Aksi fu leisiman

A fiti fu begi Gado sondro fu gebroiki wortu soleki: „na ini a nen fu Yesus”?

Bijbel e sori taki te Kresten wani begi Gado, dan den musu du dati na ini a nen fu Yesus. Yesus ben taigi den disipel fu en: „Nowan sma e kon na a Tata sondro a yepi fu mi.” A ben taki moro fara: „Iniwan sani di unu e aksi na ini mi nen, mi sa du disi, so taki a Tata kan kisi glori nanga yepi fu a Manpikin. Efu unu aksi iniwan sani na ini mi nen, mi sa du dati.”—Yohanes 14:6, 13, 14.

A buku Cyclopedia of Biblical, Theological, and Ecclesiastical Literature e sori o prenspari a posisi disi fu Yesus de te a e taki: „Libisma musu begi Gado wawan, èn den musu du dati na ini a nen fu Yesus Krestes. Fu dati ede, te sma e begi santawan noso engel, dan den begi dati a no lasiten nomo, ma den e afrontu Gado sosrefi. Sma no musu anbegi nowan mekisani awansi o hei a mekisani dati de, fu di dati na falsi anbegi, èn a santa wet fu Gado e sori taki sma no musu du a sani dati kwetikweti.”

Efu sani waka bun gi wan sma, èn a sma disi e taki baka dati „Tangi fu yu Yehovah”, sondro fu taki „na ini a nen fu Yesus”, dan fa a de nanga dati? A sma disi afrontu Gado? Dati no abi fu de so. Wan Kresten ben kan bari: „Yehovah, yepi mi!” fu di wan ogri e miti en wantronso. Gado no ben o weigri kwetikweti fu yepi a futuboi fu en soso fu di a no ben taki den wortu „na ini a nen fu Yesus”.

Ma te wi e taki pikinso tranga so taki sma noso Gado srefi e yere, dan dati no wani taki ala ten dati wi e begi. Fu gi wan eksempre, baka di Yehovah ben krutu Kain fu di a ben kiri en brada Abel, dan Kain taki: „A strafu di mi kisi fu di mi sondu, hebi moro leki mi kan tyari. Fu taki en leti, tide yu e yagi mi komoto fu grontapu, èn mi sa kibri misrefi fu yu fesi; èn mi musu tron wan wakaman nanga wan loweman na grontapu, èn ibriwan sma di sa feni mi, trutru sa kiri mi” (Genesis 4:13, 14). Aladi Kain ben e taki nanga Yehovah, toku a ben taki den sani disi fu di a ben mandi dati a ben kisi so wan hebi strafu gi a sondu di a ben du.

Bijbel e fruteri wi: „Gado e kakafutu gi den heimemrewan, ma a e gi no-frudini bun-ati na den sakafasiwan.” Te wi e taki nanga a Moro Heiwan neleki a de wan libisma nomo, dan dati e sori trutru taki wi no abi sakafasi (Yakobus 4:6; Psalm 47:2; Openbaring 14:7). Te wi sabi o prenspari Yesus de, soleki fa Gado Wortu e tyari dati kon na krin, dan wi musu begi na wan fasi di e sori taki wi e lespeki Yesus Krestes. Te wi ben sa weigri fu espresi fu du dati, dan wi no ben o sori lespeki tu.—Lukas 1:32, 33.

Disi no wani taki dati Yehovah wani taki wi gebroiki spesrutu wortu te wi e begi en. San de prenspari gi Gado na a fasi fa wan sma en ati de (1 Samuel 16:7). Na ini a fosi yarihondro G.T., wan ofsiri fu a legre fu Rome ’doronomo ben seni tranga begi go na Gado’. A man disi di ben nen Kornelius, no ben de wan Dyu èn a no ben besnij. A no ben de wan anbegiman tu fu Yehovah. A ben musu de so taki a no ben e begi Gado na ini a nen fu Yesus, ma toku den begi fu en „ben opo go na Gado èn A ben memre den”. Fu san ede dati ben pasa? Fu di ’a sma di e ondrosuku ati’, ben si taki Kornelius ben de ’wan opregti man èn a ben e frede Gado’ (Tori fu den Apostel 10:2, 4; Odo 17:3). Na a srefi ten di Kornelius ben kisi sabi fu „Yesus di ben de fu Nasaret”, dan a kisi santa yeye, èn a tron wan dopu disipel fu Yesus.—Tori fu den Apostel 10:30-48.

Te fu kaba, a no libisma e bosroiti sortu begi Gado e arki. Efu son leisi wan Kresten e taki nanga Gado sondro fu gebroiki den wortu soleki „na ini a nen fu Yesus”, dan a Kresten dati no abi fu denki taki a du wan sondu. Yehovah sabi den swakifasi fu wi heri bun èn a wani yepi wi (Psalm 103:12-14). Wi kan abi a frutrow taki efu wi e bribi na ini ’a Manpikin fu Gado. . . , dan awansi san wi e aksi akruderi en wani, a e yere wi’ (1 Yohanes 5:13, 14). Ma spesrutu te tru Kresten e begi gi trawan na publiki, dan den musu agri taki Yesus de wan prenspari sma na ini a prakseri fu Yehovah, soleki fa Bijbel e sori dati. Èn den e du ala muiti fu gi a nen fu Yesus grani, fu di den e begi Gado na ini a nen fu en.