Tan dini Yehovah nanga wan ati di no e degedege
Tan dini Yehovah nanga wan ati di no e degedege
„Mi ati no e degedege, o Gado, mi ati no e degedege.”—PSALM 57:7.
1. Fu san ede wi kan abi a srefi overtoigi leki David?
YEHOVAH kan yepi wi fu no degedege na ini a Kresten bribi, so taki wi kan tan libi akruderi den leri fu a tru Krestendom, leki getrow futuboi fu en (Romesma 14:4). Fu dati ede, wi kan abi a srefi overtoigi leki a psalm skrifiman David di ben e singi: „Mi ati no e degedege, o Gado” (Psalm 108:1). Efu na ati fu wi no e degedege, dan wi sa dini Gado soleki fa wi pramisi en. Èn efu wi e tan suku rai nanga krakti na Gado, dan wi no sa degedege noiti. Leki sma di e hori den soifri retifasi, wi sa tan horidoro, èn a bribi fu wi no sa kon swaki srefisrefi. Boiti dati, wi sa „abi ala ten furu fu du na ini a wroko fu Masra”.—1 Korentesma 15:58.
2, 3. San den frumane fu Paulus na 1 Korentesma 16:13 wani taki?
2 Di na apostel Paulus ben skrifi den bakaman fu Yesus na ini Korente fu owruten, dan a ben gi den rai di e fiti srefisrefi gi Kresten na ini a ten disi. A ben taki: „Tan na ai, tanapu kánkan na ini a bribi, tyari unsrefi leki mansma, kon tranga” (1 Korentesma 16:13). A fasi fa den komando disi skrifi na ini Grikitongo e sori taki Kresten musu du den sani disi doronomo. San a frumane disi wani taki?
3 Wi kan „tan na ai” na yeye fasi te wi e kakafutu gi Didibri èn te wi e tan krosibei na Gado (Yakobus 4:7, 8). Te wi e poti wi frutrow tapu Yehovah, dan dati sa yepi wi fu tan na ini wánfasi èn fu ’tanapu kánkan na ini a Kresten bribi’. Wi alamala, sosrefi den someni uma na wi mindri, ’e tyari wisrefi leki mansma’ te wi e dini Gado nanga deki-ati leki Kownukondre preikiman (Psalm 68:11). Wi e „kon tranga” te wi e suku krakti doronomo na wi hemel Tata fu man du a wani fu en.—Filipisma 4:13.
4. San wi du bifo wi teki dopu leki Kresten?
4 Wi ben sori taki wi teki a waarheid di wi gi wisrefi abra na Yehovah nanga wi heri ati èn di wi teki dopu na ini watra. Ma san wi du bifo wi teki dopu? A fosi sani ben de taki wi teki soifri sabi fu Gado Wortu (Yohanes 17:3). Disi yepi wi fu kisi moro bribi èn a meki wi sori berow fu den sondu di wi ben e du fosi (Tori fu den Apostel 3:19; Hebrewsma 11:6). Baka dati, wi drai wi libi fu di wi drai baka gi takrudu, so taki wi ben kan libi akruderi a wani fu Gado (Romesma 12:2; Efeisesma 4:23, 24). Baka di wi drai wi libi, dan wi taigi Yehovah na ini begi taki wi wani dini en nanga wi heri ati (Mateyus 16:24; 1 Petrus 2:21). Wi aksi Gado fu yepi wi fu kisi wan krin konsensi èn wi teki dopu fu sori taki wi gi wisrefi abra na en (1 Petrus 3:21). Te wi e hori ala den sani disi na prakseri, dan dati sa yepi wi fu frustan taki wi musu tan meki muiti fu dini Yehovah soleki fa wi pramisi en, èn taki wi musu tan dini en nanga wan ati di no e degedege.
Tan du muiti fu kisi moro sabi
5. Fu san ede wi musu go doro fu teki sabi fu Bijbel?
5 Fu man dini Gado soleki fa wi pramisi en, dan wi musu tan teki sabi fu Bijbel, fu di dati sa bow a bribi fu wi. Wi ben prisiri srefisrefi nanga a yeye nyanyan di wi kisi a fosi leisi di wi yere a waarheid fu Gado! (Mateyus 24:45-47) A „nyanyan” dati ben switi èn a ben bun srefisrefi gi wi. Now a de tumusi prenspari taki wi e tan go doro fu teki bun yeye nyanyan. Disi de prenspari, fu di a sa yepi wi leki getrow futuboi fu Yehovah fu no degedege.
