Yu sabi san a e kostu?

YESUS KRESTES ben fruteri den disipel fu en taki den o man kisi têgo libi, ma a ben gi den deki-ati sosrefi fu kon sabi san a wani taki fu de wan Kresten. A ben sori san disi wani taki di a ben aksi den: „Suma fu unu di wani bow wan toren no e go sidon fosi fu teri den kostu [noso, fu kon sabi san a o kostu], fu si efu a abi nofo fu kaba en?” (Lukas 14:28) Sortu kostu Yesus ben abi na prakseri?

Ala Kresten e kisi tesi, èn sonwan fu den tesi disi hebi fu tru (Psalm 34:19; Mateyus 10:36). Fu dati ede, wi musu de na ai èn srekasreka na yeye sei, so taki wi no skreki te wi miti nanga gens noso nanga tra problema. Wi musu sabi kaba na fesi taki den tesi disi na den kostu di wi musu pai fu di wi de wan disipel fu Krestes. Èn wi musu sabi taki a pai di wi sa kisi, fu di wi no sa sondu moro èn no sa dede moro, na wan pai di warti moro ala sani di a seti fu sani disi kan gi wi. Iya, efu wi e tan dini Yehovah, dan nowan sani di Gado e gi pasi fu pasa, no dede srefi, kan du wi wan ogri di sa tan fu alaten.—2 Korentesma 4:16-18; Filipisma 3:8.

Fa wi bribi kan kon so tranga? We, ibri leisi te wi e teki wan bun bosroiti noso e hori wisrefi steifi na Kresten gronprakseri, dan a bribi fu wi e kisi moro krakti. Èn dati e pasa tu te wi e du wan sani di e kruderi nanga a wani fu Gado, spesrutu te sma e dwengi wi fu du sani tra fasi leki san wi wani du. A bribi fu wi sa kon moro tranga te wisrefi e si den blesi di Yehovah e gi wi fu di wi de getrow wi heri libi langa. Na so wan fasi, wi e waka baka na eksempre fu sma leki Yesus, den fosi disipel fu en, èn ala den man nanga uma di ben abi tranga bribi. Den sma disi ben sori alaten na ini den difrenti pisi ten fu a historia taki den sabi ’san a e kostu’ fu dini Gado. —Markus 1:16-20; Hebrewsma 11:4, 7, 17, 24, 25, 32-38.