A fasi fa Gado sa dresi malengri sma

PRAKSERI taki brenisma sa si baka, dofu sma sa man yere bun baka, babawsma sa bari singi fu prisiri, èn malengri sma sa tanapu kánkan baka èn den sa man waka lontu! Wi no e taki fu tumusi moi sani di datra sa man du, ma wi e taki fu den sani di Gado srefi sa du gi a libisma famiri. Bijbel e taki na fesi: „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede” (Yesaya 35:5, 6). Ma san kan gi wi a dyaranti taki a tumusi moi profeititori disi sa kon tru?

A fosi sani, na taki di Yesus Krestes ben de na grontapu, dan a dresi sma di ben abi ala sortu siki èn sosrefi sma di ben malengri na ala sortu fasi. Boiti dati, furu sma ben si wan lo fu den wondru fu en, srefi den feanti fu en ben si den wondru disi. Fu taki en leti, wan leisi den gensman fu en ben wani sabi finifini fa Yesus ben dresi wan man, soso fu man gi Yesus porinen. Ma den kisi syen fu di a sani di den ben du ben yepi sma nomo fu kon bribi taki Yesus trutru ben du a wondru dati (Yohanes 9:1, 5-34). Baka dati Yesus du ete wan wondru, èn den no ben man krutu a wondru dati. Fu di den no ben sabi moro fa fu gens Yesus, dan den taki: „San wi musu du, bika a man disi e du furu wondruwroko?” (Yohanes 11:47). Ma den wondru di Yesus ben du, ben abi krakti tapu a pipel, bika furu fu den bigin bribi na ini Yesus.—Yohanes 2:23; 10:41, 42; 12:9-11.

Den wondru fu Yesus e sori fa sma na heri grontapu sa kon betre baka

Den wondru fu Yesus ben sori taki Yesus ben de a Mesias nanga a Manpikin fu Gado. Ma den ben yepi sma sosrefi fu bribi na ini den pramisi di Bijbel e gi taki a libisma famiri di e gi yesi na Gado, sa kon betre baka na ini a ten di e kon. A profeititori na ini Yesaya kapitel 35, di kari na a bigin fu a fosi paragraaf e taki tu fu den pramisi disi. Yesaya 33:24 e taki fu a gosontu di sma di e frede Gado sa abi na ini a ten di e kon: „Nowan sma di e libi drape sa taki: ’Mi siki.’” Openbaring 21:4 e pramisi wan srefi sortu sani tu: „[Gado] sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani [den problema nanga a pina fu a ten disi] pasa kaba.”

Sma e begi doronomo gi a kontru fu den profeititori disi te den e begi a Wi Tata Begi fu Yesus. Wan pisi fu a begi disi na: „Joe kownoekondre moe kom! Joe wani moe go doro na grontapu soleki na ini hemel!” (Mateyus 6:10, Da Bijbel na ini Sranantongo). Iya, Gado en wani sa pasa na grontapu  èn a libisma famiri sa kisi wini fu dati tu. Aladi Gado gi pasi taki sma e malengri èn taki sma e siki, toku wan kaba sa kon na den sani disi heri esi. Den no sa pori Gado en „futubangi” fu ala ten.—Yesaya 66:1. *

Sma kon betre baka sondro taki den ben kisi skin-ati èn sondro taki den ben musu pai

Awansi sortu siki sma ben abi, Yesus ben dresi den sondro taki den ben kisi skin-ati, a ben du dati sondro draidrai, èn sondro taki den ben abi fu pai. A no de fu taki, dati a nyunsu disi prati heri esi, èn a no ben teki langa bifo „bigi ipi sma ben kon na en, èn den ben tyari malengriwan, sma di ben kisi seryusu mankeri, breniwan, babaw-wan nanga furu trawan kon nanga den, èn den ben trowe den nomo na en futu, èn a ben dresi den”. San a pipel ben du leki bakapisi fu dati? Mateyus di ben si den sani disi nanga en eigi ai, ben skrifi: „Na ipi sma ben fruwondru di den ben si taki den babaw-wan ben e taki èn den malengriwan ben e waka èn den breniwan ben e si, èn den ben gi a Gado fu Israel glori.”—Mateyus 15:30, 31.