6. Fa yu du kisi trutru warderi gi a waarheid fu Bijbel?
6 Wi musu du furu muiti fu kon sabi moro fu den Buku fu Bijbel. A de neleki wi e suku gudu di kibri heri bun. Wi musu wroko tranga fu man feni den gudu disi. Ma yu sa prisiri trutru te yu e feni „a sabi fu Gado srefi”! (Odo 2:1-6) Di wan Kownukondre preikiman ben studeri Bijbel nanga yu fu a fosi leisi, dan a kan taki a gebroiki a buku Sabi di e tjari joe go na têgo libi. Kande a gebroiki furu ten fu taki fu ibri kapitel fu a buku, èn kande a no ben klari wan heri kapitel wantron. Te a ben leisi èn ben taki fu den bijbeltekst di skrifi na ini a buku, dan dati ben de wan yepi gi yu. Te yu no ben frustan wan tori, dan a ben fruklari a tori dati gi yu. A sma di ben e studeri Bijbel nanga yu ben sreka ensrefi bun, a ben begi Gado fu man kisi tiri fu a yeye fu en, èn a yepi yu fu kisi trutru warderi gi a waarheid.
7. San wan sma musu du fu man leri trawan a waarheid fu Gado?
7 A sma disi ben handri na wan yoisti fasi, bika Paulus ben skrifi: „Meki iniwan sma di e kisi a leri, prati ala bun sani nanga a sma di e fruteri en den sortu wortu disi” (Galasiasma 6:6). Na ini Grikitongo, a bijbeltekst disi e sori taki a leriman ben meki den leri fu Gado Wortu kisi rutu na ini na ati fu a sma „di e kisi a leri”. Te yu e kisi leri na so wan fasi, dan yu sa man leri tra sma tu (Tori fu den Apostel 18:25). Fu man tan dini Gado soleki fa yu pramisi en, dan yu musu tan studeri Gado Wortu doronomo, so taki yu no e kon swaki na yeye fasi.—1 Timoteyus 4:13; Titus 1:13; 2:2.
Memre taki yu sori berow èn taki yu drai yu libi
8. Fa wi kan tan tyari wisrefi na wan fasi di Gado feni bun?
8 Memre fa yu ben firi di yu kon sabi a waarheid, di yu sori berow, èn di yu ben firi bakaten taki Gado gi yu pardon fu di yu bribi na ini a frulusu-ofrandi fu Yesus. Yu no ben e firi neleki wan bigi hebi ben puru na yu tapu? (Psalm 32:1-5; Romesma 5:8; 1 Petrus 3:18) A no de fu taki dati yu no wani drai go baka na wan sondu fasi fu libi (2 Petrus 2:20-22). Te yu e tan begi Yehovah doronomo, dan dati sa yepi yu fu tan tyari yusrefi na wan fasi di a feni bun. Boiti dati, yu sa man du san yu ben pramisi Yehovah, èn yu sa man tan dini en na wan getrow fasi.—2 Petrus 3:11, 12.
9. Sortu pasi wi musu waka, baka di wi drai baka gi ogridu?
9 Now di yu drai yu libi, dan yu no e du ogri moro. Fu dati ede, yu musu tan aksi Gado fu yepi yu fu tan getrow. Te yu e luku en bun, dan yu no ben e waka na tapu wan bun pasi, ma yu ben suku bun yepi fu feni a yoisti pasi èn yu ben bigin waka na en tapu. Now yu no musu gowe libi a pasi disi moro. Tan frutrow tapu Gado taki a sa tiri yu, èn abi a fasti bosroiti fu tan na tapu a pasi fu libi.—Yesaya 30:20, 21; Mateyus 7:13, 14.
Noiti no frigiti taki yu gi yusrefi abra na Yehovah èn taki yu teki dopu
10. Sortu sani wi musu hori na prakseri fu di wi gi wisrefi abra na Gado?
10 Hori na prakseri taki yu gi yusrefi abra na Yehovah èn taki yu pramisi en taki yu sa dini en getrow fu ala ten (Yudas 20, 21). Te wan sma e gi ensrefi abra na Gado, dan dati wani taki dati a sma dati e poti aparti fu du wan santa wroko (Lefitikus 15:31; 22:2). Yu no gi yusrefi abra fu wan syatu pisi ten nomo, èn yu no gi yusrefi abra na libisma. Yu gi yusrefi abra na a Moro Hei Tiriman fu hemel nanga grontapu fu dini en fu ala ten. Èn fu man du disi, dan yu musu tan getrow na Gado yu heri libi langa. Iya, „awansi wi e libi èn awansi wi dede, wi na fu Yehovah” (Romesma 14:7, 8). Wi sa de koloku te wi e du san a wani, èn te wi e tan dini en nanga wan ati di no e degedege.
