Tan na ai, go na fesi nanga deki-ati!

Den Ben Hori Spesrutu Konmakandra

SUMA kan taki nanga leti taki wi no e libi na ini ’muilek ten di tranga fu pasa’? Leki Kotoigi fu Yehovah wisrefi e firi taki „den lasti dei” disi hebi èn tranga fu libi na ini (2 Timoteyus 3:1-5). Ma wi sabi taki den sma di e libi lontu wi abi yepi fanowdu. Den no e frustan fu san ede den sani disi e pasa. Den sma disi abi trowstu nanga howpu fanowdu. San na wi frantwortu ini a tori disi? Fa wi kan yepi tra sma?

Gado gi wi a komando fu preiki a bun nyunsu fu a Kownukondre fu en di seti kaba (Mateyus 24:14). Sma musu kon frustan taki a Kownukondre di de na hemel, na a wan-enkri howpu gi libisma. Ma a no ala sma lobi a boskopu di wi e tyari. Na son presi, sma tapu a wroko fu wi èn den frufolgu den brada fu wi. Toku wi no e gi abra. Fu di wi e frutrow tapu Yehovah nanga wi heri ati, meki wi teki a fasti bosroiti fu tan na ai èn fu tan go doro nanga deki-ati fu preiki a bun nyunsu sondro fu tapu.—Tori fu den Apostel 5:42.

A fasti bosroiti dati ben kon na fesi na wan tu spesrutu konmakandra di ben hori na ini oktober 2001. Tapu satra 6 oktober, na alayari konmakandra fu a Watchtower Bible and Tract Society of Pennsylvania ben hori na a Jersey City, New Jersey, Kongreshal fu Yehovah Kotoigi na ini Amerkankondre. * A tra dei wan tu tra konmakandra di ben abi fu du nanga na alayari konmakandra, ben hori na fo difrenti presi. Dri fu den ben hori na ini Amerkankondre èn wán ben hori na ini Kanada. *

A fesiman fu na alayari konmakandra ben de Brada Samuel F. Herd, wan memre fu a Tiri Skin fu Yehovah Kotoigi. Na a bigin fu a programa a brada disi ben sori go na Psalm 92:1, 4 èn a ben taki: „Wi wani sori taki wi de nanga tangi.” Feifi brada fruteri tori fu tra kondre, di e sori krinkrin fu san ede wi kan de nanga tangi na ati.

Boskopu di komoto na ala sei fu grontapu

Brada Alfred Kwakye ben fruteri fu a fasi fa a preikiwroko e go na ini Gana, di den ben e kari Goudkust fosi. Wan tu yari langa den ben tapu a wroko fu wi na ini a kondre dati. Sma ben e aksi: „Fu san ede meki den ben tapu a wroko fu unu? San unu ben du?” Brada Kwakye ben fruteri taki na so wan fasi den ben e kisi na okasi fu preiki  gi den sma dati. Di den opo a wroko baka na ini 1991, dan yu ben abi sowan 34.421 Kotoigi fu Yehovah na ini Gana. Na ini augustus fu a yari 2001, a nomru fu Kotoigi ben kren te a doro 68.152. Dati wani taki dati a nomru fu Kotoigi ben gro nanga 98 procent. Den e seti sani now fu bow wan bigi konmakandra-presi pe 10.000 sma kan sidon. A de krin taki den brada fu wi na ini Gana e gebroiki a fri fu anbegi di den kisi na wan tumusi bun fasi.

