Sori lobi bun-ati gi den wan di de na nowtu

„Sori lobi bun-ati . . . gi makandra.”​—SAKARIA 7:9.

1, 2. (a) Fu san ede wi musu sori lobi bun-ati gi trawan? (b) Sortu aksi wi sa poti prakseri na tapu?

A WORTU fu Yehovah Gado e gi wi deki-ati fu lobi „lobi bun-ati” (Mika 6:8, futuwortu). Gado Wortu e fruteri wi sosrefi fu san ede wi musu du dati. Wi musu du so fu di „wan man di abi lobi bun-ati e tyari wini kon gi en eigi sili” (Odo 11:17). A sani disi tru srefisrefi! Te wi e sori lobi bun-ati, dan dati sa meki taki wi e kisi wan tranga banti nanga sma. Leki bakapisi fu dati, wi sa abi tru mati di e horibaka gi wi ala ten, èn dati na trutru wan kefalek moi winimarki!—Odo 18:24.

² Boiti dati, Bijbel e fruteri wi: „A sma di e suku regtfardikifasi nanga lobi bun-ati sa kisi libi” (Odo 21:21). Iya, te wi e du muiti fu sori lobi bun-ati gi trawan, dan Gado sa lobi wi èn disi e gi wi okasi fu kisi moro blesi, sosrefi têgo libi. Ma fa wi kan sori lobi bun-ati gi trawan? Gi suma wi musu sori dati? A de so taki lobi bun-ati e difrenti fu a bun-ati noso a switifasi di libisma e sori gi trawan?

Bun-ati nanga lobi bun-ati

3. Fa lobi bun-ati e difrenti fu bun-ati?

³ A bun-ati di libisma e sori gi trawan no de a srefi leki lobi bun-ati. Fu eksempre, furu tron te wan sma e sori bun-ati noso switifasi gi trawan,  dan a e du bun gi den sma dati sondro taki a abi wan tranga banti nanga den. Ma te wi e sori lobi bun-ati gi wan sma, dan wi e kweki wan banti nanga a sma dati fu di wi lobi a sma. Te Bijbel e taki fu sma di ben e sori lobi bun-ati gi makandra, dan den tori dati kan abi fu du nanga sma di ben abi wan banti kaba nanga makandra (Genesis 20:13; 2 Samuel 3:8; 16:17). Den tori disi kan abi fu du sosrefi nanga sma di tron mati fu makandra fu di a wan ben du bun gi a trawan (Yosua 2:1, 12-14; 1 Samuel 15:6; 2 Samuel 10:1, 2). Fu man si a difrenti disi moro krin, dan meki wi agersi tu Bijbel eksempre nanga makandra, fu si fa libisma sori bun-ati nanga lobi bun-ati gi trawan. Wi sa luku wán eksempre fu bun-ati, èn wán fu lobi bun-ati.

4, 5. Fa den tu Bijbel eksempre e sori a difrenti na mindri bun-ati nanga lobi bun-ati?

⁴ Wi kan si wán eksempre fu bun-ati te wi e luku a tori fu wan grupu sma di ben ondrofeni brokosipi, èn na apostel Paulus ben de wan fu den sma disi. A watra ben wasi den go na a syoro fu na èilanti Malta (Tori fu den Apostel 27:37–28:1). Aladi den sma fu na èilanti no ben de fruplekti fu yepi a grupu fu sma disi èn aladi den no ben sabi den srefisrefi, toku den du bun gi den èn den „ben abi tumusi aparti switifasi” gi den (Tori fu den Apostel 28:2, 7). Den sma fu Malta ben du bun gi trawan, ma den ben du so a wan-enkri leisi dati nomo. Boiti dati, den no ben sabi den sma disi srefisrefi. Fu dati ede, disi ben de bun-ati.

⁵ Meki wi agersi disi now nanga a bun di Kownu David ben du gi Mefibosèt, a manpikin fu en mati Yonatan. David ben taigi Mefibosèt: „Yusrefi sa nyan brede na mi tafra doronomo.” Fu fruklari fu san ede a ben seti a sani disi, dan David taigi en: „Trutru mi sa sori lobi bun-ati gi yu fu yu papa Yonatan ede” (2 Samuel 9:6, 7, 13). Fu di David ben tan du bun gi Mefibosèt, meki Bijbel e taki nanga reti taki a ben sori lobi bun-ati. Disi no ben de bun-ati nomo, bika a bun di a ben du ben sori taki a ben tan getrow na a mati fu en (1 Samuel 18:3; 20:15, 42). Na ini a ten disi, den futuboi fu Gado e sori bun-ati tu gi trawan. Ma den e tan sori lobi bun-ati gi den Kresten brada nanga sisa fu den di Gado feni bun.—Mateyus 5:45; Galasiasma 6:10.

