Den frekti denki fu Tertullianus

’WAN Kresten nanga wan filosofiaman e kruderi nanga makandra oiti? Oiti wan sma di e drai a waarheid e kruderi nanga wan sma di e meki a waarheid kon soifri baka èn e leri trawan srefi fu du dati? Fa heiskoro nanga Kerki e kruderi nanga makandra?’ Tertullianus, wan skrifiman fu a di fu tu yarihondro èn a di fu dri yarihondro G.T. ben poti den dangra aksi disi. Sma kon sabi en leki „wan fu den sma di ben skrifi moro furu sani fu a historia fu a Kerki èn fu den kerkileri di ben de na ini a ten fu en”. A ben skrifi fu pikinmoro ibri sani di ben abi fu du nanga kerki.

Kande sma ben sabi Tertullianus moro bun fu di a ben abi frekti denki di ben meki taki a ben taki sani di no ben e kruderi nanga makandra. A ben taki sani soleki: „Fu dati ede, Gado na a moro bigi wan, ma A pikin.” „Awansi fa no fa, sma musu bribi na ini [a dede fu a Manpikin fu Gado], fu di a tori dati no tru srefisrefi.” „Sma ben beri [Yesus], èn a wiki baka; a sani disi tru srefisrefi, fu di a no kan.”

Ma a no den sani di Tertullianus ben e taki wawan, ben sori leki den no e kruderi nanga makandra. Tertullianus ben skrifi sani nanga a marki fu horibaka gi a waarheid, gi a soifrifasi fu a kerki, èn gi den leri fu a kerki. Ma fu taki en leti, a ben meki sma kon bribi sani di no ben e kruderi srefisrefi nanga den tru leri fu Bijbel. A ben abi a moro bigi krakti tapu Krestenhèit nanga wan leri di tra skrifiman gebroiki bakaten fu meki a Dri-wánfasi leri. Fu kan sabi moro fini fa dati du kon, dan meki wi luku fosi suma ben de Tertullianus.

„A e hari sma prakseri ala ten”

Sma sabi pikinso nomo fu a libi fu Tertullianus. Furu sabiman e agri taki a ben gebore na wan sani fu 160 G.T. na ini a foto Carthago, na Noord Afrika. Soleki fa a sori, dan a ben kisi bun leri èn a ben sabi den prenspari filosofiaman fu a ten fu en heri bun. A de krin fu si taki a sani di a ben lobi fu Krestendom, na taki trutru Kresten ben de klariklari fu dede gi a bribi fu den. Tertullianus ben poti wan aksi di ben abi fu du nanga a dede di Kresten de klariklari fu dede gi a bribi fu den. A ben taki: „Iniwan sma di e aksi ensrefi fu san ede Kresten de klariklari fu dede gi a bribi fu den, no ben sa du muiti fu kon sabi fu san ede den e du dati? Suma di kon sabi dati, no e teki den leri fu wi?”

Baka di Tertullianus ben dopu kon tron wan sokari Kresten, dan a bigin skrifi ala sortu tori di ben abi fu du nanga kerki-afersi. A ben abi a koni fu taki sani krin sondro fu gebroiki tumusi furu wortu, èn den sani dati ben e gi sma fu lafu sosrefi. A buku The Fathers of the Church (Den kerkitata) e taki fu en: „A ben abi wan koni di tra sabiman fu kerkitori no ben abi. A ben e hari a prakseri fu sma ala ten.” Wan sabiman ben taki: „Aladi wi no man frustan furu fu den sani di Tertullianus ben taki, toku a ben man gebroiki wortu na wan koni fasi. Fu dati ede sma kan frustan den lafutori fu en moro makriki, aladi den sani di a ben suku fu leri sma ben de moro muilek fu frustan. Kande na fu dati ede meki sma furu tron e gebroiki syatu pisi nomo fu den sani di a ben skrifi.”

