Gado e gi wan switikon na ala pipel

DI JOHN go na Mali, dan Mamadou nanga en osofamiri ben kari en kon na den oso na wan tumusi switi fasi. A sani dati ben naki en ati trutru. John ben e sidon na gron nanga na osofamiri dati, e nyan komoto fu wán preti makandra nanga den ososma, wan sani di a no ben gwenti du. Di a ben e sidon e nyan a ben e denki fa a o taki nanga den sma disi fu a tumusi moi presenti fu a bun nyunsu fu a Kownukondre di komoto fu Gado Wortu, Bijbel. Aladi John ben sabi taki Fransitongo, wan tongo di den e taki na Mali, toku a ben aksi ensrefi fa a ben o taki nanga wan osofamiri di ben abi wan tra bribi èn di ben e denki tra fasi leki en.

A no de fu fruwondru, taki John ben e prakseri a bijbeltori fu a foto Babel. Drape Gado ben bruya a tongo fu den sma di ben gens en (Genesis 11:1-9). Leki bakapisi fu dati, difrenti grupu fu sma di e taki difrenti tongo èn di abi difrenti sortu bribi èn difrenti fasi fu denki, opo kon na heri grontapu. Na ini a ten disi furu sma e teki waka noso e froisi go na tra presi. Disi e tyari bigi tyalensi kon, di yu kan teki gersi nanga san John ben ondrofeni. Dati meki furu sma e aksi densrefi fa den o prati a Bijbel howpu di den abi nanga den wan di komoto na tra kondre èn di kweki na difrenti fasi? Fa den o taki nanga den tra kondresma disi te den kon tan na ini a kontren pe den e libi?

Wan eksempre fu owruten

Neleki den tra profeiti fu Israel, na so a profeiti Yona ben e taki moro furu nanga den Israelsma. A ben e taki profeititori na wan ten di a tin-lo kownukondre di ben fadon komoto na bribi, ben e du sani di ben e afrontu Gado (2 Kownu 14:23-25). Ma now Yona ben kisi a spesrutu wroko fu go preiki gi den sma fu a foto Ninifei na ini Asiria. Prakseri fa Yona ben firi di a ben abi fu gowe libi en kondre fu go taki nanga den sma disi di ben abi wan tra bribi nanga wan tra kulturu. Kande Yona no ben man taki a tongo fu den sma fu Ninifei srefi, noso kande a no ben man taki a tongo bun. Awinsi fa a no fa, Yona ben feni taki a tyalensi ben hebi tumusi gi en, èn a lowe gowe.—Yona 1:1-3.

A no de fu taki, dati Yona ben musu leri taki Yehovah Gado no e luku nomo san sma ai e si, ma taki a e ondrosuku na ati fu sma (1 Samuel 16:7). Baka di Yehovah kibri a libi fu Yona na wan wondru fasi so taki a no dede na watra, dan A komanderi Yona fu a di fu tu leisi, fu preiki gi den sma fu Ninifei. Yona gi yesi na Gado. Leki bakapisi fu dati ala den sma fu Ninifei ben drai den libi. Toku Yona no ben e si sani na a yoisti fasi. Nanga yepi fu wan tumusi bun eksempre, Yehovah leri Yona taki a ben abi fu kenki a fasi fa a ben e denki. Yehovah ben aksi Yona: „Mi no ben musu firi sari gi Ninifei, a bigi foto, pe moro leki wan hondro tutenti dusun sma de di no sabi kwetikweti a difrenti na mindri a reti-anu nanga a kruktu-anu fu den?” (Yona 4:5-11) Fa a de nanga wi na ini a ten disi? Fa wi kan yepi sma di de tra fasi leki wi, fu di den komoto na tra presi noso fu di den kweki na wan tra fasi?

 Gi den Samariasma nanga den sma di no de Dyu, wan switikon

Na ini a fosi yarihondro, Yesus ben gi den futuboi fu en a komando fu meki disipel fu sma fu ala pipel (Mateyus 28:19). Disi no ben makriki gi den. Den disipel fu Yesus ben de Dyu èn neleki Yona den ben gwenti fu taki soso nanga sma di ben kweki na a srefi fasi leki den èn di ben abi den srefi gwenti leki den. A no de fu taki dati a fasi fa sma na ini ten dati ben e denki fu trawan, ben abi krakti sosrefi tapu a fasi fa den disipel ben e denki. Toku Yehovah tiri sani na so wan fasi taki safrisafri den futuboi fu en ben kon frustan fa A ben wani taki den ben musu tyari densrefi.