11. Fu san ede yu noiti no musu frigiti a dopu fu yu èn sosrefi san a dopu disi wani taki?
11 Noiti no frigiti taki yu teki dopu fu sori taki yu gi yusrefi abra na Gado nanga yu heri ati. Nowan sma no dwengi yu fu teki dopu, bika yusrefi ben teki a bosroiti dati. Yu abi a fasti bosroiti now fu libi akruderi a wani fu Gado yu heri libi langa? Yu aksi Gado fu gi yu wan krin konsensi, èn yu teki dopu fu sori taki yu gi yusrefi abra na en. Tan hori a krin konsensi dati fu di yu e dini Yehovah soleki fa yu pramisi en. Te yu e du dati, dan Yehovah sa blesi yu bogobogo.—Odo 10:22.
Yusrefi musu wani
12, 13. San wi eigi wani abi fu du nanga a gi di wi gi wisrefi abra na Gado èn nanga a dopu fu wi?
12 Milyunmilyun sma na heri grontapu kisi furu blesi trutru fu di den gi densrefi abra na Gado èn fu di den teki dopu. Te wi e teki dopu na ini watra fu sori taki wi gi wisrefi abra na Gado, dan dati wani taki dati wi e tapu nanga a fasi fa wi ben libi fosi, ma dati no wani taki dati wi no man abi wi eigi wani moro. Leki bribiman di kisi bun leri, wi kan taki dati wisrefi ben wani gi wisrefi abra na Gado èn wisrefi ben wani teki dopu. Fu man gi wisrefi abra na Gado èn fu man teki dopu, dan wi musu kon sabi san na a wani fu Gado, èn baka dati wisrefi musu teki a bosroiti fu du a wani fu en (Efeisesma 5:17). Na so wan fasi wi sa du neleki Yesus. Ensrefi ben wani tapu nanga a temrewroko fu en, ensrefi ben wani teki dopu, èn ensrefi ben wani gi ensrefi dorodoro fu du a wani fu en hemel Tata.—Psalm 40:7, 8; Yohanes 6:38-40.
13 Yehovah Gado ben wani taki en Manpikin ben musu „kon volmaakti nanga furu pina”. Fu dati ede, Yesus ben musu de klariklari fu nyan a pina dati na wan getrow fasi. Fu man du dati, dan „nanga tranga babari èn nanga watra-ai, Krestes ben seni tranga begi, sosrefi begi tu . . . , èn Gado ben arki en fu di a ben abi frede gi Gado” (Hebrewsma 2:10, 18; 5:7, 8). Te wi abi a srefi frede disi gi Gado, dan Gado sa „arki” wi tu èn wi kan abi na overtoigi taki Yehovah sa yepi wi so taki wi leki en getrow Kotoigi no e degedege.—Yesaya 43:10.
Yu ati noiti no abi fu degedege
14. Fu san ede wi musu leisi Bijbel ibri dei?
14 San sa yepi yu fu no degedege, so taki yu kan dini Gado soleki fa yu pramisi en? Fu man kisi moro nanga moro sabi fu Gado Wortu, dan wi musu leisi Bijbel ibri dei. Ibri leisi baka „a getrow èn koni srafu” e gi wi a rai fu du dati. Wi e kisi a rai dati, fu di wi musu tan waka na ini a waarheid fu Gado fu man dini en soleki fa wi pramisi en. Efu na organisâsi fu Yehovah ben e horibaka gi falsi leri, dan noiti a ben o gi Yehovah Kotoigi nanga tra sma, a rai fu leisi Bijbel.
15. (a) San wi musu prakseri te wi e teki bosroiti? (b) Fu san ede wi kan taki dati grontapuwroko no de a moro prenspari wroko fu Kresten?
