„Kon na mi, . . . èn mi sa gi unu krakti baka”

A bigi gro e meki taki moro konmakandra-presi musu bow esi-esi

„KON na mi, . . . èn mi sa gi unu krakti baka”, na so Yesus Krestes ben taki (Mateyus 11:28). A kari disi di na Edeman fu a Kresten gemeente e gi wi, na wan kari di e prisiri wi ati srefisrefi! (Efeisesma 5:23) Te wi e sidon denki fu den wortu dati, dan a no de fu taki dati wi e kisi moro warderi gi wi yeye brada nanga sisa na den Kresten konmakandra. A demakandra di wi abi nanga den na wan prenspari sani di e gi wi krakti baka. A no de fu taki dati wi e agri nanga a psalm skrifiman di ben singi: „O bun èn o switi a de te brada e libi makandra na ini wánfasi!”—Psalm 133:1.

Fu tru, a demakandra di wi abi nanga den wan di wi e miti na den konmakandra fu anbegi, na a moro bun demakandra di wi kan abi. Den konmakandra switi tu èn den bun gi wi na yeye fasi. Fu dati ede wan yongu Kresten ben taki nanga leti: „Heri dei mi de na skoro, èn dati de leki wan hebi gi mi. Ma den konmakandra de gi mi leki wan kowrupe na ini wan bigi drei sabana. Drape mi e kisi krakti baka fu man pasa a tra dei na skoro.” Wan yongu uma fu Nigeria ben taki: „Mi kon si taki krosibei demakandra nanga sma di lobi Yehovah, e yepi mi fu tan krosibei fu en.”

Na ini ibri libimakandra, a Kownukondre konmakandra-presi fu Yehovah Kotoigi de a moro prenspari presi fu tru anbegi. Na furu presi, konmakandra e hori na a konmakandra-presi disi, tu leisi noso moro na ini wan wiki. Bijbelstudenti e kisi a deki-ati fu bigin go na den konmakandra so esi leki a man, bika drape den kan nyan bun fu demakandra di kan gi den krakti baka.—Hebrewsma 10:24, 25.

 Wan sani di de tranga fanowdu

Ma te yu luku en bun, dan a no ala Yehovah Kotoigi abi wan bun konmakandra-presi di den kan gebroiki. A gro di a nomru fu Kownukondre preikiman e gro esi-esi na heri grontapu, meki taki a nowtu e kon moro bigi. Te now ete a de so taki dusundusun konmakandra-presi de fanowdu, spesrutu na ini pôti kondre.—Yesaya 54:2; 60:22.

Fu eksempre: Na ini a mamafoto fu a Demokrasia Republiek Kongo yu ben abi soso tin konmakandra-presi gi moro leki 290 gemeente. A ben de tranga fanowdu fu bow furu konmakandra-presi na ini a kondre dati. Na ini Angola yu abi furu gemeente di e hori den konmakandra fu den na dorosei, fu di nofo konmakandra-presi no de. Na so a de tu na ini furu tra kondre.

Fu dati ede den ben bigin meki muiti fu sensi 1999, fu seti sani fu yepi bow Kownukondre konmakandra-presi na ini den pôti kondre. Kotoigi di abi ondrofeni na ini a bow-wroko ben gi densrefi fu yepi nanga a wroko disi. A de wan bigi deki-ati fu si sortu tumusi moi bakapisi a abi te den brada nanga sisa di e tan na ini den difrenti kontren dati de klariklari fu horibaka gi a wroko. Na a tra sei, a abi winimarki gi den Kotoigi fu a kontren tu, fu di den e leri fa fu du difrenti wroko. Ala den sani disi e meki taki konmakandra-presi kan bow na kondre pe den de trutru fanowdu.

Fu dati ede yepi e gi na so wan fasi, taki den konmakandra-presi disi e bow leki fa den sma fu a kontren drape gwenti fu bow, èn nanga den sani di den gwenti gebroiki. A marki na fu meki konmakandra-presi pe den de tranga fanowdu. Ma a prenspari sosrefi fu seti bun programa fu tan sorgu gi den na wan bun fasi; programa di fiti a kontren dati pe den bow a konmakandra-presi.—2 Korentesma 8:14, 15.

Bakapisi di e gi deki-ati

San ben de a bakapisi fu a muiti di ben du fu meki den presi disi pe wi kan go fu anbegi? Na a bigin pisi fu a yari 2001, wan boskopu fu Malawi ben taki: „San du kaba na ini a kondre disi, moi srefisrefi. Na ini den tu mun di e kon, wi sa klari ete wan tu Kownukondre konmakandra-presi” (Fowtow 1 nanga 2). Na ini den mun di pasa no so langa ete, dan friwani wrokoman ben man fu klari wan tu konmakandra-presi na ini Togo (Fowtow 3). A bun wroko di friwani wrokoman du nanga den heri ati, e meki taki nownowde bun konmakandra-presi e bow na ini Meksikow, Brasyon, èn na tra kondre fu grontapu.

Difrenti gemeente kon si taki te den bow wan konmakandra-presi, dan den sma fu a birti e kon frustan taki Yehovah Koitoigi o tan drape. A gersi leki son sma ben e tweifri fu moksi densrefi nanga den Kotoigi, fu di den no ben abi wan bun presi fu anbegi. A gemeente Nafisi na ini Malawi e taki: „Now di wi abi wan bun Kownukondre konmakandra-presi, a de wan bigi kotoigi gi sma. Dati  meki a kon moro makriki gi wi fu bigin oso-bijbelstudie.”

