Ondrofenitori

Wi leri den pikin fu wi fu lobi Yehovah nanga den heri ati

SOLEKI FA WERNER MATZEN FRUTERI

Wan tu yari pasa, Hans Werner, a moro owru manpikin fu mi, gi mi wan Bijbel. Na inisei fu a kafti a ben skrifi: „Mi lobi papa, meki a Wortu fu Yehovah tan tiri wi leki wan osofamiri na tapu a pasi fu libi. Nanga tangi na ati, yu moro owru manpikin.” Tra papa nanga mama sa frustan fa den wortu disi ben furu mi ati nanga tangi èn nanga prisiri. Na a ten dati mi no ben sabi srefisrefi sortu tyalensi wi leki osofamiri ben sa ondrofeni ete.

MI GEBORE na ini 1924 na ini a foto Halstenbek, di de sowan 20 kilometer fu a lanpresi fu Hamburg na ini Doisrikondre. Drape mi mama nanga mi granpapa kweki mi. Baka di mi ben wroko wan pisi ten na wan presi fu leri meki wrokosani, dan na ini 1942 den kari mi fu tron srudati fu a Wehrmacht, a legre fu a kondre. Mi ben go na ini a feti di Doisrikondre ben feti nanga Rosiakondre na a ten fu a di fu Tu Grontapufeti. Mi no man taki srefi fu ala den ogri-ati sani di mi ondrofeni na a ten dati. Mi ben kisi tyfus, wan sortu siki di e gi bun hebi korsu, ma baka di mi kon betre baka den ben seni mi go baka na ini a feti. Na ini yanuari 1945, mi ben de na ini Lodz, wan foto na ini Polen, pe den ben poti mi na ini wan srudati ati-oso fu di mi ben kisi bun hebi mankeri. Mi ben de drape ete di na orloku ben kon na wan kaba. Na ini na ati-oso dati èn bakaten na ini a strafuman-kampu na ini Neuengamme, mi ben abi nofo ten fu sidon denki dipi fu a libi. Wan lo aksi ben de di ben e moro mi; aksi soleki: Wan Gado de trutru? Efu dati de so, dan fu san ede meki a e gi pasi taki so furu ogri-ati sani e pasa?

Na ini september 1947 den ben lusu mi fu a strafuman-kampu. Syatu baka dati mi trow nanga Karla. Wi ben kweki na ini a srefi foto, ma Karla ben de wan Lomsu, aladi mi no ben kweki nanga kerki. A priester di trow wi ben taigi wi taki a ben sa bun gi wi fu begi a Wi Tata Begi  makandra, ibri neti. Wi du san a ben taigi wi, aladi wi no ben frustan trutru fu san wi ben e begi.

Wan yari baka dati Hans Werner ben gebore. Na ini a srefi pisi ten dati Wilhelm Ahrens, wan man di mi ben wroko makandra nanga en, meki mi kon sabi Yehovah Kotoigi. Nanga yepi fu Bijbel a ben sori mi taki wan dei o kon dati orloku no sa de moro (Psalm 46:9). Na a kabapisi fu a yari 1950, mi gi mi libi abra na Yehovah èn mi teki dopu. Wan yari baka dati mi lobi wefi teki dopu tu. Dati ben gi mi bigi prisiri!

Kweki pikin leki fa Yehovah wani

Mi ben kon leisi na ini Bijbel taki a trowlibi na wan seti fu Yehovah (Genesis 1:26-28; 2:22-24). Fu di mi ben de makandra nanga mi wefi di a ben meki den pikin fu wi, Hans Werner, Karl-Heinz, Michael, Gabriele, nanga Thomas, dan dati gi mi moro krakti fu hori misrefi na a bosroiti di mi ben teki fu de wan bun masra nanga wan bun papa. Mi nanga mi wefi Karla ben breiti srefisrefi nanga ibriwan fu den pikin fu wi.

