A soifri retifasi fu den reti-ati sma e tiri den fu du san bun

„LIBISMA, di wan uma meki, e libi syatu èn abi furu problema”, na so Bijbel e taki (Yob 14:1). A gersi taki pina nanga sari na sani di ala libisma musu ondrofeni na ini a libi. Iya, srefi na aladei libi kan lai nanga broko-ede èn nanga bruya! San sa tyari wi na wan bun fasi pasa den tesi fu wi, so taki wi kan tan du san Gado feni bun?

Luku na eksempre fu wan guduman di nen Yob. A man disi ben libi sowan 3500 yari pasa na ini a kondre di sma e kari Arabia now. Satan ben tyari kefalek bigi rampu kon tapu a man disi di ben abi frede gi Gado. Yob ben lasi ala den meti fu en èn a ben lasi den lobi pikin fu en na ini dede. Wan syatu pisi ten baka dati, Satan ben naki Yob nanga takru sweri fu en ede te na en futu (Yob kapitel 1, 2). Yob no ben sabi fu san ede den takru sani disi ben e pasa nanga en. Toku „Yob no ben sondu nanga den mofobuba fu en” (Yob 2:10). „Teleki mi lasti bro, mi no sa libi mi soifri retifasi!”, a ben taki (Yob 27:5). Iya, a soifri retifasi fu Yob meki taki a ben man pasa den tesi fu en.

Te wan sma abi soifri retifasi, dan dati wani taki dati a e tyari ensrefi na wan trutru reti fasi. A wani taki dati a sma de sondro fowtu na ini Gado ai. Ma toku disi no wani taki dati a sma e taki sani èn e du sani na wan volmaakti fasi, bika onvolmaakti libisma no man doro den markitiki fu Gado krinkrin. Na presi fu dati, te libisma abi soifri retifasi, dan dati wani taki dati den e dini Yehovah nanga den heri ati èn taki den e tyari densrefi krinkrin akruderi a wani nanga a prakseri fu en. A fasi disi fa den e gi densrefi na Gado e pusu reti-ati sma fu du bun ala ten èn na ini ala sortu situwâsi. A fosi pisi fu a di fu 11 kapitel fu a Bijbel buku Odo e sori fa a soifri retifasi fu wi kan tyari wi na ini difrenti afersi fu a libi, èn a e sori wi sortu blesi wi sa kisi leki bakapisi fu dati. Fu dati ede, meki wi poti ala wi prakseri na den sani di skrifi na ini a kapitel dati.

Sma di e hori den soifri retifasi no e handri na wan bedrigi fasi na ini bisnis afersi

Te Kownu Salomo fu owruten Israel e poti krakti tapu a reti fasi fa sma musu tyari densrefi, dan a no e gebroiki wortu di abi fu du nanga wet, ma a e skrifi wan puwema pe a e taki: „Wan wegi di no soifri na wan sani di Yehovah no lobi kwetikweti, ma wan soifri wegiston na wan prisiri gi en” (Odo 11:1). Disi na a fosiwan fu den fo tekst na ini a buku Odo di e taki fu wegi nanga wegiston fu sori taki Yehovah wani, taki den anbegiman fu en musu handri na wan reti fasi na ini bisnis afersi.—Odo 16:11; 20:10, 23.

Te wi e si taki sma e kon gudu fu di den e  gebroiki kruktu wegi, noso bedrigifasi, dan dati kan kori wi fu du a srefi. Ma wi ben sa wani moksi wisrefi na ini kruka bisnis afersi? Wi trutru ben sa wani poti den markitiki fu Gado na wan sei di e sori wi san bun èn san ogri? Wi no sa du dati efu wi de sma di e hori den soifri retifasi. Wi e wai pasi gi bedrigifasi, bika wan soifri wegiston, noso wan soifri wegi, na wan sani di abi fu du nanga retifasi èn dati e prisiri na ati fu Yehovah.

„Koni de na den sma di abi sakafasi”

Kownu Salomo e taki moro fara: „Heimemre kon? Dan syen sa kon; ma koni de na den sma di abi sakafasi” (Odo 11:2). Wan sma di abi heimemre kan sori dati fu di a abi bigifasi, fu di a e trangayesi, noso fu di a e dyarusu. Den sani disi e tyari syen kon. Ma a de wan koni sani te wi e sori sakafasi fu di wi no e suku fu du sani di wi no abi reti na tapu. Bijbel abi heri bun eksempre di e sori taki na odo disi tru srefisrefi!

