Yehovah no lobi bedrigifasi kwetikweti
Yehovah no lobi bedrigifasi kwetikweti
’Unu no musu handri na wan bedrigi fasi nanga makandra.’—MALEAKI 2:10.
1. San Gado wani taki wi musu du fu man kisi têgo libi?
YU WANI libi fu têgo? Efu yu e bribi na ini a howpu dati di Bijbel e pramisi wi, dan kande yu sa taki ’Iya, mi wani dati’. Ma efu yu wani taki Gado e gi yu na okasi fu libi fu têgo na ini en nyun grontapu, dan yu sa abi fu doro den markitiki fu en (Preikiman 12:13; Yohanes 17:3). A de so taki Yehovah e aksi tumusi furu fu sondu libisma fu di a wani den fu doro den markitiki fu en? Nôno, fu di a e gi wi a deki-ati disi: „Na lobi bun-ati mi feni bun, èn no ofrandi; èn a sabi fu Gado na presi fu bron-ofrandi” (Hosea 6:6). Sobun, srefi wi leki libisma di e meki fowtu, kan doro den markitiki fu Gado.
2. Fa furu Israelsma ben handri na wan bedrigi fasi nanga Yehovah?
2 Ma a no ala sma de klariklari fu du a wani fu Yehovah. Hosea ben sori taki srefi wan bigi grupu Israelsma no ben wani du dati. A heri nâsi ben agri fu sroto wan frubontu, noso wan kruderi, taki den ben o gi yesi na den wet fu Gado (Exodus 24:1-8). Ma heri esi den ben sori taki den no ben e ’lespeki a frubontu’, bika den ben e broko den wet fu en. Fu dati ede, Yehovah ben taki dati den Israelsma dati ben „handri na wan bedrigi fasi” nanga en (Hosea 6:7). Èn furu sma handri na so wan fasi nanga en sensi a ten dati. Ma Yehovah no lobi bedrigifasi kwetikweti. Iya, a no lobi en te sma e handri na so wan fasi nanga en, noso nanga den sma di lobi en èn e dini en.
3. Sortu tori na artikel disi sa taki finifini fu en?
3 Hosea no ben de a wan-enkri profeiti di ben tyari kon na krin fa Gado e denki fu bedrigifasi, èn wi musu kisi a srefi denki dati efu wi wani libi wan koloku libi. Na ini na artikel na fesi, wi ben bigin kaba fu taki finifini fu a profeiti boskopu fu Maleaki, fu di wi bigin nanga a fosi kapitel fu a buku fu en. Now meki wi luku a di fu tu kapitel fu a buku dati di e poti moro prakseri na a fasi fa Gado e denki fu bedrigifasi. Maleaki ben e taki fu a fasi fa sani ben waka na mindri a pipel fu Gado someni tenti yari baka di den ben drai baka fu katibo na ini Babilon. Toku wi na ini a ten disi kan leri furu fu a di fu tu kapitel dati.
Den priester abi fowtu
4. Sortu warskow Yehovah ben gi den priester?
4 Kapitel 2 e bigin taki fu a krutu di Yehovah e krutu den priester fu di den gowe libi a bun pasi fu en. Efu den priester no ben gi yesi na a rai di a ben gi den, èn efu den no ben kenki den pasi fu den, dan seiker den ben o ondrofeni den takru bakapisi fu dati. Luku den fosi tu vers: „’A komando disi na gi unu, o priester. Efu unu no wani arki, èn efu unu no wani prakseri fu gi glori na mi nen’, Yehovah fu den legre taki, ’dan seiker mi sa seni sosrefi a fluku na unu tapu, èn mi sa fluku den blesi fu unu’.” Efu den priester ben leri a pipel den wet fu Gado, èn efu den ben hori densrefi na den wet dati, dan den ben o kisi blesi. Ma fu di den ben weigri fu poti prakseri na a wani fu Gado, meki wan fluku ben o kon na den tapu na presi fu blesi. Srefi te den priester ben o taki wan blesi, dan dati ben o tron wan fluku.
5, 6. (a) Fu san ede spesrutu den priester ben abi fowtu? (b) Fa Yehovah ben sori taki a ben wisiwasi den priester?
