Suma na Gado?

„FURU sma e taki dati a nen fu a moro bigi krakti fu hemel nanga grontapu na Gado, èn sma e anbegi a moro bigi krakti disi sosrefi”, na so The Encyclopedia Americana e taki. A wortu „Gado” wani taki ’a moro hei makti di de’. San na a kefalek hei makti disi èn fa a de trutru?

Gado na wan krakti noso wan trutru sma? A abi wan nen? A de wan Dri-wánfasi, soleki fa furu sma e bribi? Fa wi kan leri sabi Gado? Bijbel e gi den yoisti piki tapu den aksi disi di e yepi wi frustan den tori disi krin. Fu taki en leti, Bijbel e gi wi deki-ati fu suku Gado, fu di a e taki: „A no de fara fu ibriwan fu wi.”—Tori fu den Apostel 17:27.

A de wan krakti noso wan trutru sma?

Furu sma di e bribi na ini Gado no e si en leki wan trutru sma, ma leki wan krakti. Fu eksempre, na ini son kulturu, sma e si den difrenti krakti na ini a loktu èn na grontapu leki den gado fu den. Sma ben ondrosuku a libi na grontapu èn a fasi fa hemel meki, èn leki bakapisi fu dati wan tu sma kon si taki wan sani ben musu de di meki ala sani. Toku den no wani bribi taki a sani dati na wan trutru sma.

Ma efu hemel nanga grontapu meki so kefalek bun, dan a no de so taki a sani di meki den musu abi furu koni? Pe koni de, frustan musu de tu. A sma di abi a bigi frustan dati fu meki ala sani, na Gado. Iya, Gado abi wan skin, ma a no abi wan skin neleki di fu wi. A abi wan yeye skin. Bijbel e taki: „Efu libisma skin de, dan wan yeye skin de tu” (1 Korentesma 15:44). Fu fruteri wi fa Gado de, Bijbel e taki krin: „Gado na wan Yeye” (Yohanes 4:24). A sortu libi di wan yeye abi e difrenti krinkrin fu a libi di wi abi leki libisma, èn libisma no man si wan yeye (Yohanes 1:18). Tra yeye mekisani de tu di wi no man si nanga ai. Den de engel, noso „den manpikin fu a tru Gado”.—Yob 1:6; 2:1.

Gado na wan trutru sma di nowan sma meki èn a abi yeye skin. Fu dati ede a musu de so taki a abi wan tanpresi. Bijbel e taki fu a tanpresi fu den yeye, te a e taki dati hemel na a „fasti tanpresi” fu Gado (1 Kownu 8:43). Boiti dati, a Bijbel skrifiman Paulus e taki: ’Krestes ben go na hemel srefi fu sori ensrefi na fesi a sma di de Gado, fu a bun fu wi.’—Hebrewsma 9:24.

Bijbel e gebroiki a wortu „yeye” na wan tra fasi tu. A psalm skrifiman ben e taki nanga  Gado na ini begi di a taki: „Efu yu e seni a yeye fu yu go, dan yu e meki den” (Psalm 104:30). A yeye disi a no Gado srefi, ma a de a krakti di Gado e gebroiki fu du ala san a wani. Nanga a krakti dati, Gado ben meki hemel, grontapu, nanga ala libisani (Genesis 1:2; Psalm 33:6). A yeye dati nen santa yeye. Gado ben gebroiki en santa yeye fu meki libisma skrifi a Bijbel (2 Petrus 1:20, 21). Sobun, a santa yeye na wan krakti di wi no man si, èn Gado e gebroiki a krakti dati fu du san a abi na prakseri.

Gado abi wan nen di en wawan abi

A Bijbel skrifiman Agur ben aksi: „Suma tyari a winti kon makandra na ini den tu anu fu en? Suma domru den pisi watra na ini wan dyakti? Suma opo ala den lanki fu grontapu? San na a nen fu en èn san na a nen fu en manpikin?” (Odo 30:4). Te yu luku en bun, dan Agur ben e aksi: ’Yu sabi a nen noso a famiri fu iniwan libisma di du den sani disi?’ Gado wawan abi a makti fu tiri a winti, a faya, nanga den sortu sani dati. Aladi den sani disi e sori krin taki Gado de, toku den no e taigi wi san na a nen fu Gado. Fu taki en leti, wi no ben o man sabi a nen fu Gado noiti efu Gado srefi no ben fruteri wi dati. Èn a fruteri wi a nen fu en. „Mi na Yehovah. Dati na mi nen”, na so a Mekiman e taki.—Yesaya 42:8.

