O ten a bun fu lon gowe?

NA INI a grontapu fu tide furu sma abi a gwenti fu sori deki-ati nanga feantifasi noso fu poti densrefi na ini situwâsi di e tyari den go na ini tesi. Te wan sma e lowe gowe gi wan situwâsi di kan tyari problema kon, dan furu tron trawan e si a sma dati leki wan swakiman noso wan fredeman. Kande den e spotu a sma dati srefi.

Ma Bijbel e sori krin taki son leisi a de wan koni sani fu lon gowe, èn wan sma e sori taki a abi deki-ati te a du dati. Wan eksempre fu dati, na a sani di Yesus Krestes ben taigi den disipel fu en bifo a ben seni den go na ini a diniwroko. A ben taigi den: „Te den e frufolgu unu na ini a wan foto, dan lon go na wan trawan” (Mateyus 10:23). Iya, den futuboi fu Yesus ben musu pruberi fu lowe gowe fu den sma di ben e frufolgu den. Den no ben musu dwengi sma na nowan enkri fasi fu teki a bribi fu den. Den ben abi wan boskopu fu vrede (Mateyus 10:11-14; Tori fu den Apostel 10:34-37). Sobun, Kresten no ben musu kisi atibron. Na presi fu dati, den ben musu lowe gowe, den ben musu komoto fu drape. Na so wan fasi, den ben tan hori wan bun konsensi èn den no ben pori a warti matifasi di den abi nanga Yehovah.—2 Korentesma 4:1, 2.

Na ini a Bijbel buku Odo, wi e feni wan eksempre di de heri tra fasi. Na eksempre disi abi fu du nanga wan yonkuman di no ben lowe gowe gi a tesi di a ben e kisi, ma na presi fu dati, a go baka wan huru-uma „leki wan mankaw di den e tyari fu go srakti”. San na a bakapisi fu dati? Rampu miti a yonkuman disi fu di a broko kindi gi a tesi di ben o poti en eigi libi na ini kefar.—Odo 7:5-8, 21-23.

San yu ben o du te yu ben o kisi tesi fu du hurudu noso te wan tra ogri ben o miti yu? Soleki fa Gado Wortu e sori, dan a moro bun sani di yu kan du, na fu lowe gowe, fu gowe fu drape wantewante.—Odo 4:14, 15; 1 Korentesma 6:18; 2 Timoteyus 2:22.