Na ini a ten di pasa, sma ben e lafu den memre fu a gemeente Krake na ini Benin, fu di a presi pe den ben e kon makandra fosi ben gersi wan owruten sani, te yu ben sa teki en gersi nanga son wan fu den kerki na ini a kontren dati (Fowtow 4). Now a gemeente abi wan moi nyun konmakandra-presi. A no meki nanga tumusi furu pranpran, ma a e gi grani na a tru anbegi na wan warti fasi (Fowtow 5). A gemeente disi ben abi 34 Kownukondre preikiman èn na den konmakandra te sonde den ben gwenti fu abi sowan 73 sma. Ma di den ben gi a konmakandra-presi abra na Yehovah, dan 651 sma ben de drape. Furu fu den sma disi ben de sma fu a foto srefi, èn den ben fruwondru trutru fu si taki den  Kotoigi ben man bow wan konmakandra-presi na ini so wan syatu pisi ten. Nanga den sani di pasa na prakseri a bijkantoro fu Zimbabwe e skrifi: „Soso wan mun baka te wan nyun Kownukondre konmakandra-presi meki, dan furu tron a nomru fu sma di e go na den konmakandra e kon tu tron so furu.”—Fowtow 6 nanga 7.

A no de fu taki dati ala den nyun konmakandra-presi disi, na presi pe dopu Kresten nanga den wan di wani kon sabi moro, kan go fu kisi krakti baka na yeye fasi. Baka di wan gemeente na ini Ukraini ben bigin hori konmakandra na ini a nyun konmakandra-presi fu den, dan wan Kotoigi fu a kontren dati ben taki: „Wi e prisiri srefisrefi. Nanga wi eigi ai wi kon si fa Yehovah e yepi a pipel fu en. Now wi kisi moro bigi frutrow taki Yehovah sa tan yepi wi.”

[Faki/Prenki na tapu bladzijde 10, 11]

Den e warderi en taki sma lobi fu gi sani

Yehovah Kotoigi breiti srefisrefi fu si taki so furu sani ben kan seti fu bow konmakandra-presi na ala sei fu grontapu pe den de tranga fanowdu. A fasi fa a nomru fu anbegiman fu Yehovah e gro nownow, e meki taki na ini furu kondre den sa abi fu bow moro nyun konmakandra-presi na ini a ten di e kon. Iya, te yu luku a heri dienstyari 2001, dan ibri wiki sowan 32 gemeente ben seti! Den gemeente dati abi presi fanowdu fu kon makandra èn fu anbegi Gado.

Ma kande wan sma e aksi ensrefi, ’Pe wi o feni a moni fu bow sani soleki nyun konmakandra-presi, spesrutu na presi pe den brada nanga sisa no abi so furu moni fu du dati?’ A piki na taki wi e kisi a yepi fu Gado èn fu sma di trutru lobi fu gi furu sani.

Yehovah e gi santa yeye na den futuboi fu en soifri leki fa a ben pramisi. Dati e meki taki den man fu ’du bun, fu de gudu ini bun wroko, fu lobi fu gi, èn fu de klariklari fu prati nanga trawan’ (1 Timoteyus 6:18). A yeye fu Gado e pusu Yehovah Kotoigi fu horibaka gi a Kownukondre preikiwroko na ala fasi. Den e du dati fu di den e gi den ten, den krakti, den e wroko tranga, èn den e yepi na difrenti tra fasi tu.

A lobi di Kotoigi nanga son tra sma lobi fu gi sani, e meki taki den e gi moni fu horibaka gi a bow-wroko so taki moro konmakandra-presi kan meki. Boiti taki den e yepi fu tapu den kostu di den eigi gemeente e meki, dan den e horibaka gi a bow-wroko na ini tra pisi fu grontapu tu.

Na ini ibri gemeente yu abi boksu pe skrifi na tapu: „Bijdrage gi a wroko di e du na heri grontapu—Mateyus 24:14.” Drape iniwan sma kan poti wan pikin moni efu a wani du dati (2 Kownu 12:9). Wi e warderi ala den sani di sma e gi, awinsi a furu noso awinsi a de pikinso nomo (Markus 12:42-44). A moni disi e gebroiki gi difrenti sani, soleki a bow fu Kownukondre konmakandra-presi. A fasi fa a moni e gebroiki e anga fu san de fanowdu. Den moni disi a no fu pai driktoro di e kisi bigi moni, fu di Yehovah Kotoigi no abi den sortu sma dati.

Ma a moni di sma e gi fu horibaka gi a wroko di wi e du na heri grontapu, e doro en marki trutru? Iya, a no de fu taki. Liberia na wan kondre di kon broko fu borgu feti ede. A bijkantoro drape e taki dati moro furu fu den Kotoigi na ini a kondre no man feni wroko èn den abi bigi moni problema. Fa a pipel fu Yehovah di de na ini den kondre disi ben sa kan feni bun presi fu anbegi? A bijkantoro e taki: „A lobi di den brada na ini tra kondre lobi fu gi sani, sa yepi wi fu pai fu a wroko. Disi na trutru wan koni seti di sreka na wan lobi-ati fasi!”

Den brada di e libi na den difrenti kondre dati e horibaka gi a wroko tu, aladi den na mofina sma. Den brada fu Sièra Leon, wan kondre na ini Afrika, e taki: „Den brada fu a kondre srefi e horibaka krinkrin gi a wroko. Nanga prisiri den e du difrenti wroko èn den e gi san den man fu gi na moni sei, fu horibaka gi a bow fu Kownukondre konmakandra-presi.”

Te fu kaba, a bow-wroko disi e gi grani na Yehovah. Nanga bigi prisiri den brada fu Liberia e taki: „A bow fu den moi presi disi fu anbegi na ini a heri kondre, sa sori sma taki a tru anbegi o tan na ini Liberia èn a sa hei a bigi nen fu wi Gado.”