15 Ala leisi te yu e teki bosroiti, dan yu musu prakseri efu den bosroiti dati sa yepi yu fu dini Yehovah soleki fa yu pramisi en. Kande a bosroiti fu yu abi fu du nanga yu grontapuwroko. A wroko dati sa man yepi yu fu horibaka gi a tru anbegi? Furu wrokobasi feni taki getrow Kresten na bun wrokoman di no e spotu nanga a wroko fu den. Boiti dati, den feni tu taki Kotoigi fu Yehovah no e feti fu kisi biginen na grontapu, èn den no e strei nanga trawan fu man kisi den wroko di e pai moro bun. Kotoigi no e du den sani disi, fu di gudu, biginen, posisi, noso makti, no abi a fosi presi na ini den libi. A moro prenspari sani gi den sma di e dini Gado soleki fa den pramisi en, na fu du a wani fu Gado. A grontapuwroko di den e du fu man bai den aladei sani di den abi fanowdu, no de a moro prenspari wroko fu den. Neleki na apostel Paulus, a moro prenspari wroko di den e du, na a Kresten preikiwroko (Tori fu den Apostel 18:3, 4; 2 Tesalonikasma 3:7, 8; 1 Timoteyus 5:8). Yu e tan poti Kownukondre afersi na a fosi presi na ini yu libi?—Mateyus 6:25-33.
16. San wi kan du te wi abi so furu broko-ede taki wi no man dini Gado soleki fa wi pramisi en?
16 Kande son sma ben abi furu broko-ede bifo den kon sabi a waarheid. Ma di den sma disi teki a moi Kownukondre boskopu, dan den ben prisiri srefisrefi èn den ben kisi furu warderi nanga lobi gi Gado. Te den sma disi e prakseri den blesi di den kisi sensi a ten dati, dan dati trutru kan yepi den fu dini Gado soleki fa den pramisi en. Ma fa a ben o de efu wi ben e broko wi ede tumusi nanga den aladei problema fu a ten disi? Fa a ben o de te den problema disi ben e suku fu kiri „a wortu fu Gado”, neleki fa maka kan kiri den pransun fosi den gro kon bigi? (Lukas 8:7, 11, 14; Mateyus 13:22; Markus 4:18, 19) Efu yu e si taki disi e bigin pasa nanga yu, noso nanga yu osofamiri, dan yu musu trowe ala yu hebi na Yehovah tapu, èn begi en fu meki a lobi nanga a warderi fu yu gro. Te yu e trowe den hebi fu yu na Yehovah tapu, dan a sa horibaka gi yu èn a sa gi yu a krakti fu tan dini en nanga prisiri èn nanga wan ati di no e degedege.—Psalm 55:22; Filipisma 4:6, 7; Openbaring 2:4.
17. San e yepi wi fu kakafutu gi hebi tesi?
17 Tan begi Yehovah doronomo, neleki fa yu ben begi en di yu gi yusrefi abra na en (Psalm 65:2). Te yu e kisi tesi fu du ogri, noso te wan hebi tesi e miti yu, dan yu musu suku rai nanga yepi na Gado fu man handri na wan yoisti fasi. Hori na prakseri taki yu musu abi bribi, bika a disipel Yakobus ben skrifi: „Efu wan fu unu no abi nofo koni, meki a tan aksi Gado, bika a e gi ala sma pasa marki èn sondro fu sori en tapu en fowtu; èn a sa kisi en. Ma meki a tan aksi nanga bribi, èn a no musu tweifri kwetikweti, bika a sma di e tweifri, de neleki wan skwala fu se di winti e wai go-kon. Fu taki en leti, no meki a sma dati prakseri taki a sa kisi wan sani fu Yehovah; a de wan sma di no man teki bosroiti, di no e tanapu kánkan na ini ala en pasi” (Yakobus 1:5-8). Te a gersi leki wan tesi hebi tumusi gi wi, dan wi kan abi a dyaranti disi: „No wan tesi ben kon na unu tapu boiti di ala sma e miti. Ma Gado de getrow, èn a no sa gi pasi dati unu kisi tesi pasa a sani di unu man tyari, ma nanga a tesi a sa opo a pasi tu fu komoto so taki unu man frudrage en.”—1 Korentesma 10:13.
18. San wi kan du te wan seryusu sondu di wi kibri, e tapu wi fu dini Yehovah soleki fa wi pramisi en?
18 San de fu du te wan seryusu sondu di yu kibri e pori a konsensi fu yu èn e tapu yu fu dini Gado soleki fa yu pramisi en? Efu yu e sori berow, dan a sa de wan trowstu gi yu fu sabi taki Yehovah ’no sa wisiwasi wan ati di broko èn di masi’ (Psalm 51:17). Suku yepi na lobi-ati Kresten owruman. Den man disi di e teki na eksempre fu Yehovah, no sa wisiwasi yu te den e si taki yu wani abi wan bun matifasi baka nanga yu hemel Tata (Psalm 103:10-14; Yakobus 5:13-15). Te yu kon krakti baka na yeye fasi èn te yu ati no e degedege moro, dan yu sa kan meki den pasi fu yu kon reti baka èn yu sa man dini Gado soleki fa yu pramisi en.—Hebrewsma 12:12, 13.