Yehovah, a nen fu Gado, skrifi pikinmoro 7000 leisi na ini den Hebrew Buku fu Bijbel wawan. Yesus Krestes ben meki a nen dati bekènti na tra sma èn a ben prèise a nen fu Gado tu (Yohanes 17:6, 26). Wi kan si a nen dati na ini a lasti buku fu a Bijbel, leki wan pisi fu a wortu „Haleluyah” di wani taki „prèise Yah”. Èn „Yah” na wan fasi fu taki a nen „Yehovah” moro syatu (Openbaring 19:1-6, futuwortu). Toku furu Bijbel na ini a ten disi no e gebroiki a nen dati so furu. Furu tron den e gebroiki a wortu „MASRA” noso „GADO”, di skrifi nanga bigi letter fu sori taki den e difrenti fu den titel „Masra” nanga „Gado” di sma e gebroiki na ini aladei libi. Wan tu sabiman e taki dati a kan de so taki sma ben gebroiki Yahweh leki a nen Gado.

Fu san ede sma e gebroiki difrenti nen gi a moro bigi Sma na ini hemel nanga grontapu? A problema disi bigin hondrohondro yari na fesi di den Dyu ben kon abi a kruktubribi taki a no bun fu taki a nen fu Gado. Leki bakapisi fu  dati, den bigin gebroiki a Hebrew wortu di wani taki „Moro Hei Masra” na ibri presi pe den ben si a nen na ini den Buku fu Bijbel. Fu di a Hebrewtongo di sma ben gebroiki fu skrifi Bijbel, no ben abi den letter a, e, i, o, u, meki wi no kan sabi soifri fa Moses, David, nanga tra sma fu owruten ben taki a nen fu Gado. Ma sma e gebroiki a nen Yehovah someni hondro yari kaba. Na ini furu kondre, sma abi den eigi fasi fa den e taki a nen disi na ini a tongo fu den èn furu sma na ini a ten disi sabi a nen.—Exodus 6:2; Yesaya 26:4, Da Bijbel na ini Sranantongo.

Aladi wi no sabi soifri fa sma ben taki a nen fu Gado na ini owruten, wi sabi san a nen dati wani taki. A nen fu en wani taki „A e meki sani du kon”. Na so fasi Yehovah Gado e sori taki a de a Sma di ala ten e du san a abi na prakseri èn san a e pramisi. Soso a tru Gado, di abi a makti fu du disi, abi a reti fu tyari a nen dati.—Yesaya 55:11.

Tweifri no de, taki nanga a nen Yehovah, na Almakti Gado e meki sma si krin taki a e difrenti fu ala tra gado di sma e anbegi. Na fu dati ede a nen dati de so furu na ini a Bijbel. Aladi furu sma di e vertaal Bijbel no e poti a nen fu Gado na ini den Bijbel dati, toku Psalm 83:18 e taki krin: „Yu, di nen na Yehovah, yu wawan na a Moro Heiwan na heri grontapu.” Di Yesus Kresten ben e du en diniwroko, a ben leri den bakaman fu en: „Unu musu begi, fu dati ede, na a fasi disi: ’Wi Tata na hemel, meki yu nen kon santa.’” (Mateyus 6:9). Sobun, wi musu gebroiki a nen fu Gado te wi e begi, te wi e taki fu en, èn te wi e prèise en na fesi tra sma.

A de so taki Yesus na Gado?

Yehovah Gado e sori krin suma na a Manpikin fu en. Na Evangelietori fu Mateyus e fruteri taki baka di Yesus teki dopu, „wan sten ben komoto na hemel tu, di ben taki: ’Disi na mi Manpikin, a lobiwan, di mi feni bun’” (Mateyus 3:16, 17). Yesus Krestes na a Manpikin fu Gado.

Ma toku wan tu kerkisma e taki dati Yesus na Gado. Trawan e taki dati Gado na wan Dri-wánfasi. Akruderi a leri disi, dan „a Tata na Gado, a Manpikin na Gado, èn a Santa Yeye na Gado, èn toku den no de dri Gado ma wán Gado”. Sma e bribi taki den dri disi „e libi fu têgo” èn taki „den de a srefi sma” (The Catholic Encyclopedia). A denki disi na wan yoisti denki?