A kongres fu Yehovah Kotoigi di ben hori na Neurenberg na ini a yari 1953, ben prenspari srefisrefi gi wi osofamiri. Freida bakadina, wan lezing ben hori di ben nen, „Kweki pikin na ini a nyun grontapu libimakandra”. Na ini a lezing dati a takiman ben taki wan sani di wi noiti no frigiti: „A moro bigi sani di wi kan gi wi pikin na fu kon de sma di e angri fu de futuboi fu Gado.” Nanga a yepi fu Yehovah, mi nanga Karla ben wani meki muiti fu du a sani dati tu. Ma fa?

Na a fosi presi wi ben teki en leki wan gwenti fu begi makandra leki osofamiri, ibri dei. Dati ben yepi wi pikin fu kon frustan taki begi na wan prenspari sani. Ibriwan fu den pikin ben leri frukufruku kaba taki wi musu begi fosi wi nyan. Srefi di den ben de nyofi-pikin ete, dan a momenti di den ben e si a beibi-batra fu den, den ben e boigi den ede èn den ben e fow den pikin anu fu begi. Wan leisi wi ben kisi kari fu go na wan trowfesa. Den sma di ben e trow ben de famiriman fu a wefi fu mi, ma den no ben de Kotoigi. Baka a trow den kari den fisitiman fu go nyan wan tu switisani na a oso fu a papa nanga a mama fu a trowmisi. Ala sma ben wani bigin nyan wantewante. Ma Karl-Heinz, a boi fu wi di ben abi feifi yari, no ben feni taki a fiti fu du dati. „Grantangi begi gi unu fosi”, na so a ben taki. Den fisitiman luku a boi fosi, dan den luku wi, èn te fu kaba den drai luku a sma di ben gi wi a kari. Fu no meki nowan sma firi syen, dan mi aksi efu mi ben kan begi fosi wi nyan, èn a sma di ben kari wi kon ben feni dati bun.

A sani dati memre mi na den wortu fu Yesus di a ben taki: „Nanga a mofo fu nyofi pikin nanga a di fu pikin di de na bobi ete, yu meki den prèise yu” (Mateyus 21:16). Wi sabi taki a begi di wi begi doronomo èn fayafaya, makandra nanga den pikin fu wi, ben yepi den pikin fu si Yehovah leki a lobi-ati hemel Tata fu den.

 A frantwortu di wi abi na Yehovah

Fu leri pikin fu lobi Gado, wani taki tu dati wi musu tan leisi èn studeri a Wortu fu en makandra nanga den. Nanga disi na prakseri wi ben seti sani fu abi wan osofamiri-studie, ibri wiki, moro furu tapu munde neti. Fu di a moro owruwan nanga a moro pikinwan fu den pikin fu wi e difrenti sowan neigi yari, meki den pikin ben e difrenti sosrefi na ini den sani di den ben abi fanowdu. Fu dati ede meki a no alaten wi ben man studeri den srefi tori makandra nanga ala den pikin.

Leki eksempre, nanga den pikinwan di no ben e go na skoro ete, wi ben e taki soso fu den prenspari sani di makriki fu frustan. Karla ben e luku soso wán bijbeltekst nanga den, noso a ben e leri den nanga yepi fu den prenki na ini den Bijbel publikâsi. Te now ete mi e prakseri nanga prisiri fu a ten dati, di den moro yongu pikin ben e kren kon na tapu wi bedi fruku mamanten fu kon sori wi den prenki di den ben lobi srefisrefi na ini a buku The New World (A nyun grontapu). *

Karla ben kon kisi a koni fu leri den pikin nanga furu pasensi fu den furu sani di e sori fu san ede wi alamala musu lobi Yehovah. Kande a sani dati gersi wan makriki sani fu du, ma a ben de wan hebi wroko gi mi nanga Karla fu man du dati, fu di wi ben abi fu gi furu fu wisrefi. Toku wi no ben gi abra. Wi ben wani fu poti bun sani na ini na ati fu wi pikin, bifo tra sma di no sabi Yehovah ben o bigin abi krakti na den tapu. Fu dati ede, wi ben wani nomonomo taki den pikin fu wi ben musu de na wi osofamiri-studie, so esi leki den ben bigi nofo fu man sidon.