A fosi sani na taki den no ben musu meki a fasi fa den Dyu ben e denki fu den Samariasma, abi krakti na den tapu. Den Dyu no ben wani abi noti fu du nanga den Samariasma. Toku a de so taki, moro leki wan leisi srefi, Yesus ben opo a pasi gi den Samariasma fu teki a bun nyunsu. A taki di Yesus ben sidon taki nanga wan Samaria-uma, ben sori krin taki a no ben e desko nowan sma (Yohanes 4:7-26). Na wan tra okasi a ben sori wan Dyu di ben anbegi Gado, nanga yepi fu na agersitori fu a Samariaman di ben du bun gi wan tra sma, taki sma di no ben de Dyu, ben man fu sori lobi gi tra sma tu (Lukas 10:25-37). Di a ten ben doro gi Yehovah fu tyari den Samariasma kon na ini a Kresten gemeente, dan Filipus, Petrus, nanga Yohanes, di alamala ben de Dyu, ben preiki gi den sma fu Samaria. A boskopu fu den ben gi den sma fu a foto dati bigi prisiri.—Tori fu den Apostel 8:4-8, 14-17.

Efu a no ben makriki gi den Dyu Kresten fu lobi den Samariasma di ben de fara famiri fu den, dan a no de fu taki dati a ben o moro tranga gi den fu sori lobi gi sma di no ben de Dyu srefisrefi, fu di den Dyu no ben lobi den kwetikweti èn di den ben abi bita-ati gi den. Ma toku a de so, taki a skotu di ben de na mindri Dyu Kresten nanga sma di no ben de Dyu, ben kan komoto baka di Yesus dede (Efeisesma 2:13, 14). Fu di Yehovah ben wani yepi Petrus fu horibaka gi a nyun seti disi, meki a ben sori en wan fisyun. Na ini a fisyun dati Yehovah taigi Petrus fu „no taki moro langa taki wan sani doti efu Gado ben meki a kon krin”. Dan a santa yeye fu Yehovah tyari en go na Kornelius, wan man di no ben de wan Dyu. Di Petrus kon frustan fa Gado e denki, taki a no ben musu taki dati a man disi „doti”, fu di Gado ben meki a kon krin, dan a ben taki na ondro a krakti fu santa yeye: „Now mi sabi seiker taki Gado no e teki sma partèi, ma na ini ibri nâsi a sma di e frede en èn di e wroko regtfardikifasi, de bun na en” (Tori fu den Apostel 10:9-35). Petrus ben fruwondru trutru fu si taki Gado ben kanti en santa yeye tapu Kornelius nanga en famiri, fu di A ben feni den bun!

Paulus—Wan prapi di mi frukisi fu go na den pipel fu grontapu

A diniwroko fu Paulus na wan moi eksempre fu a fasi fa Yehovah e sreka den futuboi fu en safrisafri fu lobi èn fu yepi ala sortu sma. Di Paulus ben tron wan Kresten, dan Yesus ben taki dati Paulus ben o dini leki wan prapi di Gado frukisi fu tyari En nen go na ala pipel fu grontapu (Tori fu den Apostel 9:15). Ne Paulus go na Arabia, kande fu go denki dipi fu a wroko di Gado ben gi en, fu go preiki a bun nyunsu gi sma na ala sei fu grontapu.—Galasiasma 1:15-17.

 Na a fosi zendingwaka fu en, Paulus ben sori taki a ben de fayafaya fu preiki gi sma di no ben de Dyu (Tori fu den Apostel 13:46-48). A blesi di Yehovah ben blesi a wroko fu Paulus, ben e sori krin taki na apostel disi ben e du en diniwroko leki fa Yehovah ben wani. Paulus ben sori krinkrin taki a ben frustan a fasi fa Yehovah e si sani, fu di sondro frede a ben piri-ai gi Petrus, fu di Petrus no ben wani abi demakandra nanga den brada di no ben de Dyu.—Galasiasma 2:11-14.

Tra sani de tu di e sori krin taki Gado ben e tiri a diniwroko fu Paulus. Fu eksempre, tapu a di fu tu zendingwaka fu Paulus a ben de fu go preiki na Bitinia, wan foto di ben de na ondro a tiri fu Rome, ma a santa yeye fu Gado ben tapu en fu dati (Tori fu den Apostel 16:7). A sori leki a ten no ben doro ete fu a go drape. Toku wan tu fu den sma fu Bitinia ben tron Kresten bakaten (1 Petrus 1:1). Na ini wan fisyun wan man fu Masedonia ben begi Paulus: „Abra kon na Masedonia èn yepi wi.” Paulus ben frustan taki a ben musu kenki a waka fu en, so taki a ben kan go preiki a bun nyunsu na ini a pisi kontren dati, di ben de na ondro a tiri fu Rome.—Tori fu den Apostel 16:9, 10.

A man di Paulus ben man fiti ensrefi na sma, ben kisi tesi di a ben e preiki gi den sma fu Ateine. A wet fu den Grikisma nanga di fu den Romesma ben e taki dati sma no ben musu tyari a kerki gwenti fu tra sma noso na anbegi fu tra gado kon na ini a kondre fu den. Ma a lobi di Paulus ben abi gi tra sma, ben pusu en fu ondrosuku den kerki gwenti fu den sma dati finifini. Na ini Ateine a ben si wan altari pe den sma ben skrifi na tapu: „Gi wan Gado Di Wi No Sabi.” Paulus ben taki fu a sani disi di a ben preiki na ini a kontren dati (Tori fu den Apostel 17:22, 23). A ben du dati na wan switi fasi èn na wan fasi di e sori lespeki. Disi ben de wan tumusi moi fasi fu bigin taki nanga sma fu a boskopu di a ben e tyari!