Bijbel e taki fu Yehovah: „Iya, fu ten di no skotu te ten di no skotu yu na Gado” (Psalm 90:2). A de „a Kownu fu têgo ten”—a no abi bigin èn a no abi kaba (1 Timoteyus 1:17). Ma na a tra sei, Yesus na „a fosi geborewan fu ala den sani di Gado meki”. A de „a bigin fu den sani di Gado meki” (Kolosesma 1:13-15; Openbaring 3:14). Yesus ben sori taki Gado na a Tata fu en, di a taki: „A Tata bigi moro mi” (Yohanes 14:28). Yesus ben fruteri sosrefi taki Gado ben sabi wan tu sani di en no ben sabi èn di den engel no ben sabi tu (Markus 13:32). Boiti dati, Yesus ben begi en Tata, èn a ben e taki: „No meki a wani fu mi pasa, ma yu wani” (Lukas 22:42). Nanga suma a ben e taki? A no ben e taki nanga wan Sma di moro hei leki en? Boiti dati, a no Yesus ben gi ensrefi wan opobaka, ma na Gado ben gi en wan opobaka.—Tori fu den Apostel 2:32.

Sobun, Bijbel e sori taki Yehovah na a Almakti Gado, èn Yesus na en Manpikin. Den tu sma disi no ben de a srefi sma bifo Yesus ben kon na grontapu, noso di a ben de na grontapu. Sosrefi, Yesus no ben de a srefi leki en Tata baka di a kisi wan opobaka fu go na hemel (1 Korentesma 11:3; 15:28). Soleki fa wi si, dan a santa yeye, a sokari di fu dri sma na ini a Dri-wánfasi, a no wan sma. Na presi fu dati, a de wan krakti di Gado e gebroiki fu du ala san a wani. Sobun, a leri fu a Dri-wánfasi a no wan leri fu Bijbel. * „Yehovah, wi Gado, na wán Yehovah”, na so Bijbel e taki.—Deuteronomium 6:4.

Kon leri sabi Gado moro bun

Fu man lobi Gado èn fu man anbegi en leki a wan-enkri tru Gado, dan wi musu kon sabi fa a  de trutru. Fa wi kan kon leri sabi Gado moro bun? Bijbel e taki: „Den eigifasi fu en di sma no kan si nanga ai, de krin fu si sensi di grontapu meki, bika den de fu si na ini den sani di a meki, iya, en têgo krakti nanga en makti leki Gado” (Romesma 1:20). Wán fasi fu kon leri sabi Gado moro bun, na fu luku den sani di a meki èn fu denki nanga warderi fu den sani disi.

Ma den sani di Gado meki, no e fruteri wi ala san wi musu sabi fu Gado. Fu eksempre, fu man frustan taki Gado na wan yeye, wan trutru sma nanga wan nen di en wawan abi, dan wi musu ondrosuku Bijbel. Fu taki en leti, a moro bun fasi fu kon leri sabi Gado moro bun, na fu studeri a Bijbel. Na ini den Buku fu Bijbel, Yehovah e fruteri wi moro furu sani di e meki wi kon sabi sortu Gado a de. A e tyari kon na krin tu san a abi na prakseri gi wi, èn a e leri wi den pasi fu en (Amos 3:7; 2 Timoteyus 3:16, 17). Wi kan prisiri srefisrefi taki Gado wani taki wi „kon kisi wan soifri sabi fu waarheid”, so taki wi kan kisi wini fu den sani di a seti na wan lobi-ati fasi! (1 Timoteyus 2:4) Fu dati ede, meki wi du ala muiti fu kon sabi ala san wi kan leri fu Yehovah.

[Futuwortu]

[Prenki na tapu bladzijde 5]

Gado ben gebroiki en santa yeye fu meki grontapu èn fu meki libisma skrifi a Bijbel

[Prenki na tapu bladzijde 5]

Wan sten ben komoto na hemel èn a ben taki: „Disi na mi Manpikin”

[Prenki na tapu bladzijde 7]

Yesus ben e begi Gado, a Sma di moro hei leki en

[Prenki na tapu bladzijde 7]

Yesus ben meki a nen fu Gado bekènti na tra sma

[Prenki na tapu bladzijde 7]

Wi kan kon leri sabi Gado moro bun