Malengri sma de na heri grontapu

CHRISTIAN na wan sma di e libi na ini wan Afrikan kondre. Wan dei srudati teki en tyari gowe nanga tranga èn den dwengi en fu go feti na ini a legre. Ma Christian weigri fu tron wan srudati fu di a konsensi fu en ben piki en taki dati no ben e kruderi nanga Bijbel. Ne den srudati teki en tyari go na wan srudati kampu èn den fon en fo dei langa. Baka dati wan fu den srudati sutu en na ini en futu nanga wan gon. Christian ben man go na wan ati-oso, ma den ben musu koti en futu puru te na ondro en kindi. Na ini wan tra Afrikan kondre, srefi pikin-nengre lasi den anu noso den futu fu di ogri-ati fetiman ben koti den puru. Èn fu Kambodya te go miti den Balkan Staten, fu Afganistan te go miti Angola, landmijn di sma e poti na ini a gron e meki taki yongusma nanga owrusma e tan lasi den anu noso den futu fu den.

Tra sani di e meki taki sma e kon malengri, na den mankeri nanga den siki di den e kisi, siki soleki sukrusiki. Te sani di no bun gi a gosontu de na ini a loktu, dan dati srefi kan meki tu taki sma e kon malengri. Fu gi wan eksempre, na ini wan tu kontren di de krosibei fu wan foto na ini Owstu Europa, wan tu pikin gebore sondro na ondrosei pisi fu wan fu den anu fu den. Den abi soso wan kundu na ondro a baka-anu fu den. Soleki fa buweisi e sori, dan den pikin disi gebore so fasi fu di sani di no bun gi a gosontu, pori a loktu drape. Wan lo tra sma abi anu nanga futu, ma den no man gebroiki den fu di den lan, noso fu di den abi wan tra siki. Iya, malengri sma de na heri grontapu.

Awansi fa wan sma kon malengri, a sani dati kan gi en furu sari. Di Junior ben abi 20 yari, dan a lasi en kruktu-sei futu. A ben taki bakaten: „Mi ben e sari fu tru. Mi no ben man kaba krei taki mi lasi mi futu fu ala ten. Mi no ben sabi san fu du.” Ma baka wan pisi ten, Junior kisi wan heri tra denki. A bigin studeri Bijbel èn a leri sani di yepi en fu kakafutu gi a problema fu en. Boiti dati, den sani di a ben leri, gi en a moi howpu fu wan koloku libi, leti dyaso na grontapu. Efu yu na wan malengri sma, yu ben sa wani abi a howpu dati tu?

Efu dati de so, dan grantangi leisi na artikel di e kon now. A ben o bun fu luku den tekst na ini yu eigi Bijbel. Na so wan fasi, yusrefi sa man si san a Mekiman sa du gi den sma di e kon sabi san a abi na prakseri èn e seti den libi akruderi a prakseri dati.