Aladi furu dyugudyugu de na politiek sei na ini Ierland, toku den brada fu wi e wroko fayafaya na ini a preikiwroko, èn sma e lespeki den, fu di den no e moksi densrefi na ini a feti na ini a kondre. Brada Peter Andrews, a fesiman fu a Bijkantoro Komte fu Ierland, e fruteri taki a kondre abi 115 gemeente di prati na ini 6 grupu. Brada Andrews ben fruteri fu Liam, wan boi fu tin yari di no e frede fu preiki na skoro. Liam ben prati 25 Mi boekoe nanga bijbel tori, di Yehovah Kotoigi tyari kon na doro, gi den pikin fu en klas èn gi a skoromisi fu en. Liam ben wani fu teki dopu srefi. Ne wan sma aksi efu a no yongu tumusi fu du dati. Liam ben piki: „A no prenspari omeni yari mi abi. Na a lobi di mi abi gi Yehovah, na dati e meki taki mi wani teki dopu. Te mi o teki dopu, dan dati o sori o bigi a lobi de di mi abi gi en.” Liam wani tron wan zendeling.

Brada Stefan Johansson, fesiman fu a Bijkantoro Komte fu Venezuela, ben fruteri taki na ini 1968 den ben abi sowan 5400 sma di ben e preiki a bun nyunsu na ini a kondre. Ma now den abi moro leki 88.000 preikiman. Den brada e fruwakti taki a wroko sa go na fesi moro srefi, bika den ben abi moro leki 296.000 sma di ben kon na a Memrefesa na ini 2001. Na ini a mun december fu 1999, hebi alen ben fadon di ben meki taki bun furu tokotoko wasi kon na ondrosei fu den bergi èn dati ben kiri sowan 50.000 sma. Wan tu Kotoigi srefi ben lasi den libi na so wan fasi. Wan fu den Kownukondre konmakandra-presi ben lai nanga so furu tokotoko taki pikinmoro a ben doro a plafon. Di wan sma ben taki dati a ben moro bun fu libi a konmakandra-presi dati fu seti wan trawan na wan tra presi, dan den brada ben taki: „Kwetikweti! Disi na wi Kownukondre konmakandra-presi, èn wi no wani gowe libi en now.” Den ben bigin krin a presi puru bun furu tokotoko, ston, nanga furu broko sani. Den brada seti a konmakandra-presi kon bun baka èn den seti en pikinso tra fasi. Now den e taki dati a presi kon moro moi leki bifo a rampu!

Na ini den Filippijnen sma e taki sowan 87 tongo nanga dialekt. Disi na san Brada Denton  Hopkinson, fesiman fu a Bijkantoro Komte drape ben taki. Na ini a dienstyari di pasa, den ben tyari a Nieuwe-Wereldvertaling van de Heilige Schrift kon na doro na ini dri fu den prenspari tongo fu a kondre. Dati ben de Sebuwanotongo, Ilokotongo, nanga Tagalogtongo. Brada Hopkinson fruteri wan ondrofenitori fu wan pikin boi fu neigi yari di ben leisi a buku Goed nieuws dat u gelukkig kan maken, wan buku di Yehovah Kotoigi tyari kon na doro. A ben kisi tra buku fu a bijkantoro èn a ben leisi den tu. Ma dan en famiri bigin gens en. Furu yari baka dati, di a ben de na heiskoro, dan a ben aksi a bijkantoro wan bijbelstudie. A ben teki dopu na ini 1996 èn heri esi baka dati a go na ini a furuten diniwroko. Now en nanga en wefi e dini na a bijkantoro.

’Porto Riko e „seni furu Kotoigi go na tra presi”.’ Dati na san Brada Ronald Parkin, fesiman fu a Bijkantoro Komte fu Porto Riko, ben taki. Moro leki 25.000 preikiman de na tapu na èilanti dati èn furu yari langa a nomru dati no kenki. Fu san ede? We, neleki fa a sori, dan ibri yari Porto Riko „e seni” sowan 1000 preikiman go na Amerkankondre. Furu fu den sma disi e froisi fu na ekonomia situwâsi ede. Brada Parkins ben fruteri tu fu wan prenspari bosroiti di krutubangi teki di abi fu du nanga Luis, wan Kotoigi fu 17 yari, di ben abi leukemie, wan takru brudu-siki. Fu di Luis no ben wani teki brudu, meki den ben tyari en go na fesi krutu. A krutuman ben wani taki langalanga nanga Luis, fu dati ede a ben go luku a yongu Kotoigi disi na ini na ati-oso. Luis ben aksi na uma disi: „Efu mi ben du wan bigi ogri yu ben o krutu mi neleki fa yu e krutu wan bigisma, a no so? Ma now di mi wani gi yesi na Gado, unu feni taki mi a no wan bigisma ete. Fu san ede?” A krutuman ben e agri taki a boi disi ben de wan lepi yonkuman kaba, di ben man teki en eigi bosroiti.