Leki papa nanga mama, mi nanga Karla ben si o prenspari a de fu gi den pikin fu wi a yoisti eksempre na ini sani di abi fu du nanga na anbegi fu Gado. Awinsi san wi ben e du, efu wi ben e nyan, efu wi ben e wroko makandra na ini a dyari, noso efu wi ben e koiri, alaten wi pruberi fu yepi ibriwan fu den pikin fu wi aparti fu tron moro bun mati fu Yehovah (Deuteronomium 6:6, 7). Wi sorgu taki fu sensi den yongu yari, ibriwan fu den pikin ben abi en eigi Bijbel. Sosrefi, te wi ben e kisi den tijdschrift fu wi, dan mi ben e skrifi a nen fu ibriwan memre fu na osofamiri na tapu en eigi tijdschrift. Na a fasi dati den leri den pikin fu sabi sortuwan fu den buku noso tijdschrift na fu den. Wi ben kon nanga a prakseri fu gi den pikin a frantwortu fu leisi son pisi fu Ontwaakt! Baka a brekten nyanyan te sonde, dan den ben e fruteri san den ben frustan fu a pisi tori di den ben leisi.

Wi poti prakseri na san den pikin ben abi fanowdu

A no de fu taki dati sani no ben e waka bun alaten. O moro den pikin ben e gro kon bigi, o moro wi ben e kon frustan taki fu leri den pikin fu lobi Yehovah nanga den heri ati, ben wani taki dati wi ben musu kon sabi fosi san ben de kaba na ini na ati fu den. Dati ben wani taki dati wi ben musu arki den. Son ten den pikin fu wi ben e firi taki sani no ben e waka bun èn taki den ben abi fu kragi fu dati. Sobun, mi nanga Karla ben e sidon taki nanga den fu a tori. Na a kaba fu wi osofamiri-studie wi ben poti wan spesrutu afu yuru fu man taki nanga makandra fu iniwan problema di den ben abi. Iniwan sma ben abi a reti fu taki fri fa a e firi.

Fu eksempre, den tu moro pikinwan, Thomas nanga Gabriele, ben feni taki wi leki papa nanga mama ben lobi fu teki a sei fu a bigi brada fu den. Wan leisi den ben taki krin: „Pâ, wi denki taki yu nanga mama alaten e gi Hans Werner na okasi fu du san a wani.” Di den taki a sani dati mi no ben man bribi san mi ben e yere. Ma baka di mi nanga Karla luku a tori sondro fu krutu sani na fesi, dan wi ben abi fu agri taki den pikin ben abi leti. Sobun, wi bigin meki moro muiti baka dati fu luku den alamala na a srefi fasi.

Son ten mi strafu den pikin sondro fu denki fosi èn sondro taki mi ben abi leti. Na den okasi dati wi leki papa nanga mama ben abi fu leri fu aksi den pikin pardon. Baka dati, wi ben e begi Yehovah makandra. A ben prenspari taki den pikin leri dati a papa fu den ben de klariklari fu aksi Yehovah pardon èn fu aksi den leki pikin pardon tu. Leki bakapisi fu dati wi ben abi wan switi èn krosibei matifasi nanga den. Furu leisi den taigi wi: „Unu na den moro bun mati di wi abi.” Dati ben meki wi firi koloku trutru.

Te wan osofamiri e wroko makandra, dan dati  e tyari wánfasi kon. Fu dati ede ibriwan sma ben abi en wroko fu du na ini na oso. Hans Werner ben kisi a frantwortu fu go na wenkri, wán leisi na ini wan wiki fu bai den sani di wi ben abi fanowdu. Dati meki furu tron wi ben e gi en wan pisi papira nanga den sani di a ben musu bai èn a ben e kisi moni fu bai den tu. Wan leisi wi no ben gi en a pisi papira èn wi no ben gi en moni tu. Dati meki a go aksi en mama san pasa, èn en mama taigi en taki wi no ben abi moni ete. We, den pikin bigin syusyu nanga densrefi, èn dan den alamala teki den boksu pe den ben e kibri moni èn den kanti ala moni di ben de na ini na tapu tafra. Ne den alamala bari: „Mama, now wi kan go bai den sani!” Iya, den pikin ben leri fu yepi tu te wi ben de na ini nowtu, èn disi ben meki taki na osofamiri kon abi wan moro tranga matifasi nanga makandra.

