Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Fa a Bergitaki kan yepi yu fu no abi so furu broko-ede?

Ibri dei, yu ben kan leisi wán fu den prenspari leri fu Yesus di de fu feni na ini a taki dati, noso na wan tra presi na ini den Evangelietori. Te yu e denki dipi fu a leri dati èn te yu e suku fu handri akruderi en, dan dati kan meki yu moro koloku èn yu no sa abi so furu broko-ede moro.—15/12, bladzijde 12-14.

• San na dri bun reide fu san ede gemeente owruman musu leri dinari ini a diniwroko fu teki moro frantwortu?

Fu di a nomru fu Yehovah Kotoigi e gro, dan moro brada de fanowdu fu yepi den sma di no dopu so langa ete, fu go na fesi. Son brada di e dini leki owruman furu langa yari kaba, no man du so furu moro fu di den kon owru noso fu di den kon siki. Èn fu di son owruman abi tra frantwortu na ini na organisâsi, meki den no man du so furu moro na ini a gemeente leki fa den ben gwenti.—1/1, bladzijde 29.

• Fu san ede wi kan taki dati son sma e bribi na ini gado di no de tru?

Furu sma e anbegi den gado fu a bribi fu den, ma den gado disi kande na gado nomo di no man kibri den neleki fa Bâ-al no ben man kibri den anbegiman fu en na ini a ten fu Elia (1 Kownu 18:26, 29; Psalm 135:15-17). Tra sma e anbegi pôpi sma noso sportman, di no man gi den nowan enkri tru howpu gi a ten di e kon. Tra fasi leki dati, Yehovah na wan tru Gado èn a e meki den prakseri fu en kon tru. —15/1, bladzijde 3-5.

• San wi kan leri fu a fasi fa Kain ben piki tapu a warskow di Gado ben gi en?

Gado gi wi wan fri wani, èn wi kan bosroiti fu du san bun, na presi taki wi e du san takru, soleki fa Kain ben du. A Bijbel tori e sori sosrefi taki Yehovah seiker sa krutu den wan di no e sori berow gi den sondu di den du.—15/1, bladzijde 22-23.

• Fu san ede a de tumusi prenspari fu de krin na ini a ten disi?

Fu di a libi e kenki, dan furu sma no e krin den oso so bun moro soleki fa den ben gwenti fosi. Te wi morsu nanga nyanyan sani èn nanga a watra di wi e dringi, dan dati kan meki wi kon siki. Boiti taki wi musu de krin na skin sei, Bijbel e sori sosrefi taki wi musu de krin tu na yeye fasi, na a fasi fa wi e tyari wisrefi, èn sosrefi na a fasi fa wi e denki.—1/2, bladzijde 3-6.

• Paulus ben taki fu den Kotoigi di ben libi bifo Krestes: „Sondro wi den no ben sa kan kon de volmaakti.” Fa so? (Hebrewsma 11:40)

Na a ten fu den dusun yari fu Bijbel, dan Krestes nanga den salfu brada fu en na hemel sa dini leki kownu nanga priester. Den sa meki den sma di kisi wan opobaka nyan bun fu den winimarki fu a lusu-paiman. Na so wan fasi den getrow wan dati, soleki fa Hebrewsma kapitel 11 e kari den, „sa kon de volmaakti”.—1/2, bladzijde 23.

• San Paulus ben wani taki di a taigi den Hebrewsma: „Noiti ete unu ben abi fu feti teleki un brudu fadon”? (Hebrewsma 12:4)

A ben wani taki nanga dati, taki noiti ete a ben de fanowdu gi den fu kakafutu te dede. Son fositen sma ben tan getrow te dede. Den Hebrewsma di Paulus ben skrifi a sani disi gi, no ben kisi tesi te dede. Toku den ben musu gro kon tron lepi sma, èn den ben musu tranga a bribi fu den fu man horidoro, awansi san ben o miti den.—15/2, bladzijde 29.

• Fu san ede a bun fu no taki dati a sari-ati fu Yehovah e meki a retidu fu en lasi krakti?

Yehovah na wan Gado di abi retidu nanga sari-ati, èn te a e sori den fasi disi, dan a wán no e gens a trawan (Exodus 34:6, 7; Deuteronomium 32:4; Psalm 116:5; 145:9). Yehovah no abi fu meki a sari-ati fu en lasi krakti fu di a e sori retidu.—1/3, bladzijde 31.

• A fiti taki wan Kresten e sreka a dedeskin fu wan lobiwan?

Sma e sreka wan dedeskin fu sorgu taki a no e pori. Son sma fu owruten ben e sreka dedeskin, fu di dati ben abi fu du nanga a bribi fu den. Ma dati no de so nanga tru anbegiman (Preikiman 9:5; Tori fu den Apostel 24:15). Te wi ben o sreka wan dedeskin, dan dati ben o meki taki a dedeskin no ben o tron doti baka so esi, wan sani di sa musu pasa te fu kaba (Genesis 3:19). Ma te wet wani taki sma musu sreka dedeskin, noso te son famiriman wani dati, dan wi no abi fu broko wi ede taki a sani disi de kontrari a Wortu fu Gado. Wi no abi fu broko wi ede nanga dati tu te wi musu sreka wan dedeskin fu di son sma musu komoto fu wan farawe presi fu kon beri a dedesma disi.—15/3, bladzijde 18-20.

• Sortu Bijbel eksempre e leri wi taki Gado e gi wan switikon na ala pipel?

Yehovah ben seni a profeiti Yona fu warskow den Ninifeisma, èn Gado ben taigi en fu frustan taki den sma disi ben sori berow. Nanga yepi fu den sani di a ben taki èn ben du, Yesus ben gi sma deki-ati fu handri na wan lobi-ati fasi nanga den Samariasma. Na apostel Petrus nanga na apostel Paulus ben tyari a bun nyunsu go na den sma di no ben de Dyu. Den eksempre disi e sori wi taki wi musu du muiti fu yepi ala sortu sma.—1/4, bladzijde 21-24.