A e opo taki gi Krestensma

A moro pôpi buku di Tertullianus ben skrifi na a buku Apology (Pardon). A buku disi e horibaka gi Krestensma, èn soleki fa sma e taki, dan a buku disi abi moro bigi krakti tapu libisma leki iniwan tra buku di ben skrifi nanga a srefi marki dati. A buku disi ben skrifi na wan ten di ipi-ipi sma ben gwenti fu feti nanga Kresten, fu di den sma dati ben e bribi sani di no ben de tru. Tertullianus ben opo taki  gi den Kresten disi èn a krutu a fasi fa sma ben handri nanga den sma disi di no ben du nowan ogri. A ben taki: „[Gensman], unu feni taki den Kresten e meki taki ibri rampu pasa na ini a libimakandra èn taki den de frantwortu gi ala takru sani di e pasa nanga a pipel. . . . Efu a Nijl-liba no e lon pasa abra en syoro fu kan gi den gron watra, efu a weer no e kenki, efu wan gronseki de, wan angriten, wan siki di e kiri ipi-ipi sma, dan wantewante sma e bari: ’Fringi den Kresten gi den lew!’”

Aladi Kresten furu tron ben e kisi porinen taki den no ben de getrow na a tirimakti, toku Tertullianus ben pruberi fu sori sma taki den ben de den moro getrow sma na ini a kownukondre. Baka di a ben taigi den gensman fu en taki trawan ben pruberi difrenti leisi kaba fu puru a tirimakti, dan a memre den taki den sma di ben e suku fu du dati no ben de Kresten, ma den ben de heiden. Tertullianus ben sori den gensman disi taki te sma ben e kiri Kresten, dan a tirimakti srefi ben de a lasiman.

Tra buku fu Tertullianus ben abi fu du nanga a Kresten libi. Fu gi wan eksempre, a ben skrifi wan tori di a ben kari On the Shows. A tori disi ben e sori Kresten taki den no ben musu go na son presi pe den sma ben e meki prisiri. Den no ben musu go tu na heiden wega, noso na stadion pe sma ben e du sani di no fiti. Soleki fa a sori, dan sma di ben tron Kresten no so langa ete, no ben si en leki wan ogri fu go na den heiden wega, baka di den ben komoto fu wan konmakandra pe den ben kisi Bijbel leri. Fu di Tertullianus ben wani taki den Kresten disi poti prakseri na a tori dati, meki a skrifi: „A no bun kwetikweti fu go na a kerki fu Didibri, baka di yu komoto fu Gado kerki. Dati na a srefi leki te unu e du leki meti, baka di unu kaba du sani di abi fu du nanga yeye afersi.” Tertullianus ben taki: „Te yu feni taki wan sani no bun fu du, dan yu no musu arki a sani dati tu.”

A e drai a waarheid aladi a e opo taki gi en

Tertullianus ben skrifi wan pisi tori di ben nen Against Praxeas. A ben skrifi a tori disi fu sori taki a no ben agri nanga den sani di wan man di nen Praxeas ben du. A ben bigin a tori nanga den wortu disi: „Didibri strei na difrenti fasi nanga a waarheid èn a gens en na difrenti fasi sosrefi. Son leisi a e horibaka gi a waarheid fu di a wani pori en.” Tertullianus no e taki soifri suma na a man di nen Praxeas na ini a pisi tori, ma a e krutu den sani di a man disi e leri sma fu Gado nanga Krestes. A ben e si Praxeas leki wan sma di Satan e gebroiki na wan kibrifasi fu pruberi pori Krestendom.

Wan prenspari tori di ben e dangra den sokari Kresten na a ten dati, na a difrenti na mindri Gado nanga Krestes. Wan tu fu den Kresten, spesrutu den wan di ben de fu Grikikondre, no ben man bribi taki wán Gado nomo de, èn taki Yesus na a Frulusuman. Praxeas ben pruberi fu lusu a problema disi, fu di a ben leri sma taki Yesus ben de wan tra fasi nomo fa a Tata ben sori ensrefi. A ben leri sma sosrefi taki nowan difrenti no de na mindri a Tata nanga a Manpikin. A leri disi di sma sabi leki a Dri-wánfasi leri, e taki dati Gado meki sma kon sabi en leki „a Tata nanga yepi fu den sani di a meki èn nanga yepi fu a Wet di a gi libisma. A leri e taki moro fara taki Gado meki sma kon sabi en tu leki a Manpikin nanga yepi fu Yesus Krestes, èn leki a Santa Yeye baka di Krestes opo go na hemel.”

