Aksi fu leisiman

A ben sa de wan koni sani gi wan tru Kresten fu go na wan beri noso wan trow di e hori na ini wan kerki?

Yehovah no e feni en bun te wi e moksi wisrefi nanga awinsi sortu fasi fu falsi anbegi èn fu dati ede wi musu tan farawe fu den sani dati (2 Korentesma 6:14-17; Openbaring 18:4). Te wan beri e hori na ini wan kerki, dan a kan taki a kerki-fesiman e hori wan preek di e tyari sani kon na fesi di no e kruderi nanga Bijbel; sani soleki a sili di no e dede èn taki ala sma di libi bun e go na hemel. A kan sosrefi dati ala sma di drape musu meki wan kroisi, noso taki den musu begi te a priester noso kerki-fesiman e du dati. Na so a kan de tu nanga wan trow di e hori na ini wan kerki. A kan taki den e begi èn taki den du wan heri ipi tra sani di no e kruderi nanga den leri fu Bijbel. Efu wan Kresten ben sa de na mindri wan heri ipi sma di e du falsi anbegi, dan a kan de wan hebi sani gi en fu no moksi ensrefi nanga falsi anbegi. A no de wan koni sani srefisrefi fu poti wisrefi na ini den sortu problema dati!

Ma fa a de te wan Kresten e firi taki a musu go na a beri noso a trow di e hori na ini wan kerki? Fu eksempre, wan masra di no de na bribi kan gi en Kresten wefi deki-ati fu go nanga en na so wan okasi. Fa fu dati dan? A sisa kan go nanga en sondro fu teki prati? Kande a wefi kan bosroiti fu go nanga en masra fu di a hori den winsi fu en masra na prakseri, aladi a sisa teki a fasti bosroiti fu no teki prati na nowan fu den sani di den sma sa du na ini a kerki. Na a tra sei, a kan taki a teki a bosroiti fu no go, fu di a sabi taki a no sa makriki gi en fu sidon drape sondro fu du wan sani, èn taki dati kan meki taki a poti den gronprakseri fu Gado na wan sei. Ensrefi o abi fu bosroiti san a o du. A no de fu taki dati a wani abi wan korostu ati nanga wan krin konsensi.—1 Timoteyus 1:19.

Awinsi fa a no fa, a ben o bun gi a Kresten uma efu a fruteri en masra taki en konsensi no e gi en primisi fu teki prati na nowan fu den kerki gwenti, noso taki a no o man singi nowan singi makandra nanga den sma fu a kerki, noso boigi en ede te den e begi. Den sani di a sisa taigi en masra, kan meki a masra teki a bosroiti te fu kaba taki furu fruferi sani kan pasa efu en wefi ben sa go nanga en. A kan taki a teki a bosroiti fu go en wawan fu di a lobi en wefi, fu di a abi lespeki gi san en wefi e bribi, noso fu di a abi a winsi fu no du iniwan sani di kan gi en wefi syen. Ma efu a feni taki en wefi musu go nanga en nomonomo, dan a sisa kan go kande sondro taki a e teki prati na den sani di den sma e du.

San wi no musu frigiti na a krakti di a kan abi tapu tra brada nanga sisa fu wi, te den si taki wi e go sidon nanga tra sma na ini wan kerki. Yu denki taki a ben sa kan trobi a konsensi fu son wan fu den? Yu denki taki a sani dati kan meki den kon swaki na ini a fasi fa den e kakafutu gi afkodrei? Paulus e gi wi leki deki-ati: „Sorgu taki unu sabi bun san na den moro prenspari sani, so taki unu kan de sondro fowtu èn taki unu no e meki tra sma fadon na a dei fu Krestes.”—Filipisma 1:10.

Efu a de so taki a beri noso a trow-oso abi fu du nanga wan krosibei famiri, dan a kwinsi kan kon fu a sei fu famiriman sosrefi. Awinsi fa a no fa, wan Kresten musu luku a tori finifini fosi a teki wan bosroiti. Na son okasi a kan bosroiti taki a no sa de wan problema gi en efu a ben sa go na wan beri noso wan trow na ini wan kerki, sondro fu teki prati na den sani di den sma e du. Ma a musu hori na prakseri tu taki sani kan waka na so wan fasi taki a kan kisi moro takru bakapisi te a go, leki taki a kisi bun bakapisi. A kan tyari a konsensi fu en, noso di fu trawan kon na ini problema. Awinsi sortu bosroiti a e teki, wan Kresten musu sorgu taki a bosroiti fu en no tapu en fu tan hori wan krin konsensi na fesi Gado èn na fesi libisma.