5 Fu san ede a ben de so taki spesrutu den priester ben abi fowtu? Vers 7 e sori wi krin fu san ede dati ben de so: „Den mofobuba fu wan priester musu kibri sabi, èn sma musu suku a wet na en mofo; bika en na a boskopuman fu Yehovah fu den legre.” Moro leki wán dusun yari na fesi, den wet di Gado ben gi Israel nanga yepi fu Moses ben taki dati den priester ben abi a frantwortu „fu leri den manpikin fu Israel ala den wet di Yehovah ben taigi den” (Lefitikus 10:11). A sari fu si, taki bakaten a skrifiman fu 2 Kroniki 15:3 ben skrifi: „Den dei ben furu di Israel ben de sondro wan tru Gado èn sondro wan priester di ben leri sma èn sondro Wet.”
6 Na so a ben de tu nanga den priester na a ten fu Maleaki na ini a di fu feifi yarihondro b.G.T. Den no ben e leri a pipel a Wet fu Gado. Dati meki a ben fiti taki Gado ben aksi frantwortu fu den priester dati. Luku den krakti wortu di Yehovah e gebroiki fu krutu den. Maleaki 2:3 e taki: „Mi sa fringi kunkun na tapu un fesi, a kunkun fu den fesa fu unu.” Yehovah trutru ben atibron nanga den priester! A kunkun fu den meti di den ben tyari leki srakti-ofrandi, ben musu tyari go na dorosei fu a kampu èn sma ben musu bron en (Lefitikus 16:27). Ma te Yehovah e fruteri den taki a ben o fringi a kunkun na tapu den fesi fu den, dan dati e meki wi frustan krinkrin taki a ben wisiwasi den srakti-ofrandi disi, èn taki a no ben wani den. Yehovah ben denki a srefi fu den sma di ben e tyari den srakti-ofrandi disi.
7. Fu san ede Yehovah ben atibron nanga den leriman fu a Wet?
7 Hondrohondro yari bifo a ten fu Maleaki, Yehovah ben gi den Leifisma a frantwortu fu sorgu gi a tabernakel. Baka dati den ben musu sorgu gi a tempel èn den ben musu du santa diniwroko gi Yehovah sosrefi. Den ben de den leriman fu a nâsi Israel. Efu den ben du den wroko di den ben kisi, dan dati ben o tyari libi nanga vrede kon gi den èn gi a nâsi sosrefi (Numeri 3:5-8). Ma den Leifisma no ben lespeki Gado moro soleki fa den ben lespeki en fosi. Fu dati ede Yehovah ben taigi den: „Unu gowe libi a pasi. Unu meki taki furu sma misi fu du san a wet e taki. Unu pori a frubontu fu Leifi . . . Unu no ben e handri akruderi den pasi fu mi” (Maleaki 2:8, 9). Fu di den priester disi no ben leri sma a waarheid èn fu di den no ben de wan bun eksempre, meki furu fu den Israelsma ben kon bribi falsi sani. Fu dati ede Yehovah ben abi leti fu atibron nanga den.
Wi musu hori wisrefi na den markitiki fu Gado
8. A de so taki Gado e aksi tumusi furu fu libisma fu di a wani den fu doro den markitiki fu en? Fruklari disi.
8 Wi no musu denki taki Gado ben musu abi sari-ati gi den priester, noso taki a ben musu gi den pardon fu di den ben de sondu sma di no ben man doro den markitiki fu en. Fu taki en leti, libisma man hori den komando fu Gado, bika Yehovah no e aksi den fu du sani di den no man du. A no de fu taki dati wan tu priester na ini a ten dati ben e hori densrefi trutru na den markitiki fu Gado, èn wi de seiker fu wán sma di ben du dati bakaten. A sma dati na Yesus, a bigi „granpriester” (Hebrewsma 3:1). Wi trutru kan taki disi fu en: „A wet fu waarheid srefi ben de na ini en mofo, èn sma no ben feni nowan bedrigifasi na tapu en mofobuba. Na ini vrede nanga opregtifasi a ben waka nanga mi, èn den sma di a ben drai baka fu sondu ben de furu.”—Maleaki 2:6.