Baka den tori disi fu den farawe kondre, dan Brada Harold Corkern fu a Bijkantoro Komte fu Amerkankondre, ben taki nanga wan tu sma di e dini leki futuboi fu Yehovah bun langa kaba. Arthur Bonno de na ini a furuten diniwroko 51 yari kaba èn now a e dini na ini a Bijkantoro Komte fu Ekwador. Angelo Catanzaro, di de na ini a furuten diniwroko 59 yari kaba. Moro furu fu den yari dati a ben dini leki kringopziener. Richard Abrahamson, klari Gileadskoro na ini 1953, èn a ben kisi a grani fu tiri a wroko na ini Deinsikondre sowan 26 yari langa bifo a drai go baka na Brooklyn Bethel. Leki lasti a ben taki nanga Brada Carey W. Barber di abi 96 yari now. Ala sma ben prisiri fu arki Brada Barber di teki dopu na ini 1921 èn di de na ini a furuten diniwroko sowan 78 yari kaba. A de wan memre fu a Tiri Skin fu sensi 1978.

Fayafaya takimakandra

Na a alayari konmakandra, wan tu lezing ben hori di e meki sma denki dipi fu sani. Brada Robert W. Wallen ben taki fu a tori „Wan pipel gi a nen fu en”. Wi na a pipel gi a nen fu Gado èn wi de na ini moro leki 230 kondre. Yehovah gi wi „wan tamara èn wan howpu” (Yeremia 29:11). Wi musu tan fruteri sma na ala sei fu a Kownukondre fu Gado, fu di wi e prati a tumusi moi boskopu fu trowstu nanga den (Yesaya 61:1). Leki lasti sani Brada Wallen ben taki: „Meki a de so, taki ibri dei wi e tan libi akruderi a nen di wi e tyari, Yehovah Kotoigi.”—Yesaya 43:10.

A lasti pisi fu a programa ben de wan lezing fu dri pisi, di dri brada fu a Tiri Skin ben hori. A ben abi leki nen „Now na a ten fu tan na ai, tanapu kánkan èn gro kon tranga”.—1 Korentesma 16:13.

Brada Stephen Lett ben taki fu a tori, „Tan na ai na a lati yuru disi”. Brada Lett ben taki dati a sribi di wi man sribi èn rostu wi skin, na wan presenti di wi kisi. A e gi wi nyun krakti baka. Ma noiti a no bun fu fadon na sribi na yeye fasi (1 Tesalonikasma 5:6). Fa wi kan tan na ai na yeye fasi? Brada Lett ben taki fu dri sani di wi kan teki gersi nanga „perki” di musu yepi wi fu tan na ai na yeye fasi: (1) Wi musu abi furu fu du na ini a wroko fu Masra (1 Korentesma 15:58). (2) Wi musu sabi wi yeye nowtu (Mateyus 5:3). (3) Wi musu arki den rai di komoto na ini Bijbel so taki wi kan tyari wisrefi na wan koni fasi.—Odo 13:20.