Di den boi ben e kon moro owru, dan den ben e bigin luku umapikin. Fu eksempre, Thomas ben kon lobi wan Kotoigi pikin di ben abi 16 yari. Mi ben fruteri en taki efu a ben wani na umapikin dati trutru, dan a ben musu man trow nanga en èn a ben musu man tyari a frantwortu fu sorgu wan wefi nanga pikin. Ne, Thomas kon si taki a no ben o man tyari a frantwortu fu wan trowlibi ete, fu di a ben abi 18 yari nomo.

Wi go na fesi leki osofamiri

Aladi den pikin ben yongu ete, toku a wan pikin baka a trawan ben kon de na a Theokrasia Diniwroko-skoro. Wi ben e arki den takimakandra fu den nanga ala wi prakseri, èn dati ben e gi wi deki-ati trutru fu si taki den pikin kon lobi Gado nanga den heri ati. Den kringopziener nanga den distriktopziener di ben e kon tan na wi oso wanwan leisi, ben e fruteri wi fu sani di densrefi ben ondrofeni, noso den ben e leisi pisi fu Bijbel gi wi. Den brada disi nanga den wefi fu den ben yepi wi fu meki lobi gi a furuten diniwroko teki rutu na ini na ati fu wi leki osofamiri.

Wi ben e angri fu go na den kongres. Den kongres disi ben de prenspari yepisani gi wi, fu di den yepi wi fu doro na ati fu den pikin so taki den ben kan kisi na angri fu tron futuboi fu Gado. Gi den pikin a ben de wan prenspari momenti te den ben e weri den lapelkarta, fu go na a presi pe a kongres e hori. A ben naki wi ati srefisrefi di Hans Werner teki dopu di a ben abi tin yari. Son sma ben feni taki a ben yongu tumusi fu gi ensrefi abra na Yehovah. Ma now di a abi 50 yari, a e fruteri mi taki a breiti srefisrefi taki a ben man dini Yehovah 40 yari langa.

Aladi wi leri den pikin fu wi taki fu abi wan matifasi nanga Yehovah na wan tumusi prenspari sani, toku wi noiti no dwengi den fu gi densrefi abra na en. Ma wi ben breiti srefisrefi di den tra pikin fu wi ben go na fesi, teleki densrefi ben bosroiti fu teki dopu te fu kaba.

Wi leri fu trowe wi hebi na Yehovah tapu

Na ini 1971, Hans Werner ben kaba a di fu 51 klas fu a Waktitoren Bijbelskoro Gilead, èn den ben seni en go leki zendeling na Spanyorokondre. Dati ben meki wi breiti srefisrefi. Safrisafri, ala den pikin fu wi dini na ini a furuten diniwroko fu wan pisi ten èn dati gi wi leki papa nanga mama bigi prisiri tu. Na a ten dati Hans Werner gi mi a Bijbel di mi taki fu en na a bigin fu a  tori disi. A ben gersi leki wi ben koloku trutru leki osofamiri.

Ne wi kon si taki a ben de fanowdu fu abi wan moro steifi matifasi nanga Yehovah srefi. Fu san ede? Fu di wi kon si fa wan tu fu den pikin fu wi di ben gro kon bigi kaba, ben e bigin kisi problema di ben de wan trutru tesi gi a bribi fu den. Fu eksempre a lobi umapikin fu wi di nen Gabriele, ben kisi hebi problema. Na ini 1976 a ben trow nanga Lothar. Syatu baka di den trow, Lothar ben kon siki. Safrisafri a ben e kon swaki moro nanga moro. A heri pisi ten dati Gabriele sorgu en, teleki a dede. Di wi kon si fa wan memre fu na osofamiri di ben gosontu fosi ben kon siki èn dede, dan dati ben meki wi prakseri baka o tranga wi abi a yepi fu Yehovah fanowdu.—Yesaya 33:2.

