San e gi yu a dyaranti fu wan bun libi?

Na ini wan pikin dorpu na ini West Afrika, a yonkuman Josué e wai anu fu taigi den famiriman nanga den mati fu en adyosi. * Baka dati a e teki pasi fu go na a bigi foto fu suku wroko di ben musu gi en a dyaranti taki a ben o abi nofo moni ala ten. Ma syatu baka di a doro na ini a foto, dan a lasi howpu fu di a kon si taki a foto no de wan presi pe sma e kon gudu esi-esi.

ALADI Josué ben e meki muiti srefisrefi fu fiti ensrefi na a libi na ini a foto, toku a kon lasi-ati srefisrefi. A bigi foto ben de heri tra fasi leki san a ben fruwakti. Na a srefi ten, Josué ben kisi wan tranga firi na ini en ati fu drai go baka na den famiriman nanga den mati fu en na ini a pôti dorpu fu pe a komoto. Ma a frede taki son sma fu a dorpu o spotu en. ’Den sa taki dati mi don, fu di sani no waka bun gi mi na ini a foto’, na so Josué e broko en ede.

A sani di e gi Josué moro broko-ede, na taki en papa nanga mama kande sa firi sari fu di sani no ben waka soleki fa den ben fruwakti. Den e frutrow na tapu taki a sa yepi den nanga moni. Nanga den prakseri disi na ede di e trobi en srefisrefi, Josué e wroko langa ibri dei fu du a lagiwroko di a feni. Boiti dati, a e meki pikinso nomo fu a moni di a ben fruwakti fu meki. A weri srefisrefi fu di a e wroko so furu. Èn ibri wiki a e kon moro muilek gi en fu teki prati na a Kresten diniwroko di warti srefisrefi gi en. Fu di a de so farawe fu den famiriman nanga den owru mati fu en, meki a e firi sari taki a de en wawan. A kon si taki a foto no gi en a dyaranti taki a sa abi wan moro bun libi. Èn dati na soifri san a ben wani abi.

A sari sani di pasa nanga Josué, e pasa nanga furu tra sma na furu difrenti presi. A no de so taki Josué ben e prakseri ensrefi nomo fu di a ben wani froisi go na foto. A ben de so nomo taki a ben wani a dyaranti fu wan bun libi. A ben abi a fasti overtoigi taki sani ben o waka moro bun gi en te a ben gowe libi a pikin dorpu fu en fu go libi na ini a foto. A no de fu taki dati wan sma kan feni wan wroko di e pai moro moni, ma dati no sa gi en a dyaranti taki sani waka bun gi en. Sani no ben waka bun srefisrefi gi Josué, èn den no sa waka bun tu gi furu trawan di abi a srefi fruwakti disi. Fu dati ede wi e aksi wisrefi, ’San a wani taki fu abi a dyaranti fu wan bun libi?’

Furu sma abi difrenti denki fu a tori disi. Wan wortubuku e taki dati te wan sma abi a dyaranti taki sani sa waka bun nanga en, dan a sma dati „no de na ini kefar” noso „a de sondro frede noso broko-ede”. Furu sma sabi taki noti no kan gi den a dyaranti na ini a ten disi taki den noiti no sa de na ini kefar. Te den sma disi e firi nomo taki den no de na ini kefar, dan dati bun kaba gi den, aladi wan lo sani kande e pasa na den lontu di kan meki taki ogri e miti den.

Fa a de nanga yu? San e gi yu a dyaranti fu wan bun libi? Yu sa abi a dyaranti dati te yu e libi na ini wan foto, na presi fu wan dorpu, soleki fa Josué ben denki? A de so taki moni sa gi yu a dyaranti dati, awansi pe, noso fa yu e kisi a moni dati? Yu sa abi a dyaranti dati te yu kisi wan moro hei posisi na ini a libi? Awansi fa yu denki taki yu sa kisi a dyaranti fu wan bun libi, o langa sani sa tan waka bun gi yu nanga yu famiri?

Fu man kisi a dyaranti fu wan bun libi, dan furu sma e poti den frutrow tapu den dri sani disi: wan spesrutu tanpresi, moni, nanga wan hei posisi. Meki wi luku den tori disi. Baka dati wi sa ondrosuku fa wi kan kisi a trutru dyaranti fu wan libi di sa waka bun fu têgo.

[Futuwortu]