Brada Theodore Jaracz ben hori wan fayafaya lezing di ben abi leki nen „Tanapu kánkan te yu e kisi tesi”. Brada Jaracz ben sori go na Openbaring 3:10, di a ben poti na aksi: „San na a ’yuru fu tesi’?” A tesi dati e kon na ini „a dei fu Masra”, pe wi de na ini nownow (Openbaring 1:10). A tesi disi abi fu du nanga wán prenspari sani nomo: Wi de na a sei fu a Kownukondre fu Gado di seti kaba,  noso wi de na a sei fu na ogri seti fu Satan? Teleki a dei di a tesi dati o kon na wan kaba, wi kan tan fruwakti moro tesi noso moro problema. Wi sa tan loyaal na Yehovah nanga na organisâsi fu en? Brada Jaracz ben taki: „Ibriwan fu wi aparti musu sori taki a e tyari ensrefi na a fasi dati.”

Te fu kaba, Brada John E. Barr ben taki fu a pisi tori, „Gro kon tranga leki wan sma di lepi na yeye fasi”. A ben sori go na Lukas 13:23-25, di a ben taki dati wi musu span wisrefi fu „pasa a smara doro go na inisei”. Furu sma no e du nofo muiti fu gro kon tranga. Efu wi wani tron lepi Kresten, dan wi musu leri fu fiti Bijbel gronprakseri na ini ala san wi e du na ini a libi. Brada Barr ben gi a deki-ati: „Mi sabi taki unu alamala sa agri nanga mi taki now na a ten, (1) fu poti Yehovah na a fosi presi na ini wi libi èn si en leki a moro prenspari sma; (2) fu gro kon tranga; èn (3) fu span wisrefi fu du a wani fu Yehovah. Na a fasi disi wi sa pasa na ini a smara doro di e tyari wi go na a tumusi moi têgo libi.”

Di na alayari konmakandra ben e kon na wan kaba, wán aksi ben de ete di no ben kisi piki: San na a yaritekst fu a dienstyari 2002? A dei baka dati, na aksi dati ben kisi piki.

Ete wan konmakandra

A sonde mamanten baka dati, a ben span srefisrefi di a programa fu a tra konmakandra disi ben de fu bigin. A programa ben bigin nanga wan syatu takimakandra fu A Waktitoren-studie gi a wiki dati, èn baka dati den ben taki syatu fu wan tu ede-penti fu na alayari konmakandra. Baka dati, ala sma ben breiti fu arki wan takimakandra fu a yaritekst gi a yari 2002: „Kon na mi, . . . èn mi sa gi unu krakti baka” (Mateyus 11:28). A takimakandra ben teki puru fu den studie artikel fu A Waktitoren fu 15 december 2001, di ben tyari kon na doro bakaten.

Na ini augustus 2001 „Leriman fu Gado Wortu” Kongres ben hori na ini Fransikondre nanga Italiakondre. Baka a lezing fu a yaritekst wan tu sma di ben seni go na den Kongres dati, ben fruteri pikinso fa sani ben waka. * A heimarki fu a programa fu a dei dati ben de tu lezing di brada fu Brooklyn Bethel ben hori.

A nen fu a fosiwan ben de: „Abi deki-ati èn frutrow tapu Yehovah na ini den tranga ten disi”. A takiman ben taki fu den edepenti di e kon now: (1) Alaten a ben de tumusi prenspari gi a pipel fu Yehovah fu tan frutrow na en tapu. Bijbel abi bun furu eksempre fu sma di ben tan sori deki-ati nanga bribi, aladi den ben e kisi frufolgu (Hebrewsma 11:1–12:3). (2) Yehovah e gi wi bun reide fu san ede wi kan frutrow na en tapu dorodoro. Den sani di a meki èn a Wortu fu en, e gi wi a dyaranti taki a e broko en ede nanga den futuboi fu en èn taki a noiti no sa frigiti den (Hebrewsma 6:10). (3) Deki-ati nanga frutrow na sani di wi abi tranga fanowdu na ini a ten disi. Leki fa Yesus ben taki na fesi, wi na sma di trawan „no wani si na ai” (Mateyus 24:9). Efu wi wani horidoro, dan wi musu frutrow tapu a Wortu fu Gado, wi musu abi a frutrow taki en santa yeye de nanga wi, èn wi musu abi deki-ati fu tan preiki a bun nyunsu. (4) Eksempre de di e sori taki wi e ondrofeni gens na ini a ten disi. A ben naki na ati fu ala den arkiman fu yere san den brada nanga sisa fu wi ben ondrofeni na ini kondre soleki Armeinia, Fransikondre, Georgia, Kasakstan, Rosiakondre, nanga Turkmenistan. Fu tru, now na a ten fu sori taki wi abi deki-ati èn taki wi e poti wi frutrow tapu Yehovah!