9. Suma leri trawan a waarheid fu Bijbel na wan getrow fasi na ini a ten disi?
9 Den salfu brada fu Krestes di abi a howpu fu libi na ini hemel, de heri tra fasi leki den priester na ini a ten fu Maleaki. Moro leki wán hondro yari kaba, den brada disi dini leki ’wan santa priestergrupu, fu tyari srakti-ofrandi na yeye fasi di Gado feni bun’ (1 Petrus 2:5). Den e tyari a frantwortu fu leri trawan tru tori fu Bijbel. Di yu leri den tru tori di den e leri sma, dan yu no kon si taki a wet fu waarheid de na ini a mofo fu den salfu brada disi? Fu di den yepi furu sma fu drai baka gi falsi leri, meki nownowde milyunmilyun sma na heri grontapu kon sabi tru tori fu Bijbel. Boiti dati, den kisi a howpu fu libi fu têgo. Now den sma disi sosrefi abi a grani fu leri milyunmilyun tra sma fu a wet fu waarheid.—Yohanes 10:16; Openbaring 7:9.
Wi musu luku bun
10. Fu san ede wi musu luku bun nanga san wi e taki?
10 Toku wi musu luku bun. A ben kan de so taki wi no e frustan den sani di Maleaki 2:1-9 e leri wi. Wi e luku bun taki sma no e feni nowan bedrigifasi na tapu wi mofobuba? Fu gi wan eksempre, a de so taki den famiriman fu wi trutru kan frutrow san wi e taki? Den brada nanga sisa na ini a gemeente kan frutrow wi tu? Heri esi wi ben sa man kisi a gwenti fu taki sani na so wan fasi taki den gersi tru tori, aladi wi e kori trawan. Wan sma ben sa kan meki bigi sosrefi fu wan bisnis afersi, noso a ben kan kibri wan tu finifini tori di abi fu du nanga na afersi disi. Yehovah no ben o si dati? Èn efu wi ben o du den sortu sani disi, dan yu denki taki Yehovah ben o breiti nanga den srakti-ofrandi fu prèise di e komoto fu wi mofobuba?
11. Sortu sma spesrutu musu luku bun?
11 Maleaki 2:7 musu de wan warskow gi brada di abi a grani fu gi sma leri na ini a gemeente. A tekst e taki dati den mofobuba fu den „musu kibri sabi, èn sma musu suku a wet” na den mofo. Den sortu leriman disi abi bigi frantwortu, fu di Yakobus 3:1 e sori taki den „sa kisi wan moro hebi krutu”. Aladi den musu gi sma leri na wan krakti fasi èn nanga faya sosrefi, toku den sani di den e leri sma musu komoto fu a Wortu fu Gado èn den musu kruderi nanga a rai di na organisâsi fu Yehovah e gi. Na so fasi den sa „koni nofo fu leri tra sma”. Dati meki den e kisi a rai: „Du ala san yu man fu sori yusrefi na Gado leki wan sma di a feni bun, leki wan wrokoman di no abi fu syen fu noti, di e gebroiki a wortu fu waarheid na wan reti fasi.”—2 Timoteyus 2:2, 15.
12. San den sma di e gi trawan leri musu hori bun na prakseri?
12 Efu wi no e luku bun, dan wi ben sa kan moksi wi eigi denki nanga den sani di wi e leri tra sma. A sani dati ben kan tyari problema kon spesrutu gi wan sma di e frutrow tumusi tapu en eigi denki, srefi te a denki dati no e kruderi nanga den sani di na organisâsi fu Yehovah e leri wi. Ma Maleaki kapitel 2 e sori taki wi musu man abi a frutrow taki den leriman na ini a gemeente no e moksi a sabi fu Gado nanga den eigi denki, fu di dati ben kan meki reti-ati sma lasi den bribi. Yesus ben taki: „Efu wan sma meki taki wan fu den pikinwan disi di e bribi na ini mi, e fadon, dan a moro betre te den e anga wan miriston na en neki, soleki a wan di den buriki musu drai lontu, èn tyari en go trowe na ini a bigi se meki a sungu.”—Mateyus 18:6.
Te wan Kresten e trow nanga wan sma di no e anbegi Yehovah
13, 14. San ben de wan fu den seryusu sondu di Maleaki ben poti wi prakseri na tapu?
13 Fu vers 10 te go miti a lasti vers, Maleaki kapitel 2 e taki moro krin fu a bedrigi fasi fa sma e tyari densrefi. Maleaki e poti prakseri na tu difrenti fasi fa wi kan tyari wisrefi, èn a gebroiki a wortu „bedrigifasi” doronomo te a e taki fu den tu fasi disi. Luku fosi taki, bifo Maleaki e bigin gi rai, dan a e poti den aksi disi: „Wi alamala no abi wán papa? A no wán Gado meki wi? Fu san ede wi e handri na wan bedrigi fasi nanga makandra, fu di wi no e lespeki a frubontu fu wi fositen tata?” Ne na ini vers 11, a e taki moro fara dati a bedrigifasi fu Israel ben sori taki den no ben lespeki „a santafasi fu Yehovah”. San ben de a seryusu sondu di den ben e du? A vers dati e sori krin san na wan fu den sondu di den ben e du: Den ben „teki na umapikin fu wan freimde gado leki wan trowmisi”.
