Kownukondre preikiman e fruteri

„Mi ben wani dini Gado”

„KOMOTO na en, mi pipel.” Na ini a fosi yarihondro G.T., na apostel Yohanes ben yere wan engel e bari a sani disi. Na ini a ten disi, milyunmilyun reti-ati sma gi yesi na a warskow disi èn den lon gowe fu „Babilon a Bigiwan”, a grontapumakti fu falsi bribi (Openbaring 18:1-4). Wan fu den sma disi na Wilner, wan man fu Haiti, di e fruteri na ondrofenitori fu en.

„Mi gebore na ini 1956 na ini a pikin foto St. Marc, na Haiti, èn den famiriman fu mi ben de fayafaya Lomsusma. Yu kan frustan taki den ben prisiri srefisrefi di mi nanga tu tra yonkuman fu a foto, kisi kari fu go na wan hei kerkiskoro na ini St. Michel de l’Atalaye, na Haiti. Baka dati, na ini 1980, wi ben musu go na Stavelot, na Belgia, fu kisi moro leri. Drape wi go na wan moro hei Lomsu skoro srefi.

Na ini a bigin mi ben de fayafaya fu tron wan priester. Wan dei di mi ben de na ini a nyanyan kamra, dan a priester di ben abi a frantwortu fu a grupu fu wi, aksi mi fu wakti wan tu miniti, fu di a ben wani taigi mi wan sani. Yu kan frustan fa mi skreki di a taigi mi sondro fu syen, taki a ben wani hori nanga mi! Mi taigi en taki mi no ben wani a sani dati, èn a tori disi meki mi lasi ati dorodoro. Mi skrifi mi famiri fu fruteri den san ben pasa, èn mi gowe libi a skoro wan tu mun na baka, aladi den no ben feni dati bun. Mi feni tanpresi na ini a dorpu, èn mi go doro fu studeri wan tra sani.

Di mi doro baka na ini St. Marc, dan mi no ben e frutrow a Lomsu Kerki moro. Toku, mi ben wani dini Gado, ma mi no ben sabi fa. Mi go na a Adventist kerki, a Baptist kerki, èn a Mormoon kerki. Mi no ben sabi sortu bribi ben de a yoisti wan.

Ne mi memre taki di mi ben de na a hei kerkiskoro na Belgia, dan mi ben gwenti fu leisi wan Bijbelvertaling di Crampon ben vertaal. Mi ben kon si na ini a Bijbel disi, taki Gado abi wan nen. Sobun, mi gebroiki Gado en nen fu begi en fayafaya fu yepi mi fu feni a tru bribi.

Wan syatu pisi ten baka dati, tu Yehovah Kotoigi kon tan na ini a birti pe mi ben e tan. Den ben de tiri sma, den ben abi lespeki gi trawan, èn den ben e tyari densrefi na wan lespeki fasi. Mi ben lobi a fasi fa den ben e libi. Wan dei, wan fu den Kotoigi disi, gi mi wan kari fu kon na a alayari Memrefesa fu a dede fu Krestes. Mi ben lobi a konmakandra dati trutru, èn mi teki wan bijbelstudie fu den Kotoigi. Sowan siksi mun baka dati, mi ben abi a fasti overtoigi taki mi ben feni a yoisti fasi fa fu dini Gado. Mi gi mi libi abra na Yehovah, èn mi teki dopu tapu 20 november 1988.”

Baka wan pisi ten, Wilner go du furuten diniwroko. Now a e dini leki wan gemeente owruman. En nanga en wefi, makandra nanga den tu pikin fu en, e dini nanga prisiri na ini a gemeente pe den de.

[Prenki na tapu bladzijde 9]

Fu di Wilner ben e leisi Bijbel, meki a kon si taki Gado en nen na Yehovah