A lasti takiman ben taki fu a pisi tori, „Go na fesi makandra nanga na organisâsi fu Yehovah”. A lezing dati ben e taki fu difrenti sani di wi abi fanowdu na ini a ten disi. (1) A de krin fu si na ala sei taki a pipel fu Yehovah e go na fesi. A preikiwroko fu wi nanga den kongres di wi e hori, e hari a prakseri fu sma. (2) Yehovah seti wan organisâsi di de na ini wánfasi. Na ini 29 G.T., Gado ben salfu Yesus nanga santa yeye, fu di en ben abi fu tyari  „ala sani” kon na wan na ini a famiri fu Gado di de na ini wánfasi. Den sma di Yesus ben o tyari kon na wan ben o de den sma nanga a howpu fu libi na ini hemel èn den sma di abi a howpu fu libi na grontapu (Efeisesma 1:8-10). (3) Den kongres na tumusi moi okasi di e sori taki wi de wán, awinsi pe fu grontapu wi de. Disi kon na krin heri bun na den spesrutu kongres di ben hori na Fransikondre nanga na Italiakondre, na ini a mun augustus di pasa. (4) Na ini Fransikondre èn na ini Italiakondre den ben teki wan prenspari bosroiti di e gi deki-ati. A takiman ben taki fu wan tu sani fu a krakti prenspari bosroiti dati. Yu kan leisi a prenspari bosroiti dati dyaso na ondrosei.

Na a kaba fu a lasti lezing, a fisiti takiman meki wan prisiri nyunsu bekènti. A nyunsu ben komoto fu a Tiri Skin. Wan pisi fu a boskopu ben e taki so: „Now na a ten fu tan na ai, fu si krin fa sani e waka na ini grontapu. . . . Wi wani fruteri unu taki na wan lobi-ati fasi a Tiri Skin e broko den ede nanga unu èn nanga ala tra memre fu a pipel fu Gado. Meki a de so taki Gado blesi unu bogobogo te unu e meki muiti fu tan du a wani fu en nanga unu heri ati.” A pipel fu Yehovah teki a fasti bosroiti fu tan na ai na ini den muilek lasti dei disi èn den e tan go na fesi nanga deki-ati, makandra nanga na organisâsi fu Yehovah, di de na ini wánfasi.

[Futuwortu]

[Faki/Prenki na tapu bladzijde 29-31]

WAN PRENSPARI BOSROITI

Na ini augustus fu a yari 2001 wan tu spesrutu „Leriman fu Gado Wortu” Kongres ben hori na ini Fransikondre èn na ini Italiakondre. Na den kongres dati den ben leisi wan tumusi prenspari bosroiti. Dyaso na ondrosei yu kan leisi san ben de a prenspari bosroiti dati.

„LEKI Yehovah Kotoigi, wi alamala di de dyaso na a ’Leriman fu Gado Wortu’ Kongres kisi leri di e gi wi winimarki srefisrefi. A de krin pe a leri disi e komoto. A leri disi no e komoto fu libisma. A fositen profeiti Yesaya e kari a sma pe a leri disi e komoto, wi ’Gran Leriman’ (Yesaya 30:20). Poti prakseri na a frumane di Yehovah e gi wi na ini Yesaya 48:17: ’Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka.’ Fa A e du dati? Na a fosi presi A e du dati nanga yepi fu wan buku di vertaal na ini bun furu tongo, moro leki iniwan tra buku na grontapu; wan buku di panya na heri grontapu tu. A buku dati na a Bijbel. Drape wi e leisi krinkrin: ’Gado ben meki sma skrifi ala den Buku fu Bijbel nanga yepi fu en santa yeye èn den bun.’—2 Timoteyus 3:16.