14 Fu taki en tra fasi, wan tu Israelsma ben trow nanga sma di no ben anbegi Yehovah. Den Israelsma disi ben de memre fu wan nâsi di ben gi densrefi abra na Yehovah. Den wortu na ini den vers na fesi e yepi wi fu frustan fu san ede disi ben de so wan seryusu sondu. Vers 10 e taki dati den Israelsma dati ben abi wán papa. Disi no ben wani taki Yakob (di ben kisi a nen Israel) noso Abraham, èn a no ben wani taki Adam tu. Maleaki 1:6 e sori taki Yehovah ben de a „wán papa”. Den Israelsma ben abi wan matifasi nanga Yehovah, fu di den ben de makandra nanga en na ini a frubontu di a ben meki nanga den tata fu den. Wán fu den wet fu a frubontu dati ben de: „Èn yu no musu trow nanga den. Yu no musu gi yu umapikin na en manpikin, èn yu no musu teki na umapikin fu en gi yu manpikin.”—Deuteronomium 7:3.
15. (a) Fa son sma ben kan pruberi fu taki bun fu a trow di den e trow nanga trawan di no e anbegi Yehovah? (b) San Yehovah e taigi sma di wani trow?
15 Son sma na ini a ten disi, kande sa denki: ’A sma di mi lobi, a abi switi fasi trutru. Mi denki taki a sa teki a tru anbegi bakaten.’ A denki disi e sori taki Gado abi leti fu gi wi a warskow disi: „Na ati e kori sma moro leki iniwan tra sani èn a pori srefisrefi. Suma kan sabi en?” (Yeremia 17:9) Maleaki 2:12 e sori fa Gado e si a trow di sma e trow nanga trawan di no e anbegi en: „Yehovah sa koti puru ibriwan sma di e du dati.” Sobun, Kresten e kisi a seryusu rai fu trow „soso na ini Masra” (1 Korentesma 7:39). Na ini a Kresten seti, wan bribiman no e „koti puru” fu di a trow nanga wan sma di no e anbegi Yehovah. Ma efu a trowpatna fu en no e teki a tru anbegi, dan san o pasa nanga en te Gado sa tyari wan kaba kon na a grontapu disi dyonsro?—Psalm 37:37, 38.
Te wan sma e handri na wan takru fasi nanga en trowpatna
16, 17. Fa wan tu sma ben handri na wan bedrigi fasi?
16 Maleaki e go doro fu taki fu wan tra fasi fa sma e bedrigi trawan: dati na te wan sma e handri na wan takru fasi nanga en trowpatna, spesrutu te a e broko trow nanga en fu pikinpikin sani ede. Vers 14 fu kapitel 2 e taki: „Yehovah srefi gi kotoigi na mindri yu nanga a wefi fu yu yongu yari, nanga suma yu handri na wan bedrigi fasi, aladi a de yu patna èn a wefi fu yu frubontu.” Fu di Dyu masra ben handri na wan takru fasi nanga a wefi fu den, meki na altari fu Yehovah ben kon ’lai nanga watra-ai’ (Maleaki 2:13). Den man dati ben e broko trow aladi wet no ben e gi pasi fu du dati. Den no ben handri bun, fu di den ben e gowe libi a wefi fu den yongu yari, kande fu trow nanga heiden uma, noso nanga uma di ben de moro yongu. Èn den kruka priester ben e gi pasi taki a sani disi ben e pasa! Ma Maleaki 2:16 e fruklari: „’A no lobi brokotrow kwetikweti’, Yehovah, a Gado fu Israel, taki.” Bakaten, Yesus ben sori taki soso te hurudu de ini a tori, dan a sma di no ben suku fu tyari prati kon na ini a trowlibi, de fri fu trow baka.—Mateyus 19:9.