Tertullianus ben meki sma kon sabi taki den Buku fu Bijbel ben sori krin san na a difrenti na mindri a Tata nanga a Manpikin. Baka di a ben kari  1 Korentesma 15:27, 28, dan a taki fu den tekst disi: „A sma di saka ala den sani na [a Manpikin] ondro, èn a Sma di ben kisi ala sani na en ondro musu fu de tu difrenti Sma.” Tertullianus ben poti prakseri na den wortu di Yesus srefi ben taki: „A Tata bigi moro mi” (Yohanes 14:28). A ben gebroiki bijbeltekst fu den Hebrew Buku fu Bijbel, soleki Psalm 8:5, fu sori fa Bijbel e taki dati a Manpikin de „pikinso moro lagi” leki Gado. „Na so fasi a Tata e difrenti fu a Manpikin, fu di a bigi moro leki a Manpikin”, na so Tertullianus ben tapu fu taki. „Neleki fa a Mekiman na wán sma, èn a sma di a meki na wan tra sma, na so a Sma di e seni na wán sma, èn a Sma di A e seni na wan tra sma. Sosrefi a Sma di e meki na wán sma, èn a sma nanga yepi fu suma wan sani e meki na wan tra sma.”

Tertullianus ben feni taki a Manpikin lagi moro leki a Tata. Ma di a ben pruberi fu krutu a Dri-wánfasi leri, dan a „go moro fara leki den sani di skrifi” (1 Korentesma 4:6). Fu di Tertullianus ben meki a fowtu fu sori nanga yepi fu wan tra leri taki Yesus na wan gado, meki a kon nanga a leri di e taki dati dri difrenti sma de na ini wán skin. A gebroiki a leri disi fu sori sma taki Gado, en Manpikin, nanga a santa yeye na dri difrenti sma di ben de wán gado. Na so fasi Tertullianus ben tron a fosi sma di ben gebroiki a Latijn wortu di wani taki „Dri-wánfasi”, fu taki fu a Tata, a Manpikin, nanga a santa yeye.

Luku bun nanga grontapu filosofia

Pe Tertullianus ben komoto nanga a leri di e taki dati „dri difrenti sma de na ini wán skin”? Wi e feni a piki tapu na aksi disi te wi e luku a denki di a ben abi fu filosofia. Agen Tertullianus ben du sani di e sori leki den no e kruderi nanga makandra. A ben kari filosofia „’den leri’ fu libisma èn ’fu ogri yeye’”. A no ben frede fu krutu sma di ben e gebroiki filosofia fu horibaka gi Kresten tru tori. „Wi musu tapu fu pruberi fu pori Krestendom nanga yepi fu den leri fu den Stoiki, nanga den di fu Plato, èn nanga sani di no e kruderi nanga makandra”, na so a ben taki. Ma Tertullianus srefi ben gebroiki furu fu den grontapu filosofia disi te den ben kruderi nanga en eigi idea.—Kolosesma 2:8.

Wan buku e taki: „Den kerki leri di abi fu du nanga a Dri-wánfasi leri ben meki nanga yepi fu a fasi fa Griki ben e denki èn ben e si sani.” Sosrefi, a buku The Theology of Tertullian (Den kerkileri fu Tertullianus) e taki: „A leri disi ben de wan moksipatu fu idea nanga wortu di abi fu du nanga wet èn nanga filosofia. Nanga yepi fu a leri disi Tertullianus meki wan sortu Dri-wánfasi leri, èn aladi a leri dati no ben kruderi nanga Bijbel, toku sma gebroiki en fu meki a Dri-wánfasi leri di den pristeri baka ten na a Kerki Konmakandra fu Nisea.” Leki bakapisi fu dati, a leri fu Tertullianus, namku a leri di e taki dati dri difrenti sma na wán gado, ben de a moro prenspari leri di meki taki Krestenhèit abi so furu falsi leri.

Tertullianus ben feni taki trawan ben e pori a waarheid aladi den ben e pruberi fu horibaka gi en. Ma a switi fu a tori de taki, ensrefi meki a srefi fowtu dati, fu di a moksi a waarheid di Gado meki sma skrifi na ini Bijbel nanga a filosofia fu libisma. Fu dati ede, meki wi gi yesi na a warskow di Bijbel e gi fu no „poti prakseri na wortu nanga leri di e kori sma èn di e kon fu ogri yeye”.—1 Timoteyus 4:1.

[Prenki na tapu bladzijde 29, 30]

Tertullianus ben krutu filosofia denki, ma a gebroiki den fu horibaka gi en eigi idea

[Sma di abi a reti fu a prenki]

Bladzijde 29 nanga 30: © Cliché Bibliothèque nationale de France, Paris

[Prenki na tapu bladzijde 31]

Tru Kresten e luku bun fu no moksi Bijbel waarheid nanga filosofia fu libisma