6. Sortu prenspari sani Gado Wortu e tyari kon na krin fu a lobi bun-ati di libisma e sori gi trawan?

⁶ Fu man frustan moro bun san na lobi bun-ati, dan wi sa taki syatu fu dri Bijbel tori di e taki fu dati. Na ini den eksempre disi wi sa si taki libisma e sori lobi bun-ati (1) fu di den e gi sma a yepi di den abi fanowdu, (2) fu di densrefi wani dati, èn (3) den e sori lobi bun-ati spesrutu gi sma di de na nowtu. Boiti dati, den tori disi e sori wi fa wi kan sori lobi bun-ati gi trawan na ini a ten disi.

Wan papa e sori lobi bun-ati

7. San a futuboi fu Abraham ben fruteri Betuel nanga Laban, èn sortu prenspari sani a futuboi ben wani sabi?

⁷ Genesis 24:28-67 e go doro nanga a tori fu a futuboi fu Abraham di a fosi artikel ben taki fu en. Baka di a ben miti nanga Rebeka, dan a kisi kari fu go na a oso fu en papa, Betuel (vers 28-32). Drape a futuboi fruteri finifini taki a ben musu suku wan wefi gi a manpikin fu Abraham (vers 33-47). A poti krakti na tapu taki a ben si a bun bakapisi di a ben abi te so fara, leki wan marki fu Yehovah, „di ben tyari mi na tapu a yoisti pasi fu man teki na umapikin fu a brada fu mi masra gi en manpikin” (vers 48). A futuboi fruteri Betuel nanga en manpikin Laban na wan seryusu fasi san ben pasa. A no de fu taki dati a ben wani overtoigi den taki Yehovah ben e blesi a sani di a ben kon du. Te fu kaba, a futuboi taki: „Efu trutru yu e sori lobi bun-ati gi mi masra èn efu yu de getrow na en, dan taigi mi; ma efu dati no de so, dan taigi mi, so taki mi kan drai go na a reti-anusei noso na a kruktu-anusei.”—Vers 49.

8. San Betuel du di a futuboi ben kon fu teki Rebeka?

⁸ Yehovah ben sori lobi bun-ati kaba gi Abraham (Genesis 24:12, 14, 27). Betuel ben o de klariklari fu sori lobi bun-ati tu? A ben o meki Rebeka go nanga a futuboi fu Abraham? A ben  o sori lobi bun-ati neleki fa Yehovah ben du dati, so taki sani ben o waka soleki fa Abraham ben wani dati? Noso a ben o de fu soso taki a futuboi ben waka so wan langa pasi? A ben musu de wan bigi trowstu gi a futuboi fu Abraham di a yere Laban nanga Betuel taki: „A sani disi komoto fu Yehovah” (vers 50). Den ben si taki Yehovah ben e tiri na afersi, èn den agri wantewante nanga a bosroiti fu en. Baka dati, Betuel sori a lobi bun-ati fu en fu di a taki moro fara: „Luku, Rebeka de na yu fesi. Teki en èn gowe, èn meki a tron a wefi fu a manpikin fu yu masra, soleki fa Yehovah taki” (vers 51). Sondro taki wan sma ben dwengi en, Rebeka gowe nanga a futuboi fu Abraham, èn syatu baka dati a tron a lobi wefi fu Isak.—Vers 49, 52-58, 67.

Wan manpikin e sori lobi bun-ati

9, 10. (a) San Yakob ben aksi en manpikin Yosef fu du gi en? (b) Fa Yosef ben sori lobi bun-ati gi en papa?

⁹ Yakob, a granpikin fu Abraham, ben kisi wini tu fu a lobi bun-ati di sma ben sori en. Soleki fa Genesis kapitel 47 e fruteri, dan Yakob ben e libi na ini Egepte na a ten dati, èn „a ten ben kon krosibei taki [a] ben musu dede” (vers 27-29). A ben broko en ede fu di a no ben o dede na ini a kondre di Gado ben pramisi Abraham (Genesis 15:18; 35:10, 12; 49:29-32). Ma Yakob no ben wani fu sma beri en na ini Egepte, èn fu dati ede a seti sani so taki den ben o tyari en dedeskin go na a kondre Kanan. Suma ben o de a moro bun sma di ben sa man sorgu taki sani ben o waka soleki fa a ben winsi? A no en manpikin Yosef di ben abi furu makti?