Prakseri taki den sma di Yesus ben dresi, no ben de spesrutu sma di a ben teki puru kaba na mindri a pipel wan pisi ten na fesi, soleki fa bedrigiman e du dati. Na presi fu dati, den furu famiriman nanga mati fu den sikisma „ben trowe den nomo na [Yesus] en futu, èn a ben dresi den”. Meki wi luku wan tu eksempre baka di e sori krin taki Yesus ben man dresi sma.

Breni sma: Di Yesus ben de na ini Yerusalem, dan a dresi wan man di ben breni „sensi a gebore”. Furu sma na ini a foto ben sabi a man disi leki wan breniman di ben e begi sma moni. Sobun, yu kan frustan a dyugudyugu di ben de di sma si a man disi e waka na ini a foto, aladi a ben man si! Ma a no ala sma ben breiti nanga san Yesus ben du. Wan pisi ten na fesi, Yesus ben tyari na ogridu fu son Fariseiman kon na krin. Den man disi ben de memre fu wan prenspari èn makti Dyu kerkigrupu. Fu di a sani dati ben hati den Fariseiman disi, meki den ben e suku fasi nomonomo fu sori taki Yesus ben e bedrigi sma (Yohanes 8:13, 42-44; 9:1, 6-31). Fu dati ede, den poti wan lo aksi gi a man di Yesus ben dresi. Baka dati den poti aksi gi en papa nanga mama, ne den bigin baka fu poti aksi gi a man. Ma den aksi di den Fariseiman ben poti, ben du noti moro leki fu tyari kon na krin taki Yesus trutru ben du a wondru dati. A sani dati gi den atibron. Fu di a man di ben kon betre no ben man frustan fu san ede den hoigriman disi ben e du so muilek, meki ensrefi ben taki: „Fu sensi owruten, noiti sma yere fu iniwan sma di opo den ai fu wan sma di gebore leki wan breniman. Efu a man disi no ben de fu Gado, dan a no ben o man du noti srefi” (Yohanes 9:32, 33). Fu di a man ben sori a bribi fu en na so wan opregti fasi èn na so wan koni fasi sosrefi, meki den Fariseiman „trowe en go na dorosei”. Dati wani taki dati den puru a man di ben de wan breniman fosi, leki memre fu a snoga.—Yohanes 9:22, 34.

Dofu sma: Di Yesus ben de na ini a Dekapolis, wan kontren na a owstusei fu a Yordanliba, dan „den sma drape tyari wan dofuman kon gi en di no ben man taki bun” (Markus 7:31, 32). Boiti taki Yesus dresi a sma disi, a sori tu taki a ben frustan soifri fa dofusma e firi. A ben sabi taki den sma disi e firi syen son ten te den de na mindri ipi-ipi sma. Bijbel e fruteri wi taki Yesus teki a dofuman „tyari gowe fu na ipi sma go na wan sei” èn a dresi en. Agen den sma di ben de drape ben „fruwondru pasa marki”, èn den taki: „A du ala sani bun. A e meki den dofuwan srefi yere èn den babaw-wan e taki.”—Markus 7:33-37.

Sma di de lan: Di Yesus ben de na ini Kaperna-um, dan sma go na en nanga wan lanman di ben e didon na tapu wan bedi (Mateyus 9:2). Na ini Mateyus 6-8 wi kan leisi san ben pasa. „[Yesus] ben taigi a lanman: ’Opo tanapu, teki yu bedi, èn go na yu oso.’ Èn a ben opo tanapu èn a ben go na en oso. Di den sma si disi, dan den kon frede, èn den gi Gado glori, fu di a ben gi sma a makti disi.” Di Yesus ben du a wondru disi, dan a no den disipel fu en wawan ben de drape, ma den feanti fu en tu. Tra fasi leki den feanti fu Yesus, den disipel fu en ben bribi den wondru disi, fu di den no ben abi bita-ati gi Yesus èn den no ben abi wan takru denki fu en. Fu dati ede den „gi Gado glori” gi a wondru di den ben si.