17 Poti prakseri na den wortu fu Maleaki, èn luku fa den e gi wi deki-ati fu handri bun nanga trawan. A e taki fu „yu patna èn a wefi fu yu frubontu”. Ibriwan fu den man disi ben trow nanga wan uma di ben e anbegi Yehovah tu, wan uma fu Israel, èn den ben teki na uma leki wan lobi mati èn leki wan trowpatna. Kande den ben trow di den ben yongu, èn sensi a ten dati furu yari ben pasa èn den ben kon moro owru. Toku dati no ben wani taki dati den ben kan broko a frubontu di den ben sroto di den trow nanga makandra.
18. Fa a rai fu Maleaki di abi fu du nanga bedrigifasi, e fiti na ini a ten disi?
18 A rai di abi fu du nanga den tori dati, e fiti bun tu na ini a ten disi. A de wan sari sani taki son sma no wani teki a rai di Gado e gi wi fu trow soso na ini Masra. A de wan sari sani sosrefi taki son sma no e tan du muiti fu meki a trowlibi fu den waka bun. Na presi fu dati, den sma disi e kon nanga ala sortu reide èn den e du wan sani di Gado no lobi kwetikweti. Den e broko trow na wan fasi di no e kruderi nanga Bijbel, soso fu man trow nanga wan tra sma. Den sma di e du den sani disi e „meki Yehovah kon weri”. Na ini a ten fu Maleaki, den sma di no ben gi yesi na a rai fu Gado ben abi a deki-ati srefi fu taki dati Yehovah no ben abi leti fu denki so. Fu taki en leti, den sma ben taki: „Pe a Gado fu retidu de?” Dati na trutru wan takru denki! Meki wi no fadon na ini a trapu dati.—Maleaki 2:17.
19. Fa masra nanga wefi kan kisi a yeye fu Gado?
19 Wan sani di e gi deki-ati, na taki Maleaki e sori taki wan tu masra na ini a ten fu en no ben handri na wan bedrigi fasi nanga a wefi fu den. Den masra disi ’ben abi san ben tan abra fu Gado en santa yeye’ (vers 15). A bun fu si taki na ini a ten disi na organisâsi fu Gado lai nanga den sortu mansma disi di e ’gi grani na a wefi fu den’ (1 Petrus 3:7). Den no e fon a wefi fu den èn den no e kosi en. Boiti dati, den no e dwengi en fu abi seks nanga den na wan fasi di no fiti srefisrefi, èn den no e gi a wefi fu den syen fu di den e prei nanga den firi fu tra uma, noso fu di den e luku doti seks tori. Na organisâsi fu Yehovah breiti tu fu abi furu Kresten wefi di de getrow na Gado èn na den wet fu en. Ala den mansma nanga umasma disi sabi san Gado no lobi kwetikweti, èn den e denki èn e handri akruderi a sabi dati. Tan du leki den sma disi fu di yu ’e gi yesi na Gado leki tiriman’, èn yu sa kisi en santa yeye bogobogo.—Tori fu den Apostel 5:29.
20. Sortu ten e doro gi a heri libisma famiri?
20 Dyonsro, Yehovah sa krutu a heri grontapu disi. Ibri sma sa musu gi frantwortu fu den sani di a e bribi èn fu den sani di a e du. „Ibriwan fu wi sa gi Gado frantwortu fu ensrefi” (Romesma 14:12). Sobun, wan prenspari aksi de now: Suma sa pasa a dei fu Yehovah? A lastiwan fu den dri artikel disi sa taki fu a prenspari tori disi.
Yu kan tyari disi kon na krin?
• Fu san ede Yehovah ben krutu den priester na ini Israel?
• Fu san ede den markitiki fu Gado no hei tumusi gi libisma?
• Fu san ede wi musu luku bun te wi e gi sma leri na ini a ten disi?
• San na den tu spesrutu sani di Yehovah ben krutu?
[Aksi fu a tori disi]
[Prenki na tapu bladzijde 15]
Na ini a ten fu Maleaki, den priester ben kisi krutu fu di den no ben du sani soleki fa Yehovah ben wani
[Prenki na tapu bladzijde 16]
Wi musu luku bun taki wi no e leri sma wi eigi denki, ma wi musu leri sma den pasi fu Yehovah
[Prenki na tapu bladzijde 18]
Yehovah ben krutu den Israelsma di ben e broko trow nanga den wefi fu den fu pikinpikin sani ede, soso fu man trow nanga heiden uma
[Prenki na tapu bladzijde 18]
Kresten na ini a ten disi e lespeki a frubontu di den sroto nanga a trowpatna fu den