¹⁰ A tori e taki: „Sobun, [Yakob] kari en manpikin Yosef èn a taigi en: ’We, efu mi feni bun na ini yu ai, . . .yu musu sori lobi bun-ati gi mi èn yu musu de getrow na mi (Grantangi, no beri mi na ini Egepte.) Èn mi musu didon nanga den tata fu mi, èn yu musu tyari mi komoto fu Egepte èn yu musu beri mi na ini a grebi fu den’” (Genesis 47:29, 30). Yosef pramisi fu du san en papa ben aksi en fu du, èn wan syatu pisi ten baka dati Yakob dede. Yosef nanga den tra manpikin fu Yakob tyari a dedeskin „go na ini a kondre Kanan èn den beri en na ini wan ston-olo tapu a pisi gron fu Makpela, a pisi gron di Abraham ben bai” (Genesis 50:5-8, 12-14). Na so fasi Yosef ben sori lobi bun-ati gi en papa.

Wan uma e sori lobi bun-ati gi a mama fu en masra

11, 12. (a) Fa Rut ben sori lobi bun-ati gi Naomi? (b) Fa a lobi bun-ati di Rut ben sori „na ini a lasti kefal”, ben bun moro leki a lobi bun-ati di a ben sori „na ini a fosi kefal”?

¹¹ A buku Rut e fruteri wi fa a weduwe Naomi ben kisi wini fu a lobi bun-ati di Rut, a wefi fu en manpikin, ben sori en. Rut ben de weduwe tu. Di Naomi bosroiti fu drai go baka na Betlehem na ini Yuda, dan Rut sori lobi bun-ati gi en èn a taki nanga wan fasti bosroiti: „Pe yu e go, na drape mi sa go, èn pe yu e tan te neti, na drape mi sa tan te neti. Yu pipel sa de mi pipel, èn yu Gado mi Gado” (Rut 1:16). Bakaten, Rut sori lobi bun-ati di a meki Boas kon sabi taki a ben de klariklari fu trow nanga en. Boas ben de wan famiriman fu Naomi èn a ben grani kaba * (Deuteronomium 25:5, 6; Rut 3:6-9). A ben taigi Rut: „Yu sori a lobi bun-ati fu yu moro bun na ini a lasti kefal leki na ini a fosi kefal, fu di yu no lon na baka den yonkuman, efu na pôtiman noso guduman.”—Rut 3:10.

¹² Di Rut ben sori lobi bun-ati „na ini a fosi kefal”, dan dati ben abi fu du nanga a ten di a ben gowe libi a pipel fu en fu tan nanga Naomi (Rut 1:14; 2:11). Srefi a lobi bun-ati dati di a ben sori, no ben bun so leki a lobi bun-ati di a ben sori „na ini a lasti kefal”, namku di a ben de klariklari fu trow nanga Boas. Now Rut ben o man gi Naomi wan erfgenaam, bika Naomi ben owru tumusi fu kisi pikin. Boas nanga Rut trow, èn bakaten di Rut kisi wan pikin, dan den uma bari nanga tranga sten: „Naomi kisi wan  manpikin” (Rut 4:14, 17). Rut ben de wan „tumusi bun uma” trutru, èn fu dati ede Yehovah ben gi en a kefalek moi grani fu tron wan afo fu Yesus Krestes.—Rut 2:12; 3:11; 4:18-22; Mateyus 1:1, 5, 6.

Den e sori lobi bun-ati nanga yepi fu den sani di den e du

13. Fa Betuel, Yosef, nanga Rut ben sori a lobi bun-ati fu den?

¹³ Yu si fa Betuel, Yosef, nanga Rut ben sori a lobi bun-ati fu den? Den no ben taki switi wortu nomo, ma den ben du spesrutu sani sosrefi fu yepi trawan. Boiti taki Betuel ben taki: „Luku Rebeka”, a ben „seni Rebeka go” sosrefi (Genesis 24:51, 59). Boiti taki Yosef ben taigi Yakob: „Misrefi sa du soleki fa yu taki”, en nanga den brada fu en ben du den sani gi Yakob tu, „soifri soleki fa a ben komanderi den” (Genesis 47:30; 50:12, 13). Boiti taki Rut ben taki: „Pe yu e go, na drape mi sa go”, a gowe libi a pipel fu en tu èn a go nanga Naomi, èn „den ala tu teki waka teleki den doro na Betlehem” (Rut 1:16, 19). Di den ben de na ini Yuda, dan agen Rut du „ala san a mama fu en masra ben taigi en fu du” (Rut 3:6). Iya, Rut ben sori lobi bun-ati nanga yepi fu den sani di a ben e du, soleki fa trawan ben e du dati tu.