Na ini a ten disi, a libisma famiri abi den sortu leri disi tranga fanowdu. Fu san ede wi kan taki dati? San sma di e broko den ede nanga san e pasa, e denki fu a fasi fa sani na grontapu e kenki? We, disi na san den e prakseri: Aladi milyunmilyun sma kisi skoroleri, toku furu sma no sabi srefisrefi san na bun gwenti èn den no e libi akruderi den yoisti markitiki. Furu fu den no sabi a difrenti srefi na mindri san bun èn san ogri (Yesaya 5:20, 21). Furu sma no sabi noti fu Bijbel. Aladi koniman meki sani soleki computer di kan yepi wi fu kon sabi furu tori, toku a de so taki wi no man kisi piki tapu tumusi prenspari aksi soleki: San na a marki fu a libi? Fa wi musu si den sani di e pasa na ini a ten disi? Howpu de taki wi kan abi wan bun tamara? Wan dei sa kon taki wi sa libi trutru na ini vrede, sondro taki ogri sa miti wi? Moro fara a de so, taki sma e meki buku di e fruteri ala sortu tori fu sani di libisma du. Toku wi e si taki libisma e tan meki den srefi fowtu di trawan ben meki fositen. Ogridu e kon moro furu. Furu siki di sma ben denki taki no ben de moro, e opo ede kon, èn tra siki, soleki AIDS e panya na wan tumusi ogri fasi. Sani no e waka bun kwetikweti na ini na osofamiri libi. Sma e pori grontapu fu di den no e sorgu en bun. Den ogri-ati sani di sma e du fu gens tirimakti èn den tumusi ogri fetisani di den e meki fu kiri sma, e meki taki vrede no de èn taki sma e libi nanga frede. Dei fu dei moro problema e kon di sma no man lusu. Sortu frantwortu wi abi fu yepi tra sma na ini den tranga ten disi? Fa den sma disi kan kon sabi fu san ede den problema disi e miti wi? Fa den kan kon sabi efu wan moro bun libi de di den kan abi nownowde kaba èn sosrefi efu den kan kisi wan moro bun libi na ini a ten di e kon?

A komando di Bijbel e gi wi na fu ’go na ala kondre èn meki disipel fu sma, èn fu leri den fu du ala den sani di Krestes komanderi wi’ (Mateyus 28:19, 20). Yesus Krestes ben gi a komando disi baka di a dede èn ben kisi wan opobaka. Na a ten dati a kisi ala makti na ini hemel èn na grontapu. A wroko disi prenspari moro ala wroko di libisma e gi wi deki-ati fu du. Wi kisi a komando fu poti spesrutu prakseri na a yeye nowtu fu sma di e angri fu regtfardikifasi. Leki fa Gado e si a tori, dan a wroko disi di wi kisi fu du, musu kon na a fosi presi na ini wi libi. Bijbel e sori wi krinkrin taki wi musu si a wroko disi leki wan seryusu sani.

Dati wani taki dati wi musu tan poti a wroko disi na a fosi presi na ini wi libi. Sma sa pruberi fu puru wi prakseri fu a wroko disi, noso wi kan miti nanga furu problema. A kan srefi taki wi e kisi gens fu a sei fu a politiek nanga a kerki sistema, di wani tapu a wroko di wi e du fu gi sma leri na heri grontapu. Ma awinsi fa a no fa, Gado e blesi a wroko disi èn a e yepi wi fu du a wroko fu en. Wi e bribi èn wi abi a frutrow taki a wroko disi sa tan go na fesi èn taki a sa go doro te na a kaba. Fu san ede meki wi kan bribi trutru taki ala sani o waka bun? Fu di Masra Yesus Krestes ben pramisi wi taki a ben o de nanga wi te na a kaba fu a seti fu sani disi. Iya, Yesus Krestes ben taki dati a ben o de nanga wi te wi ben o du a diniwroko di Gado gi wi fu du.