Tan dini Yehovah nanga wan ati di no e degedege
19, 20. Fu san ede a de prenspari taki wi e tan dini Gado soleki fa wi pramisi en?
19 Na ini a muilek ten disi, wi musu meki furu muiti fu dini Gado soleki fa wi pramisi en èn fu tan du dati nanga wan ati di no e degedege. Yesus ben taki: „A sma di horidoro te na a kaba, na en sa kisi frulusu” (Mateyus 24:13). Fu di wi e libi na ini „den lasti dei”, meki a kaba kan kon iniwan momenti (2 Timoteyus 3:1). Boiti dati, nowan sma no abi a dyaranti taki a sa de na libi tamara (Yakobus 4:13, 14). Fu dati ede a de tumusi prenspari taki wi e tan dini Gado soleki fa wi pramisi en!
20 Na apostel Petrus ben poti krakti tapu a tori disi na ini a di fu tu brifi fu en. A ben sori taki neleki fa den ogrisma ben kisi pori na ini a Frudu, na so na agersi grontapu, noso den ogrisma, sa kisi pori tu na „a dei fu Yehovah”. Fu dati ede, Petrus ben taki nanga tranga sten: „Sortu sma unu musu de fu tyari unsrefi na wan santa fasi èn fu du sani di e sori taki unu gi unsrefi na ini a dini fu Gado”! A ben taigi den tu: „Lobiwan, now di unu sabi disi na fesi kaba, luku bun taki den [falsi leriman nanga ogrisma] no e tyari unu go nanga den, so taki unu no e tanapu kánkan moro” (2 Petrus 3:5-17). A ben o de wan sari sani trutru efu wan sma di dopu ben o lasi pasi èn ben o lasi en libi fu di na ati fu en ben degedege!
21, 22. Fa den wortu na ini Psalm 57:7 e fiti David èn sosrefi tru Kresten?
21 Yu sa man tranga yu bosroiti fu dini Gado soleki fa yu pramisi en, te yu e tan prakseri a prisiri dei di yu teki dopu. Boiti dati, yu musu aksi Gado fu yepi yu, so taki den sani di yu e taki èn den sani di yu e du sa prisiri en ati (Odo 27:11). Yehovah noiti no e gi en pipel sari, fu dati ede wi musu tan getrow na en (Psalm 94:14). A ben sori sari-ati di a ben gens den feanti fu David fu man frulusu en. Fu di David ben de nanga tangi na ati, meki a sori o tranga a lobi fu en ben de gi a Frulusuman fu en. David ben singi nanga en heri ati: „Mi ati no e degedege, o Gado, mi ati no e degedege. Mi sa singi èn mi sa prei poku.”—Psalm 57:7.
22 Neleki David, tru Kresten tan dini Gado soleki fa den pramisi en. Nanga ati di no e degedege, den e gi Yehovah grani leki a sma di e frulusu den èn di e hori den na libi. Den e prisiri fu singi prèisesingi gi en. Te na ati fu yu no e degedege, dan a sa frutrow tapu Gado èn Gado sa yepi yu fu man dini en soleki fa yu pramisi en. Iya, yu kan de leki „a regtfardikiwan” di David ben singi fu en: „A no sa frede gi takru nyunsu srefi. En ati no e degedege, a e frutrow tapu Yehovah” (Psalm 112:6, 7). Te yu e bribi na ini Gado èn te yu e poti yu frutrow na en tapu, dan yu sa man dini en soleki fa yu pramisi en. Sosrefi, yu sa man tan dini Yehovah nanga wan ati di no e degedege.
Yu e memre disi ete?
• Fu san ede wi musu tan teki sabi fu Bijbel?
• Fu san ede wi musu memre taki wi sori berow èn taki wi drai wi libi?
• Fa wi e kisi wini te wi e memre taki wi gi wisrefi abra èn taki wi teki dopu?
• San sa yepi wi fu tan dini Yehovah nanga wan ati di no e degedege?
[Aksi fu a tori disi]
[Prenki na tapu bladzijde 18]
Yu e studeri Gado Wortu doronomo so taki yu no e kon swaki na yeye fasi?
[Prenki na tapu bladzijde 18]
Te wi e si a Kresten preikiwroko leki a moro prenspari wroko fu wi, dan dati e yepi wi fu tan dini Yehovah nanga wan ati di no e degedege