 Siki sma: „Wan gwasiman ben kon tu na [Yesus], di ben fadon na tapu en kindi srefi fu begi en tangitangi, èn a ben taigi en: ’Efu yu wani nomo, yu kan meki mi kon krin.’ Fu di a ben kisi sari, meki a ben langa en anu èn a ben fasi en, èn ben taigi en: ’Mi wani. Kon krin.’ Èn wantewante a no ben abi gwasi moro” (Markus 1:40-42). A bun fu sabi taki Yesus no ben dresi a man disi na wan fasi di ben sori taki a no ben wani du dati trutru, ma a ben dresi en fu di a ben abi sari-ati gi en. Prakseri taki yu ben de wan gwasiman. Yu ben abi wan takru siki èn a siki dati ben pori yu skin safrisafri, so taki sma na ini a libimakandra ben e wisiwasi yu. Fa yu ben o firi efu wan sma ben dresi yu wantewante fu a siki dati, sondro taki yu e kisi skin-ati? Sondro tweifri yu kan frustan fu san ede wan tra gwasiman di ben kon betre na wan wondru fasi, ben „fadon na tapu en fesi na Yesus en futu, èn a taki en tangi”.—Lukas 17:12-16.

Sma di kisi mankeri: Bifo sma ben grabu Yesus èn spikri en na wan postu, dan a dresi ete wan sma. Dati ben de a lasti wondru di a ben du. Di den ben e tyari Yesus gowe, dan na apostel Petrus kisi atibron èn a handri sondro fu denki. Na apostel disi ’di ben abi wan feti-owru, hari en èn a naki a srafu fu a granpriester èn koti en retisei yesi puru’ (Yohanes 18:3-5, 10). A srefi tori disi skrifi na ini Lukas, èn drape wi e leisi taki Yesus „fasi a yesi èn a meki a kon betre” (Lukas 22:50, 51). Den mati èn sosrefi den feanti fu Yesus, ben si ete wan tron sortu bun sani Yesus ben du fu di a ben abi sari-ati. Disi leisi den feanti fu en ben de den sma di ben grabu en.

Iya, o moro wi e ondrosuku den wondru fu Yesus, o moro wi e si taki den ben de trutru wondru (2 Timoteyus 3:16). Te wi e ondrosuku den wondru disi soleki fa na artikel ben taki na fesi, dan dati sa tranga a bribi di wi abi na ini a pramisi di Gado gi wi taki a sa dresi libisma di e gi yesi na en. Bijbel e taki dati Kresten bribi na „a seiker fruwakti fu sani di wan sma e howpu na tapu, a krin buweisi fu tru sani, ma di sma no e si” (Hebrewsma 11:1). A krin fu si taki Gado no e gi wi deki-ati fu bribi sani sondro taki wi abi buweisi, èn a no e gi wi deki-ati tu fu winsi nomo taki den sani di wi e fruwakti sa kisi wan kontru. Na presi fu dati, Gado e gi wi deki-ati fu abi tranga bribi na ini sani di de tru (1 Yohanes 4:1). Te wi e kisi so wan bribi, dan wi sa si taki wi e kon tranga na yeye fasi, èn wi sa de moro koloku.—Mateyus 5:3; Romesma 10:17.

Sma musu kon betre fosi na yeye fasi!

Furu sma di abi wan bun gosontu no e firi koloku. Sonwan fu den e pruberi fu kiri densrefi fu di den no abi nowan enkri howpu gi a ten di e kon, noso fu di den abi tumusi furu problema. Fu taki en leti, den sma disi siki na yeye fasi. Na Gado ai, a sani disi seryusu moro leki te wan sma malengri na skin sei (Yohanes 9:41). Na a tra sei, furu malengri sma e libi wan koloku libi, neleki Christian nanga Junior di ben kari na ini a fosi artikel. Fu san ede dati de so? Fu di den sma disi tranga na yeye fasi èn den e kisi krakti fu di den abi a trutru howpu di Bijbel e gi.