A kaba de krosibei gi a bruya libisma famiri disi. Wi abi wroko fu du, èn a wroko disi musu du bifo a kaba kon. Fu dati ede, wi leki Yehovah Kotoigi e teki a prenspari bosroiti di e kon now:

„Nomru wan: Leki futuboi di gi den libi abra na Gado, wi teki a fasti bosroiti fu tan poti Kownukondre afersi na a fosi presi na ini wi libi èn fu tan go na fesi na yeye fasi. Fu dati ede wi e begi neleki fa Psalm 143:10 e taki: ’Leri mi fu du yu wani, bika yu na mi Gado.’ Disi wani taki dati wi musu de bun studenti fu a Wortu fu Gado; sma di e meki muiti fu leisi Bijbel ala dei. Wi musu de sma di abi a gwenti fu studeri èn fu ondrosuku sani finifini. Na ini a gemeente, na den bigi konmakandra, èn na den kongres wi e kisi bun leri. Fu di wi wani sori ala sma taki wi e go na fesi, meki wi sa du muiti fu sreka wisrefi bun gi ala den konmakandra disi so taki wi kan kisi wini dorodoro fu ala den leri di Gado e gi wi na a fasi disi.—1 Timoteyus 4:15; Hebrewsma 10:23-25.

Nomru tu: Fu di wi wani kisi leri fu Gado, meki wi sa nyan soso na en tafra. Fu dati ede, wi sa tan arki den warskow di Bijbel e gi wi, fu luku bun nanga den leri fu den ogri yeye di e kori sma (1 Korentesma 10:21; 1 Timoteyus 4:1). Wi sa meki tranga muiti fu koti pasi gi sani di no bun gi wi kwetikweti. Dati na sani soleki falsi bribi, den soso takitaki fu sma, nanga den syen sani di sma e du na seks sei. Wi sa luku bun nanga a lostu di sma abi fu luku seks prenki nanga kino, fu di sma kan tron srafu fu den sani disi. Wi sa koti pasi tu gi a yayo fasi fu meki prisiri, nanga ala den sani di ’no e kruderi nanga den gosontu leri’ di wi e kisi (Romesma 1:26, 27; 1 Korentesma 3:20; 1 Timoteyus 6:3; 2 Timoteyus 1:13). Na wi mindri wi abi brada di de leki „presenti ini libisma” di man gi wi leri na wan bun fasi. Wi wani gi den sma disi grani nanga lespeki, fu di den e du muiti fu yepi wi trutru. Dati meki nanga wi heri ati wi sa wroko makandra nanga den, fu tan hori wisrefi na den krin èn regtfardiki yeye markitiki fu a Wortu fu Gado.—Efeisesma 4:7, 8, 11, 12; 1 Tesalonikasma 5:12, 13; Titus 1:9.

Nomru dri: Leki Kresten papa nanga mama wi sa meki muiti nanga wi heri ati fu leri den pikin fu wi. Wi no sa de sma di e leri den pikin nanga den sani di wi e taki nomo, ma wi sa leri den sosrefi nanga den sani di wi e du. A moro prenspari marki fu wi, na fu yepi wi pikin fu sensi pikin-nengreten fu kon ’sabi den santa buku, so taki den kan kon koni fu kisi frulusu’ (2 Timoteyus 3:15). Wi sa tan hori bun na prakseri taki a kweki di wi e kweki den na ini a trangaleri èn na ini den seryusu frumane fu Yehovah, prenspari srefisrefi. Dati sa meki taki den sa abi a tumusi bun okasi fu nyan bun fu a pramisi fu Gado taki ’a sa go bun nanga den èn taki den sa tan wan langa ten na grontapu’.—Efeisesma 6:1-4.