14. (a) Sortu sani den futuboi fu Gado na ini a ten disi e du fu sori lobi bun-ati? (b) Sortu sani Kresten na ini yu birti e du fu sori lobi bun-ati?

¹⁴ A e gi prisiri fu si fa den futuboi fu Gado na ini a ten disi e tan sori lobi bun-ati gi trawan fu di den e du sani gi den. Fu eksempre, prakseri den wan di e tan trowstu tra bribiman di siki, di brokosaka, noso di abi bigi sari (Odo 12:25). Prakseri den someni Kotoigi fu Yehovah di e tan meki muiti fu go teki den granisma nanga oto fu tyari den go na den gemeente konmakandra di e hori ibri wiki na a Kownukondre zaal. Anna abi 82 yari èn a abi artritis (wan bonyosiki di e meki taki anu nanga kindi e sweri èn e hati srefisrefi). Furu sma e agri nanga en te a e taki: „A tyari di den e tyari mi go na ala den konmakandra, na wan blesi fu Yehovah. Mi e taigi en tangi nanga mi heri ati taki a gi mi den lobi brada nanga sisa disi.” Yu e du den sortu sani disi na ini yu gemeente? (1 Yohanes 3:17, 18) Efu dati de so, dan yu kan abi a dyaranti taki den brada nanga sisa fu yu e warderi a lobi bun-ati fu yu trutru.

Den e sori lobi bun-ati fu di densrefi wani dati

15. San den dri Bijbel tori e fruteri wi moro fara fu lobi bun-ati?

¹⁵ Den Bijbel tori di wi luku, e sori wi tu taki sma no e sori lobi bun-ati fu di trawan dwengi den, ma den e sori dati fu di densrefi wani dati. Betuel ben wani wroko makandra nanga a futuboi fu Abraham, èn Rebeka ben wani dati tu (Genesis 24:51, 58). Yosef ben sori a lobi bun-ati fu en sondro taki sma ben dwengi en (Genesis 50:4, 5). Rut „ben de nomonomo fu go nanga [Naomi]” (Rut 1:18). Di Naomi taigi Rut fu go na Boas, dan lobi bun-ati meki taki a Moab-uma disi taki: „Ala san yu e taigi mi, mi sa du.”—Rut 3:1-5.

16, 17. Fu san ede a bun fu poti prakseri na a fasi fa Betuel, Yosef, nanga Rut ben sori lobi bun-ati? San ben meki taki den sori lobi bun-ati?

 ¹⁶ A bun fu poti prakseri spesrutu na a fasi fa Betuel, Yosef, nanga Rut ben sori lobi bun-ati, bika Abraham, Yakob, nanga Naomi no ben man du noti fu dwengi den. Te yu luku en bun, dan Betuel no ben de fruplekti fu seni en umapikin gowe. A ben kan taigi a futuboi fu Abraham disi nomo: ’Nôno, mi no wani seni mi umapikin gowe fu go tan so fara, bika a e wroko bun tranga gi mi’ (Genesis 24:18-20). Sosrefi, Yosef ben kan bosroiti fu du san a papa fu en ben aksi en fu du èn a ben kan bosroiti tu fu no du dati, bika Yakob no ben o de na libi moro èn a no ben o man dwengi Yosef fu hori en wortu. Naomi srefi ben taigi Rut taki a ben kan tan na ini Moab efu a ben wani dati (Rut 1:8). Boiti dati, efu Rut ben wani, dan a ben kan trow nanga wan fu „den yonkuman” na presi fu a grani Boas.

¹⁷ Betuel, Yosef, nanga Rut ben de klariklari fu sori lobi bun-ati; na ati fu den ben gi den fu du so. Den ben feni taki den ben musu sori lobi bun-ati gi den sma di den ben abi wan banti nanga den, neleki fa Kownu David ben feni bakaten taki a ben musu sori lobi bun-ati gi Mefibosèt.

18. (a) Nanga sortu denki Kresten owruman e „wei na ipi”? (b) San wan owruman ben taki fu a yepi di a e gi den brada nanga sisa fu en?