Wan dyarusu Leifisma, Korak, ben gi wan heri grupu ogri-ati sma deki-ati fu opo densrefi teige Moses nanga Aron di Yehovah ben poti leki fesiman. San ben de a bakapisi fu a heimemre fasi disi fa den ben tyari densrefi? ’Grontapu ben opo en mofo èn a ben swari’ sonwan fu den ogriman, aladi trawan, sosrefi Korak, dede nanga faya (Numeri 16:1-3, 16-35; 26:10; Deuteronomium 11:6). Disi ben de wan bigi syen trutru! Poti prakseri sosrefi na Usa di ben sori heimemre na ini san a ben du. A ben langa en anu fu grabu na ark fu a frubontu hori, so taki a no ben o fadon. Gado naki en kiri wantron (2 Samuel 6:3-8). A prenspari srefisrefi taki wi no abi heimemre!

Wan sma di abi sakafasi no e kisi syen, awinsi a e meki wan fowtu. Yob ben de wan bun eksempre na ini furu sani di a ben du, ma a no ben de volmaakti. Den tesi di a ben kisi ben tyari wan seryusu swakifasi kon na krin na ini a fasi fa a ben denki fu wan tu sani. Di Yob ben e pruberi fu krin en nen na fesi den sma di ben e krutukrutu en, dan a no ben si sani na a yoisti fasi moro. A ben meki a gersi srefi taki a ben regtfardiki moro leki Gado (Yob 35:2, 3). Fa Yehovah ben meki Yob kisi a yoisti denki baka?

Yehovah ben e taki fu grontapu, fu a se, fu hemel di lai nanga stari, fu wan tu meti, èn fu tra kefalek moi sani di a meki, èn na so fasi a ben meki Yob kon si o pikin libisma de èn o bigi Gado de (Yob kapitel 38-41). Nowan momenti Yehovah ben taki fu san ede Yob ben e pina. Dati no ben de fanowdu. Yob ben abi sakafasi. A ben sori sakafasi di a si a kefalek bigi difrenti na mindri en nanga Gado, na mindri en eigi fowtu nanga swakifasi èn a regtfardikifasi nanga makti fu Yehovah. A ben taki: „Mi e teki mi wortu baka, èn mi abi trutru berow ini saka èn asisi” (Yob 42:6). A soifri retifasi fu Yob ben meki taki a teki a piri-ai wantewante. Fa a de nanga wi? A de so taki wi leki sma di e hori den soifri retifasi, de klariklari tu fu teki piri-ai te dati de fanowdu?

Sosrefi Moses ben abi sakafasi. Di Yetro, a papa fu Moses wefi, ben si fa Moses ben e weri en skin fu yepi trawan lusu den problema fu den, dan a gi Moses wan bun rai. A taigi Moses fu meki tra getrow man yepi en fu tyari a frantwortu fu en. Fu di Moses ben e si taki a no ben man du ala sani en wawan, meki a handri nanga koni èn a teki a rai dati (Exodus 18:17-26; Numeri 12:3). Wan man di abi sakafasi no e draidrai fu aksi trawan fu yepi en tyari a frantwortu fu en. A no frede tu taki a e lasi te a e prati a wroko fu en nanga tra man di doro den markitiki fu du den  wroko dati (Numeri 11:16, 17, 26-29). Na presi fu dati, a de klariklari fu yepi den fu go na fesi na yeye fasi (1 Timoteyus 4:15). Wi no musu handri na so wan fasi tu?

’A pasi fu a sma di de sondro fowtu, na wan reti pasi’

Aladi Salomo ben sabi taki a soifri retifasi fu den reti-ati sma no e kibri den ala ten fu ogri noso rampu, toku a e taki: „A soifri retifasi fu den reti-ati sma e tiri den, ma a kruktufasi fu den sma di e handri na wan bedrigi fasi sa meki den kisi pori” (Odo 11:3). A soifri retifasi fu den reti-ati sma e tiri den trutru fu du san Gado feni bun, srefi na ini muilek situwâsi, èn a e tyari winimarki kon te fu kaba. Yob ben weigri fu libi a soifri retifasi fu en, èn Yehovah „ben blesi a kaba fu Yob baka ten moro leki a bigin fu en” (Yob 42:12). A kan de so, taki den sma di e handri na wan bedrigi fasi e kisi wini gi densrefi aladi den e meki trawan pina, èn a kan gersi srefi taki sani e waka bun gi den fu wan pisi ten. Ma te fu kaba, den eigi bedrigifasi sa meki den kisi pori.