Grani di wi kisi na ini Yehovah organisâsi

Di den ben poti mi leki gemeente dinari (now wi e kari so wan brada a fesiman opziener) na ini 1955, mi no ben feni taki mi ben abi nofo ondrofeni fu man teki a frantwortu dati. Furu wroko ben de fu du, èn a wan-enkri fasi fa mi ben kan du ala den sani disi makandra, ben de taki son ten mi ben musu wiki fo yuru mamanten. Mi wefi nanga den pikin ben e horibaka gi mi trutru. Den ben e sorgu taki noti no ben puru mi prakseri na den neti yuru di mi ben abi furu fu du.

Toku wi ben du ala san wi man leki osofamiri fu abi prisiri demakandra. Son leisi a wrokobasi fu mi ben e gi mi a wagi fu en, so taki mi ben kan tyari mi osofamiri fu go koiri. Den pikin ben lobi en srefisrefi te wi ben go na ini a busi èn wi ben studeri A Waktitoren makandra drape. Sosrefi wi ben e kren bergi makandra. Son ten wi ben e waka e singi makandra na ini busi, aladi mi ben e prei poku tapu mi harmonika (wan sani di yu musu bro na tapu fu prei poku).

Na ini 1978, den ben poti mi fu du diniwroko leki wan sma di e teki presi gi a kringopziener (wan owruman di e teki waka go na difrenti presi). Fu di a grani dati ben e moro mi pikinso, meki mi taigi Yehovah na ini begi: „Yehovah, mi firi leki mi no sa man du a sani disi. Ma efu yu wani taki mi musu pruberi fu du en, dan mi de klariklari fu du ala san mi man.” Tu yari baka dati, di mi ben abi 54 yari, dan mi libi a pikin bisnis di mi ben abi gi Thomas, a moro yongu manpikin fu mi.

Fu di ala den pikin fu wi ben gro kon bigi kaba, meki mi nanga Karla ben abi na okasi fu du moro gi Yehovah. A srefi yari dati den poti mi na wroko leki kringopziener èn den seni mi fu wroko a pisi kontren fu Hamburg, nanga a heri kontren fu Schleswig-Holstein. Fu di wi ben abi ondrofeni nanga a kweki fu pikin, meki wi ben man yepi den papa nanga mama nanga den pikin fu den moro bun.

Baka di Karla ben wroko makandra nanga mi tin yari langa na ini a wroko leki kringopziener, dan a kon siki èn datra ben abi fu koti en. Na ini a srefi yari dati datra kon si taki mi ben abi wan takru sweri na mi edetonton. Fu dati ede mi ben abi fu tapu nanga mi wroko leki kringopziener fu go na ati-oso, so taki datra ben kan koti a sweri. A ben teki dri yari bifo mi ben man dini baka leki wan sma di e teki presi gi kringopziener. Now mi nanga Karla pasa 70 yari èn wi no e teki waka moro fu go na difrenti gemeente. Yehovah yepi wi fu frustan taki a no bun fu tan hori wan grani te wi no man tyari a frantwortu fu dati moro.

Now di mi nanga Karla e sidon prakseri fa wi libi waka, dan wi e gi Yehovah tangi taki a ben yepi wi fu leri den pikin fu wi fu lobi a waarheid nanga den heri ati (Odo 22:6). Na ini ala den yari di pasa Yehovah tiri wi èn a gi wi leri, iya, a yepi wi fu tyari wi frantwortu. Aladi wi kon owru èn wi kon siki, toku a lobi fu wi gi Yehovah faya ete èn a kon moro tranga leki iniwan ten na fesi.—Romesma 12:10, 11.

[Futuwortu]

[Prenki na tapu bladzijde 26]

Na osofamiri fu wi e waka na a syoro fu Elbeliba na ini Hamburg, 1965

[Prenki na tapu bladzijde 28]

Wan tu memre fu wi osofamiri tapu na internationaal kongres na Berlijn na ini 1998

[Prenki na tapu bladzijde 29]

Mi nanga mi wefi, Karla