¹⁸ Na ini a ten disi, a de so ete taki a pipel fu Gado èn sosrefi den skapuman fu na ipi fu Gado e sori lobi bun-ati gi trawan (Psalm 110:3; 1 Tesalonikasma 5:12). Den owruman disi sabi taki den musu du san Gado e fruwakti fu den leki owruman (Tori fu den Apostel 20:28). Den e go na sma oso fu gi den deki-ati èn den e du tra sani fu sori lobi bun-ati gi a gemeente. Awansi fa a no fa, den no e du den sani disi ’nanga dwengi, ma fu di den de klariklari’ (1 Petrus 5:2). Den owruman e wei na ipi fu di den kisi a frantwortu dati èn sosrefi fu di densrefi wani dati. Den e sori lobi bun-ati gi den skapu fu Krestes fu di Krestes e fruwakti dati fu den èn fu di densrefi wani du dati (Yohanes 21:15-17). „Mi lobi fu go luku den brada nanga sisa, noso fu bel den, soso fu sori den taki mi ben e denki den”, na so wan Kresten owruman ben taki. „Te mi e yepi den brada nanga sisa, dan dati e gi mi prisiri srefisrefi!” Lobi-ati owruman na heri grontapu e agri dorodoro nanga den wortu disi.

Sori lobi bun-ati gi den wan di de na nowtu

19. Sortu prenspari sani fu lobi bun-ati den Bijbel tori na ini na artikel disi e poti krakti na tapu?

¹⁹ Den Bijbel tori di wi luku, e poti krakti na tapu sosrefi taki wi musu sori lobi bun-ati gi den wan di de na nowtu èn di no man yepi densrefi. Fu man kisi bakapikin, dan Abraham ben abi yepi fu Betuel fanowdu. Fu sorgu taki a dedeskin fu en ben tyari go na Kanan, dan Yakob ben abi yepi fanowdu fu Yosef. Èn Naomi ben abi yepi fanowdu fu Rut, fu man abi wan erfgenaam. Abraham, Yakob, nanga Naomi no ben o man tapu den nowtu dati sondro a yepi fu trawan. Na ini a ten disi, wi musu sori lobi bun-ati tu spesrutu gi den wan di de na nowtu (Odo 19:17). Wi musu du neleki a famiri-edeman Yob, di ben poti prakseri na ’den mofinawan di ben e bari fu kisi yepi, èn na a boi di no abi papa èn na ala sma di no ben abi yepiman’. A ben poti prakseri sosrefi na „a sma di ben de fu dede”. Boiti dati, Yob ben ’meki na ati fu a weduwe kon prisiri’ èn a ben ’tron ai gi den breniwan’ èn ’futu gi den malengriwan’.—Yob 29:12-15.

20, 21. Suma abi a lobi bun-ati fu wi tranga fanowdu? San na a fasti bosroiti di wi alamala musu abi?

 ²⁰ Fu taki en leti, ’mofinawan di e bari fu kisi yepi’ de na ini ibri Kresten gemeente. Kande den sma disi e firi so wan fasi fu di den no abi mati, fu di den lasi-ati, fu di den e firi taki den no warti, fu di trawan meki den fesi fadon, fu di den siki seryusu, noso fu di wan lobiwan fu den dede. Awinsi san e meki den sma disi firi so wan fasi, ala den lobi brada nanga sisa disi abi nowtu. A de fanowdu taki wi e tapu den nowtu disi, èn wi trutru sa man tapu den te wi e sori lobi bun-ati gi den brada nanga sisa disi fu di wi e tan du sani gi den fu yepi den.—1 Tesalonikasma 5:14.

²¹ Fu dati ede, meki wi tan du neleki Yehovah Gado di abi ’lobi bun-ati pasa marki’ (Exodus 34:6; Efeisesma 5:1). Wi kan du dati te wi de klariklari fu gi sma a yepi di den abi fanowdu, spesrutu den wan di de na nowtu. Wi sa gi Yehovah grani trutru, èn wi sa prisiri srefisrefi te wi e „sori lobi bun-ati . . . gi makandra”.—Sakaria 7:9.

[Futuwortu]

San yu ben sa piki?

• Fa lobi bun-ati e difrenti fu bun-ati?

• Fa Betuel, Yosef, nanga Rut ben sori lobi bun-ati?

• Nanga sortu denki wi musu sori lobi bun-ati gi trawan?

• Suma abi a lobi bun-ati fu wi tranga fanowdu?

[Aksi fu a tori disi]

[Prenki na tapu bladzijde 18]

Fa Betuel ben sori lobi bun-ati?

[Prenki na tapu bladzijde 21]

A lobi bun-ati fu Rut ben de wan blesi gi Naomi

[Prenki na tapu bladzijde 23]

Libisma e sori lobi bun-ati fu di densrefi wani dati, fu di den e gi sma a yepi di den abi fanowdu, èn den e sori lobi bun-ati gi den wan di de na nowtu