A koni kownu e taki: „Warti sani no sa tyari wini kon na a dei fu atibron, ma regtfardikifasi srefi sa frulusu fu dede” (Odo 11:4). A de wan don sani taki wi e wroko tranga gi den sani di wi abi fanowdu, aladi wi no e poti ten na wan sei fu studeri, fu begi, fu go na den konmakandra, èn fu go na ini a preikiwroko. Na den sani disi e yepi wi fu lobi Gado moro èn fu dini en fayafaya! Awansi omeni gudu wan sma abi, toku dati no sa frulusu en na ini a bigi banawtu di e kon (Mateyus 24:21). Soso a regtfardikifasi fu den reti-ati sma sa meki taki den sa kisi frulusu (Openbaring 7:9, 14). Fu dati ede wi e handri nanga koni te wi e gi yesi na a begi fu Sefanya: „Bifo a dei fu Yehovah en atibron e kon na un tapu, suku Yehovah, ala un safri-atisma fu grontapu, di du den krutu bosroiti fu En. Suku regtfardikifasi, suku safri-atifasi” (Sefanya 2:2, 3). Na a srefi ten, meki wi du muiti fu ’gi Yehovah grani nanga den warti sani fu wi’.—Odo 3:9.

Salomo e go doro fu poti krakti na tapu o prenspari a de fu suku regtfardikifasi, fu di a e sori san o pasa nanga den wan di de sondro fowtu, èn san o pasa nanga den ogriwan: „A regtfardikifasi fu a sma di de sondro fowtu, sa meki a pasi fu en kon reti, ma na ogri sma sa fadon na ini en eigi ogridu. A regtfardikifasi fu den reti-ati sma sa frulusu den, ma den sma di e handri na wan bedrigi fasi sa fanga densrefi nanga den lostu fu den. Te wan ogri sma e dede, dan a howpu fu en e lasi gowe; èn srefi den sani di a e fruwakti fu kisi fu di a abi makti, e lasi gowe. A regtfardiki sma na a sma di e kisi frulusu fu banawtu, èn na ogri sma e kon na ini a presi fu en” (Odo 11:5-8). A sma di de sondro fowtu no e du sani di ben kan meki en fadon na ini wan trapu. A pasi fu en reti. Te fu kaba, den reti-atiwan e kisi frulusu fu banawtu. Kande a gersi taki den ogriwan abi furu makti, ma den no sa kisi frulusu kwetikweti.

„Wan foto e prisiri”

A soifri retifasi fu den reti-ati sma nanga a takrudu fu ogri sma abi krakti sosrefi tapu tra sma. A kownu fu Israel e taki: „Nanga en mofo wan sma di fadon komoto na bribi e tyari tra sma go na pori, ma nanga sabi den regtfardikiwan e kisi frulusu” (Odo 11:9). A no de fu taki dati ogri-ati lei, konkru, dotitaki nanga law takitaki, e du sma ogri. Ma wan regtfardiki sma e taki tru tori, a e gebroiki en frustan fosi a e taki wan sani, èn a e hori den firi fu tra sma na prakseri. A sabi di a sma disi abi e frulusu en, fu di en soifri retifasi e meki sma kon frustan taki den kragiman fu en na leiman.

A kownu e taki moro fara: „A bunfasi fu den regtfardiki sma e meki taki wan foto e prisiri, ma te den ogri sma e kisi pori, dan prisiri babari de” (Odo 11:10). Furu tron sma lobi regtfardiki sma, èn regtfardiki sma e gi trawan prisiri èn den e meki trawan firi koloku. Nowan sma lobi „ogri  sma” trutru. Te ogri sma e dede, dan furu tron sma no e row gi den. Sari no sa de kwetikweti te Yehovah ’sa koti den ogri sma puru fu grontapu èn te a sa hari den wan di e handri na wan bedrigi fasi puru fu en’ (Odo 2:21, 22). Na presi fu dati, sma sa prisiri fu di den sma disi no sa de moro. Ma fa a de nanga wi? A bun fu prakseri efu a fasi fa wi e tyari wisrefi e gi trawan prisiri.

„Wan foto e kisi glori”

Salomo e taki moro fara fu sortu krakti den reti-atiwan nanga den ogriwan abi tapu wan libimakandra: „A blesi fu den reti-ati sma e meki taki wan foto e kisi glori, ma a mofo fu den ogri sma e broko en puru.”—Odo 11:11.