Nomru fo: Te wi abi broko-ede noso seryusu problema, dan na a fosi presi wi sa ’meki Gado kon sabi san wi wani, na ini begi’, fu di wi abi a dyaranti taki ’a vrede fu Gado, di pasa ala suma frustan’ sa kibri wi (Filipisma 4:6, 7). Fu di wi de na ondro a tyatyari fu Krestes, meki wi sa kisi krakti baka. Wi sabi taki Gado e broko en ede nanga wi. Dati meki wi no sa draidrai fu trowe wi hebi na en tapu.—Mateyus 11:28-30; 1 Petrus 5:6, 7.

Nomru feifi: Wi abi warderi gi a grani di Yehovah gi wi fu de leriman fu a Wortu fu en. Fu dati ede wi sa tan meki muiti fu ’gebroiki a wortu fu waarheid na wan reti fasi’ èn fu ’du wi diniwroko dorodoro’ (2 Timoteyus 2:15; 4:5). Fu di wi sabi heri bun san o pasa na ini a ten di e kon, meki wi wani wroko tranga fu suku den wan di wani arki èn fu yepi den sma disi fu go na fesi. Moro fara, wi wani go na fesi na ini a fasi fa wi e gi leri, fu di wi sa studeri Bijbel nanga moro sma na wan fasi di e gi bun bakapisi. Disi o yepi wi fu du moro soifri san Gado wani. Fu di Gado wani taki ’ala sortu sma musu kisi frulusu èn taki den musu kon kisi wan soifri sabi fu waarheid’.—1 Timoteyus 2:3, 4.

Nomru siksi: Fu bigin nanga a yarihondro di pasa, te kon miti now, Yehovah Kotoigi na ini furu kondre kisi gens nanga frufolgu na difrenti fasi. Ma Yehovah sori taki a de nanga wi (Romesma 8:31). A Wortu fu en di no e misi noiti, e gi wi a dyaranti taki ’nowan fetisani di sma sa meki teige wi’ sa man tapu wi. Den no sa man meki wi lasi-ati so taki wi go du sani moro safri, noso tapu nanga wi Kownukondre preikiwroko. A wroko di wi e du fu gi sma leri sa abi bun bakapisi (Yesaya 54:17). Awinsi wi e miti bun ten noso wi e miti takru ten, toku wi no kan tapu fu fruteri sma a waarheid. Wi teki a bosroiti fu du wi preikiwroko fayafaya èn fu wroko tranga fu gi sma leri (2 Timoteyus 4:1, 2). A marki fu wi na fu prati a bun nyunsu fu Gado Kownukondre nanga ala pipel fu grontapu. Na so wan fasi, den sosrefi sa tan abi na okasi fu kon sabi sortu sani seti gi den, fu kisi têgo libi na ini wan regtfardiki nyun grontapu. Leki wan bigi grupu fu leriman fu Gado Wortu di e wroko makandra na ini wánfasi, wi abi a fasti bosroiti fu tan waka baka na eksempre fu Yesus Krestes, wi Bigi Leriman. Wi wani sori densrefi fasi fu Gado, di Yesus ben sori. Ala den sani disi wi sa tan du fu di wi wani gi glori na Yehovah Gado, wi Gran Leriman èn a Sma di e gi wi libi.

Ala sma di de dyaso èn di e agri nanga na prenspari bosroiti disi, grantangi taki IYA!”

Sowan 160.000 sma ben de na den dri kongres na ini Fransikondre, èn na den neigi kongres na ini Italiakondre yu ben abi 289.000 sma. Den sma di ben de drape ben e taki difrenti tongo. Ma di a lasti aksi fu a prenspari bosroiti disi ben poti, dan den alamala ben piki nanga wan tranga sten, „Iya”!