Yesus ben taki fu a spesrutu nowtu di wi abi leki libisma. A ben taki: „Libisma no musu libi fu brede wawan, ma fu ibri wortu di e kon fu Yehovah en mofo” (Mateyus 4:4). Iya, tra fasi leki meti, libisma abi moro fanowdu leki nyanyan wawan. Fu di Gado meki wi akruderi a „prenki” fu en, meki wi abi yeye nyanyan fanowdu. Dati wani taki dati wi abi sabi fu Gado fanowdu èn wi musu kon sabi san a abi na prakseri gi wi. Boiti dati, wi musu kon sabi tu fu san ede wi musu du a wani fu en (Genesis 1:27; Yohanes 4:34). Te wi e kisi sabi fu Gado, dan dati e gi wi wan moro bun marki na ini a libi èn a e gi wi krakti na yeye fasi. A sabi disi kan gi wi na okasi sosrefi fu kisi têgo libi na ini wan paradijs grontapu. Yesus ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes.”—Yohanes 17:3.

A bun fu sabi taki den sma di ben libi na a ten fu Yesus, no ben e kari en „Dresiman”, ma den ben kari en „Leriman” (Lukas 3:12; 7:40). Fu san ede? Fu di Yesus ben gi sma leri fu a sani di ben o lusu den problema fu libisma fu ala ten. Dati na a Kownukondre fu Gado (Lukas 4:43; Yohanes 6:26, 27). Yesus Krestes na a tiriman fu a hemel tirimakti disi di sa tiri a heri grontapu. A tirimakti disi sa meki taki ala den pramisi fu Bijbel e kon tru. Spesrutu den pramisi di e sori taki reti-ati libisma sa kon betre baka èn taki a grontapu fu den sa seti kon bun baka. Èn disi sa de fu ala ten (Openbaring 11:15). Fu dati ede, Yesus e sori na ini a Wi Tata Begi, taki a Kownukondre fu Gado abi fu du  nanga a wani fu Gado di o pasa na heri grontapu.—Mateyus 6:10.

Furu malengri sma di kon leri sabi a tumusi moi howpu disi, no e sari moro. Na presi fu dati, den e firi prisiri srefisrefi (Lukas 6:21). Fu taki en leti, boiti taki Gado sa dresi malengri sma èn sosrefi sma di abi tra siki, a sa du moro srefi. A sa tyari wan kaba kon na a soifri sani di e meki taki libisma e kon siki. Dati na sondu srefi. Iya, Yesaya 33:24 nanga Mateyus 9:2-7, di ben kari kaba na fesi, e sori taki libisma e siki fu di den na sondu sma (Romesma 5:12). Fu dati ede, te sondu no de moro, dan a libisma famiri „sa kon fri tu fu a katibo fu porifasi èn den sa abi a glori fri fu den pikin fu Gado”, te fu kaba. A fri disi wani taki dati den sa abi wan volmaakti frustan nanga wan volmaakti skin.—Romesma 8:21.

Den sma di abi wan bun gosontu kan frigiti makriki o warti a sani dati de. Ma dati no de so nanga den sma di e ondrofeni takru bakapisi fu di den malengri. Den sabi soifri o warti wan bun gosontu de èn o warti a libi de. Den sabi sosrefi fa sani kan kenki wantronso sondro taki den e fruwakti dati (Preikiman 9:11). Fu dati ede, wi e howpu taki den malengri sma di e leisi a tijdschrift disi sa poti spesrutu prakseri na den tumusi moi pramisi di skrifi na ini Bijbel. Yesus ben gi en libi fu sorgu taki den pramisi dati e kisi wan kontru. Disi na a moro bun dyaranti di wi kan abi!—Mateyus 8:16, 17; Yohanes 3:16.

[Futuwortu]