Noiti yu no owru tumusi fu leri wan sani

KSENIYA gebore na ini 1897. A ben abi 3 umapikin, wan manpikin, 15 granpikin, nanga 25 gran-granpikin. En heri libi langa a du san en papa nanga mama ben taigi en fu du. A feti di sma ben e feti na ini a Republiek Abkas, wan kondre na mindri a Blaka Se nanga den Kaukasusbergi, ben meki taki a lowe go na Moskow. Aladi a ben de wan loweman, toku a ben prisiri nanga a fasi fa a libi fu en ben waka. A ben prisiri spesrutu nanga san en ben e kari, a bribi di a ben kisi fu den afo fu en.

Na ini 1993, na umapikin fu Kseniya di nen Meri, ben tron wan Kotoigi fu Yehovah. Meri bigin taki nanga Kseniya fu Yehovah Gado èn fu Bijbel, ma Kseniya no ben wani arki. Kseniya ben e tan taigi na umapikin fu en: „Mi owru tumusi fu go leri nyun sani.”

Boiti Meri, na umapikin fu en, dan wan tu tra sma fu a famiri fu Kseniya ben tron Yehovah Kotoigi tu. Dati ben de Londa, a wefi fu en granpikin, èn sosrefi Nana nanga Zaza, di de gran-granpikin fu en. Ala den sma disi ben e tan taki nanga Kseniya fu Bijbel. Wan neti na ini 1999, den leisi wan tekst gi Kseniya komoto na ini Bijbel, di ben naki en ati. A tekst disi ben e sori den tumusi moi wortu di Yesus ben taigi den getrow apostel fu en na a ten di a seti na Avondmaal fu Masra (Lukas 22:19, 20). A neti dati Kseniya teki a bosroiti fu bigin studeri Bijbel, aladi a ben doro 102 yari kaba.

Kseniya e taki: „Baka di mi ben libi 102 yari, mi ben kon frustan te fu kaba san na a marki fu a libi. Now mi kon si taki nowan sani no de di warti moro leki fu dini wi gran Gado, Yehovah, di lobi wi trutru. Mi man frustan sani bun ete èn mi abi wan bun gosontu. Mi man fu leisi sondro wan bril èn mi abi bun demakandra nanga mi famiri.”

Tapu 5 november 2000, Kseniya teki dopu. A e taki: „Now mi e gi mi libi na Yehovah fu dini en na wan lobi-ati fasi. Krosibei fu mi oso wan presi de pe sma e wakti fu teki bus. Mi e go sidon drape èn mi e prati tijdschrift nanga traktaat. Sosrefi mi famiri e kon luku mi furu tron, èn nanga prisiri mi e fruteri den a waarheid fu Yehovah.”

Kseniya e wakti a dei di ’a skin fu en sa kon moro moi leki na ini en yongu yari èn te a sa drai go baka na den dei fu en yongu krakti’ (Yob 33:25). Efu wan sma di pasa wan hondro yari kan leri san Bijbel e taki fu a marki fu a libi, dan fa a de nanga yu?