A musu de taki Paulus ben prisiri srefisrefi fu si a bakapisi fu a wroko di a ben du leki wan apostel gi den pipel fu grontapu! A ben yepi fu seti gemeente di ben abi furu Kresten di no ben de Dyu, soleki den gemeente di ben de na ini Korente, Filipi, Tesalonika, nanga den foto na ini Galasia. A ben yepi man nanga uma di ben sori bribi, soleki Damaris, Dionisius, Sergius Paulus,  nanga Titus. A ben de wan bigi grani gi en fu si fa sma di no ben sabi Yehovah èn di no ben sabi Bijbel, ben e teki a tru Kresten bribi! Di Paulus ben taki fu a fasi fa a yepi furu sma di no ben de Dyu fu kon sabi a waarheid, dan a ben taki: „Iya, na a fasi disi mi poti en leki marki gi misrefi fu no go preiki a bun nyunsu pe sma kari a nen fu Krestes kaba, . . . ma soleki fa a skrifi: ’Den wan di no kisi a boskopu di abi fu du nanga en, sa si, èn den wan di no yere fu en sa frustan’”(Romesma 15:20, 21). Wi kan yepi fu prati a bun nyunsu gi sma di abi tra gwenti leki wi?

Gi yepi na sma fu ala folku fu grontapu

Kownu Salomo ben e begi Yehovah gi den sma di no ben de Israelsma, ma di ben abi a gwenti fu go anbegi na a tempel na ini Yerusalem. A ben begi: „Meki a de so, taki yusrefi e arki komoto na hemel, yu fasti tanpresi, èn yu musu du akruderi ala sani gi san a trakondre-sma e kari yu; so taki ala den sma na grontapu kan kon sabi yu nen” (1 Kownu 8:41-43). Na ini a ten disi yu abi dusundusun Kownukondre preikiman di e firi na a srefi fasi disi. Den e miti sma di de leki den Ninifeisma. Na yeye fasi den sma dati ’no sabi a difrenti na mindri a reti-anu nanga a kruktu-anu fu den’. Kownukondre preikiman e angri fu abi wan prati na a kontru fu den profeititori di abi fu du nanga a tyari kon na wan fu den tru anbegiman di komoto na ala pipel fu grontapu.—Yesaya 2:2, 3; Mika 4:1-3.

Neleki fa sma fu Krestenhèit e teki a Bijbel boskopu di e gi howpu, na so furu sma di abi tra bribi e du a srefi sani dati tu. Sortu krakti disi musu abi na yu tapu? Ondrosuku yusrefi bun sondro fu kori yusrefi. Efu yu e firi taki yu abi a gwenti fu desko sma, dan a bun fu rutu en puru, fu di yu o kweki lobi. * No drai yu baka gi sma aladi Gado feni den bun.—Yohanes 3:16.

Sreka yusrefi fosi yu go taki nanga sma di kweki tra fasi èn di abi tra gwenti leki di fu yu. Meki muiti fu kon sabi san den e bribi, nanga san den e broko den ede, èn fa den e denki; dan suku fu feni wan tori di unu ala tu e agri nanga dati. Sori bunfasi nanga sari-ati gi trawan. Meki muiti fu no haritaki nanga sma, pruberi fu fiti yusrefi na den èn taki na wan fasi di e gi sma deki-ati (Lukas 9:52-56). Efu yu du dati, dan yu sa meki na ati fu Yehovah prisiri, fu di a „wani taki ala sortu sma musu kisi frulusu èn kon kisi wan soifri sabi fu waarheid”.—1 Timoteyus 2:4.

Wi breiti srefisrefi taki wi abi difrenti sortu sma na ini wi gemeente di komoto fu difrenti kulturu èn di kweki na difrenti fasi! (Yesaya 56:6, 7) A switi trutru taki boiti den nen di wi gwenti yere soleki Roy, Eddy, Steven, nanga Alma, wi e yere tra nen tu soleki Mamadou, Jegan, Reza, nanga Chang! Fu tru, „wan bigi doro di e tyari go na aktiviteit opo” gi wi (1 Korentesma 16:9). Meki wi teki na okasi di wi kisi fu gi tra sma a srefi kari di wi ben kisi fu Yehovah, a Gado di no e teki sma partèi, èn gi sma fu ala pipel wan switikon!

[Futuwortu]

[Prenki na tapu bladzijde 23]

Paulus ben man preiki a bun nyunsu gi sma na ala sei, fu di a ben e fiti ensrefi na den. A ben du dati

. . . na ini Ateine

. . . na ini Filipi

. . . di a ben e teki waka fu a wan presi go na a trawan