Sma di e tyari densrefi na wan reti fasi, e tyari vrede nanga koloku kon èn den e gi den tra sma na ini a foto deki-ati fu tron moro betre sma. Na so fasi, wan foto e kisi glori; a e go na fesi. Sma di e panya ogri-ati lei èn sosrefi sma di e taki hati sani nanga fowtu sani, e tyari dyugudyugu, sari, pratifasi, nanga trobi kon. A sani dati e pasa spesrutu te den ogri sma disi na barinen sma noso sma di abi makti. So wan foto lai nanga bruyafasi, nanga krukafasi, nanga sma di no e tyari densrefi na wan reti fasi moro èn kande sani e go na baka tu na ekonomia sei.

Wi kan fiti a gronprakseri na ini Odo 11:11 sosrefi na a pipel fu Yehovah di e kon makandra na ini den gemeente fu den di wi kan agersi nanga foto. Wan gemeente pe yu abi sma di tranga na yeye fasi, sma di e hori den soifri retifasi, na wan gemeente nanga koloku sma, sma di de fayafaya èn di de klariklari fu yepi trawan. Na so fasi den e gi Gado grani. Yehovah e blesi a gemeente, èn a e go na fesi na yeye fasi. Son leisi a kan de so, taki wan tu sma no lobi fa sani e waka na ini a gemeente èn den e kragi fu den sani dati. Kande den sma disi e krutu trawan èn den no e taki bun fu san trawan e du. Den sortu sma disi de leki wan „takru rutu” di kan panya go na ala sei èn den kan pori tra sma di no ben abi problema fosi nanga den sani dati (Hebrewsma 12:15). Furu tron den sma dati wani moro makti nanga biginen. Den e panya konkru tori taki sma na ini a gemeente, noso den owruman, no e handri na wan reti fasi, èn taki den e desko tra sma fu di den de fu tra ras, èn so moro fara. A mofo fu den trutru kan tyari pratifasi kon na ini a gemeente. Wi no musu tapu wi yesi gi a takitaki fu den? Wi no musu du muiti fu de sma di tranga na yeye fasi èn di e suku fu tyari vrede nanga wánfasi kon na ini a gemeente?

Salomo e go doro, èn a e taki: „A sma di e mankeri ati, wisiwasi a sma na en sei, ma a man di abi bigi koni fu si sani krin, na a sma di e tan tiri. A sma di e waka lontu leki ogri-ati leiman, e tyari frutrow takimakandra kon na krin, ma a sma di de getrow na ini yeye, e tapu wan tori” (Odo 11:12, 13).

Wan sma di „e mankeri ati”, noso di no abi a koni fu man si sani krin, e du furu ogri! Sowan sma e tan konkru go doro, taki a e bigin fruteri ogri-ati lei fu trawan srefi, noso taki a e bigin afrontu wan sma. Den owruman musu de gaw fu tapu a sortu takitaki disi di abi wan takru krakti tapu trawan. A sma di abi a koni fu man si sani krin, de heri tra fasi leki „a sma di e mankeri ati”, fu di a sabi o ten a musu tan tiri. Na presi fu taki wan tori di wan sma fruteri en, a no e taki fu a tori nanga trawan. Wan sma di abi a koni fu man si sani krin, de „getrow na ini yeye”, fu di a sabi taki a kan du furu ogri te a no e luku bun fa a e gebroiki en tongo. A lobi den sma di abi a srefi bribi leki en, èn fu dati ede a no e tyari frutrow tori kon na krin di kan gi den problema. Den sma disi di e hori den soifri retifasi na wan blesi trutru gi a gemeente!

Fu yepi wi fu waka a pasi fu den sma di de sondro fowtu, Yehovah gi wi bun furu yeye  nyanyan di „a getrow èn koni srafu” e sreka gi wi (Mateyus 24:45). Ibriwan fu wi e kisi yepi tu fu Kresten owruman na ini den gemeente fu wi di wi kan agersi nanga foto (Efeisesma 4:11-13). Wi de nanga tangi na ati trutru gi den owruman disi, bika „te no wan sma no de fu teki fesi na wan koni fasi, dan a pipel sa fadon; ma frulusu e kon te bun furu raiman de” (Odo 11:14). Awinsi san e pasa, meki wi abi a fasti bosroiti fu ’waka na ini wi soifri retifasi’.—Psalm 26:1.

[Prenspari pisi na tapu bladzijde 26]

A de wan don sani fu wroko tranga gi den sani di wi abi fanowdu, aladi wi no e poti ten na wan sei gi theokrasia afersi!

[Prenki na tapu bladzijde 24]

Yob ben hori en soifri retifasi, èn Yehovah ben blesi en

[Prenki na tapu bladzijde 25]

Usa dede fu di a ben sori heimemre