Wi musu kon sabi suma na Gado

A NO e naki yu ati te yu e si hemel lai nanga stari tapu wan moi neti? Yu no lobi a switi smeri fu den bromki di abi someni difrenti kloru? Yu no e prisiri te yu e yere fa den fowru e singi èn fa den wiwiri fu den bon e meki babari te wan safu winti e wai? Den bigi fisi èn sosrefi den tra sani di e libi na ini se moi trutru! Boiti dati, libisma de tu. Den abi wan konsensi, èn na edetonton fu den meki so kefalek taki sma no man frustan soifri fa a e wroko. Fa yu denki taki den kefalek moi sani disi kon de?

Son sma e bribi taki ala den sani disi kon de sondro taki wan sma meki den. Ma efu dati de so, dan fu san ede libisma e bribi na ini Gado? Fu san ede difrenti sortu sani di moksi makandra wantronso, ben o meki libisma di wani kon sabi suma na Gado?

„Libisma abi a tranga firi fu anbegi wan gado, èn dati de so awinsi den gudu noso pôti, èn awansi omeni skoroleri den kisi.” A fruklari disi e sori san Professor Alister Hardy ben si di a ben ondrosuku a tori disi èn a de fu feni na ini en buku The Spiritual Nature of Man. No so langa pasa, sma ben ondrosuku fa na edetonton e wroko èn leki bakapisi fu dati, son sabidensiman kon si taki kande libisma „meki” fu anbegi wan gado. A buku di abi leki nen Is God the Only Reality? e taki: „Sensi di libisma de na grontapu, awinsi sortu kulturu den abi, awinsi sortu pisi ten den e libi, den alamala e suku fu kon sabi san na a marki fu a libi nanga yepi fu bribi.”

Luku san wan koniman ben taki sowan 2000 yari na fesi. A ben skrifi: „Ibri oso abi wan sma di meki en, ma a sma di meki ala sani, na Gado” (Hebrewsma 3:4). Fu taki en leti, a fosi tekst fu a Bijbel e taki: „Na ini a bigin Gado ben meki hemel nanga grontapu.”—Genesis 1:1.

Ma suma na Gado? Libisma e gi difrenti piki tapu na aksi disi. Di den ben aksi Yoshi, wan tini boi na ini Yapan, suma na Gado, dan a piki: „Mi no sabi trutru suma na en. Mi na wan Budasma, èn mi no broko mi ede fu kon sabi suma na Gado.” Ma Yoshi ben erken taki furu sma e si Buda srefi leki wan gado. Nick, wan bisnisman di pasa 60 yari, e bribi na ini Gado èn a e si en leki a moro bigi krakti di de. Di wan sma ben aksi Nick san a sabi fu Gado, a tan pî wan heri pisi ten, dan a taki: „Dati na wan muilek aksi, mi mati. Mi sabi nomo taki wan Gado de.”

 Son sma „aanbegi en dini da sani disi ben meki kaba moro leki da Soema disi ben meki hem” (Romesma 1:25, Da Bijbel na ini Sranantongo). Milyunmilyun sma e anbegi den afo fu den di dede, fu di den e bribi taki den no man anbegi Gado bika a de tumusi fara fu libisma. A Hindu bribi abi furu mangado nanga umagado. Na ini a ten fu den apostel fu Yesus Krestes, sma ben anbegi difrenti gado, soleki Zeus nanga Hermes (Tori fu den Apostel 14:11, 12). Furu kerki fu Krestenhèit e leri sma taki Gado na wan Dri-wánfasi di abi Gado a Tata, Gado a Manpikin, nanga Gado a Santa Yeye.

Iya, „furu ’gado’ nanga furu ’masra’ de”, na so Bijbel e taki. Ma a e taki moro fara: „Gi wi trutru wán Gado nomo de, a Tata, di ala sani komoto na en” (1 Korentesma 8:5, 6). Iya, wán tru Gado nomo de. Ma suma na en? Fa a de? A de prenspari gi wi fu kon sabi den piki tapu den aksi disi. Yesus srefi ben taigi a Sma disi na ini begi: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). A prenspari srefisrefi fu kon sabi suma na Gado, fu di a têgo libi di wi o kisi abi fu du nanga dati.

[Prenki na tapu bladzijde 3]

Fa den sani disi kon de?

[Sma di abi a reti fu a prenki]

A bigi fisi: Courtesy of Tourism Queensland

 [Sma di abi a reti fu a prenki na tapu a kafti]

KAFTI: Index Stock Photography © 2002