e bribi fu en na tru tori. Na apostel Paulus ben taki dati wan tu kerkisma fu a ten fu en ben abi „faya gi Gado, ma no akruderi soifri sabi” (Romesma 10:2). Wi kan gersi den sortu sma dati nanga wan ferfiman di kisi a wroko fu ferfi wan oso. A ferfiman disi e wroko tranga fu ferfi na oso, ma a no e gebroiki den yoisti kloru ferfi di a sma di abi na oso ben taigi en fu gebroiki. A kan taki a ferfiman sa de tevrede nanga a wroko di a du, ma a sma di abi na oso sa de tevrede tu?
San Gado e si leki tru anbegi? Bijbel e taki: „Disi wi Frulusuman, Gado, feni bun, di wani taki ala sortu sma musu kisi frulusu èn kon kisi wan soifri sabi fu waarheid” (1 Timoteyus 2:3, 4). Son sma e feni kande, taki nowan fu den kerki bribi fu a ten disi abi so wan sabi. Ma prakseri disi: Efu Gado wani taki sma musu kisi wan soifri sabi fu a tru bribi, dan a ben o kibri a sabi dati gi sma? Bijbel e sori taki a no ben o du dati, bika a buku disi e taki: „Efu yu e suku [Gado], dan a sa meki taki yu feni en.”—1 Kroniki 28:9.
Fa Gado e sorgu taki den sma di e suku en trutru, e kon sabi en? Na artikel di e kon sa piki na aksi dati.